Градот Скопје интензивно работи на решавање на долгогодишните проблеми со комуналната хигиена, а значително подобрување на состојбата се очекува веќе од септември, најави градоначалникот Орце Ѓорѓиевски на денешната прес-конференција.

Тој посочи дека при преземањето на функцијата биле затекнати само 16 функционални возила за собирање отпад, додека денес секојдневно на терен работат меѓу 50 и 60 возила.

– Не сакам да се жалам на состојбите што ги затекнавме, туку да зборувам за тоа што е направено и што се менува. Денес имаме значително повеќе возила на терен, иако голем дел од механизацијата е стара и често се соочуваме со дефекти – рече Ѓорѓиевски.

Тој нагласи дека со поддршка од Владата, Министерството за транспорт и Светската банка, Скопје ќе добие околу 40 нови возила од различен тип, наменети за комуналната хигиена.

Дополнително, Градот обезбедува уште четири нови возила и две претоварни станици, кои треба значително да ја подобрат ефикасноста во транспортот на отпадот.

Едната претоварна станица ќе биде поставена во Ѓорче Петров и ќе ги опслужува општините Ѓорче Петров, Карпош и Сарај, додека другата ќе биде лоцирана во Гази Баба.

Според Ѓорѓиевски, ова ќе овозможи камионите да не мораат постојано да патуваат до депонијата, туку побрзо да се враќаат на терен и да продолжат со собирање на отпадот.

Во тек е и набавка на 2.600 нови контејнери, кои треба да пристигнат за околу еден месец и претставуваат една од најголемите набавки во последната деценија.

– На многу локации контејнерите со години не биле заменети. Со оваа набавка решаваме уште еден сериозен проблем, кој директно влијае врз чистотата на градот – истакна градоначалникот.

Тој додаде дека во изминатиот период биле надминати и финансиски проблеми во ЈП „Комунална хигиена“, каде што биле наследени неисплатени плати и високи трошоци за работење.

– Полека, но сигурно го решаваме проблемот. Останува да пристигнат новата механизација и контејнерите, за целиот систем да биде ставен во целосна функција. Верувам дека од септември темата со отпадот повеќе нема да се третира како досега – порача Ѓорѓиевски.

The post ПРИСТИГНУВААТ 40 ВОЗИЛА И 2.600 КОНТЕЈНЕРИ ЗА ЃУБРЕ Ѓорѓиевски најави решавање на хаосот со отпадот во Скопје appeared first on plusinfo.mk.

Градот Скопје влегува во нова фаза на урбан развој со реактивирање на проектот за брз автобуски превоз (БРТ), најави градоначалникот Орце Ѓорѓиевски на денешната прес-конференција.

Тој порача дека процесот кој подолг период бил во застој сега повторно се придвижува, со поддршка од Владата и меѓународните партнери.

– Конечно го откочивме целиот процес и се подготвуваме за започнување на прелиминарната фаза. Овој проект ќе има значително влијание врз мобилноста во Скопје – изјави Ѓорѓиевски.

Покрај БРТ системот, градоначалникот истакна дека се работи и на поширока стратегија за урбана мобилност, која вклучува развој на велосипедска инфраструктура, пешачки зони и алтернативни начини на движење во градот во наредните години.

Ѓорѓиевски се осврна и на инвестициите во комуналната инфраструктура, посочувајќи дека се набавува нова механизација за одржување на хигиената, која ќе биде од корист не само за Скопје, туку и за други општини во државата.

Според него, ова претставува една од најголемите инвестиции во оваа област во последниот период, со поддршка од Владата и Светската банка.

Во рамки на инфраструктурните активности, тој најави и продолжување на повеќе булеварски проекти кои биле во застој, меѓу кои и булеварот Македонија, познат како „Лимак“ проект.

Ѓорѓиевски порача дека очекува продолжување на соработката со Министерството за транспорт и Светската банка, со цел реализација на проекти кои ќе го подобрат квалитетот на животот во Скопје и во другите општини низ земјата.

