Во последните години зборот „одржливост“ стана еден од најчесто употребуваните во светската економија. Но, зад тој збор не стои само нова регулатива, нов стандард или нов административен процес. Зад него стои суштинска промена во начинот на кој функционира светот, рече денеска премиерот Христијан Мицкоски во обраќањето на настанот „Претворање на одржливоста во конкурентност: Градење отпорни бизниси во неизвесен свет“.

Тој рече станува збор за суштинска промена во начинот на функционирање на економијата, каде што  успешни не се само компаниите што произведуваат квалитетни производи, туку и оние што одговорно управуваат со ресурсите, инвестираат во човечкиот капитал и градат доверба кај инвеститорите, партнерите и потрошувачите.

Мицкоски нагласи дека одржливиот развој не се однесува само на екологија и усогласување со европските стандарди, туку на поширок модел на економија што создава сигурност, отпорност на кризи и стабилни институции.

– Зборуваме за модел на економски развој кој создава сигурност. За држава која е отпорна на кризи. За институции кои создаваат доверба. За стопанство кое е способно да се натпреварува на најразвиените пазари. За економија која создава можности за младите да останат овде, да основаат компании, да инвестираат и да ја градат својата иднина дома. Денес светот е значително поразличен од оној што го познававме пред само неколку години. Војните, енергетската криза, нарушените синџири на снабдување, инфлациските притисоци и новите геополитички поделби покажаа дека економската стабилност повеќе не може да се зема здраво за готово- рече Мицкоски.

Во такви услови, според него, одржливоста престанува да биде избор – таа станува предуслов за конкурентност.

– Компаниите што навремено ќе се прилагодат ќе имаат пристап до нови пазари, до нов капитал и до нови инвеститори. Оние што ќе инвестираат во енергетска ефикасност, дигитализација, иновации и знаење ќе бидат компаниите што ќе го водат економскиот развој во следната деценија – порача премиерот.

Затоа Владата, рече Мицкоски, ја гледа својата улога како активен партнер на стопанството.

– Наша обврска е да создадеме предвидлива деловна клима, ефикасни институции, модерна инфраструктура, квалитетно образование и регулаторна рамка што нема да ги кочи инвестициите, туку ќе ги поттикнува. И кога зборуваме за резултати, не зборуваме за бројки сами по себе. Зад секој економски показател стојат илјадници човечки приказни. Стои нечија нова работа. Стои новоотворена фабрика. Стои повисока плата. Стои семејство кое полесно ги покрива месечните трошоци. Стои млад човек кој одлучил својата иднина да ја гради овде – рече Мицкоски.

Затоа е важно, додаде, да се погледнат фактите.

– Ако погледнеме наназад, ќе видиме дека во периодот од 2017 до 2023 година просечниот економски раст изнесуваше околу 1,8%. Денес веќе зборуваме за сосема поинаква динамика. Во 2024 година економијата порасна за 3%, во 2025 година за 3,5%, а и во текот на оваа година ја задржуваме стабилната позитивна траекторија на раст. Тоа не е случајност. Тоа е резултат на враќањето на довербата, на стабилизирањето на јавните финансии, на активната поддршка за инвестициите и на заедничката работа со приватниот сектор – рече Мицкоски.

Тој додаде дека владата успеала да се справи со еден од најголемите економски предизвици со кои се соочи Европа – инфлацијата.

– Инфлацијата, која во 2022 година достигна 14,2 проценти и сериозно го наруши животниот стандард на граѓаните, денес е значително пониска. Во мај годинава таа изнесуваше 4,8%, и тоа во услови кога светот сè уште се соочува со неизвесност и последиците од глобалната енергетска и економска криза – рече Мицкоски.

Но, најважниот економски показател, оцени, не е само растот на БДП. Најважниот показател е дали луѓето живеат подобро.

Денешниот форум го организира канцеларијата на ОН во соработка со Стопанската комора и Министерството за надворешни работи и надворешна трговија.

Покрај премиерот, обраќања ќе имаат и министерот за надворешни работи и надворешна трговија, Тимчо Муцунски, евроамбасадорот Михалис Рокас, претседателот на Стопанска комора Бранко Азески, како и Рита Колумбија, постојаната координаторка на ОН во земјава.

