Македонија има огромен ИКТ потенцијал, одлични и квалитетни кадри кои излегуваат од универзитетите. Сега е шанса да ги искористиме во приватниот сектор, за потоа тие да и помогнат на државата во дигиталната трансформација, порача денеска министерот за дигитална трансформација, Стефан Андоновски по почетокот на конференција MASIT 2.0 – „Recode Reality”.

Владата, како што изјави Андоновски, одлучи да се потпре на приватниот сектор во процесот на дигитализацијата и сега двете страни треба заедно да градат проекти кои ќе значат реализација дома, но и извоз на продуктите.

– Продолжуваме со поддршка на приватниот сектор. Немаме агенција оперативно одговорна за дигитализација и затоа се потпревме на приватниот сектор во сите најкрупни проекти на државата, а потоа и во нивното одржување. Сега прашањето е како тоа да го надградиме, како да стигнеме до следното ниво – европски проекти во државата кои треба да бидат реализирани од македонски компании или македонски компании да бидат носители на тие проекти зашто тоа е начинот да донесеме и европски стандард и да ги поттикнеме домашните фирми да растат, но и администрацијата да ги следи. Вториот елемент на нашата домашна задача е државните институции да обезбедат доволно квалитетен кадар што ќе остане да ги води проектите во институциите. Мислам дека сме на добар пат и дека ќе имаме резултати – рече Андоновски.

Според претседателот на МАСИТ, Јордан Димитровски, ИКТ индустријата учествува со 4,5% во националниот БДП на Македонија што е 1,65 милијарди евра годишен приход. Секторот брои над 3.000 компании со над 25. 000 вработени, чија просечна бруто плата надминува 2.500 евра.

– Очигледен е растот на на ИКТ секторот, а тоа го покажуваат и прелиминарните бројки за 2025 година. Македонските ИТ компании ги следат европските стандарди. Многу од нив кои се на ниво на европските, работат за странство, посебно за европските држави. Ги следиме трендовите во Европа, но и предизвиците. Сепак, ИТ секторот кај нас е во добра кондиција и секоја година бележи раст над 10 отсто – подвлече Димитровски.

Министерот Андоновски одговорајќи на новинарско прашање, потврди дека платите во приватниот сектор се подобри, но државата, напомена, нуди стабилност и таа симбиоза, како што оцени, може да донесе резултати.

– Има конкуренција во плати и државата никогаш нема да го стаса приватниот сектор исто како што приватниот сектор никогаш нема да ја стаса стабилноста на државата. Ние гледаме како нашите позиции во Министерството да бидат поатрактивни со конференции, обуки и патувања во странство, активности и креирање политики, додека приватниот сектор тоа повеќе го прави со мотивација преку плати. Таа симбиоза може да донесе резултати – рече Андоновски.

Конференцијата „Recode Reality” што ја организира Стопанската комора за информатички и комуникациски технологии (МАСИТ) има преку 300 гости од земјава и регионот, како и говорници од врвот на ИКТ-индустријата во Европа. Тие денеска во Скопје разговараат за модернизација на дигиталната инфраструктура и телекомуникациите, како за реалните можности што ги отвора вештачката интелигенција.

The post ИМАМЕ ОГРОМЕН ИКТ ПОТЕНЦИЈАЛ Андоновски очекува секторот да ја помогне дигитализацијата на земјата appeared first on plusinfo.mk.

„Ако сакаме Европа да биде конкурентна, мора да им овозможиме на нашите компании пристап до капитал – не само преку банкарски кредити, туку и преку пазарите на хартии од вредност“.

Вака порача Блаж Бродњак, Главен извршен директор на НЛБ Групацијата, на отворањето на 24. Годишна конференција на Македонската берза во Охрид.

Бродњак потенцираше дека интеграцијата на пазарите на капитал е неопходна, бидејќи банките не можат сами да го преземат целиот инвестициски товар кој е потребен за поширок регионален или глобален настап на компаниите од регионот.

