Полицајците што спроведувале акциска контрола во дискотеката „Пулс“ вечерта кога се случи трагедијата и началниците во ОВР Кочани и во СВР Штип, наскоро ќе седнат на обвинителна клупа, откако Советот за оценка на обвинителен акт го одобри во целост обвинението на Обвинителството за гонење на организиран криминал и корупција против 13-те полицајци.

Во почетокот на март почнуваат судењата за дел од полицајците обвинети за поврзаност со трагедијата во која загинаа 63 млади луѓе и над 200 беа повредени. Полицајците за кои се закажани судењата се товарат за злоупотреба на службената положба, додека 13-те полицајци што се обвинети за директна поврзаност со трагедијата, се товарат за тешки дела против општата сигурност.

Исто така, Кривичниот суд соопшти дека е прифатено обвинението против 5 физички лица за различни кривични дела и тоа Давање поткуп, Давање награда за противзаконито влијание, Примање награда за противзаконито влијание и Примање поткуп, во чиј склоп е и обвинителен предлог против 4 други физички и 1 правно лице, а поврзани со користење средства преку ИПАРД програмата.

„Врз основа на двата, веќе одобрени обвинителни акти, формирани се кривично правни предмети, кои согласно АКМИ – системот ќе бидат распределени на понатамошно постапување кај надлежни судии, а откако ќе биде насрочена главна расправи по конкретните предмети, термините ќе бидат достапни преку Календарот за судење на веб-страницата на судот“ – соопшти Судот.

The post 13 ПОЛИЦАЈЦИ И ИНСПЕКТОРИ ЌЕ ОДГОВАРААТ ВО ВРСКА СО ТРАГЕДИЈАТА ВО „ПУЛС“ Одобрени уште два обвинителни акти appeared first on plusinfo.mk.

Општина Крива Паланка и претставниците на 16 месни заедници ја информираат јавноста дека утре, 26 февруари 2026 година, ќе се одржи мирен протест организиран од граѓани, поради неконтролираното движење на говеда и штетите врз имот и земјоделски површини.

„Општината потсетува дека надлежните институции веќе донесоа правосилни решенија и задолжителни мерки за регулирање на оваа состојба. Непочитувањето на овие решенија го загрозува јавниот ред, безбедноста и имотните права на граѓаните.

Сите учесници се повикуваат на одговорно и мирно однесување, додека Општина Крива Паланка и претставниците на 16 месни заедници активно ги следат настаните и ќе преземат сите мерки во рамки на своите надлежности за заштита на јавниот интерес“ – се вели во соопштението на Општина Крива Паланка.

Обидот на институциите да стават ред со добитокот што со месеци слободно се движи низ кривопаланечкиот регион денеска се претвори во драма на теренот. Наместо мирно прибирање на животните, ситуацијата ескалираше со расправии, трчање по ридовите и физички турканици, објави Телма.

Во Крива Паланка инспектори од Агенција за храна и ветеринарство, со асистенција на Министерство за внатрешни работи, се обидоа да ги приберат кравите кои подолг период се движат без контрола. Дел од животните беа лоцирани и натоварени кај помошниот објект во близина на градскиот базен.

Сепак, акцијата не помина без отпор. Членови на семејството на сопственикот се обидуваа да ги оттурнат кравите од инспекторите и да ги насочат кон планинските предели. Меѓу најгласните беше Јулија Ѓорѓиевска, ќерка на сопственикот, која трчаше по стадото обидувајќи се да го спречи нивното одземање. Во еден момент, службени лица се обидоа да ја сопрат, но ситуацијата дополнително се вжешти.

Според информациите од терен, од вкупно околу 500 грла добиток, денеска биле заловени само десетина, додека останатите и понатаму слободно се движат низ околните ридови и пасишта.

Тензиите кулминираа со турканици, откако дел од службениците пријавиле дека биле физички попречувани при извршувањето на задачата.

Од друга страна, сопственикот Гоце Ѓорѓиевски изјави дека нема спор со институциите, но инсистира неговите крави да бидат соодветно згрижени, посочувајќи дека семејството се грижи за нив повеќе од три децении.

И покрај денешната интервенција, проблемот со слободното движење на добитокот во кривопаланечкиот регион останува отворен.

The post ПРОДОЛЖУВА БУРЛЕСКАТА СО „ЛУДИТЕ КРАВИ“ ВО КРИВА ПАЛАНКА Инспектори и полицајци неуспешно ги бркаа по ридовите, за утре свикан „мирен протест“!? appeared first on plusinfo.mk.