The post ИДНИНАТА НА ЕКОНОМИЈАТА СЕ ИНВЕСТИЦИИТЕ ВО ИНОВАЦИИ И ВО ЧОВЕЧКИ КАПИТАЛ Мицкоски вети деловната клима која нема да го кочи развојот на компаниите appeared first on plusinfo.mk.

Претседателот на владата, Христијан Мицкоски во интервју на МРТ по повод две години од мандатот на владата, посочи дека и покрај тоа што оваа енергетска криза е полоша од претходните три, владата поуспешно работи од претходната и тоа го говорат фактите, односно во време на владите на СДСМ буџетскиот дефицит беше 5,3%, а сега со нафтената криза е 3,5%, додека платите беа во минус 3% реален раст, додека сега реалниот раст е 3%.

– Кога сме кај буџетскиот дефицит, зедов параметри и од претходната влада кои се многу важни затоа што кога зборувате за нешто, треба да зборувате со споредба, не може напамет. Кога ќе речат, оставете порано да видиме вие, добро, ама ние мора тоа да го споредиме со нешто, да видиме дали добро правиме или погрешно. Логично е да споредиме со нешто пред нас. Ако тоа го земете, во 2020 да не го сметаме буџетскиот дефицит кој е 8%, ковид период, но 2021 година 5,3% од БДП, во 2022 година е 4,4%, следната 4,6%, а ние лани бевме под 4%, оваа година ни беше целта 3,5%. Ова го зборувам поради една едноставна причина, оваа година да не беше кризата која се случи, и овие 3,5% на крај на годината ќе беа пониски – истакна премиерот Мицкоски.

Премиерот Мицкоски додаде дека за оваа енергетска криза за која сите велат дека по рихтеража, по јачина е поголема од трите последни енергетски кризи заедно, односно 2022, војната во Украина и оние од седумдесеттите години на минатиот век, и тоа го вели Светската енергетска агенција, господинот Фатих Бирол, претседателот, кој вели дека по јачина и последиците оваа криза ќе биде многу подевастирачка отколку тие три заедно.

– Што направивме ние. Ако вие ги анализирате параметрите економски сега, со тие од 2022 година. Во 2022 година реалниот раст на платите бил минус 2,9%, а сега е 3%, 6% во плус. Да одиме по други параметри, да речеме инфлација, во 2022 година 14,2%, сега е 4,5%. Било проекција 3,5%, се случи тоа што се случи, но не е 14,5%. Тогаш 2022 година се завршила со раст БДП од 2,8%, а сега растот е 3,1% во првиот квартал, очекувам до крај на годината 3,5%. Ова се параметри, ова се бројки кои вие не можете да ги игнорирате – нагласи премиерот Мицкоски.

Мицкоски: Има историска градба паралелно на 6 автопатишта

Претседателот на владата Христијан Мицкоски во интервју на Македонската радио телевизија по повод две години мандат вели дека во моментот има историска градба паралелно на 6 автопатишта во Македонија.

– Јас сум среќен што можам да кажам дека ние финансиски го затворивме Кичево Охрид конечно, благодарение на еден синдикат креиран од домашните банки, откако не оставија на цедило би рекол условно кинеските заемодаватели. Финансиски за оваа година го затворивме исто благодарение на домашните банки проектот коридор 8 и коридор 10д. Сега бараме на меѓународен пазар следна недела во вторник ЈПДП ќе бара од надворешни заемодаватели сума рамковна за до крајот на проектот со што до крај ќе ги обезбедиме парите – вели премиерот.

Тој додаде дека претходната влада не само што немаше мрднато ништо од тој проект, туку едноставно ги немаше ни финансиски затворено тој проект.

– Тоа е уште потрагично, значи они ни со експропријација ништо немаа направено, туку тие нема ниту финансии за проектот. И сега кога ќе ме обвинуваат немало пари за тој и тој проект, а што направивте вие? Така што тој го затворивме проект. Добро е што конечно после не знам колку перипетии Блаце – Скопје имаме договор, и конечно после многу години македонска фирма го прави тоа. Добива тендер од Европските банки, македонска фирма Гранит. Добро е затоа што на крајот од денот тој финансиски аранжман има грант но има и кредит кон што го плаќаат македонските даночни обврзници. Кога ќе работи македонска компанија посебно ми е драго, затоа што знам дека тоа е добро за македонската економија – додава премиерот.

