Иницијатива за одржување референдум со цел разрешување на скопската градоначалничка веќе започна партијата ЛДП, а како што ни изјави претседателката на партијата Моника Зајкова, целта е референдумот да се одржи заедно со парламентарните и со претседателските избори за да се одбегне дополнителен трошок.

ЛДП наскоро ќе се обиде да собере околу 46.000 потписи од граѓани – толку се потребни за распишување референдум – 10% од вкупниот број гласачи во Град Скопје.

Експертите со коишто разговараше Плусинфо, пак, велат дека дури и да не успее идејата за референдумско изјаснување, сепак постои можност Владата да ѝ ги одземе ингеренциите на градоначалничката и практично да ѝ ги „врзе“ рацете кога се работи за носење важни одлуки кои би можеле да бидат штетни за поголемиот дел од жителите на Скопје.

Постапката е веќе започната

Претседателката на ЛДП Моника Зајкова во разговор за Плусинфо рече дека идејата е да се распише референдум за смена на скопската градоначалничка токму на денот кога ќе се одржи вториот круг од претседателските избори и првиот круг од парламентарните избори на 8 мај догодина.

Нашата цел е референдумот да се одржи заедно со вториот круг од претседателските и првиот круг од парламентарните избори, бидејќи на тој начин би се заштедиле пари.

Моника Зајкова ЛДП

– Освен тоа што сакаме да распишеме референдум за смена на скопската градоначалничка, сакаме да иницираме и промена на Законот за локална самоуправа, кој до 1996 година нудел можност за отповикување на градоначалник. Но, со измените што се направени во 2002 година таквата одредба е отстранета, па градоначалникот може да биде сменет само ако е фатен во вршење кривично дело или ако настапи смрт. Па така, во ситуација кога еден градоначалник воопшто не се занимава со општината, како што е случајот со Град Скопје и со Данела Арсовска, ние немаме основа како да побараме одговорност. Наскоро ќе почнеме со собирање потписи за распишување референдум. Откако ќе ги собереме потписите, потребно е да ги доставиме до Собранието, па да чекаме одлука од Собранието дали може да се распише референдум. Таква е процедурата, но постапката секако ќе заврши за неколку месеци – изјави Зајкова.

Добро би било референдумот да се одржи заедно со изборите во мај идната година, додаде таа.

– Нашата цел е референдумот да се одржи заедно со вториот круг од претседателските и првиот круг од парламентарните избори, бидејќи на тој начин би се заштедиле пари. Има шанси да стигнеме навреме, бидејќи Собранието ќе се распушти дури во февруари идната година. Во Полска на пример, кога се одржуваа парламентарни избори, имаше дури 4 референдумски прашања. Така сакаме да биде и кај нас – ни изјави Зајкова.

Во однос на досегашната работа на актуелната скопска градоначалничка Данела Арсовска, претседателката на ЛДП вели дека памети поубаво Скопје.

– Со длабоко разочарување и загриженост ја гледам сегашната состојба во нашиот главен град. Паметам поубаво Скопје, град на светлина, култура и зеленило, а не град кој сега е завиен во темнина и кој се гуши во смет. Се чини дека сегашните локални власти се оддалечиле од основните потреби и желби на своите граѓани. На европско тло досега се спроведени неколку постапки за отповикување на градоначалници, како примерот со Хана Гронкиевич Валц која беше градоначалничка на Варшава. Исто така, се одржал локален референдум за отповикување на градоначалникот на Кишенев, а во 2015 година, по предлог на тогашниот британски премиер Девид Камерон, во Парламентот се усвоил механизмот за отповикување во Обединетото Кралство. Воедно и Петер Фелдман, контроверзниот градоначалник на германскиот финансиски центар Франкфурт, преку граѓански референдум бил сменет од функцијата – вели Зајкова.

