Асоцијацијата на спортски обложувалници на Македонија (АСОМ) на јавната расправа закажана за петок, 19 јуни, пред собраниската Комисија за финансирање и буџет, отворено и со факти ќе ги соочи предлагачите на новиот Предлог-закон за игрите на среќа со катастрофалните последици од нивните решенија. Пред пратениците и експертската јавност, АСОМ ќе ги презентира главните аргументи кои јасно разоткриваат дека зад параванот на лажна грижа за граѓаните, државата всушност спроведува класична монополизација на пазарот, воведува скандалозна финансиска нееднаквост и свесно го турка легалниот приватен сектор во сигурен банкрот.

Асоцијацијата соопшти дека еден од главните аргументи кој ќе биде изложен се однесува на апсурдната забрана за приредување на игрите на среќа преку интернет. Според светските и европските стандарди, интернет игрите не се посебна категорија, туку само медиум преку кој се одвиваат веќе постоечките игри на среќа. Но, новиот закон предвидува државата да добие ексклузивно право самостојно да организира интернет игри на среќа, преку друштво во кое е единствен акционер. Со ова, на останатите лиценцирани приредувачи кои веќе платиле скапи лиценци, им се забранува пристапот до глобалната интернет мрежа. Освен Северна Кореја, не постои друга држава во светот која на легални компании им го забранува користењето на интернетот како медиум за легално работење. АСОМ ќе посочи дека овој потег има единствена цел да го монополизира пазарот и да го озакони досегашното незаконско работење на државната платформа „Мега Вин“, преку елиминирање на секоја конкуренција.

Дополнително, пред Комисијата ќе бидат презентирани и аргументите дека субјектите што приредуваат игри на среќа свесно се доведуваат во финансиска нееднаквост, со што државата ја озаконува нелојалната конкуренција. Со ова Предлог-законот целосно го крши уставот и е спротивен на уставното право за еднаква положба на сите учесници на пазарот. Имено, предлог-законот предвидува државната лотарија за интернет игрите на среќа да плаќа посебна давачка од само 15%, а останатите приредувачи за истите игри ќе плаќаат 23%. Истовремено, за приватниот сектор се воведуваат и нови огромни фиксни давачки. Ова претставува очигледен доказ дека државата си одредува повластени услови за себе, додека приватниот сектор го оптоварува со давачки кои се неиздржливи.

Кога на забраната за онлајн работење и воведувањето драстично повисоки давачки ќе се додаде и мерката за оддалеченост од 500 метри, станува јасно оти целта на законодавецот не е просторната регулација и заштитата на учениците, туку чистење на пазарот. Легалните приредувачи ќе мора да затворат над 90% од своите објекти, а оние кои ќе останат, едноставно нема да можат да ѝ конкурираат на државната лотарија која ќе има монопол на интернет, помали давачки и ќе нема трошоци за кирии за физички објекти.

„Пред пратениците јасно ќе ја изнесеме суровата вистина дека Владата свесно жртвува 10.000 директни работни места и егзистенцијата на илјадници семејства, ги затвора легалните објекти за да го преземе профитот преку државен монопол, оставајќи го притоа просторот ширум отворен за развој на нелегална црна економија на терен. Црниот пазар работи само за профит, таму нема контрола на идентитет и никој не штити малолетници. Дополнително, 350 милиони евра кои годишно легално се слеваат во државниот буџет, ќе бидат префрлени директно на црниот пазар“, се наведува во соопштението од АСОМ.

Врз основа на овие непобитни аргументи, на претстојната јавна расправа АСОМ категорично ќе бара итно повлекување на овој скандалозен предлог-закон. Асоцијацијата останува доследна во борбата за спас на 10.000 работни места и зачувување на легалната индустрија сè до донесување на вистински, одржлив и европски закон.

The post „ВО ЛАЖНАТА ГРИЖА ЗА ГРАЃАНИТЕ СЕ КРИЕ ОБИД ЗА ДРЖАВЕН МОНОПОЛ“ Од АСОМ обвинуваат дека државата си прави повластени услови за себе appeared first on plusinfo.mk.

