Ќе ја парафразирам Катица Ќулавкова дека „нашиот јужен сосед, кога ја формирал својата национална држава, точно пред два века, имал слобода да го избира“ својот колективен идентитет – тие во мај 1827 го одбраа грчкиот колективен, а не македонскиот колективен идентитет како свој. Тоа што денес во Грција неколку милиони нејзини граѓани избираат нивниот личен идентитет да биде македонски, не значи дека нашиот колективен идентитет не може да биде македонски. Напротив! Оттука, потреба од враќањето на името Македонија.

Македонскиот национализам се обидува да ги спаси македонската култура, јазик и историја, а национализмите на некои наши соседи, оживотворени во нивната официјална државна политика, ги водат Македонците директно во духовни „гасни“ комори – во нивен идентитетски геноцид.

До 2018 година колективниот македонски идентитет беше признаен од повеќе од 130 земји, вклучувајќи ги сите десет најнаселени земји во светот: Кина, Индија, САД, Индонезија, Бразил, Пакистан, Нигерија, Бангладеш, Русија, Мексико. А, денес? Македонскиот просторно-временски јазично-дијалектен континуум е сѐ уште е реалност за повеќето, можеби за сите, држави, освен за Бугарија. Сепак, ние уште понизно живуркаме воопшто не помислувајќи да го раскинеме Договорот со Бугарија и така ги поддржуваме бесмислените уцени на Бугарија.

Внесувањето на македонскиот јазик во ООН, иако во референтниот документ на ООН за главните обележја и податоци за земјите – се користи кратенката UNTERM, за разлика од 2022 година, веќе не постои податокот „македонски јазик“! Значи, всушност има само признавање на литературниот (државниот) македонски јазик, но не и признавање на македонскиот просторно-временски јазично-дијалектен континуум.

Центризмите (евроцентризмот, синоцентризмот или русоцентризмот) не се решение, меѓутоа евроцентизмот беше и е сѐ уште погубен за опстојувањето на Македонија и нејзиниот историски и митски поглед.

Не само Илинден, туку и 11 Октомври е „семакедонско ‘Свето тројство’, затоа што поврзува неколку слоја на колективната меморија на Македонците: митскиот, христијанскиот, историскиот, политичкиот и културниот слој“ (Катица Ќулавкова).

Мице Козар, Крсте Црвенковски, Благоја Корубин, Коле Чашуле, Душко Наумоски и другите борци на Прилепскиот партизански одред, задоени со слободарски идеи и со љубов за Македонија, започнаа да го реализираат сонот на македонскиот народ за сопствена држава, што доведе, неколку години подоцна, до возобновување на духовните, научните, образовните, политичките, општествените, социјалните и културните институции на Република Македонија.

Денес, осумдесет и три години по нападот извршен на 11 октомври 1941 година, во кој учествуваа 16 борци од Прилепскиот партизански одред, македонските институции се целосно разнебитени.

Честитајќи им го празникот 11 Октомври на Македонците и на граѓаните на Македонија, уште еднаш ќе подвлечам – за навек, дека остварување на македонското национално единство и враќање на името Македонија се единствениот исправен пат, по кој треба да зачекорат денешнава генерација Македонци и македонски политичари.

The post ВРАЌАЊЕТО НА ИМЕТО МАКЕДОНИЈА Е ЕДИНСТВЕНИОТ ИСПРАВЕН ПАТ Договорите со Грција и со Бугарија го ништат македонскиот идентитет appeared first on plusinfo.mk.

Ако треба, СДСМ ќе се откаже од државните пари, но нема да го смени своето име, согласно со Преспанскиот договор, кој предвидува и приватни ентитети да ги усогласат своите имиња со официјалното име на државата „Северна Македонија“.

Ова во поткаст за Плусинфо го изјави Славјанка Петровска, поранешен министер за одбрана и кандидат за претседател на СДСМ, на изборите што треба да се одржат в недела на 30 јуни.

Во поткастите на Плусинфо во текот на оваа седмица ќе бидат претставени и кандидатите Александар Бајдевски и Јован Деспотовски. Единствено кандидатиот Венко Филуипче ја одби поканата за интервју.