Одземање на ингеренциите

Политичкиот аналитичар Синиша Пекевски не верува дека има време до мај идната година да биде спроведен референдум за разрешување на скопската градоначалничка од функцијата, но затоа, пак, тој смета дека наједноставното и најбезболно решение е Владата да ѝ одземе голем дел од ингеренциите на Арсовска.

– Не верувам дека ќе има референдум или дека ќе се организираат посебни скопски избори за смена на актуелната градоначалничка Данела Арсовска. Но, наједноставното решение е да ѝ се одземат ингеренциите поради лошо владеење со градот. Ние досега неколкупати сме биле сведоци на такви случаи, па многу лесно може да се случи истата судбина да ја снајде и Данела. На тој начин таа ќе си остане градоначалничка до крајот на својот мандат, но практично ќе ѝ бидат врзани рацете и нема да има право да носи важни одлуки за градот. Нејзините ингеренции би ги презела Владата или Министерството за локална самоуправа. Секако, причините за нејзиното одземање на ингеренциите се очигледното несоодветно менаџирање со институциите, ставањето на ЈСП во огромни долгови, создавањето голем долг кон приватните превозници и практично оставајќи го главниот град без градски превоз – објаснува Пекевски.

Откако ќе ѝ бидат одземени ингеренциите, додава тој, може да се потегне постапка за нејзино разрешување, секако, доколку се докаже дека направила кривично дело во време на својот мандат.

– А кога ќе се сетиме на сите нејзини наредби за разрешување на директори на јавни претпријатија, кога ќе се сетиме на „рачињата во медот“, за стопирањето на тендери за прочистителни станици, можеби и ќе се најде причина за нејзино кривично гонење, што во превод би значело разрешување – вели Пекевски.

Не постои импичмент за градоначалник

Постојат само две категории лица во нашава таканаречена држава кои се недопирливи – тоа се градоначаник и пратеник.

Борче Давитковски Професор

Во нашиот политички систем, само Господ може да смени градоначалник. Ова за Плусинфо неодамна го изјави Борче Давитковски, професор по административно право и јавна администрација на Институтот за правно-политички науки, на прашање дали во нашиот систем постои законска можност за отповикување градоначалник од функцијата.

– Никаква. Само Господ може да го земе. Само ако направи кривично дело, да биде осуден на ефективна казна затвор повеќе од шест месеци. Ниту има импичмент за градоначалник. Знаете, има можност за импичмент за претседател на државата, со двотретинско мнозинство во Парламентот, потврдена потоа од Уставниот суд. Значи, постојат само две категории лица во нашава таканаречена држава кои се недопирливи – тоа се градоначаник и пратеник. Ако сами не си дадат оставка, никој не може да ги смени од функција – изјави Давитковски.

Според Законот за локална самоуправа, мандатот на градоначалникот му престанува по сила на закон ако поднесе оставка, во случај на смрт, ако е осуден со правосилна пресуда за кривично дело на казна затвор во траење над шест месеци, ако со правосилно решение биде лишен од деловна способност, ако настапи случај на неспојливост за вршење на функцијата согласно Законот за локални избори, во случај на неоправдано отсуство подолго од шест месеци и ако престане да биде жител на општината.

Тој е кагегоричен дека градоначаник тешко е да се смени „екс леге“, зашто дури и да му биде поднесена кривична пријава, како што вели, „со нашево судство може да му поминат три мандата додека биде осуден“.

– Има 20 години како зборувам, еве точно во 2002 се донесе Законот за локална самоуправа, дека нема логика да можете да разрешите претседател на државата, а некој градоначаник на Кукуречани, Новаци или било која општина, да не можете да го разрешите, со никаква иницијатива, ниту со референдум, никој со ништо да не може да го разреши. Тоа е за жал вистината – вели професор Давитковски.

The post ДВОЈНИТЕ ИЗБОРИ ВО МАЈ ЌЕ БИДАТ ВСУШНОСТ – ТРОЈНИ? Скопјани преку референдум ќе ја менуваат Данела Арсовска appeared first on plusinfo.mk.

