инвестиција Archives - plusinfo.mk

ШЕСТ МОДЕРНИ ОПЕРАЦИОНИ САЛИ ВО „МАЈКА ТЕРЕЗА“ Мицкоски најави уште нови четири и нов проект во „8 Септември“

плусинфо — Mon, 06 Apr 2026 10:42:28 +0000

На Комплексот клиники „Мајка Тереза“ во Скопје денеска беа пуштени во употреба шест операциони сали како дел од проектот за реконструкција на вкупно десет сали, со вкупна вредност од 282 милиони денари. Реконструираните сали се на Одделот за трауматологија при клиниката за ТОАРИЛУЦ, две на Клиниката за урологија и две на Клиниката за детска хирургија.

Директорот на ТОАРИЛУЦ, Игор Мерџановски, изјави дека со реконструкцијата ќе се добие оперативен блок според светски стандарди, што ќе овозможи подобри услови за работа на медицинскиот кадар.

– Ќе добиеме оперативен блок со светски стандарди така што нашите млади доктори специјализанти кои ги праќаме на обука во странство ќе може да работат во истите услови во кои работат светските доктори. Тоа значи дека се качуваме со новите методи, апаратури и оперативни сали на ниво на светската мапа на здравствениот систем – изјави Мерџановски.

Тој посочи дека реконструкцијата се реализира во две фази со цел да не се прекине пружањето на здравствена заштита во терцијарното здравство и да не се создаде дополнителен притисок врз листите за чекање.

На настанот присуствуваше и премиерот Христијан Мицкоски, заедно со министерот за здравство Азир Алиу, кои најавија дека во наредните месеци ќе бидат пуштени и преостанатите четири операциони сали.

– За неколку месеци отсега треба да бидат пуштени уште четири сали така што го закружуваме процесот од 10 современи модерни операциони сали. Од почетокот на летото се надевам дека ќе бидеме во можност да видиме уште еден завршен проект во болницата „8 Септември“, каде исто така ќе имаме модерни сали и со тоа ќе бидеме практично држава број еден во регионот кога станува збор за ваков тип на операциони сали. Во здравството има многу работи што треба да се прават, но потребни се и фундаментални промени како во менталитетот на политичарите, така и во менталитетот на вработените. Здравството е еден од врвните приоритети на Владата – рече Мицкоски.

The post ШЕСТ МОДЕРНИ ОПЕРАЦИОНИ САЛИ ВО „МАЈКА ТЕРЕЗА“ Мицкоски најави уште нови четири и нов проект во „8 Септември“ appeared first on plusinfo.mk.

НЕМА ДА ДОЗВОЛИМЕ ФИРМАТА НА КОНТРОВЕРЗНИОТ ДАКА ДА ГРАДИ ВО МАКЕДОНИЈА Ќе ја спречиме, иако ги исполнува сите услови, вели Петрушевски

плусинфо — Wed, 01 Apr 2026 10:56:09 +0000

Прорускиот бизнис-партнер на Зоран Заев, Миодраг Давидовиќ – Дака, е човек со контроверзно минато, кој е на црната листа на САД поради сомнежи за корупција и злоупотреба на влијание на Балканот, вклучително и Македонија – рече денеска на прес-конференција пратеникот од ВМРО-ДПМНЕ Бране Петрушевски.

– Дака стана познат за македонската јавност во времето на Заев, кога во 2020-тата година, излегоа аудио снимки за тоа како Зоран Заев земал пари за да се види со Дака и да направат некаков бизнис.

Во аудио снимката која пред неколку години излезе на социјалните мрежи, Дака вели дека дал 300 илјади евра и 2.000 квадрати земјиште на Заев за возврат да добие услуга. Понатаму во снимката, Дака вели дека Заев овие пари ги искористил за инженеринг на референдумот за името.

Освен Заев, во аудио снимката на која разговараат Дака и Зоки Милески Кичеец, кој инаку е главен посредник на Заев во случајот, се споменува и името на Драги Рашковски, поранешен генерален секретар на Владата на Заев, што значи дека тогашната власт на СДСМ и те како добро била поврзана со контроверзниот проруски бизнисмен Дака, па дури и го рекетирале за да можат да спроведат инженеринг на референдумот за името.