Асоцијацијата на приредувачи на игри на среќа во казина и автомат клубови (АПИС) ја поздрави одлуката на членовите на Комисијата за финансирање и буџет конечно да се одважат и да го прифатат нивното заедничко барање за одржување јавна расправа по повод Предлог законот за игри на среќа кој го помина првото читање. За жал, велат од АПИС, асоцијациите и здружението на вработени во секторот, до сега немаа можност, со својата експертиза, знаење и искуство да дадат придонес во процесот на изработка на ново одржливо законско решение.

„Иако сме прва линија на имплементација на актуелниот важечки закон за игри на среќа, кој е еден од најстрогите во регионот и пошироко, ни беше ускратена можноста преку инклузивен процес да креираме регулатива согласно сите европски и светски стандарди. Јавната расправа е демократска алатка која ќе овозможи претставници на асоцијациите и вработените во легалните објекти со аргументи на целокупната јавност да ја објаснат штетноста на одредени одредби од Предлог законот за игри на среќа. Ќе зборуваме за закон кој се однесува на економски сектор со повеќе од 10.000 вработени што вкупно гледано е најголемиот приватен работодавец. Ќе зборуваме за регулатива од која зависат повеќе од 350 милиони евра буџетски приливи на годишно ниво. Ќе зборуваме за уставно спорните одредби и решенија. Ќе предупредиме дека вака подготвен закон на среден рок ќе направи хаос во општеството кој тешко ќе може да се спречи. Подготвени сме во законодавниот дом да се соочиме со дежурните критичари на игрите на среќа, кои нема да преземат одговорност за тоа што ќе следи доколку овој Предлог закон се изгласа“, се наведува во соопштението од АПИС.

Доколку се прифатат нивните аргументи, подготвени се веднаш да учествуваат во мешовита работна група која во кус рок ќе изработи ново законско решение по европски и светски стандарди за игри на среќа, кое ќе ги даде вистинските одговори за грижите на граѓаните и ќе биде спроведлив во пракса.

The post ЈАВНАТА РАСПРАВА Е МОЖНОСТ ДА СЕ АРГУМЕНТИРА ШТЕТНОСТА НА ПРЕДЛОЖЕНИОТ ЗАКОН ЗА ИГРИ НА СРЕЌА Секторот ја поздрави одлуката на пратениците appeared first on plusinfo.mk.

Со 59 гласа „За“ и 9 гласа „против“ во четвртокот вечерта Собранието ги усвои измените во Законот за игри на среќа, со кои казината повеќе не смеат да се лоцирани поблиску од 500 метри од училиштата.

Со новите прописи се забрануваа рекламирањето на излозите на коцкарниците, како и рекламите со кои коцкањето се претставува како начин за постигнување личен успех или за брза заработка.

Со законските измени секој апарат ќе мора да има задолжителен систем за локација, односно GPS, со цел тековна контрола од страна на Управата за јавни приходи. Исто така, лиценците нема да можат да се мултиплицираат, а се воведуваат и нови финансиски давачки за отворање на уплатно-исплатни места.

Предлог-законот предвидува и зголемување на износите на банкарските гаранции, како и имплементација на препораката MONEYVAL на Советот на Европа, како дел од стандардите за спречување перење пари и финансирање тероризам.

Со овие измени, според власта, треба да се обезбеди поголема контрола врз секторот, намалување на ризиците од злоупотреби и поголема заштита на младите од влијанието на игрите на среќа.

The post УСВОЕНИ ИЗМЕНИТЕ ВО ЗАКОНОТ ЗА ИГРИ НА СРЕЌА Играчниците мора да бидат 500 метри далеку од училиштата appeared first on plusinfo.mk.

Асоцијацијата на спортски обложувалници на Македонија (АСОМ) и Асоцијацијата на приредувачи на игри на среќа во автомат клубови и казина (АПИС), со поддршка на вработените во дејноста денеска одржаа заедничка прес-конференција во паркот „Жена борец“ поради ставањето на Предлог-законот за игрите на среќа и за забавните игри на дневен ред на денешната 104. собраниска седница.

Претставниците на секторот и вработените упатија силен и недвосмислен апел до пратениците целосно да го отфрлат ова законско решение, кое го оценија како деструктивно, монополско и штетно како за буџетот, така и за егзистенцијата на илјадници семејства.