Од Левица за „Фокус“ објаснуваат дека тоа се случило при испраќањето на известувањето за одлуката за враќање на иницијативата за референдум, кое Џафери го проследи и до медиумите.

– Претседателот на Собранието Џафери до медиумите на писменото известување во врска со поднесената иницијатива за референдум, објави и лични податоци за подносителот Димитар Апасиев. Од негова страна ќе биде поднесено правно средство за утврдување на повреда до Агенцијата за заштита на лични податоци, велат од Левица.

Во известувањето за иницијативата за референдумот упатено до Апасиев, кое Џафери го испрати до медиумите, а голем дел од нив го објавија јавно, стои и домашната адреса на лидерот на Левица. Домашната адреса се смета за личен податок.

The post АПАСИЕВ ЌЕ ГО ПРИЈАВИ ЏАФЕРИ ЗА ОБЈАВУВАЊЕ ЛИЧНИ ПОДАТОЦИ Во известување до медиумите Џафери ја навел и адресата на Апасиев appeared first on plusinfo.mk.

– По однос на содржината на прашањето, тоа е само потсетување, не е моја обврска да навлегувам, потсетувам дека начинот на кој е поставено прашањето, може во понатамошната постапка да направи проблем, во смисла на она што укажуваат не јас, туку институциите во држава, кои утврдуваат дека таквите прашања не се општ правен акт, така што јас само го потсетувам на укажувањето на другите институции – изјави Џафери на денешната заедничка прес-конференција со претседателка на Националниот совет на швајцарскиот Федерален парламент, Ирене Келин, во одговор на новинарско прашање.

Тој додаде дека подносителот на иницијативата за референдум има двегодишно искуство како пратеник и се надева оти му е позната одредбата од членот 135 од Деловникот, на кој што го упатува, бидејќи таа е јасна и прецизна по кој основ треба да се доуреди барањето.

– Во секој случај ќе видиме во која насока ќе се исполнат барањата во законски предвидениот рок – додаде Џафери.

Претходно Апасиев изјави дека враќањето на нивната иницијатива за референдум од страна на претседателот на Собранието е само „купување време”, но дека тие ќе ја направат корекцијата во дадениот рок и повторно ќе ја поднесат.

The post РЕФЕРЕНДУМСКОТО ПРАШАЊЕ НА ЛЕВИЦА МОЖЕ ДА СОЗДАДЕ ПРОБЛЕМ Џафери го советува Апасиев да го прочита член 135 од Деловникот appeared first on plusinfo.mk.

Левица ќе му го направи ќефот на собранискиот спикер Талат Џафери и согласно неговите забелешки ќе ја корегира веќе поднесената иницијатива за референдум, но доколку и таа корегирана верзија биде одбиена, тогаш Собранието ќе се соочи со целосна блокада.

Ова го најави лидерот на Левица, Димитар Апасиев, кој истакна дека враќањето на веќе поднесената иницијатива е само едно обично губење време, бидејќи, како што рече, неговата партија повторно ќе ја поднесе корегираната верзија, чие евентуално отфрлање ќе предизвика парализа на целиот Парламент.

Прашање е колкава поддршка ќе добиеме од опозициската ВМРО-ДПМНЕ, бидејќи со нивните ресурси многу поефикасна би била блокадата.

Јована Мојсоска Левица

Но, прашањето што сега се поставува е како Левица планира да ја изведе целосната блокада на Собранието, со оглед на фактот дека има само двајца пратеници, додека, пак, владиното мнозинство брои 64? Дали можеби планира да ги здружи силите со најголемата опозициска партија ВМРО-ДПМНЕ, која и во моментов, среде економска и енергетска криза, блокира над педесетина закони во Парламентот и не дозволува да се изгласаат.