Ја користиме оваа прилика за да им се заблагодариме на СДСМ, кои многу добро ги знаат сите фирми на Дака, со кои нивниот шеф Заев веројатно има соработувано и заработувано, за укажувањето за фирмата Хронос Сум дека била во сопственост на прорускиот бизнисмен Дака.

Владата предводена од ВМРО-ДПМНЕ нема да прави како што правеше власта на СДСМ и Заев, туку напротив, веднаш ќе ги преземе сите законски можности за оваа фирма да не гради и да не инвестира во енергетски објекти, иако фирмата ги има исполнето сите услови и законски критериуми, нешто што во времето на СДСМ и Заев беше мисловна именка – рече Петрушевски.

The post НЕМА ДА ДОЗВОЛИМЕ ФИРМАТА НА КОНТРОВЕРЗНИОТ ДАКА ДА ГРАДИ ВО МАКЕДОНИЈА Ќе ја спречиме, иако ги исполнува сите услови, вели Петрушевски appeared first on plusinfo.mk.

НАЈГОЛЕМ ВЕТЕРЕН ПАРК ВО ЗЕМЈАВА Алказар Енерџи ја објави студијата за Штип, оди на јавен увид

плусинфо — Tue, 31 Mar 2026 21:03:18 +0000

Алказар Енерџи ја објавува Студијата за оцена на влијанието врз животната средина и социјалните аспекти (ESIA) за ветерниот парк Штип и ја става на јавен увид, што претставува значајна пресвртница во развојот на проектот кој треба да стане најголемиот проект за обновлива енергија во Македонија.

Со планиран инсталиран капацитет до 396 MW, ветерниот парк Штип претставува трансформативен чекор кон зајакнување на енергетската независност на земјата, намалување на зависноста од фосилни горива и забрзување на напредокот кон националните климатски цели. Проектот е и значаен придонес кон Платформата за праведна енергетска транзиција на Северна Македонија, лансирана на COP28.

Се очекува проектот да биде финансиран од водечки меѓународни финансиски институции, вклучително и Европската банка за обнова и развој (ЕБОР), Меѓународната финансиска корпорација (IFC) и Ерсте Груп Банк АГ (ERSTE), што ја нагласува неговата силна усогласеност со меѓународните стандарди за животна средина, општество и корпоративно управување.

Студијата за оцена на влијанието врз животната средина и социјалните аспекти (ESIA) е изготвена во целосна согласност со националното законодавство и меѓународно признати рамки, вклучително и Стандардите за перформанси на IFC, Еколошката и социјална политика на ЕБОР и Еколошките и социјалните стандарди на Европската инвестициска банка (ЕИБ). Таа обезбедува сеопфатна проценка на потенцијалните еколошки и социјални влијанија, заедно со јасно дефинирани мерки за ублажување и мониторинг, со цел сите влијанија да останат ограничени, локализирани и одговорно управувани.

Како дел од посветеноста на Алказар Енерџи кон транспарентност и вклучување на засегнатите страни, периодот за јавен увид на Студијата (ESIA) трае од 27 февруари до 27 април 2026 година. Во овој период, засегнатите страни се поканети да ја разгледаат проектната документација и активно да учествуваат во процесот на консултации.

Серија на јавни консултативни настани, кои започнуваат во текот на неделата од 30 март, ќе обезбедат отворена платформа за дијалог со проектниот тим. Овие сесии се наменети да овозможат локалните заедници, институциите и сите заинтересирани страни да поставуваат прашања, да споделуваат мислења и суштински да придонесат во развојот на проектот.

Документацијата за ESIA, вклучително и резиме на разбирлив јазик, е достапна онлајн и во општините на локално ниво. Материјалите се подготвени на повеќе јазици, со цел да се обезбеди пристапност и инклузивност за сите засегнати страни.

Сите добиени коментари во текот на периодот на јавен увид ќе бидат внимателно разгледани и вклучени во финалната верзија на Студијата (ESIA), како и во плановите за управување што ќе го водат процесот на изградба и работење.