Општина Центар ја заврши првата фаза од воспоставувањето систем за мониторинг на бучавата во јавниот простор со поставување 30 уреди за мерење на бучава на повеќе фреквентни локации низ општината.

Уредите се поставени на улиците Народен фронт, Наум Наумовски Борче, Орце Николов, Михаил Цоков, Славка Недиќ, Живко Чинго, Радњанска, Ленинова, Самоилова, Отон Жупанчиќ, Мирослав Крлежа, Ѓорѓи Пешков, Пиринска, Јордан Мијалков, булеварот Климент Охридски, како и на Кејот 13-ти Ноември.

Градоначалникот на Општина Центар, Горан Герасимовски, истакна дека уредите се наменети исклучиво за индикативни мерења и претставуваат значајна алатка за поддршка на инспекциските служби.

– Овие мерни единици не препознаваат гласови, туку ја мерат амбиенталната бучава во децибели и фреквенцијата на звукот. Со тоа овозможуваме побрза и поефикасна реакција на инспекциските служби и подобра заштита на јавниот ред и мир – изјави Герасимовски.

Од Општина Центар информираат дека податоците добиени од уредите за мерење на бучавата, служат како индикатор за дополнителна теренска контрола, а врз основа на нив не се покренуваат прекршочни постапки.

Инспекцијата за животна средина постапува согласно Законот за заштита од бучава во животната средина, при што санкции се изрекуваат исклучиво врз основа на официјални мерења извршени од акредитирана лабораторија.

Согласно член 56 од Законот, прекршочните санкции се утврдуваат според големината на правниот субјект и изнесуваат од 6.000 до 7.000 евра за микро, од 13.000 до 14.000 евра за мали и од 37.000 до 41.000 евра за средни правни субјекти.

Уредите се користат со посебен фокус на бучавата која потекнува од угостителски објекти и сообраќајот, со цел унапредување на квалитетот на животот и заштитата на јавниот мир на граѓаните во Општина Центар.

The post 30 УРЕДИ ЈА МЕРАТ БУЧАВАТА ОД РЕСТОРАНИТЕ И ОД СООБРАЌАЈОТ ВО ЦЕНТАР Инспекторите вршат контрола, ама не казнуваат appeared first on plusinfo.mk.

Голема полициска акција вчера и денес ја „стресе“ Управата за јавни приходи. Главниот јавен обвинител, Љупчо Коцевски, откри дека се води предистражна постапка против службеници од УЈП кои, според првичните информации, на некаков начин се поврзани со предметот што произлезе од истрагата за пожарот во дискотеката во Кочани.

Коцевски потврди дека утрово биле приведени околу десетина лица, а паралелно биле извршени претреси на нивните домови и работни места.

– Во моментов можам да кажам само дека станува збор за вработени во УЈП. За точните кривични дела допрва ќе се утврдува, но првичните сознанија покажуваат злоупотреба на службена положба и овластување, како и примање и давање мито – изјави обвинителот.

Тој објасни дека дел од приведените се поврзани со електронски комуникации и пораки кои претходно се појавија во јавноста, а дел од нив веќе биле доставени и во судот.

– Тоа беше само дел од материјалот за предметот, но сега гледаме дека дел од тие пораки се врзуваат и со овие лица. Оваа постапка е директно поврзана со предметот за Кочани – додаде Коцевски.

Обвинителството засега не открива имиња. Генералиите, како што рече Коцевски, ќе бидат објавени дури по формалното документирање на приведените, а за тоа какви мерки ќе бидат предложени ќе се решава по земањето на нивните изјави.

Предметот официјално ќе се води во Обвинителството во Кочани, бидејќи таму е извршено евентуалното кривично дело.

– Доколку се појават нови елементи, можно е предметот да го преземе Обвинителството за организиран криминал. Засега останува во Кочани“, појасни Коцевски.

Тој нагласи дека овој случај не може да се спои со главната истрага за пожарот во дискотеката, затоа што се работи за различни кривични дела ,злоупотреби, мито и поткуп, односно нешта кои немаат директна врска со самата несреќа.