Мицкоски истакна дека се при крај со Букојчани-Кичево, тоа е практично спојот помеѓу проектот на Сино хидро и Бехтел и Енка. Завршена е процедурата, очекуваме и тој автопат да почне.

– Така што практично во еден момент ќе имаме 5 до 6 делници. Ќе ја имаме делницата Тетово – Гостивар, Гостивар – Букојчани, ќе ја имаме делницата Букојчани – Кичево, спојот меѓу автопатот на Синохидро и Бехтел и Енка, ќе се дозавршува автопатот Кичево – Охрид, почетна фаза Блаце – Скопје, во напредна фаза ќе биде Прилеп – Битола очекувам прва половина следна година да имаме десетина километри пуштено на делницата Прилеп – Битола. Тоа историски не се правело во Македонија, 6 делници автопатишта да се градат – дециден е Мицкоски.

The post ПРЕМИЕРОТ ТВРДИ ДЕКА ВЛАДАТА СЕ СПРАВУВА ПОДОБРО СО КРИЗАТА Инфлацијата падна од 14,2 на 4,5 проценти appeared first on plusinfo.mk.

Поранешната министерка за труд и социјална политика, Јована Тренчевска, денеска зборуваше за животниот стандард, иако токму во времето кога СДСМ беше на власт граѓаните се соочуваа со двоцифрена инфлација и со сериозно намалување на куповната моќ, се вели во реакцијата на ВМРО-ДПМНЕ на прес-конференцијата на Тренчевска од СДСМ.

„По 7 години политики кои го доведоа народот на работ на егзистенција, денес на СДСМ им пречат мерките што носат повисоки приходи и подобар стандард за граѓаните. Владата, и покрај наследената празна државна каса од СДСМ и последиците од глобалната криза, спроведува политики кои даваат конкретни резултати. Просечната нето-плата од 2024 година до денес е зголемена за близу 8.000 денари, односно за 19,6%, додека инфлацијата е стабилизирана“, соопшти ВМРО-ДПМНЕ.

Зголемени се пензиите, како и платите на здравствените работници, просветните работници и вработените во одбраната и полицијата, се додава во соопштението.

„Стапката на невработеност е намалена од 12,5% на 11,3%, додека стапката на вработеност е зголемена од 45,6% на 46,5%. Економските показатели го потврдуваат напредокот. Македонија бележи раст на БДП од 3% во 7 последователни квартали и се вбројува меѓу побрзорастечките економии во Европа. Овие резултати покажуваат дека економските политики на Владата носат конкретни придобивки за граѓаните и создаваат основа за натамошно подобрување на животниот стандард“, соопшти ВМРО-ДПМНЕ.

Пратеничката и потпретседателка на СДСМ, Тренчевска денеска рече дека после 2 години од Владата на ВМРО-ДПМНЕ животниот стандард на граѓаните е намален.

– Нема ништо од ветувањата за повисоки плати, за достоинствен живот на социјално ранливите категории на граѓаните – рече Тренчевска.

Социјално ранливите категории на граѓаните се заборавени од оваа Влада, додаде таа, а ветувањата кон нив, за зголемување на гарантираната минимална помош и на посебниот додаток, не се исполнети.

The post ВО ВРЕМЕТО НА СДСМ ГРАЃАНИТЕ ОСИРОМАШИЈА, СЕГА ТРЕНЧЕВСКА КРИТИКУВА ЗА ЖИВОТНИОТ СТАНДАРД Реакција на ВМРО-ДПМНЕ на обвинувањата од потпретседателката на СДСМ appeared first on plusinfo.mk.

Официјалните податоци потврдуваат дека платите во Македонија бележат значителен раст – во март 2024 година просечната нето-плата изнесуваше 40.496 денари, додека во март 2026 година достигна 48.433 денари, рече пратеникот на ВМРО-ДПМНЕ, Бојан Стојановски.

– Тоа значи дека за 2 години просечната нето-плата е зголемена за близу 8.000 денари, односно за 19,6 проценти. Во истиот период, растот на цените изнесува 7,8 проценти. Кога растот на платите ќе се коригира со растот на цените, реалното зголемување на просечната плата изнесува близу 11 проценти. Тоа значи дека платите не само што го следат растот на цените, туку растат значително побрзо и реално ја зголемуваат куповната моќ на граѓаните  – рече  Стојановски.

Растот е присутен во сите клучни сектори, додаде тој.

