Многу родители денес се мачат со истите стравови во врска со одгледувањето на своите деца, а Хејли Бибер е една од нив. Во интервју за пролетното издание на списанието Interview, 29-годишната основачка на брендот Rhode ги сподели своите грижи за одгледувањето на својот 19-месечен син Џек Блус во свет кој изгледа сè потемен. Моделот, кој има син со сопругот Џастин Бибер, исто така откри дека се надева дека ќе го прошири своето семејство.

Стравови што ги мачат многу родители

Кога ја прашале дали се грижи за светот во кој ќе расте нејзиниот син, моделот признала дека тоа ја загрижува секој ден.

– Тоа е веројатно мојот најголем страв откако станав мајка. Светот во кој расте е навистина застрашувачки и ме обзема тешко чувство кога ќе помислам на иднината и на тоа каква е состојбата во светот. Но, морам едноставно да верувам. Можам само да се надевам дека ќе порасне во дом полн со љубов и топлина – рекла таа.

„Сакам повеќе од едно дете“

Во истото интервју, Хејли открила дека дефинитивно сака да го прошири своето семејство.

– Дефинитивно сакам повеќе од едно дете, но одам чекор по чекор. Понекогаш сакам две деца, понекогаш сакам пет – додала таа, истакнувајќи дека сонувала за брак, деца и семејство уште од мала.

The post ХЕЈЛИ БИБЕР ОТКРИВА ШТО ЈА ЗАГРИЖУВА ВО ВРСКА СО ОДГЛЕДУВАЊЕТО НА НЕЈЗИНИОТ СИН Повеќето денешни родители ги делат стравовите на манекенката appeared first on plusinfo.mk.

Компанијата dm drogerie markt ја претставува платформата „Иднина која инспирира“, иницијатива насочена кон поттикнување на општествениот ангажман и активното учество на поединците во обликувањето на заедничката иднина.

Со тоа започнува серија активности чија цел е да се охрабрат луѓето да се вклучат во промените така што поединци ќе споделуваат приказни за своите искуства со општествен ангажман и ќе ја инспирираат заедницата додека организациите, здруженијата и институциите ќе пријавуваат проекти што обединуваат волонтери или нудат можност за волонтерско ангажирање на граѓаните.

Ако сте личност која своето слободно време го посветува и се ангажирате за подобра иднинa, dm ве повикува да го споделите вашиот личен општествено одговорен ангажман тука и да ги инспирирате и другите луѓе да го дадат своето време онаму каде е најпотребно.

Доколку пак, сте здружение, организација или друга форма на непрофитна институција,  можете да пријавите проект чие реализирање подразбира граѓански ангажман тука. Споделувањето лични искуства и пријавувањето проекти ќе трае до 31 јули 2026 година, додека проектите што ќе ги поддржи dm, ќе бидат објавени од септември 2026 година.

Иницијативата се развива во три клучни области што ги обликуваат темелите на општество засновано на заедништво и меѓусебна поддршка: зајакнување на солидарноста и општествениот ангажман, поттикнување развој и напредок преку еднаквост, инклузија и образование, како и одговорно дејствување во согласност со природата, засновано на одржливи практики.

– Денес, повеќе од кога било, ни е потребна верба дека секој од нас може да придонесе за позитивни промени. Со иницијативата ‘Иднина која инспирира’ сакаме да ги охрабриме луѓето повторно да ја препознаат сопствената сила – силата на идејата, на солидарноста и на заедничкото делување. Веруваме дека иднината не се случува сама по себе, туку се создава преку мали, но храбри чекори што ги преземаме секој ден за подобра заедница. Затоа ја гледаме оваа иницијатива како платформа што ги поврзува луѓето, ги поддржува нивните иницијативи и создава простор во кој добрите приказни можат да прераснат во вистински промени. Нашата желба е да инспирираме што повеќе поединци и организации да се вклучат, затоа што веруваме дека кога делуваме заедно, можеме да изградиме поодржлива, поинклузивна и похумана иднина за сите – вели Кристина Дуранска, менаџер за маркетинг и комуникации во dm.