Ова е делот од интервјуто со Петровска, во кој таа зборува за Преспанскиот договор и за тоа кое име таа ќе го употребува како иден лидер на СДСМ:

На прашањето дали ќе го користи името „Северна Македонија“, Петровска вели:

– Внимавам на официјални настани да го користам уставното име. Да, како министер за одбрана сум знаела да го изговорам и името „Македонија“ или „македонска армија“. Ми се случило некогаш да кажам дури и „Република Македонија“. Но, ниту сум била опомената, ниту сум била санкционирана, ниту била изразена било каква дипломатска нота. Затоа што било увидено дека јас тоа не го правам намерно или да докажам колкав патриот сум. И во иднина ќе кажам „Македонија„“, ама ќе кажам и „Северна Македонија“.

Славјанка Петровска додава дека од ВМРО-ДПМНЕ иочекува или репреговарање на Преговарачката рамка и укинување на Преспанскиот дофговор, или таа партија да  излезе и јасно да се каже – нема репреговарање на Преговарачката рамка, а Преспанскиот договор ќе го почитуваме.

Во интервјуто со новинарот Бранко Героски, кандидатката Петровска зборува за причините за поразот на СДСМ на овие избори, за состојбите во партијата, за потребата од враќање кон идеолошките корени и за своите планови како иден лидер на партијата.

Погледнете го целото интервју со Славјанка Петровска:

The post 🎥 АКО ТРЕБА ЌЕ СЕ ОТКАЖЕМЕ ОД ДРЖАВНИТЕ ПАРИ, ИМЕТО НЕ ГО МЕНУВАМЕ Нема место за „северна“ во името СДСМ, категорична е Славјанка Петровска appeared first on plusinfo.mk.

Не.

Еве ги моите аргументи.

За почеток, три ноторни и проверени факти:

Прво, на таблата на Вилата „Водно“, каде што се работните простории и резиденцијата на шефот на државата, пишува „Претседател на Република Северна Македонија“.

Второ, во Уверението што го доби Сиљановска Давкова, пишува „Република Северна Македонија“.

Трето, во текстот на заклетвата што го потрпиша претседателката, а го прочита собранискиот спикер, пишува „Република Северна Македонија“.

Значи, во своето официјално својство, Гордана Сиљановска Давкова се претстави како претседателка на државата со новото официјално име запишано во Преспанскиот договор и во Уставот.

Ниту тие два, а ниту еден друг правен акт, не ја обврзува претседателката при говорењето во секоја прилика и во секоја реченица да ги употребува целото официјално или скратеното официјално име на државата.

Тоа не го прави ниту еден друг претседател, премиер, министер или државен функционер на било која држава. Не го прават ни Грците, на пример. Официјалното име на Грција е Hellenic Republic на англиски јазик или Ελληνική Δημοκρατία на грчки јазик. Грчките државни функционери најчесто го употребуваат скратеното име Greece. И никој на тоа не им забележува.

Патем речено, нека остане забележано дека во својата остра реакција на Икс (поранешен Твитер), премиерот Киријас Мицотакис нашата земја ја ословува со името „Скопје“. Јас лично и во тоа не гледам проблем, бидејќи надвор од доменот на употребата на официјалните имиња на државите, многу често имињата на главните градови се користат како синоними за имињата државите: Скопје за Македонија, Атина за Грција, Софија за Бугарија, Вашингтон за САД, Москва за Русија итн.

Да не заборавиме дека во изборната кампања, тогашниот претседател Стево Пендаровски и доскорешниот премиер Димитар Ковачевски, не ја употребуваа придавката „Северна“ и „патриотски“ својата земја ја ословуваа со името „Македонија“. Тогаш тоа не им пречеше ни на Атина, ни на Софија, а богами ни на Брисел. Сите тие помалку или повеќе отворено навиваа за СДСМ и за ДУИ, но ете, народот во Македонија одлучи поинаку.

Но, ајде да расчистиме што вели Преспанскиот договор.

Членот 1, во точката 3, став „а“, вели дека „Република Северна Македонија“ ќе биде „официјалното име на Втората страна“ од Договорот. Тоа официјално име (како и скратеното официјално име „Северна Македонија“) ќе се употребуваат erga omnes, што ќе рече и во меѓународниот и во домашниот правен промет.