– Транспарентноста и отчетноста се во основата на начинот на кој ги развиваме нашите проекти. Работиме целосно во согласност со законите на Северна Македонија и во линија со меѓународните стандарди. Овој процес обезбедува ветерниот парк Штип да се развива одговорно, во партнерство со заедниците и со долгорочни придобивки за земјата – изјавија од Алказар Енерџи.

Алказар Енерџи останува посветена на реализација на проект што обединува техничка извонредност, одговорност кон животната средина и суштинско вклучување на локалната заедница, придонесувајќи кон поодржлива и постабилна енергетска иднина за Македонија.

The post НАЈГОЛЕМ ВЕТЕРЕН ПАРК ВО ЗЕМЈАВА Алказар Енерџи ја објави студијата за Штип, оди на јавен увид appeared first on plusinfo.mk.

ТАВ МАКЕДОНИЈА ВЛОЖУВА 2,7 МИЛИОНИ ЕВРА ЗА НОВ ЛИК НА ОХРИДСКИОТ АЕРОДРОМ Терминалната зграда ќе добие поголем капацитет

плусинфо — Sun, 29 Mar 2026 15:20:48 +0000

ТАВ Македонија, подружница на ТАВ Аеродроми, членка на Групацијата АДП, денеска официјално го одбележа почетокот на реконструкцијата на Аеродромот „Св. Апостол Павле“ Охрид, инвестиција вредна 2,7 милиони евра.

– Со овој проект, чија вредност изнесува 2,7 милиони евра, средства од ТАВ Македонија, ќе се инвестираат во неколку клучни сегменти на охридскиот аеродром. Првата фаза опфаќа реконструкција на патничкиот терминал и зголемување на оперативните капацитети, чек-ин просторот ќе се прошири од 6 на 8 шалтери и дополнителни 100 квадратни метри. Ова ќе овозможи зголемување на капацитетот за опслужување на нашите патници и подобра функционалност на целиот процес – рече Неџат Курт, генералниот директор на ТАВ Македонија.

Областа за безбедносна контрола и рачен багаж ќе се прошири на речиси 200 квадратни метри, просторот кај гејтовите ќе се прошири на 350 квадратни метри, просторот за подигање багаж ќе се прошири на 230 квадратни метри.

Ќе има нова duty-free продавница, нови ескалатори за патници, како и нова опрема и технологија за побезбедно и поефикасно опслужување на патниците. Пасошката контрола ќе се прошири на 150 квадратни метри, канцелариите за оперативниот персонал во безбедносно – контролираната зона ќе бидат обновени на површина од 270 квадратни метри. Паркингот пред терминалот ќе биде реорганизиран, со што протокот на патници ќе се зголеми и ќе се подобри.

– Со реконструкцијата, капацитетот на терминалната зграда се зголемува за 30% до 40%, што ќе ни овозможи да опслужуваме повеќе авиони и повеќе патници во најинтензивните часови кога аеродромот работи со максимален капацитет. Овој проект, со кој охридскиот аеродром ќе добие сосема нов лик, ќе овозможи поудобно, поефикасно и попријатно искуство за патување за нашите патници и секако подобрено работно искуство за нашиот персонал и за персоналот на нашите засегнати страни – полицијата и царината. Токму затоа овие активности ги гледаме како инвестиција во подобро секојдневие за сите што се дел од аеродромската заедница – додаде Курт.

Ќе се догради и административната зграда, која од 290 квадратни метри ќе достигне 746 квадратни метри. Во административната зграда, покрај канцелариите на ТАВ Македонија и нов ресторан за вработените, ќе има и нови канцеларии за Граничната полиција и Царината, како и нов паркинг за вработените.

Основната идеја со реконструкцијата и проширувањето на аеродромот во Охрид е дислокација на административните објекти од терминалната зграда во надградената административна зграда, со што ќе се овозможи поголем капацитет на терминалот за потребите на патничкиот сообраќај.

Во меѓувреме, стратегијата за планирање за имплементација на проектот ќе му овозможи на аеродромот да продолжи да работи без прекин за време на градежните активности.