Во време обележано со економски неизвесности, климатски предизвици и чувство дека големите промени се надвор од дофатот на поединецот, оваа платформа тргнува од поинаква перспектива: иднината не е нешто што пасивно го чекаме, туку нешто што секојдневно го градиме, со мали чекори исполнети со солидарност и подготвеност за дејствување. Токму затоа, „Иднина која инспирира“ ги става луѓето и заедницата во центарот на своето внимание, додека dm ја презема улогата на двигател и партнер што обезбедува простор, поддршка и поттик.

The post ИДНИНА КОЈА ИНСПИРИРА dm лансира платформа која ја враќа вербата во силата на поединецот и заедницата appeared first on plusinfo.mk.

The post ДАЛИ 2025 Е ТАКВА КАКВА ШТО ЈА ЗАМИСЛУВАА ПРЕД 100 ГОДИНИ? Дел од технолошките пророштва се чинат исполнети appeared first on plusinfo.mk.

Денеска во Ѓорче Петров, Карпош, Центар и Кисела Вода, имавме чест да ги посетиме најмалите, нашите најмили, иднината на Македонија. Со новогодишни пакетчиња им подаривме радост и насмевки, кои се најискрената и највредната награда за нас, објави премиерот Христијан Мицкоски на својот Фејсбук профил.

Детската насмевка, истакнува премиерот, не потсетува, зошто вреди да се работи со одговорност, грижа и љубов за држава во која секое дете расте со надеж, сигурност и верба во подобро утре.

Премиерот сподели фотографии и од новогодишна средба со дечиња во владата.

„Владата денес е во поинакво руво. Најмладите се меѓу вработените, со најголемата надеж. Млади лица, големи соништа. Владата денес чекори со нив, нивната радост е нашата сила. За децата денес, за иднината утре“ – напиша Мицкоски.

The post 📷 „НИВНАТА РАДОСТ И НАСМЕВКИ НИ СЕ НАЈВРЕДНАТА НАГРАДА“ Најмладите ја разубавија владата, добија и пакетчиња appeared first on plusinfo.mk.

Претседателот на ВМРО-ДПМНЕ, Христијан Мицкоски, денеска на трибината „Локални и глобални предизвици од младинско значење“ упати силни пораки до младите за нивната улога во партиите и иднината на државата. Настанот беше организиран од Унијата на млади сили на ВМРО-ДПМНЕ и младината на Меѓународната Демократска Унија (IYDU) во хотел Хилтон.

– Ако постои партија без млади, тогаш тоа е партија без суштина. Прашањето не е дали таа ќе исчезне, туку кога. Ние сме горди што имаме офанзивна младина и ја поддржуваме затоа што тие ќе бидат нашите наследници во иднината – рече Мицкоски, потенцирајќи дека младите се сржта на партиите и клучни за политичката стабилност.

Претседателот им упати порака да градат младина и да им даваат шанса на новите генерации.

– Развивајте ги и дајте им шанса на вашите наследници. Без млади, политичките партии ќе исчезнат – рече тој.

Мицкоски предупреди и за реалноста во денешниот дигитален свет.

– Не верувајте во чуда. Она што го гледате на Инстаграм и ТикТок не е реалност. Ако некој ви ветува чуда, тогаш ве лаже – вели претседателот.

Тој ја потенцираше и важноста на достоинството

– Зачувајте го вашето достоинство. Не бидете дволични. Ако го имате достоинството, го имате најважниот дел од вашиот карактер – истакна лидерот на ВМРО-ДПМНЕ.

Мицкоски додаде дека семејството е најважниот столб во животот на младите.

– Децата и семејството ќе го обликуваат вашиот живот. Споделувајте, учете, бидејќи тоа ќе ве подготви и за иднината на вашата нација – порача Мицкоски.

На крајот, претседателот на ВМРО-ДПМНЕ се осврна и на важноста на работа, посветеност и визија за иднината.

– Ако една нација, особено мала како македонската, не работи напорно со фокус и јасен патоказ, ќе исчезне. Борете се и размислувајте за работите што ќе го обликуваат човештвото и иднината на вашата нација – рече Мицкоски.

