Бројката на луѓето што по втор пат се заразиле со вирусот е навистина мала, што се наметнува како предмет на жешка дебата за тоа дали прележаните треба исто да се третираат како и невакцинираните, со мерките за здравствена заштита.

За мислење го прашавме д-р Александар Петличковски, директор на Институтот за имунологија и хумана генетика, кој ни посочи дека имунитетот по прележувањето на болеста на почетокот е висок, но со време се намалува со што се зголемува ризокот од реинфекција.

– Ризикот од повторно зарзување со ковид-19 е многу низок неколку месеци по прележување на болеста, но се зголемува како одминува времето. Ако ризикот за реинфекција изнесува помалку од 5 отсто во првите 4 месеци по прележување на болест, 17 месеци по прележувањето тој пораснува до 50%. При тоа, ризикот кај луѓето кои ја прележале болеста, а не се вакцинирале е околу 2 пати поголем од ризикот за оние кои примиле вакцина по прележување на болеста – за Плусинфо изјави Петличковски.

Иако ризикот од реинфекција е реален, тоа не значи дека луѓето не создаваат антитела, бидејќи за очекување е тие полесно да ја прележат заразата вториот пат.

– Не значи дека луѓето кои ќе се заразат и по втор пат не создале добар имунолошки одговор и секако е за очекување, реинфекциите да резултираат со многу поблага клиничка слика, ако воопшто дојде до развивање на симптоми – вели Петличковски.

Тој посочи и на потребата да се прави разлика меѓу позитивните случаи без симптоми и заболените од ковид-19.

– Треба да имаме во предвид дека е многу веројатно луѓе кои се веќе имунизирани да дојдат во контакт со вирусот и да бидат позитивни ако им се направи тест, но тие воопшто нема да развијат симптоми и реално нема да се разболат по втор пат – додава тој.

The post ПРЕЛЕЖАНИТЕ САМО ВО ПОЧЕТОКОТ СЕ ИМУНИ НА КОВИД Д-р Петличковски открива дека оздравените се безбедни околу 4 месеци appeared first on plusinfo.mk.

Експерти за имунологија и вируси предупредуваат дека не треба многу да се чита за нивото на антитела во крвта на пациентите кои го прележале вирусот, бидејќи антителата не се единствениот систем на имунолошка одбрана.

– Концентрацијата на антитела во крвта не значи колку е силен вашиот имунитет – рече Еленор Рајли, професорка по имунологија и заразни болести на Универзитетот во Единбург.

Таа и нејзините колеги велат дека исчезнувањето на антителата во крвта не објаснува како организмот гради имунитет за инфекции.

– Имунитетот не е нешто што можеме да го поистоветиме со нивото на антитела или одговорот на Т-клетките. Имунитетот е систем кој работи на друг начин и следниот пат кога ќе се сретнете со инфекција, не мора да значи дека ќе ја закачите, а ако ја закачите не мора да значи дека ќе се разболите посериозно. Тоа се нарекува заштитен имунитет – рече Рајли.

Затоа, многу потенцијални вакцини против Ковид-19 се направени за да изградат посилен имунитет со „повикување“ на посилна таканаречена „имунолошка меморија“.

– Антителата се генерално краткотрајни, бидејќи штом ја завршат работата, на вашето тело повеќе не му требаат – рече Џонатан Стоје, главен вирулог на британскиот институт „Френсис Крик“.

Стоје додава дека тоа не значи дека имунитетот трае кратко.

– Таканаречените мемориски клетки можат да реагираат сосема добро во борбата против нова инфекција – рече тој.

После ковид-19, научниците сè уште не знаат колкава количина од имунолошкиот систем ќе се покаже како доволна.

Сепак, многу производители на вакцини укажуваат на одговорите на антителата и Т-клетките, на кои се гледа како важни за долгорочен имунитет.

– Имунолошкиот систем е многу комплициран. Знаеме дека антителата исто така се важни, но не е сè во антителата. Важна работа се имунолошките мемориски клетки, изјави Лоренс Јанг, професор по молекуларна онкологија на Универзитетот Варвик во Велика Британија.

The post Британски експерти: Губењето антитела на короната не мора да биде лоша вест за имунитетот appeared first on plusinfo.mk.

Заразените со корона вирусот кои се асимптоматски случаи претставуваат вистинска „бомба“ за околината бидејќи ја шират болеста на други лица, а ниту самите не се свесни за тоа. Во Скопје најмалку 60 отсто од вкупниот број на заразени се асимптоматски – предупредија неодамна од Центарот за јавно здравје, а министерот за здравство Венко Филипче најави дека денеска или утре ќе почне да ги обелоденуваат оние лица коишто не се достапни за да им се врачат решенијата за изолација или даваат погрешни податоци во анкетните листови.

Забуна кај граѓаните во однос на овие случаи внесе дополнително и самата Светска здравствена организација чии експерти за два дена дадоа сосема спротивни изјави околу асимптоматските случаи, а последната е дека тие сепак ја шират заразата со ковид-19.