Според најновите статистички податоци, ТАВ Македонија, подружница на ТАВ Аеродроми, членка на АДП Групацијата, ги заврши првите два месеци од 2026 година со 539.474 патници на Меѓународниот аеродром Скопје и на Аеродромот „Св. Апостол Павле“ Охрид. Ова е зголемување од 31% на бројот на патници во споредба со истиот период во 2025 година. Во исто време, бројот на летови (3.766) порасна за 14%.

Аеродромот во Охрид ги заврши првите два месеца од 2026 година со 28.452 патници, што е зголемување од 20,3%, во споредба со истиот период во 2025 година.

Со 4 нови линии што ќе започнат од охридскиот аеродромот со летниот распоред на летови (Милано, Виена, Вроцлав и Катовице), како и претходно започнатата нова линија до Братислава, ТАВ Македонија очекува овој двоцифрен раст на патничкиот сообраќај да продолжи.

Моментално, од Охрид, како една од најважните туристички дестинации во регионот, летаат 8 авиокомпании до 17 дестинации, меѓу кои 3 се чартер летови.

The post ТАВ МАКЕДОНИЈА ВЛОЖУВА 2,7 МИЛИОНИ ЕВРА ЗА НОВ ЛИК НА ОХРИДСКИОТ АЕРОДРОМ Терминалната зграда ќе добие поголем капацитет appeared first on plusinfo.mk.

ШТИПСКА „АКТИВА“ ГО ЗГОЛЕМИ ПРОИЗВОДНИОТ КАПАЦИТЕТ Мицкоски задоволен како компанијата ги потрошени парите од унгарскиот кредит

плусинфо — Thu, 05 Mar 2026 13:18:25 +0000

Според премиерот, токму овие пари овозможиле компанијата да добие „нова физиономија“ и да инвестира во капацитети со голема додадена вредност за македонската економија.

-Задоволство е што како Влада учествувавме овој капацитет да се прошири. Сопствениците го искористија заемот за вложување во нови поразводни капацитети, а тие имаат голема додадена вредност во македонската економија и во локалната економија, овде во Штип – рече Мицкоски.

Тој рече дека Влада, ќе стори се што е потребно македонските компании да добијат услови коишто ќе им овозможат да се развиваат, а со тоа и да ја развиваат македонската економија.

-Тоа е наш приоритет, така се однесувавме до сега, така и ќе се однесуваме и од сега- рече Мицкоски.

Во компанијата работат 580 работници.

The post ШТИПСКА „АКТИВА“ ГО ЗГОЛЕМИ ПРОИЗВОДНИОТ КАПАЦИТЕТ Мицкоски задоволен како компанијата ги потрошени парите од унгарскиот кредит appeared first on plusinfo.mk.

📷 СТОКОВНАТА КУЌА ВО РАДОВИШ ЌЕ СТАНЕ КУЛТУРЕН ЦЕНТАР Реконструкција и пренамена вредни 3,7 милиони евра

плусинфо — Sat, 17 Jan 2026 12:22:07 +0000

Во Општина Радовиш е во тек работната фаза од проектот за реконструкција и пренамена на поранешната Стоковна куќа во современ мултифункционален и културен центар со музејска содржина, информираше премиерот Христијан Мицкоски.

На својот Фејсбук профил тој објави слики од реконструкцијата.

„Објектот, лоциран во централното градско подрачје, добива целосно нова намена и значење како јавен простор од културен и општествен интерес.

Во рамки на работната фаза се изведуваат интензивни градежни активности кои опфаќаат конструктивна санација и адаптација на постојниот објект, внатрешно уредување, функционална реорганизација на просторот и создавање услови за современи културни, изложбени и музејски содржини.

Со инвестиција од 229.691.396 денари, обезбедена од Министерството за култура, се поставуваат темелите за нов културен центар кој ќе придонесе за збогатување на културниот живот, зачувување и презентација на културното наследство и зголемена достапност на културни настани за сите граѓани“.

The post 📷 СТОКОВНАТА КУЌА ВО РАДОВИШ ЌЕ СТАНЕ КУЛТУРЕН ЦЕНТАР Реконструкција и пренамена вредни 3,7 милиони евра appeared first on plusinfo.mk.