Пред присутните медиуми и собраните граѓани се обрати претседателот на АСОМ, Васко Илијевски, кој потенцираше дека овој предлог закон означува свесна одлука на државата да доведе една целосно легална дејност до банкрот.

– Кажете НЕ на овој деструктивен Предлог-закон за игрите на среќа и за забавните игри! Отфрлете го ова решение кое ќе значи крај за легалната дејност и кое ширум ќе ја отвори вратата за сивата економија и криминалот – изјави Илијевски.

Илијевски исто така посочи дека со носењето на овој закон, повеќе од 10.000 директно вработени и десетици илјади работници во придружните дејности ќе останат без приход и работа. Заедно со нивните семејства, тоа се преку 35.000 луѓе кои државата свесно ги прави идни кандидати за иселување. Од Асоцијацијата предупредуваат и дека затворањето на легалните објекти нема да ги заштити младите, туку ќе предизвика тежок контра-ефект.

– Сакам јавно да ги прашам пратениците: Дали навистина верувате дека со затворањето на легалните објекти ќе ги заштитите младите? Оваа мерка ќе даде тежок контра-ефект. Со затворањето на легалните објекти, вие директно отворате простор за нелегална црна економија. Ја враќате Македонија во деведесетите, а оние кои криминално сакаат да заработуваат од оваа дејност веќе тријат раце. Обложувањето нема да исчезне туку ќе се врати по темните подруми – потенцираше Илијевски од паркот „Жена борец“.

Од АСОМ напоменаа дека тие се првата легална бариера која почитувајќи го законот, врши контрола на лични карти и не дозволува влез на малолетници. Со нивно затворање оценува Илијевски ќе се остави играта на црниот пазар.

– Кога ќе нè затворите нас, ја оставате играта на црниот пазар кој работи само за профит, каде што нема контрола на идентитет и никој не штити малолетници. Дополнително, 350 милиони евра кои годишно легално се слеваат во државниот буџет, ќе бидат префрлени директно на црниот пазар – изјави денеска Илијевски.

Од асоцијацијата потсетија дека секторот никогаш не бил против регулација, но институциите досега покажале целосен игнорантски однос за соработка, како за нивните предлози при подготовка на законот по европски стандарди така и за повиците за средби при уредување на дејноста.

Илијевски се наврати и на понудените конкретни решенија базирани на три столба и тоа: Поригорозни казни за непочитување на забраната за влез на малолетници, либерализација на онлајн пазарот за легалните приредувачи, наместо воведување државен монопол, со што државата би имала апсолутна контрола на приредувачите на игри за среќа и вложување сопствени ресурси за развој на национални едукативни кампањи во соработка со институциите.

Од настанот вработените како најзасегнати од дејноста испратија јасно предупредување до пратениците, а тоа е дека бараат итно повлекување на штетниот предлог-закон и отворање на вистински дијалог.

– Доколку законот се турка без јавна расправа и се изгласа уште во првото читање, денешниот настан ќе се смета само за прв чекор – порачаа работниците.

АСОМ и АПИС најавија дека ќе ги искористат сите механизми за одбрана на легалниот сектор и најавија масовни протести низ целата земја сè до конечно повлекување на законот од кој зависи егзистенцијата на нивните вработени.

The post ПРАТЕНИЦИТЕ ДА КАЖАТ „НЕ“ НА ДЕСТРУКТИВНИОТ ЗАКОН ЗА ИГРИ НА СРЕЌА Порака од 10.000 вработени кои се соочуваат со губење на работата appeared first on plusinfo.mk.

Изминаа две недели откако, асоцијациите на приредувачите на игри на среќа во автомат клубови, казина и спортски обложувалници, АПИС и АСОМ доставија официјално барање до Собранието за организирање јавна расправа во врска со Предлог законот за игри на среќа, но не добија одговор. Согласно член 129 став 2 од деловникот, барањето е упатено до претседателот на Собранието, претседателката, членовите на Комисијата за финансирање и буџет и до координаторите на сите пратенички групи.