The post ПОЧНУВА РЕАЛИЗАЦИЈА НА БРТ ПРОЕКТОТ Скопје влегува во нова ера на урбан превоз appeared first on plusinfo.mk.

Градоначалникот на Скопје, Орце Ѓорѓиевски, најави дека започнува финалната фаза од реализацијата на проектот за поврзување на мостот Љубљанска со улицата Скупи, со што ќе се овозможи нова сообраќајна врска преку реката Вардар.

„Довербата што ја добив од граѓаните за мене е обврска да се работи и да се решаваат проблемите што со години стоеле заглавени. Денес можам да информирам дека овој важен мост конечно ќе биде ставен во функција“, напиша Ѓорѓиевски.

Тој нагласи дека станува збор за проект од големо значење за градот, кој ќе овозможи подобра поврзаност меѓу северниот и западниот дел на Скопје.

„Со неговото завршување, граѓаните ќе добијат побрз и побезбеден пристап до Злокуќани, Бардовци и индустриската зона, а воедно ќе се растоварат булеварите Партизански одреди и Илинденска“, посочи градоначалникот.

Според него, проектот претходно бил стопиран поради потребата од дозвола од надлежните институции за заштита на локалитетот Скупи, но сега таа е обезбедена и градежните работи продолжуваат со засилен интензитет.

„Со сериозна работа и одговорен пристап обезбедивме дозвола, го заштитивме културното наследство и продолжуваме со реализација на проектот“, додаде Ѓорѓиевски.

Паралелно со изградбата, најавено е и ново сообраќајно решение на влезот во овој дел од градот, кое ќе вклучува кружен тек или адаптивна семафоризација, со цел да се намали метежот и да се подобри безбедноста.

Ѓорѓиевски потенцира дека унапредувањето на инфраструктурата останува приоритет на градските власти.

„Скопјани заслужуваат функционален, поврзан и модерен град. Продолжуваме со работа и конкретни резултати“, порача тој.

The post 📽️ 📷 МОСТОТ НА ЉУБЉАНСКА ЌЕ СЕ ЗАВРШИ Ѓорѓиевски најави големо олеснување за сообраќајот во Скопје appeared first on plusinfo.mk.

Премиерот Христијан Мицкоски и градоначалникот на општина Аеродром, Дејан Митески денеска извршија увид во градежни работи на клучна сообраќајница во Мичурин.

На денешниот настан беше кажано дека започната е целосната реконструкција на една од најзначајните улици во населбата Мичурин во општина Аеродром, Симеон Кавракиров.

Премиерот и градоначалникот извршија увид во почетокот на градежните активности, со што официјално се означи стартот на реализацијата на овој значаен инфраструктурен проект.

Со должина од 485 метри, улицата Симеон Кавракиров претставува важна сообраќајна артерија низ која секојдневно се одвива интензивен сообраќај.

Реконструкцијата има за цел унапредување на безбедноста, мобилноста и севкупниот квалитет на живот на граѓаните.

Проектот опфаќа целосна обнова на коловозот, изградба на нови и безбедни тротоари, поставување нова асфалтна конструкција. Вкупно 3.950 квадратни метри асфалт и 2.305 квадратни метри тротоари со бехатон. Вкупната вредност на инвестицијата изнесува 22.630.000 денари.

Како што беше посочено, реконструкцијата на улицата Симеон Кавракиров е дел од поширок инфраструктурен зафат на општина Аеродром, што опфаќа реконструкција на 18 улици во вкупна должина од 5,4 километри, со вкупна вредност од 138 милиони денари. Средствата за реализација на проектите се обезбедени од Владата преку Министерството за транспорт и врски.

Премиерот во изјава за медиумите рече дека многу е важно што се подобрува квалитетот на животот на граѓаните.

– Уште неколку проекти што се финансирани од страна на Владата во општините. Од тоа што можев да го слушнам од градоначалникот, станува збор за вкупен обем на улици и придружна инфраструктура, во вредност поголема од 130 милиони денари, меѓу другото тоа се неколку проекти што покрај што веќе се реализираат од страна на програмата на Владата за финансирање на проекти во општините. Општина Аеродром на овој начин добива додадена вредност и тоа е многу важно затоа што се подобрува квалитетот на животот на граѓаните – нагласи премиерот.