Јована Мојсоска, член на президиумот на Левица, во разговор со Плусинфо вели дека евентуалното отфрлање на корегираната иницијатива за референдум ќе ја натера партијата да почне да не бира средства како да ја закочи работата на Собранието.

Таа не ја отфрла евентуалната поддршка што би ја добила Левица од пратениците на ВМРО-ДПМНЕ кога ќе дојде ред да се парализира Парламентот.

– Ова нема да биде првпат Левица да го блокира Собранието. Ако се сеќавате, кога спикерот Талат Џафери насилнички го донесе Законот за државјанство, тогаш Левица поднесе околу 1.000 амандмани, кои, сепак, на крајот завршија во корпа за отпадоци и власта успеа да го прошверцува законот со европско знаменце. Тогаш нашите двајца пратеници блокираа околу 15 закони кои и до ден-денеска се блокирани. Дел беа блокирани со непрекинато зборување на комисии, дел со филибастеринг, односно со поднесување амандмани. Нешто слично ќе се повтори и овојпат доколку Џафери ја отфрли корегираната верзија на иницијативата за референдум. Ќе ги употребиме сите можни средства што ни стојат на располагање – филибастеринг со зборување, филибастеринг со амандмани, па ако треба и физички ќе ги спречиме пратениците од власта да присуствуваат на комисиите. Сега се поставува и прашањето колкава поддршка ќе добиеме од опозициската ВМРО-ДПМНЕ, бидејќи со нивните ресурси многу поефикасна би била блокадата. Но, ние овојпат зборуваме за целосна блокада, ниту еден закон да не може да биде изгласан, а не зборуваме за обично одолговлекување, нешто што досега го правеше партијата на Христијан Мицкоски – објаснува Мојсоска.

Став побаравме и од опозициската ВМРО-ДПМНЕ, но оттаму ни одговорија дека засега немаат донесено официјален заклучок како би делувале кога и по вторпат би била одбиена иницијативата за референдум поднесена од Левица.

– Ние веќе водиме активна блокада, но за жал Левица ја нема во Парламентот. Ја повикуваме да се приклучи и на тој начин блокадата да стане посилна – велат од ВМРО-ДПМНЕ за Плусинфо.

Претседателот на Собранието Талат Џафери синоќа преку соопштение го објави својот став дека барањето за одржување референдум поднесено од политичката партија Левица не е подготвено во согласност со собранискиот Деловник, а прашањето е несоодветно поставено, и побара во предвидениот рок од 15 дена предлагачот да го усогласи барањето со одредбите од Деловникот на Собранието.

Левица на 7 октомври до Собранието поднесе иницијатива за покренување задолжителен и дополнителен референдум на државно ниво на референдумско прашање „Дали сте за продолжување на преговорите со ЕУ со прифаќање на собраниските заклучоци од 16 јули 2022 година?“.

АПАСИЕВ: ЏАФЕРИ СЕ ОДНЕСУВА КАКО СИЛЕЏИЈА Иницијативата ќе биде корегирана и повторно поднесена

The post АКО ТРЕБА И СО ЖИВ ЅИД ЌЕ ГО БЛОКИРАМЕ СОБРАНИЕТО Левица агресивно ќе делува ако Џафери по вторпат ја отфрли иницијативата за референдум appeared first on plusinfo.mk.

– Иницијативата не е одбиена. Значи, ова не е ист случај како со претходната иницијатива на ДПМНЕ. Ако правилно го читаме, иницијативата е вратена на корекција, односно спикерот Џафери спротивно, во негов стил силеџиски, како уставен судија, но сега со друга финта ни ја врати да ја усогласиме во рок од 15 дена. Ние впрочем тоа и ќе го направиме, рече вечерва Апасиев во изјава за Сител ТВ.

Тој смета дека правното толкување на Џафери кое што е неиздржано е оти заклучокот бил став, а не бил акт и според тоа прашањето не било соодветно поставено.