Понатаму, Преспанскиот договор прецизно ги набројува сите договорени елементи на официјалната употреба на новото име:  во државјанството, патните документи и во сите други лични документи; во сите релевантни меѓународни, мултилатерални и регионални организации, институции и форуми, вклучително и на сите состаноци и во вкупната кореспонденција и во сите нивни билатерални односи со сите држави – членки на Обединетите нации; во сите нови службени документи, кореспонденција и релевантни материјали; итн.

Секој што мисли дека претседателката Гордана Сиљановска Давкова е обврзана во своето говорење секогаш да ги употребува имињата „Република Северна Македонија“ и „Северна Македонија“, прво нека го прочита Преспанскиот договор на овој линк и прецизно нека посочи во кој дел од овој акт го пишува тоа.

Јас, како поддржувач на Преспанскиот договор – знам дека на многумина тоа не им се допаѓа, но го немам сменето мислењето за тој акт – тврдам дека такво нешто, едноставно, не постои!

Екстензивното толкување на овој договор е дело на владите на Зоран Заев и на Димитар Ковачевски, кои самите себеси се присилуваа, а и другите околу себе ги присилуваа, во секоја пригода, како папагали, да го употребуваат новото официјално име на државата, веројатно мислејќи дека така му се додворуваат на меѓународниот фактор. Уште повеќе, преку својата пропагандна машинерија, тие се обидоа да ја сменат и придавката „македонски“ во „северномакедонски“ и така, всушност, да ги преименуваат и македонскиот народ и македонскиот јазик.

Јас повеќе пати до сега пишував дека нема основа за таа погубна пракса и дека мора да се почитува и јазичната норма, која во цивилизираните држави има сила на закон.

Ако ги прашате Германците, на пример, зошто новото официјално име на нашата земја го преведуваат како „Nordmazedonien“, тие ќе ви објаснат дека таква е јазичната норма во германскиот јазик и таа налага при преводот придавката „северна“ и името „Македонија“ да се спојат. Крај на приказната!

Но, нашиот јазик исто така има јазична норма. Многу пати сум пишувал за таа синтаксичка норма, но сепак ќе си земам слобода да ја повторам.

Името „Република Северна Македонија“ е именска фраза. Именска фраза (група, синтагма) е група зборови без прирок, чиј главен дел е именката или некој друг заменски збор. Именската група (фраза) има центар (или глава), која може да ја претставува целата фраза, односно може да стои без другите додатоци. Така, на пример, во фразата „нашите мали добри деца“, центар на фразата е именката „деца“, бидејќи само тој може да ја претставува целата фраза.

Центар или глава на фразата „Република Северна Македонија“ е именката „Македонија“. Само тој збор може да стои самостојно и да ја претставува целата фраза. Некои писмени идиоти тоа го разбираат, па затоа се обидуваа преку спојување на придавката „северна“ со името „Македонија“, да сковаат нова придавка „северномакедонски“, за така да го избришат името „Македонија“. Најголемиот идиот меѓу нив, пак, својата држава навредливио ја нарекува „Нордот“, трудејќи се тој негов лудачки обид за деноминирање да биде видлив од авион.

Да заклучам.

Обврска на Гордана Сиљановска Давкова е да ги почитува Уставот и ратификуваните меѓународни договори, кои станале дел од домашниот правен поредок со чинот на ратификација. Јас сум убеден дека таа токму тоа и ќе го прави. Како и во овој случај.

Обврска на секој од нас е да ги почитуваме Уставот и законите. И јас навистина немам никаков проблем со тоа и кога станува збор за Преспанскиот договор.

Но, екстензивното толкување на овој договор е неприфатливо. Ограничувањето на слободата на говорот, загарантирана со член 16 од Уставот, исто така е неприфатливо. Сиот тој инженеринг е неприфатлив.

Треба да биде јасно дека сите ние, вклучувајќи ја и претседателката Гордана Сиљановска Давкова, надвор од доменот на службената употреба на новото официјално име на државата, секогаш и во сите пригоди можеме слободно да го употребуваме нашето историско име „Македонија“ и придавките изведени од тоа име.