Тој им се заблагодари на градоначалникот, на советниците, на пратениците.

– На сите оние коишто учествуваат во реализацијата на овие проекти, бидејќи само на овој начин, можеме да покажеме дека тоа што го ветуваме тоа и го испорачуваме за граѓаните. Јас сум задоволен кога гледам со каква динамика се работат проектите, еве се запролети и веќе наеднаш повторно сите градилишта се рестартираат, така што очекуваме оваа година сето она што беше почнато со првиот и вториот повик преку Министерството за локална самоуправа да биде завршено, а следната година да имаме одреден буџет за да објавиме нов повик и нови проекти да реализираме во општините – додаде Мицкоски.

Беше кажано дека Општина Аеродром останува посветена на реализација на проекти што обезбедуваат модерна, безбедна и функционална инфраструктура, во интерес на сите граѓани.

– Ова е трета улица што се реализира од проектот. Веќе се започнати со реализација две улици. Очекувам дека до крајот на летото ќе бидат комплетно реконструирани сите 18 улици – истакна градоначалникот на општина Аеродром.

The post ДО КРАЈОТ НА ЛЕТОТО 18 НОВИ УЛИЦИ Општина Аеродром со голем инфраструктурен зафат вреден 138 милиони денари appeared first on plusinfo.mk.

Ново видео објавено од градоначалникот на Скопје, Орце Ѓорѓиевски, покажува како изгледа завршената прва фаза од булевар Македонија. На снимката може да се види обновениот коловоз, проширените сообраќајни ленти и подобрената проточност на сообраќајот на овој важен градски потег.

„Првата фаза од булеварот Македонија е готова. Чекор поблиску до првата подземна сообраќајница. Скопје го правиме заедно. По скопски“, напиша Ѓорѓиевски во објавата покрај видеото.

Според него, работите се одвивале со засилена динамика, често и во ноќните часови. На терен е извршена реконструкција и рехабилитација на постојниот коловоз, како и проширување на дел од сообраќајните ленти, со што значително се подобрува проточноста и функционалноста на сообраќајот.

Проектот ги опфаќа булеварот Борис Трајковски кај Рампа, улиците 11 Октомври и Пролет, како и дел од булеварот Македонија кој ќе се поврзува со следните фази. Во рамки на првата фаза, улицата Пролет е проширена со дополнителна коловозна лента на потегот од полициската станица „Пролет“ до Тутунскиот комбинат, а раскрсниците се уредени со нови сообраќајни острови.

Во текот на вечерните часови ќе се изврши и целосно обележување на коловозот, по што потегот ќе биде целосно подготвен за користење. Во наредните фази е предвидена изградба на кружен тек кај „Нова Македонија“, уште два кружни текови меѓу булеварот Кочо Рацин и улицата Јордан Мијалков, како и проширување на булеварот Св. Кирил и Методиј.

Паралелно се работи и на атмосферската канализација со поставување повеќе од 60 шахти и сливници, што треба да обезбеди долгорочна функционалност на инфраструктурата.

The post 📽️ СНИМКА ОД ВОЗДУХ И ОД ТЕРЕН НА БУЛЕВАР МАКЕДОНИЈА Ѓорѓиевски покажа како изгледа по завршената прва фаза appeared first on plusinfo.mk.

Градоначалничката на Општина Кисела Вода, Бети Стаменкоска Трајкоска информираше дека во првите 100 дена од мандатот се реализирани пет километри нов асфалт, отворено е кино во Драчево и се работи на повеќе од 20 капитални проекти.

Таа нагласи дека под слоганот „100 дена, 100 дела“ општината работи со засилено темпо и со фокус на конкретни резултати.

– Со реализирани 5 километри нов асфалт, со отворено ново кино и интензивна работа на над 20 крупни капитални проекти, покажавме дека динамиката не запира. Дел од зафатите се веќе пуштени во употреба, а други се во напредна фаза – изјави Стаменкоска Трајкоска, додавајќи дека значаен дел од проектите се реализираат со поддршка од Владата.