– Најголемо зголемување во апсолутен износ има во информациите и комуникациите, транспортот и складирањето и во рударството. Процентуално, највисок раст има во транспортот, дејностите поврзани со недвижен имот и во образованието. Овие бројки се потврда дека економските политики даваат резултати и дека приходите на вработените растат. Нашата цел останува јасна: платите да продолжат да растат побрзо од цените, да се отвораат подобро платени работни места и граѓаните да имаат повисок животен стандард – рече пратеникот Стојановски.

The post ПРОСЕЧНАТА ПЛАТА СЕ ЗГОЛЕМИ ЗА 8.000 ДЕНАРИ ЗА 2 ГОДИНИ Примањата растат побрзо од цените appeared first on plusinfo.mk.

Премиерот Христијан Мицкоски најави нов состанок со маркетите и со дистрибутерите во почетокот на следната недела, но и законски измени со кои десеткратно ќе бидат зголемени казните за фирмите кои ќе имаат нефер трговски практики.

Премиерот денеска одговарајќи на новинарски прашања ги повика компаниите, дистрибутерите, добавувачите и производителите да пријавуваат нефер трговски практики за да може државата да интервенира во ваквите случаи.

– На почетокот на кризата имавме еден таков состанок. Сега во понеделник ќе имаме уште еден таков состанок, мислам дека е закажан за понеделник, на којшто ќе испратиме силна порака во начинот на нивното однесување на пазарот. Истовремено, и законските измени се при крај за усвојување, каде што казните се десеткратно зголемени за оние маркети коишто ќе се однесуваат нефер. Ќе ја засилиме и инспекцијата и контролите на терен за да идентификуваме ваков тип на однесување. Но, истовремено ги охрабрувам компаниите, дистрибутерите, добавувачите, производителите да пријавуваат нефер трговско однесување од страна на некои од маркетите, бидејќи сега се наоѓаат канали од страна преку разноразни услуги преку трети фирми да се фактурира таканаречен ројалити, што не е фер трговско однесување. Јас ги охрабрувам сите дистрибутери и производители тоа да го пријават за да можеме како држава да делуваме. Инаку не можеме да делуваме, затоа што кога ќе направите инспекција и кога ќе ги видите сметководствените книги, ќе видите дека сѐ е во ред, а преку трети и четврти прокси канали се наплаќа тој ројалити. Дали производот да е полево или подесно на полицата, тоа е веќе јавна тајна и сите го зборуваат тоа, затоа ги охрабрувам да посведочат за да можеме да реагираме како држава против таквите маркети коишто нефер трговски се однесуваат – изјави Мицкоски.

Во однос на инфлацијата, Мицкоски рече дека имаме една од најниските инфлации во регионот, а нејзино стабилизирање очекува по смирувањето на кризата на Блискиот исток и состаноците што ќе ги има со компаниите.

– Во мај да речеме Грција имаше над пет проценти инфлација, Бугарија над шест проценти, Романија близу двоцифрен број. Истото е и во Косово и во Хрватска, нешто пониска меѓу три и четири проценти имаат Албанија и Србија, така што ние сме меѓу најниските во регионот. Европа е меѓу три и четири проценти. Ние сме меѓу четири и пол и 4,7 проценти, така што очекувам со смирување на кризата и после овие интензивни состаноци и акции што ќе ги имаме, да дојде до релативно нормализирање и да се спуштиме во услови на посткриза под четири проценти – рече Мицкоски.

The post МИЦКОСКИ НАЈАВИ ДЕСЕТКРАТНО ПОГОЛЕМИ КАЗНИ ЗА МАРКЕТИТЕ Премиерот очекува да се стабилизира инфлацијата по мирот на Блискиот Исток appeared first on plusinfo.mk.

Извршниот одбор на Народната банка одлучи основната каматна стапка да се зголеми за 0,25 процентни поени, односно од 4% на 4,25%.

Одлуката се заснова на најновите податоци и информации и согледувањата за ефектите врз домашната економија од светските случувања.

Во однос на сегментите коишто се клучни за монетарната политика, од почетокот на годината е забележана поголема побарувачка на девизи од корпоративниот сектор, што условило поголемо присуство на Народната банка на девизниот пазар. Од почетокот на мај се бележи стабилизација на побарувачката на девизи, а најновите информации носат поголема извесност за скоро смирување на конфликтот на Блискиот Исток.