The post БЕЗ МЛАДИ, ПАРТИЈАТА НЕМА ИДНИНА Мицкоски откри зошто младите се сржта на политиката appeared first on plusinfo.mk.

Во пресрет на вториот круг од локалните избори на 2 ноември, лидерот на ВМРО-ДПМНЕ, Христијан Мицкоски, и кандидатот за градоначалник на Брвеница, Јовица Илиевски, испратија пораки за единство, соживот и фокус на проекти, повикувајќи ги граѓаните да гласаат без разлика на етничка или верска припадност.

Претседателот на ВМРО-ДПМНЕ, Христијан Мицкоски, денеска од Брвеница порача дека сите кои работат за иднината на Македонија ја имаат неговата поддршка, без разлика на етничката, верската или политичката определеност. Тој ги повика граѓаните на општината да гласаат за кандидатот на партијата за градоначалник Јовица Илиевски и да заокружат број 9.

– Секој кој зборува за иднината на Македонија е добредојден соговорник. Секој кој поттикнува етнички поделби не му мисли добро на никого – истакна Мицкоски, нагласувајќи дека Владата инвестирала половина милијарда евра рамномерно во сите општини, без разлика на партиската припадност на градоначалниците.

Мицкоски го коментираше и недозволивиот речник на противникот на Илиевски, оценувајќи го како себичен потег и грешка, која според него ги компромитира и кандидатите од истата коалиција. Тој додаде дека и меѓународната заедница со загриженост го следи ваквото однесување.

Кандидатот Јовица Илиевски истакна дека неговата работа како градоначалник во изминатиот мандат била насочена кон проекти, а не кон етнички поделби, и дека истиот пристап ќе продолжи во наредниот мандат.

– Општина Брвеница и јас како градоначалник сме фокусирани на проекти – улици, патишта, детски градинки – рамномерно застапени за сите жители – рече Илиевски, додавајќи дека примери како спортската сала во Челопек и детската градинка во Гургурница покажуваат дека општината се водела според потребите на граѓаните, а не по етничка припадност.

Тој нагласи и пример за соживот: за време на реновирањето на училиштето во Брвеница, околу 270 ученици секојдневно биле носени во Челопек без проблеми, што според него ја потврдува мултиетничката природа на општината.

Илиевски ги повика граѓаните да гласаат за единство и заедничка иднина, предупредувајќи дека повиците за поделби „никому не му носат добро“.

Мицкоски и Илиевски заеднички порачуваат дека локалните избори се шанса за продолжување на проектите и за одржување на соживотот, потсетувајќи дека успехот на општината се базира на соработка, а не на поделби.

– Гласањето за број 9 е глас за иднината на Брвеница и за заедничка Македонија – заклучија тие.

The post СО ГЛАСАЊЕ ЗА ЈОВИЦА ИЛИЕВСКИ ГЛАСАТЕ ЗА ЗАЕДНИЧКА ИДНИНА НА МАКЕДОНИЈА Мицкоски повика да се гласа за единство, соживот и проекти во Брвеница appeared first on plusinfo.mk.

Во Чаир ќе се гради ново модерно училиште во населбата Тенеќе Маало, најави кандидатот за градоначалник од Вреди, Изет Меџити. Според него, објектот ќе го носи името „Викторија“ и ќе обезбеди достоинствени услови за околу 1.300 ученици.

Училиштето ќе има површина од 4.700 квадратни метри со 54 училници, осум кабинети и две современо опремени лаборатории. Наставата ќе се изведува во една смена, а проектот е дел од Деталниот урбанистички план за општината. „Оваа инвестиција ќе биде гордост за Чаир и вистински простор за развој на младите“, истакна Меџити.

Паралелно со овој проект, ќе се градат уште два училишни објекти: нова зграда за училиштето за деца со попречености „Иднина“ и уште едно основно училиште во близина.

Со овие три инвестиции, бројот на основни училишта во Чаир ќе се зголеми на 11. Целта, според Меџити, е конечно воведување настава во една смена и создавање услови за целодневна настава за сите ученици.

