Автар Синг како дете растел во индискиот град Амритсар со баба му и дедо му. Со години слушал гласини дека жената која го одгледува всушност не му е мајка, но не им верувал на соседите.

– Мислев дека само измислуваат приказни – раскажал Синг за „Гардијан“.

Но приказните се покажале како вистинити. Неговиот татко се преселил во Канада, каде што предавал, а Автар останал во Индија со баба му и дедо му. Баба му го одгледувала и го викала Титу.

Набргу по деветтиот роденден, Автар сам бил испратен со авион во Канада. Бил облечен во костум и не знаел ниту збор англиски.

Јазикот брзо го научил и се вклопил во училиштето, но дома се чувствувал речиси невидлив. Кога имал 14 години, семејството заминало на одмор и го оставило сам две недели.

– Таа немаше ни трошка од топлината што ја имаше мојата баба. Апсолутно ме мразеше – рекол тој за жената која дотогаш ја сметал за мајка.

Вистината излегла на виделина по години

Години подоцна, додека Автар бил во посета на семејството во Индија, баба му му кажала дека тој е син на неговиот татко од првиот брак. За биолошката мајка Автар го дознал само името – Савиндер. Ништо повеќе.

– Постојано наидував на ѕид од молк – раскажал тој.

Потрагата станала уште поважна кога пренаталните тестови на Роузи покажале одредени аномалии. Генетичарот ги прашале Автар за семејната медицинска историја, но тој не можел да каже речиси ништо за страната на мајка му.

– Не можев да им кажам ништо за историјата на болести од страната на мајка ми. Тоа ме погоди право во срце. Тогаш си помислив: морам нешто да направам – рекол тој.

Со години барал информации за мајка си Савиндер, но без успех. Дополнителен проблем било тоа што Савиндер е често име меѓу пенџапските Сики. Не сакал да направи било какви ДНК-тестирање, бидејќи имал резерви во однос на приватноста на генетските податоци.

– Тие можат да ги продадат тие податоци. И не само тоа – ако во мојата ДНК видат нешто, тоа влијае и на моите деца – рекол тој.

Расплет на југот на Франција

На 8 мај, Автар бил со Роузи на југот на Франција. Таму биле на патување откако тој го завршил лекувањето од рак. Се разбудил рано и решил да проба нешто ново. Си помислив: пробав со „Гугл“ и со сè друго, зошто да не се обидам и со вештачка интелигенција?

Во Чат Џи-Пи-Ти ги внел сите информации што ги знаел или можел да ги претпостави: жена по име Савиндер, на возраст меѓу 87 и 97 години, веројатно со средно име „Каур“, како и многу други Сики жени од нејзината генерација, поврзана со Индија, Африка и можеби Велика Британија.

Чат Џи-Пи-Ти му го прикажал името Савиндер Каур Наги, родена во 1936 година во Кисуму, Кенија, како и текст посветен на неа.

Автар бил свесен дека вештачката интелигенција може да измислува информации, но овојпат одговорот имал конкретна референца до текст.

Текстот го напишала Ники Даму, дизајнерка на накит од Лондон, како омаж за својата мајка, која починала во декември 2024 година на 88-годишна возраст.

Трагата водела до Савиндер

Во текстот било опишано детството на Савиндер во Кенија. Како девојче била отпишана од училиште и омажена во близина на Амритсар. Кога бракот пропаднал, татко ѝ ја вратил дома, но семејството на нејзиниот сопруг го задржало нејзиниот син.

На своите деца никогаш не им раскажувала за својот прв син Автар. Во последните години од животот, додека боледувала од деменција, плачела и повторувала: Мера бача – моето дете.

Автар Синг со неговата баба во Индија 

Ники две години се обидувала да го пронајде својот полубрат, но не го знаела ниту негово вистинско име. Само негоиот прекар Титу.

Никој нема да се вика Титу на „Линкдин“, нели? Како да најдеш некого без име? Невозможно е – рекла таа.

Роузи го прочитала текстот, но во почетокот не била целосно убедена, бидејќи во него не се споменувал првиот брак. Потоа Автар се вратил на фотографијата од сертификатот за шиење што Савиндер го добила во Даривал во 1962 година.

– Тоа е две или три години откако сум роден, и тоа токму во градот во кој сум роден – рекол тој.

За Автар тоа било важна трага.

„Титу, ти ли си?“

Во 8:36 часот тоа утро Автар ѝ испратил е-пошта на Ники. Пораката пристигнала токму на денот кога нејзината мајка би го прославувала 90-тиот роденден.

– Имав силно чувство дека знам. Не можам да го објаснам – рекла Ники.

Само два часа откако го внел прашањето во Чат Џи-Пи-Ти, Автар веќе разговарал со Ники по телефон.

– Мама била мажена и разведена во Индија – му рекла таа.
– Дали имала деца? – прашал Автар.

– Да. Имала син.

Тогаш Ники го прашала:

– Титу, ти ли си? Ти ли си Титу, синот на мајка ми?

Автар и Роузи почнале да плачат.

– Тоа сум јас – одговорил тој.

Полусестрата Ники и мајката на Автар, Савиндер (Фото: ФБ Ники Даму)

За Автар било неверојатно што Ники го знаела токму неговиот детски прекар.

– Никој не го изговорил мојот прекар на тој начин уште откако баба ми ме викаше така кога бев мал – рекол тој.

Разговарале два часа, сè додека не му се испразнил телефонот.

Само неколку дена подоцна, Автар веќе бил во Лондон. Таму се сретнал со Ники и со други членови на семејството од страната на неговата мајка.

Најважното што го дознал

Автар никогаш нема да може да ја запознае својата биолошка мајка. Савиндер починала во 2024 година. Но од Ники и од другите членови на семејството дознал нешто што му било поважно од каков било ДНК-тест: Мајка му не го заборавила.

Во последните години од животот, додека страдала од деменција, плачела и повторувала „мера бача“ – моето дете. Со години Автар верувал дека мајка му го оставила за да продолжи со својот живот. Никогаш не ѝ замерил. Сега, вели, конечно знае дека приказната била поинаква.

– Сега од Ники и од другите членови на семејството слушнав дека мајка ми плачела по мене. Тоа е сè што ми беше потребно да го слушнам. Прекрасно е чувството да знам дека сум бил сакан – рекол тој.

И покрај тоа што Чат Џи-Пи-Ти одиграл клучна улога во пронаоѓањето на трагата, Автар не смета дека вештачката интелигенција направила некакво чудо.

– Во моментов, вештачката интелигенција сè уште е само еден вид глорифициран пребарувач. Тоа е софтвер што препознава шеми во низа знаци. Тука нема вистинска интелигенција – смета тој.

Тој и Ники не сакаат ниту ДНК-тест како дополнителна потврда.

– На овој свет има неколку милијарди луѓе. Ако некој случајно може да ме нарече Титу, мислам дека не ми треба никаква друга потврда – рекол Автар.

За него, најважното од целата приказна не е тоа што технологијата му помогнала да го пронајде семејството, туку тоа што по речиси шест децении конечно дознал дека неговата мајка го сакала.

автар синг, чатџипити, вештачка интелигенција, мајка, семејство, потрага, индиија, канада, сики, ники даму, савиндер Каур, човечки приказни, технологија

The post ЈА БАРАЛ МАЈКА СИ РЕЧИСИ 60 ГОДИНИ, НО ДУРИ ЧАТ ЏИ-ПИ-ТИ ГО ПОВРЗАЛ СО СЕМЕЈСТВОТО Трогателна приказна за тоа како еден детски прекар ја сочувал врската appeared first on plusinfo.mk.