– Убедени сме дека ваквата демократска алатка ќе овозможи претставници на асоцијациите и вработените во легалните објекти да ја споделат сопствената експертиза и професионално искуство со пратениците. За жал, не само што не добивме ниту позитивен ниту негативен одговор, туку денеска на дневен ред на пленарната седница е ставен Предлог законот за игри на среќа во прво читање. Се засилува нашиот впечаток дека за некого брзината е поважна од суштината – рече Горан Стоименов, претставник на Асоцијацијата на приредувачи на игри на среќа (АПИС).

Тој нагласи дека станува збор за закон кој се однесува на економски сектор со повеќе од 10.000 вработени што вкупно гледано е најголемиот приватен работодавец.

– Зборуваме за регулатива од која зависат повеќе од 350 милиони евра буџетски приливи на годишно ниво. Закон со толку сериозни последици, особено што содржи уставно спорни одредби и решенија е недозволиво да се носи набрзина. Вака подготвен закон на среден рок ќе направи хаос во општеството кој тешко ќе може да се спречи. Затоа, сметаме дека е неопходно во законодавниот дом да ги соочиме аргументите и најважно од сѐ, јавноста да добие точна претстава за тоа какви штета ќе предизвика усвојувањето на овој Предлог закон – рече тој.

Долг период игрите на среќа се цел на негативна кампања во која се нафрлаат разни клевети. Стоименов повтори дека легалните објекти не се закана за младината. Закана за младината е популизмот кој затворајќи го овој економски сектор ќе ги направи младите лесен таргет на незаконски играчници кои ќе се одвиваат по подруми, а државата ќе нема никаква контрола.

– Голем дел од нашите членки имаат капитал од ЕУ, станува збор за општествено одговорни компании кои донираат во јавното здравство, спортот, културата, покровители се на многу хуманитарни акции и до сега низ различни примери покажале дека се искрен и стабилен партнер на заедницата. Доколку не бидеме ислушани и нашата експертиза и знаење не биде уважено со цел изработка на одржливо законско решение во согласност со највисоките европски и светски стандарди за организирање игри на среќа, ќе бидеме принудени да ги користиме сите демократски средства и правни механизми да ја истераме правдата до крај – рече претставникот на АПИС.

The post НЕДОЗВОЛИВО Е ЗАКОНОТ ЗА ИГРИ НА СРЕЌА ДА СЕ НОСИ НАБРЗИНА Приредувачите на игри на среќа реагираат на игнорантскиот однос appeared first on plusinfo.mk.

Долго време во општеството е отворено прашањето што треба државата да стори за да се намали бројот на обложувалници, автомат-клубови и казина. Од една страна државната каса на годишно ниво инкасира повеќе од 350 милиони евра, но од друга страна различните политички структури кои владеат во последните десетина години, се под притисок на критичката јавност која бара целосно затворање на игрите на среќа и „продавниците“ за брзи кредити.

Жестоките критичари го наметнуваат мислењето дека младината во моментот е изложена на искушенија за стекнување зависност од игрите на среќа, кое според нив, ги има на секој чекор. Многу често се користи формулацијата дека Скопје заради светлечките реклами на игрите на среќа наликува на Лас Вегас. Актуелната Влада не е имуна на овој притисок и затоа предложи нов закон за игри на среќа кој веднаш предизвика жестоки реакции на вработените во овој сектор и асоцијациите на приредувачите, кои тврдат дека со ваквото решение ќе се затворат легалните објекти заради што младината ќе стане лесна мета на диви играчници. Се повикуваат на примерот со Албанија каде нивниот премиер се откажа од четиригодишната забрана на игрите на среќа заради масовно отворање на играчници на црно и големи буџетски финансиски загуби.

Што содржи новиот предлог закон за игри на среќа? Се актуелизира одредбата за воведување дистанца од 500 метри на објектите за приредување игри на среќа од училишта, се забранува секаков вид медиумско рекламирање на приредувачите и се намалуваат светлечките реклами на големина од 100 сантиметри ширина и 30 сантиметри должина. Ова може да се каже дека е обид за тројна заштита од игрите на среќа. Сепак, анализите укажуваат сериозен потенцијал за покренување уставно правни прашања.