Тој потсети дека образованието е „клучот на иднината“ и дека секое дете заслужува еднакви и современи услови за учење. „Како иден градоначалник се обврзувам дека образованието и нашите деца ќе бидат на врвот на приоритетите,“ нагласи Меџити.

The post МЕЏИТИ ВЕТИ НОВО УЧИЛИШТЕ ВО ТЕНЕЌЕ МААЛО „Викторија“ ќе прими 1.300 ученици appeared first on plusinfo.mk.

Експериментален мозочен имплант може да ги чита мислите на луѓето, претворајќи ги нивните внатрешни мисли во текст, објави Јуроњуз.

Во рана фаза на тестирање, научници од Универзитетот „Станфорд“ користеле уред за интерфејс мозок-компјутер (BCI) за да дешифрираат реченици што биле само помислени, но не и изговорени. Имплантот бил точен до 74% од времето.

Што се уредите за интерфејс мозок-компјутер?

BCI уредите функционираат така што го поврзуваат нервниот систем на човекот со уреди кои можат да ја интерпретираат мозочната активност, овозможувајќи му да презема дејства – како, на пример, користење компјутер или движење протетичка рака, само со мисли.

Тие се појавија како можен начин за луѓето со попречености да вратат дел од својата независност.

Можеби најпознат е имплантот Неуралинк на милијардерот Илон Маск, експериментален уред кој е во рана фаза на испитувања за безбедност и функционалност кај луѓе со одредени медицински состојби кои ја ограничуваат нивната подвижност.

Луѓето што не можат да зборуваат ќе комуницираат подобро

Најновите наоди, објавени во списанието „Сел“, би можеле еден ден да го олеснат комуницирањето на луѓето кои не можат да зборуваат, велат истражувачите.

– Ова е првпат да успееме да разбереме како изгледа мозочната активност кога само размислувате за зборување – изјави една од авторите на студијата и истражувачка на Универзитетот „Стенфорд“ во САД, Ерин Кунц.

Како е направен овој интересен уред?

Работејќи со четворица учесници, тимот вградил микроелектроди, кои ги снимаат нервните сигнали, во моторниот кортекс, делот од мозокот одговорен за говор.

Истражувачите ги замолиле учесниците да се обидат да зборуваат или да замислат дека изговараат одредена низа зборови. И двете активности активирале преклопувачки делови од мозокот и предизвикале слични типови на мозочна активност, иако во различен степен.

Потоа тие тренирале модели на вештачка интелигенција за да интерпретираат зборови што учесниците ги мислеле, но не ги изговарале на глас. Во демонстрација, мозочниот чип можел да преведе замислени реченици со точност до 74%.

Во друг тест, истражувачите поставиле лозинка за да спречат BCI уредот да ја дешифрира внатрешната мисла, освен ако корисникот прво не ја помисли лозинката. Системот ја препознал лозинката со околу 99% точност.

Лозинката? „Chitty chitty bang bang“.

Што носи иднината?

Засега, мозочните чипови не можат да ја интерпретираат внатрешната мисла без значајни безбедносни механизми. Но, истражувачите велат дека понапредните модели во иднина би можеле да го постигнат тоа.

Френк Вилет, еден од авторите на студијата и вонреден професор по неврохирургија на Универзитетот „Станфорд“, изјави дека BCI уредите исто така би можеле да се обучат да ја игнорираат внатрешната мисла.

– Оваа работа дава вистинска надеж дека говорните BCI уреди еден ден ќе можат да ја вратат комуникацијата на ниво што е исто толку течно, природно и удобно како разговорниот говор – рече тој.

The post ВЕШТАЧКАТА ИНТЕЛИГЕНЦИЈА СЕГА МОЖЕ ДА ВИ ГИ ЧИТА МИСЛИТЕ Каква е оваа нова технологија? appeared first on plusinfo.mk.

Премиерот Христијан Мицкоски на свечената седница по повод 24-годишнината од Рамковниот договор порача дека иако во 2001 година документот бил прифатен со огорченост и кај Македонците и кај Албанците, денес е јасно дека донел мир, стабилност и зачувана унитарност на државата.