– Имено, тој го занемарува членот 24 од Законот за референдум и други одлуки на непосредно изјаснување на граѓаните каде што вели дека дополнителен референдум каков што ние бараме може да се распише за други прашања за кои одлучувало Собранието. Токму такво прашање, значи не се бара акт туку прашање е заклучокот, односно заклучоците коишто ние ги ставаме на референдум. Оттука, ова враќање на спикерот Џафери е само добивање време, односно купување време, подвлекува Апасиев.

Тој го повтори ставот дека доколу Џафери ја отфрли иницијативата откако ќе ја коригираат ќе почнат со целосна блокада на Собранието.

– Се надеваме дека нема да се дрзне, бидејќи во спротивно ќе го блокираме целото Собрание затоа што тоа не е негова своина, не е негова сопственост и за ова одбивање ќе добие и соодветен поднесок од мене против него лично бидејќи како физичко лице ми ги објавил моите лични податоци што исто така е кривично дело, вели Апасиев.

Претседателот на Собранието Талат Џафери вечерва преку соопштение го објави својот став дека барањето за одржување референдум поднесено од политилката партија Левица не е подготвено во согласност со Собранискиот деловник, а прашањето е несоодветно поставено, и воедно бара во предвидениот рок од 15 дена предлагачот да го усогалси барањето со одредбите од Деловникот на Собранието.

Левица на 7 октомври до Собранието поднесе иницијатива за покренување задолжителен и дополнителен референдум на државно ниво на референдумско прашање „Дали сте за продолжување на преговорите со ЕУ со прифаќање на собраниските заклучоци од 16 јули 2022 година?”.

The post АПАСИЕВ: ЏАФЕРИ СЕ ОДНЕСУВА КАКО СИЛЕЏИЈА Иницијативата ќе биде корегирана и повторно поднесена appeared first on plusinfo.mk.

„Испитувајќи го вашето „Барање за покренување на граѓанска иницијатива на државно ниво за распишување на задолжителен дополнителен референдум“, увидов дека барањето не е подготвено во согласност со одредбите на Деловникот, а особено член 135 од истиот, а и поставеното прашање упатува на несоодветно поставено прашање од причина што, заклучоците не се општ правен акт, закон или устав, истите по негова природа и содржина се став кој ја насочува Владата на Република Северна Македонија во нејзиното постапување“, наведе вечерва Џафери во соопштение како одговор на граѓанската иницијатива за одржување референдум од Левица.

Претседателот на Собранието воедно бара во предвидениот рок предлагачот да го усогалси барањето со одредбите од Деловникот на Собранието.

„Имајќи го во предвид горенаведеното, а согласно член 136 од Деловникот на Собранието на Република Македонија, кој гласи: „Ако предлогот на закон не е подготвен во согласност со одредбите на овој Деловник, претседателот на Собранието, пред да го достави на пратениците, ќе побара од предлагачот да го усогласи со одредбите на овој Деловник. Ако предлагачот не го дополни предлогот на законот во рок од 15 дена од барањето на претседателот на Собранието, се смета дека предлогот на законот не е поднесен“, која одредба соодветно се применува и за сите други поднесоци. Барам во предвидениот рок, Вашето барање да го усогласите со одредите на Деловникот на Собранието на Република Македонија“, наведува Џафери.

Политичката партија Левица на 7 октомври до Собранието поднесе иницијатива за покренување задолжителен и дополнителен референдум на државно ниво на референдумско прашање „Дали сте за продолжување на преговорите со ЕУ со прифаќање на собраниските заклучоци од 16 јули 2022 година?”. Партијата собрала 750 потписи кои со останатите материјали ги предаде во собраниската архива.

Лидерот на Левица Димитар Апасиев на прес-конференција најави целосна блокада на Собранието доколку спикерот Талат Џафери ја отфрли и оваа иницијатива.

