Претседателот на Владата, Христијан Мицкоски, денеска изјави дека проектот „Градски воз“ ќе донесе значајна промена во начинот на кој граѓаните од периферијата ќе патуваат кон центарот на Скопје, најавувајќи побрз, поеколошки и поефикасен јавен превоз.

Според него, првата линија, чија изградба треба да започне од 1 септември, ќе ги поврзе Зелениково, Драчево, Лисиче и Аеродром со Транспортниот центар и ќе претставува вистинска алтернатива на сегашниот сообраќаен метеж.

– Тоа ќе значи нов еколошки транспорт за голем дел граѓани коишто имаат дневна рутина да се движат кон центарот на градот на потегот од Зелениково преку Драчево, Лисиче, Аеродром до Транспортен центар. Во зимските месеци, кога загадувањето е сериозен проблем, со овој проект ќе обезбедиме побрз и почист превоз за голем број наши сограѓани. На реконструираната и електрифицирана пруга ќе се патува со брзина од 80 до 90 километри на час, наместо досегашните 20 до 30 – изјави Мицкоски.

Тој додаде дека паралелно се работи и на проширување на системот со уште две делници.

– Работиме и на другите две делници, од Ѓорче една, а другата од Илинден. Очекуваме целиот проект да биде заокружен во периодот 2027–2028 година. Ова ќе биде сериозна алтернатива за превоз на граѓаните што секојдневно патуваат од периферијата кон центарот на Скопје – рече премиерот.

Проектот „Градски воз“ се најавува како едно од клучните решенија за намалување на сообраќајниот метеж и аерозагадувањето во главниот град, со фокус на модернизација на железничката инфраструктура и подобра поврзаност на урбаните и приградските делови.

The post СЕ МЕНУВА ЈАВНИОТ ПРЕВОЗ ВО СКОПЈЕ Градскиот воз стартува од 1 септември, брзина до 90 км/ч appeared first on plusinfo.mk.

Изградбата на браната на реката Отиња кај Штип влегува во завршна фаза, со што источниот дел на државата наскоро ќе добие прво рекреативно вештачко езеро. Проектот, покрај туристичката функција, ќе има значајна улога и во наводнувањето и водоснабдувањето во регионот, истакна денеска при увид во работите заменик-претседателот на Владата и министер за транспорт, Александар Николоски.

– Ова ќе биде прво рекреативно вештачко езеро во источниот дел на државата, кое ќе го развие туризмот во регионот и ќе претставува главна туристичка атракција во текот на летото, но ќе се користи и за рекреација во текот на целата година. Покрај тоа, ќе отвори нови работни места – рече Николоски.

Покрај туристичката димензија, веќе се разгледуваат идеи за уредување на просторот околу езерото и дополнителни содржини за посетителите.

– Езерото ќе служи и за наводнување, како и за решавање на проблемот со водоснабдување во критични периоди. Трупот на браната ќе се користи како патека која ќе се поврзува со градот Штип и ќе овозможува пешачки и велосипедски патеки – додаде заменик-претседателот на Владата.

Изградбата на браната е веќе 70% завршена, а Николоски не ја исклучи можноста проектот да заврши пред предвидениот краен рок во април 2027 година.

– Ако не’ послужат временските услови, можеби уште оваа година ќе го завршиме езерото, а потоа ќе биде потребна една година за полнење. Тоа значи дека веќе во пролетта 2028 година жителите и туристите ќе можат да уживаат во новото езеро, кое навистина ќе биде атракција – посочи Николоски.

Станува збор за втор ваков проект на Владата, по изградбата на вештачкото езеро во Конско кај Гевгелија.

– Вкупниот буџет за изградба изнесува 448 милиони денари, обезбедени преку Министерството за транспорт. До денес се реализирани 311 милиони денари, и имаме доволно средства за целосно завршување на проектот. Благодарност до локалната и централната власт за соработката и координацијата околу овој исклучително значаен проект за Истокот на земјата – заклучи Николоски.

The post ЕЗЕРОТО ОТИЊА ГОТОВО ДО КРАЈОТ НА ГОДИНАТА? Штип наскоро ќе стане нова туристичка атракција appeared first on plusinfo.mk.

Вицепремиерот Александар Николоски од Вашингтон најави нови проекти за општините и продлабочена соработка со Светска Банка. Николоски оствари работна средба со Чарлс Кормиер,регионален директор за инфраструктура во Светска банка. Со Кормиер разговарале за зголемена соработка во делот на инфраструктурата, транспортот и локалниот развој.

Николоски нагласил дека поддршката од оваа меѓународна институција има големо значење за модернизацијата на државата.