Тој предупреди на злоупотребата на национализмот од политичари кои, според него, две децении ги користеле поделбите за личен интерес, додека реалните проблеми останувале нерешени. Мицкоски повика на заедништво, почит и визија за Македонија како заеднички дом на сите граѓани, нагласувајќи дека иднината на земјата може да се гради само преку обединување и надминување на поделбите.

Говорот на премиерот ви го пренесуваме во целост:

Ми претставува задоволство да ја отворам Свечената седница по повод одбележувањето на 24-годишнината од потпишувањето на Рамковниот договор.

Денес, 24 години по потпишувањето на Рамковниот договор, стоиме овде не само да се потсетиме на еден историски датум, туку да се потсетиме на една длабока вистина – дека државата ја имаме само ако ја чуваме заедно.

Летото 2001 беше едно од најтешките во нашата понова историја. Нашата татковина беше разнишана од конфликт, од страв, од неизвесност. Имаше мигови кога изгледаше дека ништо нема да остане исто, дека патот кон пропаст е неизбежен. Но, тогаш, со храброст, со трпение и со визија, избравме пат на мир. Избравме пат на дијалог, на компромис, на заедништво.

За овие работи треба да се зборува отворено и без ракавици. Дали Македонците беа најсреќни со потпишување на Рамковниот договор? Убеден сум дека тоа не е така. Чувство на огорченост, гнев. Веројатно такво било чувството и кај Албанците. Системски и тешки реформи, менување на Уставот во услови на воен конфликт. Но, да зборуваме отворено, Рамковниот договор 24 години потоа донесе мир. Донесе стабилност и обезбеди зачувана унитарност на Македонија.

Рамковниот договор не е само лист хартија. Тој е симбол на зрелост, на храброст и на мудрост. Тој е потсетник дека, колку и да се разликуваме по јазик, вера, култура или етничка припадност – сите ние делиме една историја и една заедничка иднина. Тој е доказ дека Македонија може да биде дом за сите свои граѓани, и дека различностите се наша предност.

Денес не живееме во 2001-та. Но денес, исто како и тогаш, сме пред избори – не избори на хартија, туку избори во срцето и умот. Ќе дозволиме ли повторно да се појават ѕидови меѓу нас? Ќе се препуштиме ли на поделби и недоверба? Или ќе го избереме патот кој тогаш го избравме – патот на заедништво, на почитување, на љубов кон татковината и меѓусебно разбирање?

Овој документ, овој рамковен договор е и долго злоупотребуван договор, за жал од поединци. Над 20 години имавме структури кои го користат национализмот како најдобра прекривка за заштита на криминалот и личните интереси. Впрочем таквиот национализам е последното прибежиште на оние кои направија кариери, стекнаа огромен капитал на грбот на народот кој го делат, и врз чии поделби опстојуваат во политиката. Со една рака пишуваат и делат во каков свет ќе се живее. Со другата, ја крадат земјата, стекнуваат имоти, хотели, трговски центри, скапи возни паркови. И не им пречи бојата на парите. Таквите поделби не ги решаваат проблемите на реалните луѓе кои бараат само едно, подобар живот за себе. Како политичар не познавам ваков или таков, мал или голем свет, туку само еден свет- Македонија, дом на сите нејзини граѓани каде имаме обврска сите да обезбедиме подобра иднина за сите нејзини граѓани. Заедно да градиме и заедно да ги решаваме проблемите. Куферите кои си заминуваат немаат националност. Луѓето си одат, селата се празнат и Македонци и Албанци и Турци и Роми и Срби и Власи и Бошњаци и сите. Тоа се најдобрата порака на народот спрема оние кои 20 години манипулираат дека работат за нив, а постојано ги делат. Натпреварот не е кој колку може да биде радикален или да се удира во гради со простодушен национализам, туку денес битката е да ги решиме реалните проблеми, да обезбедиме подобри услови за живот, за работа, просперитет за секој Македонец, Албанец, Турчин, Ром, Србин, Влав, Бошњак и останатите наши сограѓани.

Нашата задача е да обезбедиме иднина за сите, затоа што Македонија е дом на сите нејзини луѓе.