„Сепак, економските последици од геополитичките случувања се присутни, а неизвесноста околу темпото на целосната стабилизација на тековите и понатаму создава ризици. Опстојуваат и притисоците врз инфлацијата. Имено, во мај годишната стапка на инфлација забави во согласност со очекувањата, но таа и натаму е на повисоко ниво и укажува на продолжена инфлација и побавно враќање кон историскиот просек. Истовремено, и дел од домашните фактори коишто влијаат врз побарувачката и инфлацијата уште повеќе ја нагласуваат потребата од претпазливост при водењето на монетарната политика. Во такви услови, беше оценето дека умереното затегнување на монетарната политика, заедно со досегашните измени кај останатите инструменти – задолжителната резерва и макропрудентните мерки, ќе придонесат за одржување на стабилноста на девизниот курс, за стабилизирање на инфлацијата и за зацврстување на инфлациските очекувања, а соодветно ќе влијаат и врз кредитните услови во економијата. Како резултат на засилените инфлациски притисоци во еврозоната, на последниот состанок на ЕЦБ каматните стапки беа зголемени за 0,25 процентни поени што претставува дополнителен фактор што се зема предвид при носењето на домашните монетарни одлуки“, соопшти Народната банка.

Во однос на најновите податоци за главните макроекономски показатели, на крајот на мај, девизните резерви изнесуваат 5.209,7 милиони евра и се во сигурната зона, а нивната промена засега е во согласност со проекциите за вториот квартал.

Во текот на мај девизниот пазар беше стабилен, без интервенции од страна на Народната банка за надоместување на потребите за девизна ликвидност на економските субјекти.

Во мај 2026 година, годишната стапка на инфлација забави сведувајќи се на 4,8%, од 5,7% во април, главно под влијание на поумерениот раст на цените на храната, што се должи на повисоката споредбена основа од истиот период минатата година. Сепак, тековните показатели упатуваат на засилени инфлациски притисоци кај енергетската компонента, што создава ризици за пренесување на ефектите и врз останатите цени во економијата. Ова делумно е видливо преку засилениот раст на базичната компонента на инфлацијата. Најновите проекции за увозните цени упатуваат на повисока странска инфлација и умерено нагорно ревидирани цени на енергентите и на дел од прехранбените производи, во услови на одолжена неизвесност.

Иако очекувањата на потрошувачите за растот на цените во следниот период се малку поумерени во споредба со претходниот месец, ризиците за инфлацијата претежно се во нагорна насока. Домашната економија и натаму покажува отпорност во услови на неизвесно надворешно окружување. Во првиот квартал од 2026 година, реалниот раст на БДП изнесуваше 3,1%, што е блиску до очекувањата од последниот циклус проекции. Расположливите високофреквентни показатели за вториот квартал сѐ уште не овозможуваат попрецизни согледувања, но априлските податоци упатуваат на раст на индустриското производство и послаби остварувања кај прометот во трговијата. Во монетарниот сектор, согласно првичните податоци за мај, растот на депозитите е во рамките на проектираниот, но динамиката на раст на кредитната активност и натаму е над очекувањата и влијае врз домашната побарувачка.

Народната банка останува цврсто посветена на одржувањето на стабилноста на девизниот курс на денарот во однос на еврото, како основен предуслов за обезбедување ценовна стабилност на среден рок. За таа цел, Банката најави дека ќе продолжи со внимателно следење на домашните и на меѓународните економски и финансиски движења, ќе ги оценува нивните ефекти врз девизниот пазар и инфлацијата и е подготвена да ги употреби сите расположливи инструменти за зачувување на макроекономската и финансиската стабилност.

The post ОСНОВНАТА КАМАТНА СТАПКА ЗГОЛЕМЕНА ЗА 0,25 ПРОЦЕНТНИ ПОЕНИ Како што се очекувало, инфлацијата забавила во мај appeared first on plusinfo.mk.

Ја сакам инфлацијата, изјави Доналд Трамп откако новите податоци покажаа дека растот на цените во САД повторно забрзал и во мај достигнал 4,2 отсто. Американскиот претседател не само што не покажа загриженост, туку порача дека бројките биле добри и дека последиците од конфликтот со Иран вреди да се издржат.