ГОЛЕМ ЧЕКОР НАПРЕД ЗА ЖЕЛЕЗНИЦИ Ќе се набават 5 локомотиви преку заем од ЕБРД

плусинфо — Tue, 30 Dec 2025 13:34:41 +0000

Инвестираме 21 милион евра за набавка на 5 нови електрични локомотиви кои ќе бидат од суштинско значење за зголемување на карго-транспортот, истакна вицепремиерот и министер за транспорт Александар Николоски, кој денеска заедно со министерката за финансии Гордана Димитриеска Кочоска и директоrот на МЖ Транспорт, Дејан Кошутиќ го потпишаа Договорот за заем од ЕБРД за набавка на нови електрични локомотиви.

– Со новата флота од 5 локомотиви и постојните 4 кои се понови, ќе располагаме со 9 модерни локомотиви кои ќе можат целосно да го покријат карго-превозот, а дел од нив да се користат и во патничкиот сообраќај – изјави Николоски.

Во продолжение интегралното обраќање на вицепремиерот Николоски.

„Навистина ми е драго што денес имаме можност да го заокружиме еден исклучително важен процес кој ќе значи набавка на најмалку 5 нови електрични локомотиви, заедно со пропратни резервни делови. Ова е навистина голем чекор напред за Железници за транспорт и во делот на карго-превозот и во патничкиот сообраќај.

Сите се сеќаваме дека минатата година, во моментот на формирање на Владата, состојбата беше исклучително тешка. Имавме нула оперативни локомотиви, практично железничкиот транспорт беше парализиран, а бројни композиции стоеја на македонските пруги бидејќи немаше со што да се оперира.
Со интензивна работа и со поддршка од претседателот на Владата, успеавме во текот на минатата година да ставиме во функција пет локомотиви, а денес веќе имаме над 11 функционални локомотиви. Со тоа целосно се менува сликата за железничкиот транспорт во државата.

Во таа насока, набавката на овие пет нови електрични локомотиви ќе има суштинско значење за зголемување на карго транспортот. Од постојните 11 локомотиви, четири се понови, а седум се постари. Со новата флота од пет локомотиви и постојните четири понови, ќе располагаме со девет модерни локомотиви кои ќе можат целосно да го покријат карго превозот, а дел од нив да се користат и во патничкиот сообраќај.
Ова е особено важно за Коридорот 10, кој треба да бележи раст во наредните години, како и за Коридорот 8, кој во моментов интензивно го развиваме преку значајни инвестиции во железничката инфраструктура.
Истовремено, оваа инвестиција е дел и од пошироката визија за Скопје, подобрување на квалитетот на воздухот преку воведување на градскиот воз. Во моментов се работи на една од трите линии во делот на инфраструктурата, а во следните две години ќе се работи и на преостанатите две. Кога целиот проект ќе биде завршен, по тие линии ќе сообраќаат исклучиво електрични возови, со јасна цел, целосно да се елиминира употребата на дизел локомотиви и дизел возови во главниот град и да се придонесе за подобар квалитет на воздухот.

Сега влегуваме во потешкиот, но клучен дел, успешно спроведување на набавката. Се надевам дека до март, во соработка со ЕБРД, ќе успееме да го објавиме повикот и потоа успешно да ја реализираме испораката на новите локомотиви“, се обрати Николоски.

The post ГОЛЕМ ЧЕКОР НАПРЕД ЗА ЖЕЛЕЗНИЦИ Ќе се набават 5 локомотиви преку заем од ЕБРД appeared first on plusinfo.mk.

ДАЛИ ФИЛИПЧЕ Е ПАРТНЕР НА ЗАЕВ ЗА ЗГРАДАТА ВО ДУБАИ И КАКО ЈА ДОБИ ЗЛАТНАТА ВИЗА? Прозивка од ВМРО-ДПМНЕ за лидерот на опозицијата

плусинфо — Thu, 25 Dec 2025 11:51:28 +0000

ВМРО-ДПМНЕ го повика лидерот на СДСМ Венко Филипче да каже дали е инвестициски партнер на Зоран Заев во изградбата на 42-катна зграда во Дубаи, и дали златната виза за Обединетите Арапски Емирати ја има добиено врз основа на инвестиција во недвижнини, а не како лекар, како што претходно тврдел, но досега тоа не го поткрепил со документи.

