Уште најмногу 5.000 фирми денеска треба да ја завршат постапката за поднесување пресметки за мартовската плата, соопшти денеска Управата за јавни приходи.

Според нејзините податоци, до 8 април вкупно 59.681 даночни обврзници веќе поднеле МПИН пресметки за март. Од нив, 30.090 даночни обврзници веќе ги платиле МПИН пресметките за исплата на мартовската плата.

Со ова ќе завршат и проблемите на сметководителите кои се жалеа дека не успеале да ги добијат навреме идентификациските кодови и морале да чекаат по неколку часови на шалтерите за да можат фирмите да ги исплатат навреме платите.

– Процесот за нас е обемен бидејќи не даваме сметководствени услуги само на една фирма. За секоја фирма треба да се логираме одделно и тоа одзема време. Ако се направи грешка, постапката се повторува и непотребно се губи време. Дополнително од страна на УЈП кодовите не се даваат веднаш и целата постапка за поднесување пресметка за плата доцни. Ние сме под голем притисок на фирмите кои сакаат да се исплати платата навреме – вели сопственичка на сметководствено биро.

Од Институтот за сметководители (ИСОС) веруваат дека проблемот веќе е надминат и преостанатиот број фирми кои не поднеле пресметки за плата денеска ќе ја завршат постапката и ќе ги добијат кодовите кои ќе важат во следните 5 години.

– УЈП правеше надградба на системот и требаше секоја фирма да добие нов идентификациски код. Дел од фирмите тоа го направија навреме, а дел не успеаја. Од друга страна со издавањето на кодовите се доцнеше по 3 до 4 дена и се создаде паника кај сметководителите дека нема навреме да стигнат да ја изработат платата и таа да биде исплатена. Побаравме УЈП да даде и видео појаснување на постапката и да го забрза процесот, бидејќи дел од сметководителите не се снаоѓаа со ПДФ упатството, како и да се издаваат кодови за најмногу 48 часа, што беше направено. Верувам дека процесот добро ќе се заврши бидејќи останаа мал број фирми кои немаат кодови –  вели претседателката на ИСОС Весна Прентоска.

Проблемот што настанаа со замената на кодовите Прентовска го гледа во тоа што, како што вели, сите сметководители не можат да бидат ИТ експерти и веднаш да разберат како да ја завршат постапката, но и во фактот што капацитетите на УЈП се ограничени и во кус рок не можат да се дадат кодовите.

– Реално е дека не може да се издаде код веднаш бидејќи имаше наплив на барања кои треба да се обработат. Капацитетот на Управата е тој и треба тоа да го почитуваме, но и дел од сметководителите не се снајдоа добро. Едно поради тоа што правеа грешки поради обемната работа и не се снајдоа во пишаните упатства на УЈП, но и поради тоа што промената на кодовите се совпадна со поднесувањето завршни сметки – вели Прентоска.

Управата за јавни приходи соопшти дека во овој период е во постојана и активна комуникација со даночните обврзници и сметководителите со цел да обезбеди навремено и успешно постапување по сите барања за реиздавање кодови за идентификација потребни при поднесувањето на МПИН пресметките.

– Имајќи ја предвид обемноста на процесот, Управата за јавни приходи формираше тимови кои посветено работат за да го олеснат целокупниот процес. Особен акцент е ставен на даночните обврзници кои немаа поднесено МПИН пресметки. Кон овие даночни обврзници Управата за јавни приходи испрати и персонализирани пораки и оствари телефонски контакти со цел тие да добијат дополнителна поддршка и навремено да ги исполнат своите обврски – се наведува во соопштението од УЈП.

Оттаму потсетуваат дека даночните обврзници треба да ги проверат своите профили на системот „е-Даночни услуги“ и да ги преземат кодовите кои веќе се изработени и се поставени на профилите. Апелираат даночните обврзници кои сè уште немаат поднесено барање за издавање код за идентификација тоа да го направат преку „е-Даночни услуги“.

„Како професионална институција која ги следи потребите на даночните обврзници, Управата за јавни приходи изготви видео- корисничко упатство (види линк https://youtu.be/dgra2ULgvgI). Упатството е визуелен водич кој ги објаснува сите чекори потребни за навремено подигнување и инсталирање на кодот за идентификација со кој ќе може да се поднесат пресметките за плата за месец март“, се додава во соопштението.

За забрзување на постапката УЈП назначи и контакт лица кои им помагаат на даночните обврзници за инсталирање на кодовите.

The post СМЕТКОВОДИТЕЛИТЕ МОЖЕ ДА ЗДИВНАТ Од УЈП тврдат дека е решен проблемот со кодовите за плати appeared first on plusinfo.mk.