Во Истанбул денеска ќе се одржи бизнис форум посветен на јакнење на економските врски и промоција на инвестициските потенцијали на Македонија пред турската деловна заедница.

Форумот се организира во рамки на проектот „Промоција на Мапа за инвестирање“, како дел од Програмата за поддршка на спроведувањето на Националната развојна стратегија, предводена од македонската влада и Генералниот секретаријат, а имплементирана во соработка со УНДП. Форумот има за цел да ги поврзе институциите и бизнис секторот од двете земји преку директни контакти и разговори насочени кон отворање нови можности за соработка и заеднички инвестиции.

На настанот е најавено учество на премиерот Христијан Мицкоски, кој ќе предводи владина делегација составена од ресорни министри од економската, енергетската и инфраструктурната област.

Од турска страна, домаќин на форумот ќе биде министерот за трговија на Република Турција, Омер Болат, а организацијата ја спроведуваат Министерството за трговија на Турција и DEİK – Советот за надворешни економски односи.

Во рамки на програмата ќе бидат претставени инвестициските потенцијали на нашата земја, а настанот ќе вклучи и официјални обраќања, тематски панели посветени на трговијата, енергетиката и инфраструктурата, како и Б2Б средби меѓу компании од двете земји, со фокус на размена на искуства и унапредување на соработката во клучните економски сектори.

Форумот е наменет за компании кои имаат интерес за проширување на своето присуство на меѓународните пазари и воспоставување нови деловни партнерства во рамки на регионалната економска соработка.

Во континуитет на ваквите активности, како дел од пошироката серија промотивни настани за позиционирање на Македонија како атрактивна инвестициска дестинација, сличен бизнис форум неодамна се одржа и во Будимпешта. Овие настани претставуваат дел од пошироките напори за промоција на економските потенцијали на земјата и привлекување нови странски инвестиции преку директна комуникација со меѓународната бизнис-заедница.

The post ПРОМОЦИЈА НА МАКЕДОНИЈА ПРЕД ТУРСКИТЕ КОМПАНИИ Форум за нови партнерства и инвестиции во Истанбул appeared first on plusinfo.mk.

Пуштена е во употреба најновата инвеститиција на „Алкалоид“, микробиолошка лабораторија вредна 3,1 милиони евра, чија цел е обезбедување највиско ниво на контрола, соопшти компанијата.

Со официјална посета на владина делегација предводена од премиерот придружуван од министерот за здравство и од директорот на Фондот за здравство, „Алкалоид“ го одбележа пуштањето на систем за конторла на микробиолошкиот квалитет на суровините, примарната амбалажа, полупроизводите и на готовоите производи.

– Со Микробиолошката лабораторија за контрола на квалитет Македонија се позиционира како регионален лидер не само во фармацевтската микробиологија, туку и во целокупната контрола на лекови. Проектот е целосно финансиран и реализиран од ’Алкалоид’ АД, со сопствени ресурси, интерна експертиза и со инвестиција од околу 3,1 милиони евра реализирана во период од речиси две години, што е јасна потврда за визијата, знаењето и за долгорочната посветеност на компанијата на врвниот квалитет – изјави Живко Мукаетов, Генерален директор и Претседател на Управниот одбор на „Алкалоид“ АД Скопје.

Се работи за простор од близу 700 квадратни мтери во новата лабораторија кадешто се спроведуваат активности како што се мониторинг на просториите и површините, мониторинг на системите за производство и дистрибуција на прочистена фармацевтска вода, мониторинг на компримираниот воздух, верификација на чистењето на процесната опрема, тестови за стерилност, идентификација на микроорганизми, тестирање на антимикробната ефикасност, потврда за ефикасноста на дезинфициенсите, како и други анализи, во согласност со регулаторните барања.

Премиерот Христијан Мицкоски изјави дека му е особена чест и задоволство што , како што вели, работи коишто има во најсовремените светски фармацевтски компании и индустрии денес ги гледаме во „Алкалоид“ во Скопје.

– Горди сме што се македонски. Благодарност до Генералниот директор и до сите вработени кои денеска стручно ни објаснија со што сè се занимава оваа компанија и можам со задоволство да констатирам дека над 3.000 вработени ја градат својата иднина во „Алкалоид“. Извозното портфолио на компанијата, кое е повеќе од две третини од производството, позитивно влијае во насока на економската состојба на државата и зголемувањето на БДП и на индустриското производство, па затоа ние како Влада секогаш ќе поддржуваме успешни македонски приказни бидејќи нема подобра промоција за државата од ваква успешна приказна надвор од границите – изјави премиерот.

Новата Микробиолошка лабораторија за контрола на квалитет на „Алкалоид“ АД Скопје има капацитет да изведува околу 20.000 различни микробиолошки анализи годишно, a во неа работи 21 високостручно лице.

Одделот за контрола на квалитет носи стратешка одговорност за усогласеност со меѓународните регулаторни стандарди во фармацијата, а со него раководи д-р Ѓорѓи Петрушевски, доктор по хемиски науки со значаен научен придонес (33 објавени научни трудови во меѓународни списанија со фактор на влијание и повеќе од 500 цитати) и со експертиза на полето на фармацевтската хемија и фармацевтските системи за квалитет.

The post (ГАЛЕРИЈА) 📷 ПУШТЕНА ВО УПОТРЕБА НОВАТА МИКРОБИОЛОШКА ЛАБОРАТОРИЈА ЗА КВАЛИТЕТ НА „АЛКАЛОИД“ Инвестиција вредна 3,1 милиони евра носи висока контрола на производите appeared first on plusinfo.mk.