УШТЕ 11 ВРАБОТЕНИ ВО УЈП ОПФАТЕНИ СО ИСТРАГАТА ЗА ПОЖАРОТ ВО КОЧАНИ, НАЈМАЛКУ 6 УАПСЕНИ Се товарат за поткуп, фалсификат, злоупотреба на положба…

The post ПРЕТРЕСИ, ПОРАКИ И МИТО Коцевски откри детали за новите случувања поврзани со трагедијата во Кочани appeared first on plusinfo.mk.

Инспекциските служби на Агенција за храна и ветеринарство (АХВ) неделава, при спроведена вонредна контрола кај оператор со храна, запленија и нештетно уништија приближно 37 тони храна, јаткасти плодови, зрнести и мешункасти производи и разни зачини, без декларации и на кои рокот на употреба им бил истечен од една до две години.

Ова го соопшти Агенцијата, давајќи детали за сторениот прекршок. Според написот, на операторот му е изречена времена забрана за работа и глоба, како и наредба за отстранување на утврдените недоследности со надзорот.

„АХВ неделава спроведе вонредни контроли и кај други оператори со храна – месарници, ресторани, сендвичарници, маркети, за што заради утврдени недоследности (нерегистрирани оператори со храна, неспроведени задолжителени обуки на вработените за безбедност на храната, пуштање во промет на небезбедна храна и слично), на операторите со храна и на нивните одговорни лица им изрече парични казни, но и времени забрани за вршење на дејност. Издадени беа и наредби за отстранување на утврдените недостатоци со контролите, а затекнатата небезбедна храна беше нештетно уништенa“, велат од Агенцијата.

The post УНИШТЕНИ 37 ТОНИ ХРАНА, ИНСПЕКТОРИТЕ СО ПОЛНИ РАЦЕ РАБОТА Глоби и времена забрана за оператор appeared first on plusinfo.mk.

Министерството за животна средина соопшти дека државниот Инспекторат за животна средина спровел вонреден инспекциски надзор на депонијата „Дрисла“ откако вчера околу 15:15 часот избувнал пожар, по пријава од Полициската станица Гази Баба.

На терен интервенирале екипи на ЈП „Дрисла“ со сопствена механизација, противпожарни возила и цистерни од ЈП „Водовод и канализација“ – Скопје. Присутни биле и овластени инспектори од СВР Скопје ЕЕКК, директорот на „Дрисла“, надлежни лица за животна средина и други вработени во јавното претпријатие.

– Наш приоритет е заштитата на здравјето на граѓаните и животната средина. Затоа ќе бидат земени примероци од подземните води и почвата од акредитирана лабораторија, за да се процени влијанието на пожарот и навремено да се преземат мерки – изјавија од Министерството за животна средина.

ЈП „Дрисла“ веќе доставило извештај од мониторинг станицата за квалитет на воздухот, а од надзорот е изготвен и официјален записник.

Од Министерството додаваат дека инспекциската постапка е во тек и се следат сите мерки за евалуација и отстранување на последиците од пожарот.

The post ВОНРЕДЕН НАДЗОР НА „ДРИСЛА“ Инспектори од животна средина ќе ја испитуваат водата и почвата по пожарот appeared first on plusinfo.mk.

Државниот инспекторат за градежништво и урбанизам донесе решение за стопирање на изградбата на објект во заштитената зона на Старото градско јадро во Охрид, откако при вонредна контрола било утврдено дека инвеститорот градел без одобрение за градба.

Како што информираат од Инспекторатот, станува збор за објект што се гради во Старата охридска чаршија, во строго заштитена зона која е дел од светското наследство на УНЕСКО.

– Со решение број ИП 1бр 74-137 од вонреден инспекциски надзор, издадено од страна на Државниот инспекторат, изградбата е стопирана, а објектот затворен за понатамошни градежни активности – велат од Инспекторатот.

Поради непочитување на одредбите од Законот за градење, против инвеститорот ќе бидат поднесени соодветни пријави, а засилените контроли на инспекциските служби ќе продолжат и во наредниот период низ целата држава.

Од Инспекторатот нагласуваат дека заштитата на Старото градско јадро на Охрид е од суштинско значење за да се спречат дејства и појави што можат да доведат до уништување или деградација на ова културно-историско подрачје, кое уште од 1980 година е впишано на Листата на светско наследство на УНЕСКО.

The post ГРАДЕЛ ВО СРЦЕТО НА ОХРИДСКАТА ЧАРШИЈА Инспекторатот стопираше изградба во Охрид, следуваат кривични пријави appeared first on plusinfo.mk.