Според презентираниот отчет, во изминатиот период се реконструирани клучни сообраќајници, меѓу кои улиците Ѓорѓи Димитров и 527, а при крај се работите на Жил Верн и Саса со нејзините краци. Паралелно се гради фекална канализација во Бабин Дол, во завршна фаза е атмосферската мрежа на улицата Томе Арсовски, во тек е изградба на два нови паркинга, како и на две од предвидените 10 детски катчиња — едното во село Драчево, другото во Дупки.

– Општината воведе и новини во управувањето со отпад, при што за првпат се поставени 15 специјализирани контејнери за селекција на текстилен отпад пред месните заедници, а во подготовка се уште 15 пред училиштата. Веќе е складиран и првиот тон текстилен отпад – посочи градоначалничката.

Во рамки на еколошките активности, исчистени се 27 диви депонии, а во соработка со ЈП Национални шуми најавено е засадување на 3.000 нови садници.

Како значаен чекор во општествениот живот беше издвоено отворањето кино во Драчево — прво кино во село по повеќе децении. Во делот на грижата за децата, општината најави отворање на две нови градинки во „11 Октомври Згради“ и „Подстаница“, додека во тек е изградбата на објектот во „Расадник“. Со владина поддршка се вршат доградби во училиштата „Невена Георгиева Дуња“ и „Кирил Пејчиновиќ“, а се гради и ново училиште во Драчево.

Во спортската инфраструктура се инвестира преку изградба на спортски сали во училиштата „Круме Кепески“ и „Кузман Јосифовски Питу“, како и преку целосна реконструкција на салата „Расадник“.

– Силен акцент ставивме на едукацијата и инклузијата: наставниците по физичко поминаа специјализирани обуки за работа со деца со попреченост, обезбедивме бесплатни часови по шах за младите, а воведовме и манифестација Спортист на годината која планираме да прерасне во традиција – нагласи Стаменкоска Трајкоска.

Во делот на социјалната заштита, отворен е нов Центар за бесплатни логопедско-дефектолошки третмани во Драчево, а во завршна фаза е едукативно-терапевтски центар во Црниче наменет за деца со дислексија, дисграфија и дискалкулија. На крајот од отчетот, градоначалничката порача дека реализираните активности се само почеток на поширока програма.

– Ова е само почеток на една амбициозна приказна. Нашата крајна цел е целосна реализација на ветената програма. Ова беа само 100 дена, продолжуваме понатаму, заедно – изјави Стаменкоска Трајкоска.

The post 📽️ 100 ДЕНА – 100 ДЕЛА ВО КИСЕЛА ВОДА Нов асфалт, кино и десетици проекти во тек, отчет на Стаменкоска Трајкоска appeared first on plusinfo.mk.

Буџетот на Град Скопје за 2026 година е усвоен со поддршка од повеќето советници, а според претседателот на Советот на Град Скопје, Даме Димитровски, станува збор за документ што означува почеток на реална преродба на главниот град.

– Ова е моментот кога ветувањата стануваат реалност. Буџетот за 2026 година е доказ дека кога има визија и ред, резултатите се неизбежни – порача Димитровски, нагласувајќи дека станува збор за директно исполнување на деветте темелни политики за развиено Скопје – најавени во кампањата.

Еден од клучните сегменти е т.н. „зелен буџет“, каде средствата за животната средина се речиси двојно зголемени. Градот, како што посочи Димитровски, го откочил проектот за поставување фотоволтаици во училиштата, а дополнително се инвестираат 210 милиони денари во јавно зеленило.

– Ова е нашиот конкретен одговор на загадувањето, не декларации, туку реални инвестиции – истакна тој.

Инфраструктурата останува во силен фокус, со вкупно 1,7 милијарди денари наменети за капитални инвестиции. Ќе се реконструираат клучни булевари и улици, при што безбедноста во сообраќајот е поставена како приоритет.