– Ние не очекуваме опструкции, доколку спикерот Талат Џафери се осмели да глуми уставен судија ќе почнеме со целосна блокада на Собранието, рече Апасиев.

Образложувајќи ја иницијативата рече дека таа се однесува на промена на заклучоците каде се спорни две точки.

– Тоа се точка 1 и точка 3Г, каде што се вметнати „францускиот” предлог и преговарачката рамка. Тоа практично би значело дека од ЕУ ќе се очекува нова преговарачка рамка без бугарските хегемонистички барања кои се инкорпорирани внатре. Тоа значи дека референдумот не е анти ЕУ, туку бојкотот на референдумот или недавањето да се случи референдум е чин на анти ЕУ. Демократското изјаснување на граѓаните не може да биде анти ЕУ, појасни Апасеив, при поднесувањето на иницијативата за референдум до ДИК.

Претседателот на Собранието Џафери на 13 септември ја отфрли иницијативата на опозициската ВМРО-ДПМНЕ за референдум за престанок на важењето на Законот за ратификација на Договорот за пријателство, добрососедство и соработка со Бугарија, образложувајќи дека е противуставна и оти меѓународните договори што се ратификувани во согласност со Уставот се дел од внатрешниот правен поредок и не можат да се менуваат со закон. Од ВМРО-ДПМНЕ тогаш оценија дека иницијативата е во сoгласност со членот 24 од Законот за референдум и порачаа дека Џафери нема основа да ја отфрли, додека од владејачката СДСМ ја поддржаа одлуката на Џафери поради тоа што и тие ја сметаат за неуставна.

The post ЏАФЕРИ Ѝ ГО ВРАТИ БАРАЊЕТО ЗА РЕФЕРЕНДУМ НА ЛЕВИЦА Не е во согласност со Деловникот, поставете го соодветно appeared first on plusinfo.mk.

– Ние не очекуваме опструкции. Доколку спикерот Талат Џафери се осмели да глуми уставен судија ќе почнеме со целосна блокада на Собранието, рече Апасиев.

Тој верува дека ќе има координација со пратениците од ВМРО-ДПМНЕ и нагласи дека очекуваат да бидат сериозно сфатени како опозиција.

– Се надеваме во добра волја да помине оваа референдумска иницијатива – рече Апасиев.

The post „ЛЕВИЦА“ СОБРА ПОТПИСИ ЗА ИНИЦИЈАТИВА ЗА РЕФЕРЕНДУМ Барањето ќе биде доставено до собраниската архива appeared first on plusinfo.mk.

Одговорајќи на новинарски прашања по посетата на Општина Штип заедно со градоначалникот Иван Јорданов, Мицкоски уште еднаш повтори дека ВМРО-ДПМНЕ нема да поддржи било каква промена на Уставот.

– Дадовме една иницијатива, знаете на каков начин беше одбиена од страна на Талат Џафери. Секоја иницијатива која е во насока на тоа што го бараме, ќе ја поддржиме, незвисно од која група граѓани доаѓа, дали таа група ќе ја формира политичка партија или не, ако темата се однесува на тоа што ние го бараме – рече Мицкоски.

Според него, ако се влезе во вртлогот на иницијативи, тогаш ќе се испушти суштината.

– Суштината е како да го спречиме асимилаторскиот договор да нанесе штета на идентитетот на македонскиот народ и вратата на која се отвара можноста за асимилација е токму промената на Уставот. Партеничката група на ВМРО-ДПМНЕ нема да поддржи било каква промена на Уставот, тоа треба да сте сигурни и сега кога е во опозиција, но и наскоро кога ќе ја формира идната Влада. Следната Влада на ВМРО-ДПМНЕ е подготвена да седне повторно на маса со Владата во Софија и да ги репреговара овие околности кои цениме дека се асимилаторски и се кочница за патот на Македонија кон полноправно членство во ЕУ, а не помагаат, да постигнеме вистински добрососедски договор кој навистина ќе ги подобри односите кои сега се на катастрофално ниско ниво меѓу двата народа и двете држави – истакна Мицкоски. 