Кандидатот на коалицијата ВРЕДИ за градоначалник на Општина Чаир, Изет Меџити на денешната прес-конференција информираше за уште една нова инвестиција која веќе е финализирана – улицата Максут Садик.

– Уште една голема инвестиција-улицата Максут Садик е успешно завршена, а токму на овој ден започнува изградбата на модерниот кампус на Универзитетот „Мајка Тереза“. Улицата Максут Садик е веќе целосно завршена и подготвена да им служи на граѓаните, инвестиција реализирана според највисоките стандарди на квалитет, безбедност и функционалност. Со вредност од околу 220.000 евра, овој проект претставува уште еден значаен чекор во модернизацијата на урбаната инфраструктура на Чаир, рече Меџити.

Според него, оваа улица што ги поврзува населбите на Чаир со булеварот Никола Карев и Универзитетот „Мајка Тереза“, е претворена во значајна артерија која го олеснува движењето.

– Благодарение на блиската соработка помеѓу Владата и Општина Чаир, оваа улица што ги поврзува маалата на Чаир со булеварот Никола Карев и Универзитетот „Мајка Тереза“ се трансформираше во важна развојна артерија, што го олеснува сообраќајот и ја зголемува урбанистичката и економската вредност на овој дел од градот. Симболиката е извонредна: на истиот ден кога завршува улицата што води кон знаењето, започнува изградбата на модерниот кампус на Универзитетот „Мајка Тереза“ – историска инвестиција од 40 милиони евра – истакна кандидатот на коалицијата ВРЕДИ за градоначалник на Општина Чаир, Изет Меџити.

The post ЧАИР ДОБИВА МОДЕРНА ИНФРАСТРУКТУРА На улицата Максут Садик започнува модерниот кампус на Универзитетот „Мајка Тереза“ appeared first on plusinfo.mk.

Инфлацијата во државата бележи континуирано намалување, а економскиот раст останува стабилен — порача премиерот и лидер на ВМРО-ДПМНЕ, Христијан Мицкоски, на денешниот Бизнис форум што се одржа во Струмица.

– Еве трет месец по ред имаме инфлација која од 4,9 отсто дојде до 4 отсто и очекуваме во следниот период да продолжи да се намалува. Тоа е добра вест за граѓаните, бидејќи ќе имаат подобар стандард и поквалитетен живот – изјави Мицкоски.

Тој посочи дека очекува растот на бруто-домашниот производ (БДП) во вториот квартал да достигне околу 7,8 проценти, што, како што нагласи, ќе влијае позитивно врз буџетскиот дефицит.

– Буџетската консолидација ќе продолжи и годинава очекуваме дефицит под 4 проценти. Нашата цел е да дојдеме под 3,5 проценти, како што е стандард во европските земји – рече премиерот.

Мицкоски категорично истакна дека нема да има зголемување на даноците, ниту на ДДВ-то, кое ќе остане на сегашното ниво од 18 проценти.

– Иако има притисоци за зголемување на старосната граница за пензија, ние донесовме закон со кој пензионерите можат да бидат повторно ангажирани и да плаќаат придонеси. Единствениот данок што ќе се зголеми е оној на профит, од 15 проценти, но само за компании кои ги исполнуваат условите поставени од ОЕЦД – нагласи тој.

Премиерот подвлече дека Владата ќе води стабилна макроекономска и промакедонска политика, и дека интеграцијата во Европската Унија останува цел, но не по секоја цена.

– Ќе ги направиме сите неопходни реформи, ќе ја спроведеме нашата агенда за развој, но повеќе нема да прифаќаме уцени и диктати како во минатото. Македонија ќе чекори стабилно, со свои одлуки – истакна Мицкоски.

Мицкоски објави дека се во тек преговори со САД за намалување на трговските тарифи за околу 80 производи, што ќе ја зголеми конкурентноста на домашните компании.

– Имаме голем извоз на автобуси преку поранешен „Ван Хол“ во вредност од 250 милиони долари. Ако договорот се реализира, извозот може да достигне една милијарда долари, а се планира и изградба на две нови фабрики за автобуси, од кои една може да се отвори во Струмица – најави премиерот.

Тој истакна и дека земјата е на праг на реализација на големи инфраструктурни проекти во соработка со Велика Британија.

– Веќе имаме индикативна понуда и очекуваме до есента следната година да почне реализацијата. Во годините што следуваат, се очекува инвестициски бран меѓу 4 и 5 милијарди евра – посочи Мицкоски.

Пред присутните стопанственици зборуваше и кандидатот за градоначалник на Струмица од ВМРО-ДПМНЕ, Петар Јанков, кој најави формирање на економско-социјален совет.

– Нашата задача е да му излеземе во пресрет на бизнис секторот, а не да бидеме административна пречка. Ќе бидеме партнер, не пречка – истакна Јанков.

На форумот присуствуваа и вицепремиерот и министер за транспорт и врски Александар Николоски, министерката за финансии Гордана Димитриеска-Кочоска, министерот за земјоделство Цветан Трипуновски, заменик-министерот за економија Марјан Ристески и поранешниот министер за финансии Зоран Ставревски, кои одговараа на прашања од бизнис заедницата.

The post ГОЛЕМИ ПРОМЕНИ ВО ЕКОНОМИЈАТА Мицкоски ветува стабилност, раст и без нови даноци appeared first on plusinfo.mk.