Инфлацијата повторно стана една од главните политички и економски теми во САД. Трамп делумно ја доби довербата од гласачите со ветувања дека ќе го намали притисокот врз семејните буџети, но најновите податоци покажуваат спротивен тренд.

Годишната инфлација изнесувала 2,4 отсто во февруари, пред почетокот на конфликтот со Иран. Во март се искачила на 3,3 отсто, во април достигнала 3,8 отсто, а во мај пораснала на 4,2 проценти.

„Ја сакам инфлацијата“

Одговарајќи на прашање за новите бројки, Трамп не остави простор за дилеми околу својот став.

– Не, не, ја сакам. Бројките беа одлични – рече Трамп пред новинарите во Белата куќа.

Американскиот претседател тврдеше дека Вашингтон продолжува да извлекува значителни количини нафта преку Ормускиот Теснец и покрај кризата во регионот. Според него, американските власти успевале да организираат транспорт без знаење на Техеран.

Трамп изјави дека само пред неколку дена биле изнесени 22 брода во текот на ноќта и без вклучени светла.

– Затоа нафтата е 85 долари за барел – рече тој.

„Мора да одиме и да нападнеме“

Трамп не криеше дека бил подготвен воените операции против Иран да предизвикаат потреси на пазарите и раст на цените на енергијата.

– Мразам што морам да ви го кажам ова, но Иран многу скоро ќе има нуклеарно оружје. Мора да одиме и да нападнеме – изјави американскиот претседател.

Според податоците на американското Биро за статистика на трудот, цените на енергијата во последните 12 месеци пораснале за 23,5 проценти. Бензинот поскапел за дури 40,5 проценти, што дополнително го зголемило товарот врз домаќинствата.

Растот на цените се очекува да биде една од клучните теми пред ноемвриските избори за Конгресот, кои ќе имаат големо влијание врз политичката сцена во САД.

„Знаете кој не ја сака инфлацијата?“

На изјавите на Трамп реагираше и сенаторот Берни Сандерс, кој го обвини претседателот дека е оддалечен од секојдневните проблеми на граѓаните.

„Знаете кој не ја сака инфлацијата, господине претседателе? Работничките семејства кои се мачат да платат бензин, храна и други основни потреби поради вашите катастрофални постапки“, напиша Сандерс на социјалните мрежи.

The post ИНФЛАЦИЈАТА? ЈА САКАМ Трамп убеден дека цените ќе се вратат на место по војната во Иран appeared first on plusinfo.mk.

Инфлацијата мерена преку индексот на трошоците на животот во мај 2026 година во однос на мај 2025 година, бележи зголемување од 4,8 %, а индексот на цените на мало бележи зголемување од 5,6%, објави Државниот завод за статистика (ДЗС).

Најголемо зголемување на трошоците на живот на годишна основа има кај транспортот од 11,1%. Кај цените највисок годишен раст од 6,7% има кај земјодлеските производи и непрехранбените прозиводи од 6,4%

Според пресметките на ДЗС, инфлацијата во мај во однос на април пораснала за за 0, 6%, а цените на мало се зголемиле за 0,8%.

Во мај во однос на април, најголемо зголемување на трошоците на животот е забележан раст кај транспортот од 1,6%, потоа кај храната безалкохолните пијалаци и облеката и обувките раст од 1%, кај  рекреација, спорт и култура од 0,9%, информации и комуникации од 0,7%, кај рестораните и услугите за сместување од 0,5 %, додека пак, кај здравствена заштита, домување, вода, електрична енергија, гас и други горива зголемувањето е од 0,1%.

Во мај во однос на април намалување на трошоците на животот е забележано во групите Лична нега, социјална заштита и разновидни стоки и услуги за 0,4 % и Покуќнина, опрема за домаќинствата и редовно одржување на домаќинствата за 0,1%.

Трошоците на животот во групите Услуги за образование, Осигурување и финансиски услуги и Алкохолни пијалаци, тутун и наркотици остануваат на исто ниво како и во претходниот месец.

Кај цените највисок месечен раст има кај цените на на земјоделските производи од 4,4%.

The post ИНФЛАЦИЈАТА ВО МАЈ ПОРАСНАЛА ЗА 0,6% На годишно ниво изнесува 4,8% appeared first on plusinfo.mk.

Годишната инфлација во Бугарија, според прелиминарната „кратка“ проценка, се зголеми во мај од 6,8% во април на 7%, така што сега е на највисоко ниво од август 2023 година, објави денеска Националниот статистички институт (НСИ) на таа земја.