– Обезбедивме средства за сообраќајна сигнализација и проекти со кои ‘Визија Нула’ и програмата ‘Safe to school’ конечно ќе станат реалност на терен – нагласи Димитровски.

Посебно внимание се посветува и на јавните простори. Во 2026 година, 90 милиони денари ќе се инвестираат во детски катчиња, паркови, фитнес зони и пешачки патеки.

– Јавниот простор го враќаме на граѓаните. Скопје мора да биде град каде секој може да се движи слободно и безбедно – рече претседателот на Советот.

Образованието и младите се издвојуваат како темелен приоритет, со зголемување на буџетот за 7,5 проценти. Предвидена е изградба на ново училиште, нови спортски терени, ИТ-опрема, а за првпат и униформи за сите средношколци во прва година.

– Инвестицијата во младите е инвестиција во иднината и развојот на Скопје – порача Димитровски.

Културата добива двојно поголема поддршка, со цел да се зачува проектот „Европска престолнина на културата – Скопје 2028“, додека паралелно се зајакнува и противпожарната заштита преку вработување на 30 нови пожарникари и набавка на современа опрема.

Според Димитровски, буџетот од 5,2 милијарди денари е буџет на одговорност и финансиска консолидација.

– Скопјани не бараат импровизации и спектакли, туку решенија што функционираат. Со јасен план, градот конечно застанува на нозе – заклучи тој.

The post БУЏЕТ СО КОЈ СКОПЈЕ ЌЕ ЗАСТАНЕ НА НОЗЕ Димитровски најавува преродба на градот и ги откри инвестициите appeared first on plusinfo.mk.

Скопските средни училишта добиваат нови и обновени спортски терени, дел од големата акција на Град Скопје за унапредување на спортската инфраструктура и поттикнување на здрави навики кај младите. Градските служби интензивно работат на реконструкции и изградба на современи игралишта во повеќе училишта, со фокус на безбедност, квалитет и функционалност.

Градоначалникот на Скопје, Орце Ѓорѓиевски, вели дека ова е инвестиција насочена директно кон иднината на младите генерации.

– Горд сум кога нашата визија добива форма. Со силна и јасна цел да ги мотивираме средношколците да живеат здраво, ставаме огромен фокус во спортската инфраструктура. Ова е инвестиција во здрави генерации кои се темелот на нашата иднина – истакна Ѓорѓиевски.

Во моментов се работи во шест средни училишта:

– СУГС „Браќа Миладиновци“ – ново повеќенаменско игралиште,

– СУГС „Здравко Цветковски“ – терен со специјално уредени спринт-патеки,

– СУГС „Димитар Влахов“ – нови фудбалски и кошаркарски терени,

– СУГС „Кочо Рацин“ – фудбалско игралиште, терен за одбојка и реконструиран под во салата,

– СУГС „8 Септември“ – игралиште за кошарка и одбојка,

– СУГС „Ѓорѓи Димитров“ – тениско, кошаркарско и фудбалско игралиште.

Сите терени се градат со полипропиленски спортски подови од ист тип како оние користени на Летните олимписки игри во 2024 година, материјали кои обезбедуваат издржливост, професионални услови и највисок степен на безбедност за учениците.

Од Град Скопје додаваат дека инвестициите ќе продолжат и понатаму, со цел спортот да стане навика и дел од секојдневието на младите.

– Спортот е навика, дисциплина, карактер и тимска работа. Затоа континуирано ќе ја развиваме оваа инфраструктура. Скопје заслужува. А младите – повеќе од било кој – порача градоначалникот.

The post СКОПЈЕ ГРАДИ НОВИ ТЕРЕНИ ЗА МЛАДИТЕ Голема инвестиција во училиштниот спорт и во здрави генерации appeared first on plusinfo.mk.

Советот на Град Скопје денеска го изгласа ребалансот на буџетот со 37 гласови „за“, еден „против“ и еден „воздржан“, со што се отвора пат за стабилизирање на финансиската состојба и забрзување на проектите што со години стоеле во место.

Од Град Скопје велат дека ребалансот е пресвртница по долг период на блокади и нефункционалност.