Истовремено, тој предупреди и на сè поголемата технолошка зависност на Европа, особено од САД во ИКТ секторот, што според него е сериозна пречка за долгорочна конкурентност.

– Она што вчера изгледаше како гарантирана стабилност, денес веќе не е сигурно – рече главниот извршен директор на НЛБ Групацијата, алудирајќи на геополитичките тензии и конфликтите во непосредна близина на Европската унија.

– Сигурноста станува приоритет број еден – од воена и политичка до сајбер заштита – но цената што ја плаќаат државите за тоа сериозно ги оптоварува јавните буџети – додава Бродњак.

Според главниот извршен ддиректор на НЛБ Групацијата, трошоците за одбрана и инвестициите во сајбер безбедност и ИКТ доаѓаат на веќе преоптоварени буџети, особено во земјите кои се соочуваат со дефицити поради социјални и демографски политики.

Македонија и регионот се срцето на економската иднина на Европа

Како пример за функционална регионална поврзаност и долгорочна вредност, Бродњак ја посочи НЛБ Групацијата, која котира на Љубљанската и Лондонската берза и има активно присуство во сите земји од Западен Балкан.

– НЛБ претставува пулс на домаќинствата и на стопанството во регионот – вложувањето во НЛБ е вложување во целиот регион“, истакна тој.
Бродњак ја нагласи стратешката улога на Македонија во овој контекст и потенцираше дека земјите од Западен Балкан се подготвени за членство во ЕУ повеќе од било кога досега. „Никој не може да ме убеди дека денешна Македонија е помалку подготвена за членство отколку што беа Романија и Бугарија во своето време – изјави тој, оценувајќи дека блокирањето на проширувањето е исклучиво политичка, а не реална одлука.

Според него, неприфаќањето на земјите од регионот би било најголема геостратешка грешка за Европа.

Бродњак го заврши говорот со силна порака за иднината на континентот:

– Мораме да размислуваме европски, обединето и долгорочно, и да не заборавиме дека без нови генерации, нема ни иднина.

Конференцијата на Македонската берза, која ќе се одржува и утре, традиционално е еден од најзначајните финансиски настани во земјава, со учество на клучни актери од банкарскиот, инвестицискиот и корпоративниот сектор, како и регулатори и гости од регионот.

The post „ДА НЕ ЈА ИЗГУБИМЕ ВИЗИЈАТА ЗА ОБЕДИНЕТА ЕВРОПА“ Главниот извршен директор на НЛБ Групацијата се обрати на конференција во Охрид appeared first on plusinfo.mk.

Стопанската комора за информатички и комуникациски технологии МАСИТ ја објави годишната анализа на ИКТ-секторот и соопшти дека оваа индустрија и во 2024 година е двигател на економскиот раст, интернационализацијата и иновациите.

Според најновата компаративна анализа, ИКТ-секторот во 2024 година генерирал неверојатни 1,65 милијарди евра приход што е раст од 12,5% во однос на 2023 година.

Бројот на вработени се зголемил на речиси 24.000 лица, а инвестициите во човечки капитал и бенефиции достигнале историски нивоа.

Најбрзорастечки параметар е профитабилноста

Во 2024 година, компаниите од ИКТ секторот платиле 33 милиони евра данок на добивка, што претставува скок од речиси 65% во однос на претходната година. Ова покажува не само голем раст на приходите, туку и сериозно зголемена продуктивност и зрелост на индустријата.

Платите се највисоки во земјата

Просечната месечна бруто плата во ИКТ достигна 2.376 евра, а вкупно за плати и надоместоци се исплатени над 314 милиони евра што е 18% повеќе од 2023 година. Се бележи и раст на инвестиции во „нематеријални“ бенефиции – бонуси, обуки, патувања, осигурување – со вкупен износ од 32 милиони евра, што ја потврдува конкурентноста и привлечноста на секторот.