Најголем придонес за растот на цените имаше транспортниот сектор, каде што инфлацијата се забрза од претходните 18,5% на 22,1%, поради повисоките цени на горивата и трошоците за енергија поврзани со конфликтите на Блискиот Исток.

Цените во Бугарија се зголемија и во категориите алкохолни пијалаци и тутун, каде што инфлацијата достигна 7,7 %, домување, електрична енергија, гас и гориво, со раст од 5,2%, како и ресторани и хотели, каде што цените беа повисоки за 9,4%. Инфлацијата во областа на рекреација, спорт и култура остана многу висока и изнесуваше 15,8%, иако малку забави во споредба со април.

Спротивно на тоа, зголемувањето на цените на храната и безалкохолните пијалаци се забави на 4,9%, додека цените на облеката и обувките се намалија за 0,4% на годишна основа.

Според Хармонизираниот индекс на потрошувачки цени (HICP), кој го користи Евростат за споредување на инфлацијата меѓу членките на Европската Унија, годишната инфлација во Бугарија изнесуваше 6,3%,  според веб-страницата на NSI.

The post ИНФЛАЦИЈА ОД 7% ВО БУГАРИЈА Достигнато највисоко ниво во последните три години appeared first on plusinfo.mk.

Имаме нормална инфлација со оглед на кризата во светски рамки, која не е на алармантно ниво за да се ограничат маржите или цените. Ситуацијата постојано се следи и ако има потреба, Владата ќе ги спроведе сите законски можности и решенија. Нормално е да има мало покачување на цените на одредени производи, но сето тоа е дозволиво доколку е економски оправдано, изјави денеска заменик-министерот за економија, Марјан Ристески.

Како што истакна Рисетски, преку 30 екипи од Државниот пазарен инспекторат се на терен, ги контролираат цените на увозниците, дистрибутерите, производителите и маркетите. Нема да се дозволи неекономско и непазарно однесување и печалење на грбот на граѓаните.

– Ние успеавме да ја смириме инфлацијата пред да почне светската економска криза и беше проектирана на 2,5 до 3% од страна на Народна банка и Владата, меѓутоа сигурно ќе имаме малку повисока инфлација. Владата во иднина е подготвена да ги спроведе сите законски можности и решенија – дали тоа ќе биде во однос на ограничување на цени или можност за намалување на ДДВ на одредени на основни прехранбени производи. Ќе реагираме во однос на ситуацијата и анализите кои доаѓаат не само од Државниот пазарен инспекторат, туку од сите институции и министерства. Мора да бидат аналитички и економски издржани, бидејќи секое политичко, ад-хок решение, како порано што правеле, предизвикува други економски турбуленции од кои понатаму државата многу тешко излегува – рече Ристески.

Според него, енергетската криза влијае врз животниот стандард и инфлацијата не само во Македонија, туку во целиот регион и секаде во светот.

-Имаме нормална инфлација за ваква криза која не отскокнува многу и можеби е една од пониските инфлации. Ако земеме предвид дека ланската година во овој период имавме и мерки и поради тие мерки на ограничување на маржите имавме малку повисока инфлација, покажана во април во однос на март од Државниот завод за статистика, сепак, сметаме дека не е некое големо и алармантно ниво за да предизвикаме вакви неекономски мерки со ограничување на маржи или други мерки, законски можности со кои може да постапи Владата околу ограничувањето на цените. Од она што е предизвикана малку поголема инфлација, гледаме дека најмногу е во транспортните трошоци, над 10% се зголемени нормално поради енергетската криза, а преку транспортните трошоци се зголемуваат и цените на другите производи.  Во однос на основните прехранбени производи, безалкохолни пијалаци, изнесува само 0,7%. Инспекторите се на терен и како Влада, повторно ќе кажам, нема да дозволиме неекономско и непазарно однесување и печалење на грбот од граѓаните во вакви тешки финансиски услови – вели Ристески. 

The post ИНФЛАЦИЈАТА НЕ Е НА АЛАРМАНТНО НИВО ЗА ДА СЕ ПРЕЗЕМАТ НЕКАКВИ МЕРКИ Ристески вели ситуацијата се следи и ако треба ќе има мерки appeared first on plusinfo.mk.