Да анализираме едно по едно. Со темелните вредности на Македонскиот Устав, но и во членот 55 во главата 4 – „Основи на економските односи“, се гарантира слободата на пазарот и претприемништвото. Државата мора да обезбеди еднаква правна положба на сите субјекти за пазарот и не може да ги ограничи слободата на пазарот и претприемништвото освен ако не е загрозена одбраната на Републиката, зачувувањето на животната средина, природата или здравјето на луѓето.

Доколку предлагачите на законот сметаат дека игрите на среќа се штетни по здравјето на луѓето, тогаш тоа мора да го докажат во правосудна постапка и потоа целосно да ги забранат. Вака, со дистанцирање 500 метри од училишта се прави противуставна дискриминација, и тоа на урбанистичка околност која не е фиксна. Имено, 500 метри во 2026 не значи дека ќе биде 500 метри и во 2028 година. Било кој градоначалник може да одлучи да гради училиште на помалку од 500 метри од постоечки автомат клуб и со тоа да создаде правна претпоставка за негово затворање. Уште повеќе што дистанцата од училишта не важи и за кафулиња, ресторани и тобака каде младината по истата логика (преку очи и магнетна привлечност на светлечките украсени излози) може да стекнува зависност од алкохол и никотин.

Доволен е примерот во Општина Центар, каде на „Боемската улица“ има основно училиште каде ученици од школскиот двор секојдневно се соочуваат со кафеанските обичаи. Најголем фаул на дистанцата прави одредбата од предлогот на Владата со кој државата го задржува правото да организира онлајн игри на среќа. Едноставно, се губи смислата на мерката за наводна заштита на младината кога преку мобилните телефони и интернетот тие ќе бидат изложени во секое време на онлајн игри на среќа.

Забраната за медиумско рекламирање е парадоксална, затоа што истата не се однесува и не важи за рекламите на спортската опрема и рекламите на спортските терени на називите на приредувачите на игри на среќа. Тоа значи дека кога на медиумите ќе се врши пренос на фудбалски, ракометен натпревар или спортски автомобилизам целокупната јавност ќе се соочува со рекламите на дресовите и називите на приредувачите на игри на среќа, ама за истите медиуми ќе важи забрана според која нема да може самите комерцијално да издаваат рекламен простор за овој економски сектор. Ова е повторно правен потенцијал за противуставна дискриминација.

Конечно, во октомври 2024 година Врховниот Суд на Шпанија ја укина забраната за рекламирање игри на среќа преку ТВ и интернетот. Пресудата ги истакна приоритетите за регулаторите во ЕУ. Судот заклучи дека забраната нема правна и уставна основа и наложи да се најде рамнотежа меѓу загарантираната слобода на деловното работење на приредувачите на игри на среќа и заштита на потрошувачите – играчите. Истиот Суд како повреда на слобода на говорот ја оцени и ја укина забраната за познатите личности (инфлуенсери) да рекламираат игри на среќа.

Анализата укажува дека министерството за финансии како овластен предлагач на новиот Предлог закон за игри на среќа на Владата треба сериозно да го земе предвид потенцијалот на оспорување на клучните одредби пред Уставниот суд што секако може да предизвика тужби кои драматично би го оштетиле буџетот на државата.

The post ТРОЈНАТА ЗАШТИТА ОД ИГРИТЕ НА СРЕЌА ЌЕ СТАНЕ УСТАВНО-ПРАВЕН ПРОБЛЕМ Слободата на пазарот и претприемништвото се гарантирани со Уставот appeared first on plusinfo.mk.

Здружението на вработени во секторот игри на среќа „Сакам да работам“ испрати рекација по повод предложените измени на Законот за игри на среќа.

„Слушнавме дека Предлог законот за заштита од пушење поминал серија консултации на извршната власт со еснафските здруженија и претставниците од тутунската индустрија за да постигнат компромис. За разлика од овој пристап, за Предлог законот за игри на среќа, извршната власт постапува обратно и ги игнорира засегнатите страни, иако станува збор за економски сектор кој вкупно гледано е најголем приватен работодавец во Македонија. За жал, никој од надлежните не смета дека ние вработените кои секојдневно ја спроведуваме регулативата за игри на среќа треба да дадеме идеи и предлози за подобар закон.