– Ми претставува огромна чест овие два дена да се биде во Вашингтон, во седиштето на Светска банка, и да можам да се обратам како еден од главните говорници на глобалниот настан што го организира Светска банка – рече Николоски.

286 километри локални патиша, нема каде не се гради

Тој објасни дека на настанот „Transforming Transportation 2026“ ќе се дискутира за транспортот, комуникациите и инфраструктурата, како и за нивното влијание врз економскиот развој.

– Средбите се на високо ниво. До сега имаме одлична соработка со Светска банка. Нема општина, нема град, нема село во Македонија каде во моментов не се работат локални улици токму со средства од Светска банка – изјави вицепремиерот.

Според него, во моментов се реализираат околу 286 километри локални улици со финансиска поддршка од Светска банка.

Интегриран систем на царина, поврзување на 8 институции

Николоски најави и значајни подобрувања во царинскиот систем, каде што во еден интегриран систем ќе бидат поврзани 8 институции. Тоа, како што рече, ќе овозможи побрз проток на стоки и луѓе и ќе го намали задржувањето на товарниот сообраќај на границите.

– Ја подобруваме состојбата во Царината, каде во еден систем ќе се интегрираат осум институции, што ќе значи побрз проток на стока и луѓе – истакна Николоски.

Тој посочи и дека во тек е реконструкцијата на два важни гранични премини – Ќафасан, кој ја поврзува Македонија со Албанија, и Деве Баир, кој ја поврзува со Бугарија.

Интелигентни транспортни системи и урбана мобилност

Во наредниот период, Владата ќе работи и на воведување интелигентни транспортни системи, како и на подобрување на сообраќајната инфраструктура и управувањето со транспортот.

Посебен акцент, според Николоски, ќе биде ставен на урбаната мобилност. Пилот-проект веќе се подготвува за Скопје, по што ќе биде проширен и во другите градови.

– Најавувам бројни нови проекти кои ќе ги работиме во соработка со Светска банка, особено во делот на урбаната мобилност – рече тој.

Нови возила за комунална хигиена

Еден од предизвиците со кои се соочуваат општините, како што додаде, е хигиената. Затоа се подготвува проект со кој за Град Скопје ќе се обезбедат нови возила за комунална хигиена.

– Заедно со Светска банка работиме на проект за Град Скопје со кој ќе обезбедиме возила за Комунална хигиена, што треба целосно да ја промени сликата за чистотата на нашите општини – нагласи Николоски.

Тој истакна дека е голема чест што е избран како еден од тројцата говорници на годишната конференција на Светска банка во Вашингтон.

– Тоа е признание за Владата и за напорната работа. Ќе продолжиме со нашите меѓународни партнери да ја развиваме Македонија, да отвораме нови добро платени работни места и луѓето да остануваат во Македонија – порача Николоски.

На средбата, регионалниот директор за инфраструктура во Светска банка, Чарлс Кормиер, го поздравил присуството на вицепремиерот на глобалниот настан и нагласил дека годинава фокусот на Светска банка е ставен на решенија за одржлив и инклузивен транспорт, како клучен предуслов за економски раст и отворање нови работни места.

The post НИКОЛОСКИ НАЈАВИ ЕДЕН КУП НОВИ ПРОЕКТИ СО СВЕТСКА БАНКА Интелигентни транспортни системи, реконструкција на премини, нови комунални возила appeared first on plusinfo.mk.

Вицепремиерот и министер за транспорт и врски Александар Николоски денеска во Прилеп изјави дека првите 11 километри од автопатот Прилеп–Битола ќе бидат пуштени во употреба до крајот на 2026 година, додека целата траса во должина од 40 километри се очекува да биде готова до крајот на 2027 или почетокот на 2028 година.

– Изградбата на автопатот Прилеп–Битола се одвива одлично. Задоволен сум од изведбата. Очекуваме кон крајот на 2026 година да ги имаме функционални првите 11 километри, а целиот автопат од 40 километри да биде готов кон крајот на 2027 година или на почетокот на 2028 година, зависно од временските услови – изјави Николоски.

Тој нагласи дека автопатот ќе се надоврзува на експресниот пат Градско–Дреново–Фариш, а дополнително е планирано и автопатско поврзување од Фариш до Прилеп.

Изведувач на проектот е компанијата „Бехтел и Енка“.

Николоски присуствуваше во Прилеп на промоцијата на кандидатот за градоначалник од редовите на владејачката ВМРО-ДПМНЕ, при што ја искористи приликата да ја презентира динамиката на инфраструктурните проекти во регионот.

The post ЗАВРШУВАЊЕТО НА КОРИДОРОТ 10 ДОБИВА ДИНАМИКА Првите километри од автопатот Прилеп–Битола ќе бидат готови наскоро appeared first on plusinfo.mk.