Претседателката Гордана Сиљановска Давкова денеска во пресрет на 21 март, Светскиот ден на лицата со Даунов синдром прими претставници на здружението за рехабилитација и инклузија на лица со Даунов синдром „Дневен центар – Доза среќа“ Скопје.

Сиљановска Давкова го поздрави холистичкиот пристап на здружението за континуирано унапредување на животот на децата, младите и возрасните лица со Даунов синдром.

Во поддршката на родителите и згрижувачките семејства, за претседателката е важно институциите да им овозможат на лицата со Даунов синдром адекватен да ги развиваат животните вештини и способности и активно да учествуваат во сите сегменти на општествениот живот, како рамноправни граѓани, соопштението од Кабинетот на претседателската.

Сиљановска Давкова укажала на потребата од подигнувањето на јавната свест, како и отворање повеќе дневни центри.

– Нема полековита доза среќа од разбирањето, прифаќањето и љубовта кон овие лица – посочил Сиљановска Давкова.

Претседателката на здружението, Сузана Стојановска информира дека нивниот центар е отворен не само за деца со Даунов синдром, туку и за деца со друга попреченост, како оштетен говор, слух и вид.

Таа нагласи дека сè уште присутната дискриминација кон нив е голем општествен проблем и предизвик.

– Недостигот на стручен кадар, како психолози, малиот број волонтери, недоволната грижа за просторот во којшто е сместен Центарот и крајно лимитираните можности за вработување на полнолетните лица со Даунов синдром, се сериозни прашања коишто бараат одговор и акција од надлежните институции – истакна Стојановска.

Во соопштението се додава дека особена убавина на настанот му дал детскиот музички настап на знаковен јазик, со помош на Соња Кимова, нивен знаковен предавач.

Дека талентот не познава бариери, стана јасно по музичката точка на хармоника, изведена од Денис Димитров, во придружба на младите гости од Дневниот центар „Доза Среќа“ Скопје.

Во знак на благодарност, претседателката од нив доби рачно изработен подарок, се вели во соопштението од нејзиниот кабинет.

The post СЀ УШТЕ СЕ ДИСКРИМИНИРАНИ ЛИЦАТА СО ДАУНОВ СИНДРОМ Институциите да им дадат поддршка, за активно да учествуваат во општеството appeared first on plusinfo.mk.