The post МИЦКОСКИ И АПАСИЕВ ГИ ЗДРУЖУВААТ СИЛИТЕ Левица ќе поднесе иницијатива за референдум, ВМРО-ДПМНЕ ќе ја поддржи appeared first on plusinfo.mk.

Левица го товари Џафери дека „своеволно и спротивно на Уставот, Законот и Деловникот го оневозможил спроведувањето на граѓанската иницијатива на државно ниво за собирање 150.000 потписи за распишување задолжителен дополнителен референдум за Законот за ратификација на Договорот за добрососедство со Бугарија“.

Пријавениот се товари дека, „намерно и со умисла, преку противуставното, противзаконското и противделовничкото одбивање на уредната граѓанска иницијатива – поднесена од страна на група од 646 граѓани, на пропишаниот образец од страна на Државната изборна комисија – сторил тешко кривично дело против изборниот систем – „Спречување на избори и гласање”, казниво по чл. 158, ст. 1 од Кривичниот законик, со запретена минимална затворска казна од најмалку три години“.

Во пријавата се нотира дека, „со ова свое инкриминирано деликтно дејствие, преку злоупотреба на своите службени овластувања, пријавениот арбитрарно го ускратил врховното колективно уставно право на граѓаните, како носители на народниот суверенитет, на т.н. директна демократија, свесно спречувајќи нивно непосредно изјаснување по пат на референдум.

Според Левица, спикерот не е надлежен да се впушта во мериторно оценување на иницијативата за распишување референдум, туку исклучиво може само да ја цени нејзината уредност, како поднесок, од формално-правен аспект. Toj исто така не можел сам, без претходно прибавено мислење од две собраниски комисии, да одлучи за уредноста на иницијативата. Џафери бил должен прашањето да го префрли на парламентарниот пленум на Собранието, поради тоа што само тоа има уставна и материјална надлежност да цени дали истата ќе продолжи или ќе запре, бидејќи единствено Собранието, во полн состав, на пленарна седница, е надлежно мериторно да одлучи за уредноста или неуредноста на поднесената граѓанска иницијатива.

The post КРИВИЧНА ПРИЈАВА ПРОТИВ ТАЛАТ ЏАФЕРИ Левица го товари спикерот дека го прекршил Уставот и ги пречекорил овластувањата appeared first on plusinfo.mk.

Во јавноста кружат гласини дека опозицијата сериозно размислува да поднесе нова интерпелација против собранискиот спикер, особено откако тој ја отфрли иницијативата за референдум поднесена од ВМРО-ДПМНЕ и откако на некој начин ја повтори истата работа поради којашто му беше поднесена интерпелацијата во јуни годинава: кршење на одредбите на Уставот и Деловникот на Собранието.

Правните и политичките експерти тврдат дека претседателот на Собранието нема ингеренции да прифаќа или да отфрла иницијативи врз основа на тоа дали тие се уставни или противуставни, како што впрочем го стори тоа Џафери со отфрлање на повикот за референдум на опозициската ВМРО-ДПМНЕ. Според експертите, собранискиот спикер нема никакво право да го толкува Уставот, туку може да ја отфрли иницијативата единствено ако забележи дека таа не е уредно поднесена.

Со ваквиот потег, коментираат познавачите, Џафери ги надминал своите овластувања, ги прекршил процедурите и се ставил во улога на уставен судија, а како што додаваат, овие три работи се сосема доволни за опозицијата повторно да иницира интерпелација за спикерот.

Политичкиот аналитичар Петар Арсовски во разговор за Плусинфо вели дека поднесувањето интерпелација за Џафери е повеќе од извесно.