За тоа колкав е бројот на заразени лица кои се без симптоми на болеста ковид-19, а кои развиваат антитела, директорот на Институтот за имунологија и хумана генетика, проф.д-р Александар Петличковски, вели:

– Околу 60 отсто од асимптоматските случаи развиваат антитела, а остатокот од лицата може да не развиваат антитела.

Епидемиолозите од Центарот за јавно здравје – Скопје велат дека е потребно 70 отсто од населението да стекне антитела за да се создаде колективен имунитет.

– И асимптоматските случаи може да ја пренесат инфекцијата, иако кај симптоматските случаи е поголема можноста. Но не е задоволителна концентрацијата на антитела во крвта, за да се развие колективен имунитет кај населението. Треба 70 отсто од населението да ги има развиено антителата во крвта, за да стекнеме колективен имунитет, а сега е кратко времето и организмот не дава задоволителен имунолошки одговор. Догодина, се надевам, ќе може да зборуваме за ова, сега е рано – вели д-р Сашо Стојанов, епидемиолог во ЦЈЗ.

Директорот на оваа установа, д-р Арбен Зибери, неодамна изјави дека 60 отсто од вкупниот број на заразени во Скопје се асимптоматски случаи.

– Затоа треба да бидеме многу внимателни, затоа што има многу асимптоматски кои ја шират болеста. Оние кои се позитивни и се без симптоми се лекуваат дома, а оние со лесна клиничка слика или се лекуваат дома или се во болница – рече тој.

Тој апелираше до граѓаните дека ако не ги почитуваме мерките, само ќе ја одолговлекуваме пандемијата.

За асимптоматските случаи кои одбиваат да ги примат решенијата од инспекторите или погрешно ги информираат епидемиолозите каде живеат или за други лични податоци, веќе се подготвува списокот кој денеска или најдоцна утре јавно ќе биде објавен. Станува збор за 450 лица.

– Уште еднаш утрово дискутиравме како да го решиме овој проблем на состанокот на Комисијата за заразни болести како да го решиме овој проблем. За овие 450 решенија очекувавме помош од МВР, но тие не се поделија, ги вратија назад. Веројатно дека денеска или најдоцна утре ќе почнеме таканаречена јавна објава, зашто едноставно луѓето не се достапни или даваат погрешни податоци во анкетните листови – изјави министерот Филипче денеска во Прилеп.

Овие лица, според најавите, ќе бидат објавени на веб страната на Министерството за здравство www.moh.gov.mk.

The post Само 60% од асимптоматските случаи развиваат антитела, кај другите нема имунолошки одговор appeared first on plusinfo.mk.

Во однос на новозаразените меѓу медицинскиот персонал, кај нас веќе 20 отсто од вкупниот број заболени се од здравството, тој извести дека и на Клиниката за онкологија има заболени двајца здравствени работници, Нов случаја на ковид-19 е регистриран и во кочанската болница, каде е позитивна докторка од интерното одделение, па пациентите ќе бидат отпуштени.

Новинарите денеска се интересираа, бидејќи и натаму има пораст на новоинфицирани медицински лица, дали се засилени контролите за почитување и на протоколите за заштита при работа.

– Точно е дека е позитивна и докторка на Интерно одделение во кочанската болница, но нема  позитивни меѓу  пациентите таму, па сомнежот  е дека таа се инфицирала  на друго место. А сите пациенти во оваа болница кои се на одделение, може на домашно лекуо однсовање да си одат. Во тек е увидот на Санитарниот инсекторат од каде секој ден комумицираат со сите Центри за јавно здравје. А тешко е да се каже дали здравствените работници  се инфицирале на работното место. Има и такви кои не се заразиле на работа. Секако, се инсистира на почитување  на протоколите за заштитната  опрема кога има сомнеж дека има пациент кој е сомнителен на вирусот. Активни се и комисиите за заразни  болести во во ЈЗУ во однос на ова прашање – рече Филипче.

Министерот најави дека пациенти со онколошки заболувања во иднина нема да мораат да доаѓаат во Клиниката за онкологија за да примат терапија, туку тоа ќе можат да го сторат во најблиската болница.

– Министерството за здравство работи на протокол за дистрибуција на терапија за пациенти со онколошки заболувања, кој утре треба го финализираме со директорот и стручниот колегиум на Клиниката за онкологија, за тоа кои пациенти ќе можат да ја примат терапијата надвор од Клиниката, за да не патуваат -додаде Филипче.

Протоколот бил подготвен независно од тоа што на оваа клиника има двајца здравствени работници заразени со Ковид-19.

-Двајцата работници, но тие не се поврзани со пациентите и на клиниката работата се одвива во најдобар ред, нема рестрикции, ниту посебен протокол – рече министерот.

The post На Детска е заразена докторка од Имунологија, а во Кочани од Интерното одделение appeared first on plusinfo.mk.