И на оваа маса овде седат луѓе и партнери кои ја гледаат политиката низ призма на тоа што можеме повеќе да направиме за народот. Нема простор и нема место повеќе за поединци и структури кои манипулираа и правеа вештачки кризи, етнички и политички за да подоцна себе си се наметнуваат како решенија. Вистината токму говори, дека најголемиот белег во однос на Рамковниот договор е што оваа влада преку носењето на законот за правична застапеност ја исполни и последната обврска и нема повеќе отворени прашања во овој поглед.
Како затворено поглавје, Рамковниот договор останува да сведочи за потребата за обединување и интегрирање во исполнувањето на заедничките цели.

Нашата татковина не е силна затоа што сме сите исти, туку затоа што сме различни, а сепак сме заедно. Силата е во тоа што е една држава, со едно срце, но со многу бои.

24 години се доволно време за да сфатиме дека мирот не е нешто што се подразбира – мирот е нешто што се гради секој ден. Тој бара трпение, бара почит, бара подготвеност да се слушне и другата страна. И бара политичари, граѓани, интелектуалци, работници, студенти – сите – да ја стават иднината пред личниот интерес.

Овој ден не е само спомен. Овој ден е обврска. Обврска да се потсетиме на храброста на оние кои тогаш застанаа и рекоа: „Доста е со поделби, време е за мир”. Обврска да не дозволиме омразата и нетрпеливоста повторно да пуштат корен. Обврска да им оставиме на нашите деца држава која е обединета, силна и праведна.

Нека знаат сите – нема македонска, нема албанска иднина, нема турска или српска иднина – има само заедничка, македонска иднина за сите нас. И таа иднина ќе биде онаква каква што ќе ја создадеме денес.

Денес ги повикувам сите – без разлика на вера, националност или политичка определба или политичка неопределба – да ја избереме државата пред поделбата, да ја избереме иднината пред минатото, да ја избереме љубовта кон татковината пред омразата.

Историјата нè учи дека татковината не се брани со оружје – таа се брани со доверба, со почит, со визија. А визијата која ја имам за Македонија е јасна – земја каде граѓанинот е слободен, институциите се праведни, а различностите се почитуваат и слават.

24 години по Рамковниот договор, да им покажеме на сите – дома и надвор – дека остануваме верни на патот на мирот и заедништвото. Дека сме научиле од минатото, дека сме подготвени да се гледаме во очи и да кажеме: „Заедно сме посилни”.

Да живее нашата заедничка татковина!

The post НЕМА МАКЕДОНСКА ИЛИ АЛБАНСКА ИДНИНА – ИМА САМО ЗАЕДНИЧКА Рамковниот договор е потсетник на една длабока вистина, порача Мицкоски appeared first on plusinfo.mk.

Италија започнува да ја истражува земјата за минерални суровини. Ваквиот потег за геолошки истражувања следува откако Европската Унија минатата година создаде листа на критични минерални суровини кои се неопходни да се спроведе зелената транзиција за животната средина. Со цел да се произведат електрични возила, ветерници, соларни панели и други извори на енергија, Унијата започна засилено на свое тло да трага по литиум, никел, бакар, кобалт и други минерали, од кои во моментов во голема мера е зависна од Кина.

„Италија ги обновува напорите за мапирање и развој на своите минерални ресурси со својата прва голема јавна инвестиција во геолошки истражувања од почетокот на 1990-тите, давајќи приоритет на минералите што Европската Комисија ги дефинира како критични и стратешки за економијата и безбедноста на ЕУ. Иницијативата тешка 3,5 милиони евра, предводена од Италијанскиот геолошки завод, доаѓа една година откако Владата донесе указ за критичните суровини“, пишува Еурактив.

Италијанските власти на почетокот на јули објавија дека започнуваат со испитување на земјата, со цел да се изгради ажурирана слика за минералниот потенцијал на Италија и да се обезбедат прелиминарни индикации за италијанските и странските инвеститори за достапноста на суровините.