Сиљановска Давкова вети дека ќе ја користи таа слобода и јас ја охрабрувам да го исполни тоа ветување.

Да се каже „Македонија“ денес е не само изблик на гордост и на   достоинство, туку и прашање на елементарна пристојност.

ПС. Не сакам да инсистирам, но ќе забележам дека единствената институција која формално и грубо го крши Преспанскиот договор е Социјалдемократскиот сојуз на Македонија (СДСМ). Оваа партија, како и другите партии, добива пари од државниот буџет за изборните кампањи и по таа основа, според словото на Преспанскиот договор, мора да си го смени името. Или, таа може на кратенката СДСМ да ѝ даде ново име – на пример, Социјалдемократи на Северна Македонија. Очекувам реакции од Атина и од Брисел на оваа тема.

The post Претседателката Сиљановска Давкова не го прекрши Преспанскиот договор appeared first on plusinfo.mk.

Моето фамозно писмо до претседателот на САД, во кое изразив резервиран оптимизам дека „непристојноста на формата“ (во која тој ја призна Македонија) нема да биде пречка за добрите односи помеѓу народите на „Поранешната британска колонија САД“ и „Поранешната југословенска република Македонија“” имаше една лесно забележлива јавна консеквенција: првин г. Метју Нимиц, на прашањето на изнервираните грчки новинари зошто постојано зборува за „Македонија“, а не вели „FYROM“, без заобиколување одговори дека тој акроним го смета за глупост, „како што би било глупост некој за мојата земја да каже ‘Поранешната британска колонија САД’”, а потем првата дама на Стејт департментот, при отворањето на Aмериканската амбасада во Скопје, ниеднаш не го изговори очигледно некрофилскиот евокативен акроним „Поранешна југословенска република Македонија“, туку постојано се довиваше да не ѝ го спомне името на земјата во која ја отвора амбасадата, постојано повторувајќи една мошне „духовита формула“ (што одамна пред неа ја измислија европските дипломати, а на која ние, овдешниве, како сосема да отрпнавме): „вашата земја“, „оваа земја“, „оваа држава“ итн. итн.

Затоа, кога пред некој ден органот на ССРНМ објави интервју со американскиот амбасадор во Скопје под наслов „Македонија ја чека бурна година“, со внимание го прочитав целиот (безначаен) текст, со една единствена желба да го видам тоа чудо невидено, амбасадорот да го изговори зборот „Македонија“, чијашто употреба Грците најстрого им ја забранија на Американците. Попусто! Човекот, исто како и неговата газдарица од Стејт департментот, ниеднаш не се осмели да изусти „Македонија“ туку (како и таа на времето) постојано ги повторуваше „духовитите“ дипломатски формули: „вашата земја“, „оваа земја“, „оваа држава“ итн. итн.

Така, значи, продолжувачите на славните традиции од Горно Врановци едноставно ги „фризираа“ исказите на амбасадорот и ја видоа Македонија таму каде што неа воопшто ја немаше. Ниту амбасадорот го изговорил забранетиот збор „Македонија“, ниту пак воопшто мислел на Македонија кога рекол дека „следната година ќе биде уште побурна“. За да нема забуна ќе го парафразирам крајот на интервјуто!

Целата колумна од проф. д-р Ѓорѓи Марјановиќ прочитајте ја на следниот ЛИНК

***

Сакате да продолжите со читањето на останатите 319 колумни? Обезбедете си примерок!
Оваа колумна е само една 319-те издадени во збирката наречена едноставно „Колумни“. Оваа книга, како и сите останати во издание на Фондацијата Ѓорѓи Марјановиќ, не се продаваат на „традиционален“ начин. туку се добиваат како благодарност за вашата донација. Финансиските средства обезбедени од донациите ќе бидат употребени за помош при школување и вработување на деца без родители, што е една од стратешките определби на Фондацијата.

Инструкции за нарачување За да ја добиете оваа книга, кликнете на копчето Донирај на следниот ЛИНК и во полето за забелешка наведете ја адресата на која сакате да ви биде доставена книгата. Донирајте износ по Ваш избор во Фондот за школување на Фондацијата Ѓорѓи Марјановиќ, а книгите заедно со автограм од авторот ќе Ви бидат доставени на Вашата домашна адреса. Забелешка: Можете да донирате износ по Ваш избор, но не помал од 1000 ден + поштарина. Поштарината за испорака во Македонија изнесува 130 денари. За испорака надвор од Македонија, контактирајте ја Фондацијата претходно.