Инспекторатот за животна средина веќе е ангажиран на терен поради хемиската хаварија што се случи во скопската населба Пинтија, изјави првиот вицепремиер и министер за животна средина, Изет Меџити. Според него, надлежните служби се веќе активирани, а институциите подготвуваат санкции против одговорните.

Хемикалиите се излеале вчера од резервоар на приватна компанија за производство на стиропор, лоцирана во Кисела Вода. Според досегашните информации, хемикалиите се користеле во рамки на производствениот процес, а хаваријата предизвикала потенцијална закана по здравјето и животната средина.

На новинарско прашање за тоа што точно е преземено против компанијата, Меџити упати кон раководителот на Инспекторатот, кој функционира како дел од Министерството за животна средина.

Од Град Скопје соопштија дека по добиената пријава, на местото на настанот веднаш биле испратени екипи на Противпожарната бригада (ТППЕ Скопје), кои го изолирале инцидентот. Инспекциските служби подготвиле и записник, во кој се нотирани деталите за хаваријата и условите на теренот.

Градските власти потсетуваат дека за ваков тип на прекршок е предвидена парична казна од 45.000 евра за сторителот, како и затворање на производствениот погон и налог за санирање на штетите.

„Со извршен технички преглед на опремата под притисок, инспекторите констатирале дека вентилот на резервоарот покажувал знаци на протекување. Компанијата ‘Екопор’ не презела мерки за да спречи хаварија, и покрај очигледните индикации за дефект“, стои во писменото соопштение од Град Скопје.

Од таму апелираат до Општина Кисела Вода – под чија надлежност се наоѓа објектот – како и до Министерството за животна средина, да постапат во рамки на своите надлежности и да го санкционираат правното лице.

СЕ ИЗЛЕА ЦРНО МАСЛО ОД АТМОСФЕРСКА КАНАЛИЗАЦИЈА ВО КИСЕЛА ВОДА Полицијата го пренасочува сообраќајот

ФАБРИКАТА ЗА СТИРОПОР „ЕКОПОР“ ИЗЛЕА ХЕМИКАЛИЈА ВО ПИНТИЈА Казна од 45.000 евра и затварање на погонот бара Градот Скопје

ИЗЛЕАНОТО МАСЛО Е ПОСИПАНО СО ПЕСОК И СО ПИЛЕВИНА Ѓоргиевски бара Арсовска да постапи по еколошката хаварија во Пинтија

The post ИНСПЕКТОРАТОТ ВЕЌЕ ПОСТАПУВА ЗА ЕКО-ИНЦИДЕНТОТ ВО ПИНТИЈА Меџити најави одговорност за истечените хемикалии appeared first on plusinfo.mk.

Од вкупно 23 правни субјекти со активна лиценца во делот на угостителството, кај 17 се утврдени неправилности.

Од нив, на девет им се одземени лиценците, а кај осум се утврдени неправилности за исполнување на минималните технички услови кои треба да ги отстранат во одреден рок.

Министерот за економија и труд Бесар Дурмиши денеска на прес-конференција посочи дека овој рок им е даден затоа што инспекторите од Пазарниот инспекторат утврдиле дека се работи за технички услови кои може да бидат отстранети, а доколку тоа не го сторат тоа, лиценците ќе им бидат одземени.

– Контролите од ДПИ покажале дека може да се отстранат неправилностите и даден им е рок за отстранување – рече Дурмиши.

Во однос на Законот за угостителска дејност, Дурмиши информираше дека работна група веќе работи на измени на Законот и дека во опција се две можности – контролите да ги прави Пазарниот инспекторат или Комисија која ќе биде формирана од надлежни институции.

Со измените направени во 2008 година, се дозволи сопствениците на угостителски објекти под морална одговорност да потврдат дека ги исполнуваат мининалните технички услови за работа и тие податоци да ги доставуваат до Пазарниот инспекторат.

Измените на Законот беа иницирани по големата трагедија која се случи во Кочани по што се утврди дека дискотеката работела без да ги исполни минималните технички услови.

The post 9 УГОСТИТЕЛИ ЈА ИЗГУБИЈА ЛИЦЕНЦАТА Осум објекти добија рок да ги исполнат минималните услови за работа appeared first on plusinfo.mk.

The post ИНСПЕКТОРИТЕ ОД ОПШТИНА КАРПОШ ЌЕ ГИ ПРЕТРЕСАТ СИТЕ ЛОКАЛИ Сопствениците треба да ги спремат потребните документи appeared first on plusinfo.mk.