Со извоз на ИКТ-услуги вреден 664 милиони евра, секторот бележи раст од 20%, потврдувајќи ја својата позиција како стратешки двигател на македонската економија на глобалната сцена.

ИКТ е иднината и сегашноста

Анализата покажува дека ИКТ не е само најбрзорастечкиот, туку и најстабилниот и најатрактивниот сектор за кариерен развој. Компаниите вложуваат сè повеќе во луѓето, креирајќи услови за одлични плати, професионален развој и висок животен стандард.

Оваа година, МАСИТ одбележува јубилеј 25 години активно присуство и посветеност на развојот на ИКТ-индустријата во Македонија. Во текот на овие две и пол децении, МАСИТ успеа да ги обедини најиновативните и најуспешните ИКТ-компании, кои денес генерираат половина од вкупниот приход во секторот.

The post ПРОСЕЧНА БРУТО ПЛАТА НА КОМПЈУТЕРЏИИТЕ ВО ЗЕМЈАВА Е 2.376 ЕВРА Лани овој сектор генерирал 1,65 милијарди евра приход appeared first on plusinfo.mk.

ИКТ индустријата во Македонија го задржа позитивниот тренд на пораст, согласно последната анализа на МАСИТ, која покажува континуиран раст по однос на сите параметри.

Просечната месечна бруто плата на вработените во оваа индустрија за 2023 година покажува стабилност. Овој индикатор во 2023 година изнесува 2.290 евра и бележи пораст од 1% во однос претходната 2022 година кога бил 2.260 евра за просечна месечна бруто плата исплатена по вработен.

Платите и надоместоците од плата бележат поголем пораст. Во 2023 година биле реализирани приближно 266,8 милиони евра, споредбено со 2022 година кога биле реализирани 215,2 милиони евра, што покажува зголемување од 24% на овој индикатор.

Во 2023 година, забележан е и пораст на вкупниот број регистрирани субјекти во индустријата. Во 2022 година имало активни 2.846 компании во индустријата, а во 2023 година се евидентирани 3.091 компанија, што прикажува пораст од 9% на овој индикатор. Согласно анализите на МАСИТ од претходните години, во 2022 година е забележан пораст од 16% на бројот на компании во однос на 2021 година, односно минатогодишниот пораст бил речиси двојно поголем од тековно евидентираниот пораст од 9%.

Во 2022 година, евидентирани биле 19.947 вработени лица, а во 2023 година се евидентирани 21.640 лица. Забележан е пораст од 8% на овој индикатор. За споредба, минатогодишниот измерен пораст изнесувал 13% повеќе вработени во 2022 во однос на 2021 година, што укажува на благо опаѓање на вработувањата во ИКТ секторот.

Значителен пораст е забележан во исплатата на останати трошоци за вработените во индустријата. Во 2023 година се исплатени над 30 милиони евра, односно 37% повеќе од претходната 2022 година кога за останати трошоци компаниите одвоиле нешто над 22 милиони евра. Овој индикатор јасно покажува дека компаниите во континуитет одвојуваат сѐ поголеми буџети во насока на зголемување на бенефициите и задоволството на своите вработени.

Компаниите во 2023 година оствариле пораст и во приходите од работењето и во извозот и тоа 15%, односно 18% пораст во однос на 2022 година.

Трошоците за даноци на плати и надоместоци на плата во 2023 година исто така бележат зголемување за 24% во однос на 2022 година. Во ист однос се бележи пораст и на платените придонеси за задолжително социјално осигурување.

ИКТ компаниите во државава во 2023 година изгенерирале данок на добивка во износ над 20 милиони долари, или 13% повеќе од 2022 година.

Погледнете го движењето на генералните индикатори прикажано за последните 5 години со суми и проценти во табелата подолу:

The post ПРОСЕЧНА ПЛАТА ВО ИНФОРМАТИЧКИОТ СЕКТОР Е 2.290 ЕВРА Повеќе од 30 милиони евра отишле за поголеми бенефиции и задоволство на вработените appeared first on plusinfo.mk.