Осум години сме заложници на различни политички структури кои си поигруваат со нашите судбини тогаш кога мислат дека може да печалат гласови преку жртвување на нашите работни места. Осум години живееме во грч, неизвесност, заедно со нашите семејства се тресеме дали ќе останеме на улица, со нецелосно исплатени кредити, со активирани хипотеки и со авионски карти за еден правец – иселување во странство.

Ние не сме гости во сопствената држава. Албанските дипломирани правници бараат да полагаат правосуден испит на мајчиниот јазик, на највисоко ниво веднаш им се ветува решение. Ние испраќаме писма, протестираме, нема никаков ефект. Власта треба да одговори, зошто игнорира над 10.000 вработени во игрите на среќа? Дали причина за тоа е што 90 проценти од вработените сме Македонци кои можеби треба станеме жртви на политичко-етнички инженеринг? До кога легалните игри на среќа и вработените ќе страдаат заради негативната кампања на дежурните критичари, кои никогаш нема да преземат одговорност кога ќе се отворат играчници на црно по подруми каде младината ќе биде лесна цел?

Како здружение сме подготвени со сите демократски средства да го заштитиме нашето уставно загарантирано право на работа. Надлежните кои предлагаат затворање на легалните објекти за игри на среќа ни должат одговор каде ние да се вработиме, со поминати професионални обуки и работно искуство за приредување игри на среќа по највисоки светски и европски стандарди?“, се наведува во реакцијата на Здружението Сакам да работам која ја пренесувме во целост.

The post ЗОШТО ЗА ПУШЕЊЕТО ИМА КОНСУЛТАЦИИ, А ЗА ИГРИТЕ НА СРЕЌА НЕ? Здружението Сакам да работам бара одговор зошто се игнорираат 10.000 вработени appeared first on plusinfo.mk.

Претставници на Здружението на вработени во секторот игри на среќа „Сакам да работам“ денеска излегоа на предупредувачки протест против новиот предлог закон за игри на среќа.

– Причината за денешниот протест е Законот за игри на среќа кој Владата набрзина му го предложи на Собранието. Тие што го подготвувале законот не сметале дека треба да го чујат нашето мислење и искуство пред да го предложат. Сигурно се прашувате зошто протестот е овде во трговскиот центар Лептокарија? Токму оваа локација е потврда дека предлогот на Владата за дистанца од 500 метри е предлог за затворање на легалните објекти за игри на среќа. Затоа, ние вработените во овие објекти протестираме овде половина час како прво предупредување за тоа што ќе следи – рече Оливера Костова, претставничка на Здружението.

Таа предупреди дека ако се усвои предлогот на Владата, 10.000 вработени во овој сектор ќе останат на улица, а тоа ќе значи дека заедно со нивните семејства ќе станат 35.000 нови кандидати за иселување надвор од земјата.

– Тоа е социјална бомба. Каде ние да се вработиме? Актуелните наши работодавачи ни обезбедија обуки, професионално усовршување по највисоки европски и светски стандарди за организирање игри на среќа. Ако овој економски сектор престане да постои во Македонија ние ќе немаме друг избор освен да аплицираме во странство, во ЕУ, во западните земји за да работиме на работни места за кои сме се обучиле. Сакаме да упатиме јасна порака. Нашите протести се демократска битка за вистината. Долг период игрите на среќа се цел на негативна кампања. Ние не сме закана за младината. Закана за младината е популизмот кој затворајќи ги легалните објекти ќе ги направи младите лесен плен на играчници на црно кои ќе се одвиваат по подруми, каде државата ќе нема никаква контрола. Ние се бориме со аргументи и факти. Јавноста треба да види кој е подготвен да преземе одговорност за тоа што следи доколку се затвори овој легален економски сектор. Ние знаеме дека сме во право и стоиме зад секој искажан збор. Доколку надлежните и натаму мислат дека можат да нѐ игнорираат, ние сме подготвени да организираме масовни протести – рече Костова.

Нејзиниот колега Стеван Крстевски порача дека ако Владата итно не најде решение за нивните работни места, масовно ќе излезат на улица, со сите нивни вработени и семејства, сè додека некој не ги сфати сериозно.