– По сведоштвото од страна на Томе Аврамски, поранешен соработник на Зоран Заев, дека во Дубаи Заев гради 42катница, а дополнително со Филипче имаат станови во друг објект, од СДС молк на темата и крици на беспомошност.

ВМРО-ДПМНЕ долго време веќе говореше во јавноста дека Заев и Филипче имаат златни визи за Дубаи, а за истите и самите потврдија, но не кажаа на кој начин ги добиле. По се изгледа, стекнувањето на златна виза е поради влог во недвижности.

Иако Филипче призна дека златната виза е последица на работен ангажман во некаква си болница во Дубаи и вети дека тоа ќе го докаже, јавноста не виде никакви документи.

Јавно го прашуваме Венко Филипче, каква е неговата улога во изградбата на 40-катницата на Заев, за која сите слушнавме сведоштво? Дали златната виза на Венко во Дубаи е резултат на тоа што Венко Филипче е бизнис партнер на Зоран Заев во градење на згради? Од каде му пари на Венко за да си дозволи толку голем влог, со оглед на тоа дека тој самиот кажува дека има досега работено како доктор и како пратеник? Дополнително, Филипче треба да одговори на чии име се води станот за кој Томе Аврамски вели дека е во негова сопственост – рече на прес конференција Валентин Манасиевски, член на ЦК на ВМРО-ДПМНЕ.

Манасиевски го повика јавното обвинителство да го истражи случајот.

The post ДАЛИ ФИЛИПЧЕ Е ПАРТНЕР НА ЗАЕВ ЗА ЗГРАДАТА ВО ДУБАИ И КАКО ЈА ДОБИ ЗЛАТНАТА ВИЗА? Прозивка од ВМРО-ДПМНЕ за лидерот на опозицијата appeared first on plusinfo.mk.

🎥 ЗАЕВ ГРАДИ ЗГРАДА НА 40 КАТА ВО ДУБАИ, А ФИЛИПЧЕ ТАМУ СИ КУПИЛ СТАН, СЕ ПОЈАВИЈА СВЕДОЦИ Дали и за оваа „бомба“ ќе расправа Антикорупцискиот тим на СДСМ?

плусинфо — Wed, 24 Dec 2025 11:41:57 +0000

ВМРО-ДПМНЕ јавно поднесува пријава до Антикорупцискиот тим на СДСМ, и тоа лично за Зоран Заев, кој гради зграда на 40 ката во Дубаи, рече на денешната прес-конференција Валентин Манасиевски, член на ЦК на ВМРО-ДПМНЕ.

Тој презентираше видеозапис од интервју на Томе Аврамски, поранешен соработник и познаник на Зоран Заев, во емисија на ТВ Хепи, во соседна Србија.

– Ова е сведоштво на човек кој тврди дека бил таму и го видел тоа. Томе Аврамски, поранешен соработник и познаник на Зоран Заев, кажува лично сведоштво дека бил во Дубаи и ја посетил зградата која ја гради Зоран Заев. Но, исто така кажува и дека Венко Филипче има стан во Дубаи.

Манасиевски рече дека ова е скандал од невидени размери, но и доказ дека златните визи на Зоран Заев и Венко Филипче се добиени врз база на инвестиции во недвижности.

– Во своето сведоштво, Томе Аврамски вели, цитирам: „Еве јас сега одам во Дубаи, таму нешто работам и он (се мисли на Заев) е таму. Таму се сите. Тука е и Заев, тука е и бившиот министер, сега лидер на СДСМ (се мисли на Венко Филипче), и он е тука. Јас баш сум бил во зградата каде што купија станови. Еве сега Заев гради во Дубаи, зграда од 42 спрата. Тоа се големи инвестиции, тоа се милиони евра“ – ги цитира Манасиевски зборовите на Аврамски.

Фото: Принтскрин

Манасиевски јавно постави неколку прашања до СДСМ и до неговиот новоформиран Антикорупциски тим (АКТ).