– Со оваа одлука конечно се затвора едно проблематично поглавје и се отвора нова фаза. Буџетскиот дефицит го намалуваме за речиси милијарда денари, а капиталните инвестиции ги зголемуваме за околу 99 милиони. Тоа значи дека завршуваат импровизациите и почнува работата – порачуваат од кабинетот на градоначалникот.

Од градската администрација додаваат дека со ребалансот се гарантира редовна исплата на платите во јавните претпријатија и значително кратење на непродуктивните трошоци.

Според Град Скопје, клучен дел од ребалансот е зајакнувањето на јавниот превоз.

– Соработуваме со Министерството за транспорт за повторно да се активира Градскиот воз – нешто што скопјани одамна го бараат. Истовремено продолжува постапката за набавка на 80 нови автобуси, што веќе ја спроведува Владата – велат од градот.

Во план е и разгледување на БРТ-системот како современо решение за побрз и поефикасен градски превоз.

До крајот на годината, како што информира Град Скопје, сите училишта ќе добијат нови спортски терени, фитнес-зони, смарт-табли, информатички кабинети и по еден лаптоп за секој ученик првенец на генерација. Ќе се реши и деценискиот проблем со недостигот на клупи и столчиња.

Зелениот дел од буџетот предвидува почеток на парковите „Христијан Тодоровски – Карпош“ и „Лепенец“, како и 50 нови мали паркови низ различни општини.

Во делот на инфраструктурата ќе продолжат проектите што со години стагнираа: реконструкцијата на Фрањо Клуз, кружниот тек во Ѓорче Петров, третата лента на булевар Александар Македонски, булеварите АСНОМ, Хрватска и клучката кај Момин Поток.

Обезбедени се и пари за проектна документација за неколку улици и за експропријации, што отвора простор за големи булеварски зафати, вклучително и продолжувањето на Борис Трајковски.

– Овој ребаланс значи крај на застојот. Влегуваме во период на стабилизација и развој, со цел Скопје конечно да се врати на вистинскиот развоен пат – порача градоначалникот преку службите на Град Скопје.

The post СКОПЈЕ ВЛЕГУВА ВО НОВА ФАЗА НА РАЗВОЈ Изгласан ребалансот, следуваат паркови, автобуси и реконструкции appeared first on plusinfo.mk.

Градоначалникот на Скопје, Орце Ѓорѓиевски ја најави денес официјално потпишаната одлука за јавна набавка за изградба на првата фаза од првата подземна сообраќајница во главниот град. Проектот ќе се реализира на потегот од под „Лимак“ до влезот на Кисела Вода.

– По завршувањето на правната постапка, веднаш започнуваме со работа. Ова е проект што претставува вистински пресврт за централното градско подрачје, капитална инвестиција што ќе го растовари сообраќајниот метеж и ќе донесе нова динамика во срцето на градот – истакна градоначалникот во својата објава на Фејсбук.

Со изградбата на подземната сообраќајница, Скопје ќе добие шест ленти, четири за двосмерен автомобилски сообраќај, две наменети за јавен превоз и дополнителни пешачки патеки, кои ќе овозможат побезбеден и побрз проток на возила.

Дополнително, новиот кружен тек кај „Нова Македонија“ и двата кружни тека на потегот кај булевар Кочо Рацин и улица Железничка ќе го подобрат сообраќајното движење и ќе внесат паметни, модерни решенија во согласност со европските стандарди.

– Со пуштањето во употреба на подземната сообраќајница под „Лимак“, Скопје ќе го добие своето прво подземно сообраќајно чудо, нешто што досега не било својствено за нашиот град. Овој проект значи дека центарот ќе се ослободи од гужвите, станувајќи покомфорен, побезбеден и поуреден простор за сите – додава Ѓорѓиевски.

Градоначалникот го нарече проектот симбол на новото време за Скопје и потврди дека преродбата на градот официјално започнува.

The post СКОПЈЕ ДОБИВА ПОДЗЕМНА СООБРАЌАЈНИЦА Шест ленти, пешачки патеки и современи кружни текови за побезбеден град appeared first on plusinfo.mk.