– Денес стојам тука пред вас, во придружба на моите колеги, како еден обичен работник од индустријата за игри на среќа. Сакаме до сите надлежни институции, по кој знае кој пат, да испратиме една порака: Ние сме вкупно 10.000 вработени во оваа индустрија и ова што ни се случува е навистина срамота. Но, нема повеќе да молчиме! Ова денеска е само предупредувачки собир. Излезени сме во помал број за да покажеме дека сме спремни. Цели 8 години сме жртви на секоја политика, на секоја Влада, за нечии лични бизнис интереси. Секој што сака да ќари евтини политички поени, удира по нашиот грб. 8 години секој што ќе стигне нè држи во заложништво. Оставени сме во целосна неизвесност и секој ден живееме во страв дали утре нашиот објект ќе биде затворен и дали нашите работни места ќе постојат – рече тој.

Крстевски праша дали некој се запрашал какво е чувството да се живее во таква агонија и постојан немир?

– Од оваа работа ние чесно го вадиме нашиот леб. Ова е за нас единствен стабилен приход и надлежните мора да разберат дека овој предлог-закон удира врз реални човечки судбини. Сите ние имаме кредити за плаќање, подмируваме кирии и сметки, издржуваме семејства. Недозволиво е оние кои седат во удобните фотелји, вака да си поигруваат со нашата егзистенција. Затоа, нашата порака е јасна: Нема да дозволиме преку ноќ да нè избркате на улица. Оставете нè конечно на мир чесно да работиме! Ако не бидеме слушнати сега, следниот чекор се масовни блокади низ целата држава и нема да отстапиме сè додека нашите работни места не бидат безбедни – заклучи тој.

The post ОСТАВЕТЕ НЀ НА МИР, ЧЕСНО ДА РАБОТИМЕ Вработените во игрите на среќа бараат да бидат сфатени сериозно appeared first on plusinfo.mk.

Здружението на вработени во секторот игри на среќа „Сакам да работам“ за во петок во Скопје најави предупречувачки протест.

„Пратениците во македонското Собрание вчера и официјално го добија владиниот Предлог закон за игри на среќа, со кој се предвидува затворање на легалните објекти. Земајќи предвид дека нашите работни места и официјално се загрозени ние сме принудени да ги користиме сите демократски средства за борба за нашето уставно загарантирано право на работен однос. Во таа насока во петок ќе го одржиме првиот предупредувачки протест на вработените.

Одговорно тврдиме дека како здружение не сме консултирани за предлогот на Владата, ниту сме биле запознаени со неговата содржина. Нема никаква дилема дека овој Предлог закон за игри на среќа ни ја запечатува судбината. Подготвени сме на официјални средби со пратеничките групи да им ги презентираме сите факти, аргументирано да ги увериме дека со нивното евентуално гласање ‘за“ ќе остават најмалку 10.000 луѓе без работа и ќе создадат 35.000 нови кандидати за иселување од Македонија.

Нашето здружение одамна ѝ предочува на јавноста дека со воведување дистанца ќе се предизвика целосно затворање на легалните објекти, што по автоматизам ќе создаде епидемија на диви играчници по подруми, над кои државата ќе нема никаква контрола, а младината ќе биде под далеку поголем ризик. Доволно е да се погледнат примерите од соседството. Вчера излезе веста дека во Тирана тамошната полиција разбила голема мрежа на нелегално коцкање во местото Вора кое се одвивало во угостителски објект во кој при акцијата биле запленети поголем износ на пари. Сето ова е последица на четиригодишната забрана на легалните игри на среќа во Албанија. Иако, албанскиот премиер се повлече од забраната, сѐ уште не може да се справи со нелегалните играчници кои согласно неговото признание никнувале како печурки и сериозно му наштетиле на нивниот државен буџет.

Во Македонија се применува Закон за игри на среќа, кој е еден од најстрогите во регионот и пошироко и содржи европски и светски стандарди за регулирање на оваа економска гранка, а особено за забрана на влез на малолетници во сите легални објекти со лиценци за приредување игри на среќа. Пратениците не треба да влезат во замката на дежурните критичари на игрите на среќа кои многу долг период водат офанзивна битка против овој економски сектор. Легалните игри на среќа веќе со години се предмет на невидена негативна кампања во која се користат сите дозволени и недозволени средства за оцрнување.