-Во Националната програма за општо истражување на минерали, штотуку одобрена од Меѓуминистерскиот комитет за еколошка транзиција (CITE), вклучени се 14 истражувачки проекти, распределени низ целата територија на државата, во клучни региони како што се Ломбардија, Пиемонт, Трентино-Алто Адиџе, Лигурија, Тоскана, Лацио, Кампанија, Калабрија, Емилија-Ромања, Марке и Сардинија, на што е додадено и националното мапирање на можни складишта за рударски отпад. Програмата, чија имплементација Министерството за животна средина и енергетска безбедност и Министерството за бизниси и ја доверија на Геолошката служба на Италија, вклучува 15 оперативни единици и над 400 специјалисти, со инвестиција од 3,5 милиони евра посветени на првата фаза од истражувањето на природните наоѓалишта – се наведува во објавата на италијанскиот Институт за заштита и животната средина.

Оттаму додаваат дека во фокусот на геолошките истражувања ќе бидат литиумот, борот, бакарот, манганот и други критични минерали дефинирани во актите на Европската Комисија. Во меѓувреме, домашните експерти исто така очекуваат да се спроведат геолошки истражувања и во Македонија. Ова барем го пишува првата нацрт верзија на Стратегијата за геолошки истражувања и минерални суровини 2025-2045, што ја иницираше МАНУ, а се очекува наскоро да боде усвоена од страна на властите. Во текстот единствено се истакнува дека земјата кај нас е полна со бакар.

-Македонија во моментот не е силно развиена рударска земја и нејзината визија за развој треба да се однесува на тоа да го зајакне овој сектор од стопанството и да искористи што поголем дел од своите природни ресурси, односно природни минерални богатства. Со одржливо користење на сите природни минерални богатства, а во хармонија со еколошките, културните и природните вредности, можеме да создадеме работни места низ цела Македонија…. Република Северна Македонија мора да знае со какви минерални суровини располага и затоа потребно е континуирано собирање на податоци со користење на современи методи, мапирање на минералните ресурс како и анализа на тие податоци. Создавање на поволни услови значи дека тие податоци треба да бидат достапни што ќе придонесе за привлекување инвестиции, идентификување на нови перспективи и донесување соодветни одлуки во врска со развојот на ресурсите од страна на креаторите на политиките, се наведува во предлог Стратегијата.

Според нацрт текстот, еден од основните предуслови за развивање на геолошките истражувања и искористување на минералните суровини е воспоставување на јасна и транспарентна правна и регулаторна рамка, а оваа рамка треба да обезбеди сигурност, стабилност и предвидливост за инвеститорите. Од друга страна, од Министерството за енергетика, рударство и минерални суровини информираа дека потпишале Меморандум за соработка со Друштвото на геолози, за стручна поддршка и учество на геолозите во работни групи кои ќе придонесат во подготовка на законски и технички решенија.

-Меморандумот има за цел да воспостави долгорочна и систематска соработка во областите на геолошки истражувања, примената на еколошки и ефикасни рударски практики, како и подигнување на јавната свест за значењето на геолошките науки и минералните суровини. Соработката со стручната и академска заедница е суштински дел од реформите што ги спроведуваме во секторот. Овој Меморандум е дел од нашата заложба за транспарентно, стручно и одржливо управување со минералните ресурси, со јасна одговорност кон животната средина, изјави министерката за енергетика, рударство и минерални суровини, Сања Божиновска.

-Овој чекор претставува важна потврда дека гласот на стручната заедница ќе има суштинско влијание во креирањето на политиките во нашата област. Геологијата не е само наука за минатото на Земјата – таа е клучот за нашата енергетска иднина, нагласила проф. д-р Соња Лепиткова, претседателка на Друштвото на геолози.

Како што се дополнува во соопштението од страна на Министерството, двете страни ќе спроведуваат и едукативни кампањи и ќе го поддржуваат носењето на одлуки базирано на наука и докази.

The post ИТАЛИЈА ЗАПОЧНА ДА ЈА ИСТРАЖУВА ЗЕМЈАТА ЗА МИНЕРАЛИ Македонските геолози велат дека во тоа лежи енергетската иднина appeared first on plusinfo.mk.