– Џафери ја отфрли иницијативата за референдум поради суштински, а не технички причини. Тоа значи дека тој смета оти иницијативата се коси со Уставот, односно дека не може меѓународен договор да се поништи со закон. Дилемата сега е дали за таквото решение требаше да одлучува Собранието, а не самиот Џафери? И второто прашање е дали требаше воопшто Собранието да одлучува или требаше да се поведе иницијатива пред Уставен суд, бидејќи Уставниот суд ја цени уставноста на таквите иницијативи. Од одговорот на овие прашања зависи дали Џафери треба да поднесе одговорност – објаснува Арсовски.

Од политички аспект, пак, тој вели дека на опозицијата сега не ѝ останува ништо друго освен да се радикализира и да започне со блокирање на работата на Собранието.

– Во оваа ситуација и двете страни губат. Власта губи затоа што со политички маневар отфрли иницијатива за референдум, па акумулираната негативна енергија кон Договорот со Бугарија сега нема каде да се потроши. Со референдумот ќе имаше каде да се издише. Исто така, на власта не ѝ оди во прилог и тоа што опозицијата сега нема друг избор освен да ескалира. Тоа веќе го најави лидерот на Левица, Димитар Апасиев, а чекаме официјален став и од ВМРО-ДПМНЕ. Едноставно, по такво отфрлање на иницијативата, опозицијата нема друг избор освен да се радикализира. Наскоро може да се случи целосна блокада на институциите, вклучително и интерпелација за Џафери. Јас дури мислам дека интерпелацијата би била само еден од почетните чекори на ВМРО-ДПМНЕ. Страшно ќе биде ако се блокира целото Собрание – изјави Арсовски.

Тој вели дека постојат негативни последици и за партијата на Христијан Мицкоски.

Наскоро може да се случи целосна блокада на институциите, вклучително и интерпелација за Џафери. Јас дури мислам дека интерпелацијата би била само еден од почетните чекори на ВМРО-ДПМНЕ. Страшно ќе биде ако се блокира целото Собрание.

Петар Арсовски Политички аналитичар

– Најголемата опозициска партија во земјава прелесно се откажа од иницијативата за референдум. Џафери ја отфрли иницијативата, а опозиционерите си свиркаа како штурци. Немаше никаква посериозна реакција, освен најава за заострување на односите со власта. Кај членството на партијата ова може да предизвика сомнеж дека раководството сепак не било толку искрено и дека се исплашило од евентуален колапс. Значи, овде не постои победник. Според мене, најпаметен потег за власта ќе беше да се дозволи референдумот, бидејќи е невозможно тој да биде успешен без поддршката на СДСМ. Потребна е излезност од најмалку 910.000 гласачи, а за ова прашање едноставно не постои заинтересираност кај албанските партии и шансите за успешен референдум уште на почеток беа мали – објаснува Арсовски.

Мислење побаравме и од професорот по уставно право, Борче Давитковски, кој смета дека и двете страни се подеднакво виновни.

– Грешката е обострана. Иницијативата на ВМРО-ДПМНЕ не беше добра, а не беше добро ниту образложението што го даде собранискиот спикер откако го одби повикот за референдум. Многу убаво е наведено во Член 118 од Уставот за тоа кој ги потпишува, а кој ги ратификува договорите. Вие не можете сега да го смените Законот за ратификување, бидејќи тоа може да го стори само оној што го склучил. И тука е измешана целата работа. Мислам дека треба да се седне и со трезвени глави да се надмине спорот. Се стремиме да живееме во демократија, а тоа значи дека за секое прашање може да се иницира референдум, бидејќи станува збор за народна иницијатива. Од друга страна, пак, потребно е референдумот да се изведе законски со сите нишани – вели Давитковски.

The post ЌЕ СЕ СОПНЕ ЛИ ЏАФЕРИ НА ПАДНАТИОТ РЕФЕРЕНДУМ? Интерпелација за спикерот е само почеток на опозициската радикализација appeared first on plusinfo.mk.