– Имаме пријава до антикорупцискиот тим на Венко, и тоа лично за Зоран Заев. Дали е точно дека додека државата ја остави на колена, опустошена, Зоран Заев гради зграда во Дубаи и тоа 40 катница? Од каде му се парите за тоа? Дали се од РЕК Битола и дали за тоа е вмешан Вице Заев? Каква е врската на Вице Заев и Енко Колашинац? Дали за овие „бомби” ќе расправа антикорупцискиот тим на СДСМ? Вистината излегува на виделина. Правда мора да има – рече членот на ЦК на ВМРО-ДПМНЕ Манасиевски.

The post 🎥 ЗАЕВ ГРАДИ ЗГРАДА НА 40 КАТА ВО ДУБАИ, А ФИЛИПЧЕ ТАМУ СИ КУПИЛ СТАН, СЕ ПОЈАВИЈА СВЕДОЦИ Дали и за оваа „бомба“ ќе расправа Антикорупцискиот тим на СДСМ? appeared first on plusinfo.mk.

ВОЗОВИТЕ ЌЕ ЛЕТААТ НИЗ ЕВРОПА, АМА ВО 2040 ГОДИНА Мрежата на брзи пруги ќе стане реалност

МИА — Wed, 05 Nov 2025 12:35:39 +0000

Европската комисија денеска усвои сеопфатен пакет за транспортниот сектор, кој предвидува забрзување на воспоставувањето на европска мрежа на брзи железници и поголеми инвестициите во обновливи и горива со ниско ниво на емисии на јаглерод диоксид за воздухопловство и поморскиот сообраќај.

Како што соопшти ЕК, целта на овој пакет е обезбедување на поефикасен, поврзан, лесно достапен, чист и отпорен транспортен систем во ЕУ.

Со планот се предвидува создавање на побрза, поинтероперабилна и подобро поврзана европска мрежа на возови со брзина од над 200 километри на час до 2040 година, со што би се скратило времето на патување и железницата би станал привлечна алтернатива за воздушниот сообраќај на кратки релации.

Остварувањето на ваквите цели се очекува донесе поголем бројот на патници во железничкиот сообраќај и да ги поттикне регионалните економии и туризмот.

„Патниците ќе можат да патуваат од Берлин до Копенхаген за 4 часа, наместо сегашните 7, а од Софија до Атина за 6 часа, наместо сегашните 13 часа и 40 минути. Новите прекугранични врски, исто така, ќе овозможат побрзи и поедноставни патувања од Париз до Лисабон, преку Мадрид, и подобрена поврзаност меѓу балтичките главни градови“, се наведува во соопштението.

Покрај намалување на времето за патување, на овој начин ќе се намали и застојот и ќе се ослободат капацитет на конвенционалните линии, товарниот транспорт и воената мобилност.

Покрај ова, пакетот предвидува и инвестиции од 100 милијарди евра до 2035 година за производство на околу 20 милиони тони обновливи и горива со ниско ниво на емисии на јаглерод диоксид за воздухопловство и поморскиот сообраќај.

„Ова испраќа јасен сигнал до инвеститорите дека остануваат во сила целите на Европа и дека Комисијата ќе ја поддржи транзицијата кон климатски неутрална економија. Со забрзување на домашното производство на биолошки и небиолошки горива, Европа може да ја намали својата зависност од увезени фосилни горива, да ја подобри конкурентноста на своите индустрии и да ја предводи транзицијата кон чиста енергија на глобално ниво“, потенцира ЕК.

ВРЕМЕ Е ЗЕМЈИТЕ ДА СЕ ПРИКАЧАТ НА НАЈГОЛЕМИОТ ЕВРОПСКИ ТРАНСПОРТЕН ПРОЕКТ Европската унија ќе инвестира 546 милијарди евра за брзи пруги до големите градови

The post ВОЗОВИТЕ ЌЕ ЛЕТААТ НИЗ ЕВРОПА, АМА ВО 2040 ГОДИНА Мрежата на брзи пруги ќе стане реалност appeared first on plusinfo.mk.