The post Македонија ја чека бурна година appeared first on plusinfo.mk.

Здружението „Млади за Македонија“, чија регистрација е одбиена, во својот статут и основачки акти предвидувало да врши дејност и надвор од Македнија, притоа финансирајќи се и од буџетот на РСМ, а притоа не го користи уставното име за државата, па според тоа не ги исполнува условите да биде регистрирано под тоа име, објасни меѓудругото Министерството за правда во својот одговор до Плусинфо за законската основа на одлуката во однос на ова барање за регистрација на здружение.

Како што Плусинфо веќе пишуваше Министерството за правда отфрлило барање за регистрација на здружение на граѓани „Млади за Македонија“ од Гевгелија, поради употреба на името „Македонија“ во називот. Застапникот на иницијативата за регистрирање здужение адвокатот Тони Менкиноски поднел тужба до Управниот суд на решението на Министерството за правда со кое се одбива регистрацијата, и за таа тужба минатата недела судот расправаше на отворена седница. Предвидено е Управниот суд да ја објави својата одлука во среда.

Во својот одговор до Плусинфо Министерството за правда исцрпно ја објаснува звојата одлука:

„Министерството за правда по однос на поднесените барања за користење на името Македонија постапува согласно член 9 став 1 од Законот за здруженија и фондации според кој ,,зборот Македонија и зборовите изведени од него како и неговите кратенки можат да се содржани во името на организацијата само со одобрение на Министерството за правда. Со стапување на сила на Конечниот договор за решавање на македонско-грчкиот спор за името и за стратешко партнерство како и уставните амандмани од 33-36 и Уставниот закон од 12 јануари 2019 година, РСМ како една од договорните страни ги презема обврските кои произлегуваат од овие документи а во кои е регулирано прашањето за решавање на разликите околу името. Според договорот и уставните амандмани кои стапија на сила 2019 година, уставното име на државата е Република Северна Македонија кое се употребува „erga omnes“. По стапувањето на сила на Конечниот договор, согласно одредбите од член 1, став 9 и став 10 од договорот, термините ,,Македонија” ,,Република Македонија“ ,,ПЈР Македонија” ,,ПЈР. Македонија”, во преведена или непреведена форма, како и привремената референца ,,Поранешна југословенска Република Македонија” и кратенката ,, ПЈРМ” ќе престанат да се употребуваат за обраќање во каков било официјален контекст. Придавката во однос на државата, органите на државната управа и останатите институции, како и приватните ентитети кои се поврзани со државата „се основани со закон и добиваат финансиска поддршка од државата за активности надвор од државата, мора да бидат во согласност со официјалното име на државата, Република Северна Македонија.“

Од приложената документација произлегува дека Здружението, согласно статутот, е предвидено да делува надвор од државата, притоа финансирајќи се и од буџетот на РСМ. Термините „Македонија”, ,,Република Македонија” ,,ПЈРМ”во преведена или непреведена форма не смеат да се употребуваат во целокупната внатрешна и надворешна официјална комуникација од сите.. Актот за основање на здружението е од 02.08.2020 година, барањето за добивање на одобрение за користење на зборот ,,Македонија” до Министерството за правда е поднесено на 12.08.2020 година.

При увидот од приложената докуменација, Министерството за правда утврди дека Здружението ,,Меѓународно здружение за унапредување и заштита на човековите права Млади за Македонија – Гевгелија” во основниот акт не го користи уставното име на државата.. Министерството за правда при носењето на одлуките се повикува на законските одредби и врз нив ја заснова својата одлука како во конкретниот случај“ – се наведува во одговорот од Министерството за правда.

The post НЕ МОЖЕ И „МАКЕДОНИЈА“ ВО ИМЕ И ФИНАНСИРАЊЕ ОД БУЏЕТ Зошто е одбиена регистрацијата на здружение „Млади за Македонија“ appeared first on plusinfo.mk.