Излегуваме на серија предупредувачки протести во одбрана на вистината. Бараме институционално соочување со дежурните критичари на игрите на среќа. Крајно време е да ги соочиме фактите и аргументите пред целокупната јавност и да видиме кој е подготвен да преземе одговорност за штетните последици кои брзо ќе се случат ако ваквото законско решение стапи на сила. Ние знаеме дека сме во право и стоиме зад сите наши тврдења. Доколку нашиот глас и понатаму се игнорира подготвени сме да организираме масовни протести“, се наведува во најавата за протест на Здружението Сакам да работам.

The post ПРЕДУПРЕДУВАЧКИ ПРОТЕСТ ВО ПЕТОК НА ВРАБОТЕНИТЕ ВО СЕКТОРОТ ИГРИ НА СРЕЌА Не биле ниту консултирани, ниту запознаени со владиниот Предлог закон appeared first on plusinfo.mk.

Жалиме што и актуелниот премиер влезе во замката на дежурните критичари на игрите на среќа кои многу долг период водат офанзивна битка против легалните игри на среќа, се вели во реакцијата на Здружението на вработени во сектор Игри на среќа „Сакам да работам“.

„Легалните игри на среќа веќе со години се предмет на невидена негативна кампања во која се користат сите дозволени и недозволени средства за оцрнување и обид за нивно дефинирање како најголеми општествени штетници. Притоа, свесно се игнорираат аргументите кои јасно и недвосмислено, преку конкретни примери од соседството, ставаат до знаење какви последици имаат државите каде игрите на среќа биле забранети одреден временски период. Она што е симптоматично е што дежурните критичари манипулираат со податоци кои внесуваат страв и паника меѓу родителите создавајќи лажна перцепција дека приредувачите на легалните игри на среќа имаат економски интерес малолетници да влегуваат во нивните објекти. Можеме да ги броиме и објектите за игри на среќа во центрите на повеќе европски метрополи, каде дел од домашните критичари гордо позираат и се фотографираат кога се туристи.

Една од асоцијациите јавно соопшти дека се согласува со намалување на големината на светлечките реклами на легалните објекти за игри на среќа како дополнителен придонес во градењето сигурност дека младината е безбедна. Интригантно прашање е зошто се премолчува една клучна одредба од предлогот на Владата што во целост ја поништува суштината на дистанцата од 500 метри. Зошто државата го задржува правото да организира онлајн игри на среќа што преку мобилните уреди и интернетот се достапни секаде и во секое време?

Ние одамна тврдиме дека со воведување дистанца ќе се постигне целосно затворање на легалните објекти, што секако е внесување на приредувањето на игри на среќа во црна зона во која ќе почнат да се организираат во подруми, како во 90-те години од минатиот век, без никаква контрола од државата, каде младината ќе биде под поголем ризик. Во Македонија се применува Закон за игри на среќа, кои е еден од најстрогите во регионот и пошироко и содржи европски и светски стандарди за регулирање на оваа економска гранка, а особено за забрана на влез на малолетници во сите легални објекти со лиценци за приредување игри на среќа.

Одговорно тврдиме дека како здружение не сме консултирани за предлогот на Владата, ниту сме биле запознаени со содржината пред да биде објавен. Нема никаква дилема дека законското решение кое влегува во собраниска процедура ни ја запечатува судбината. Подготвени сме на средба во Владата да му ги презентираме сите факти на премиерот за да го увериме дека ваквото решение ќе остави најмалку 10 илјади луѓе без работа и ќе создаде 35 илјади нови кандидати за иселување од Македонија“ – се вели со соопштението на Здружение на вработени во сектор Игри на среќа „Сакам да работам“.

МАКЕДОНИЈА НЕМА ДА НАЛИКУВА НА ЛАС ВЕГАС Мицкоски оцени дека новиот закон става ред во игрите на среќа

The post ПОСТОЕЧКАТА РЕГУЛАТИВА ЗА ИГРИТЕ НА СРЕЌА Е ЕДНА ОД НАЈСТРОГИТЕ ВО РЕГИОНОТ И ПОШИРОКО! Здружението „Сакам да работам“ му реплицира на премиерот appeared first on plusinfo.mk.