Изградбата на Универзалната сала во Скопје почнала непосредно по катастрофалниот земјотрес во 1963 година како „трајно одбележување на хуманата акција на дарителите од странство“. Од идејата да се воспостави културно-уметничката манифестација „Средби на солидарноста“ која еднаш во годината во Скопје ќе ги собере претставниците на земјите што му пружија помош на разурнатиот град, потоа израснува и идејата за изградба на Универзалната сала како место во кое ќе се реализираат тие активности.

Во историјатот на Универзалната сала стои запишано дека „Дирекцијата за комунална и снабена изградба на Скопје, носи одлука за изградба на еден ваков објект кој ќе биде од монтажен карактер“.

Во изградбата на Универзналната сала во Скопје со значајна материјална и финансиска помош учествувале повеќе од 35 земји во светот. Од собраните средства е купен објектот Универзална сала од бугарската фирма „Техноекспортстрој“ од Софија.

На 11 јули 1964 година во Софија е потпишан Договорот за купопродажба на објектот „универзална сала“ со вкупно 1.800 седишта. 10 месеци по потпишувањето на договорот, во 1965 година во Скопје никнува објектот „Универзална сала“. Иако уште недовршен и без технички прием, во јули и август 1965 година во салата се одржуваат вторите „Средби на солидарноста“.

Салата официјално е пуштена во употреба на 10 јануари 1966 година со драмската претстава „Виктор или деца на власт“ во изведба на белградското „Атеље 212“, а  на 16 јануари истата година е одржан голем Симфониски концерт на Македонската филхармонија со пијанистот Александар Унински.

Она што е помалку познато во историјата на скопската Универзална сала е податокот дека таа е направена како копија на зградата на Државниот циркус во Софија.

По вчерашниот пожар, интересен е уште еден момент што ги поврзува двете речиси идентични градби. И зградата на Државниот циркус во Софија и скопската Универзална сала горат во пожар.

Зградата на Државниот циркус во Софија – иновативно дело на бугарските архитекти Ерослав Станков и Костадинка Станкова Мутафова е изградена на Плоштадот Солен пазар во бугарската престолнина. Постои околу 20 години пред да биде пеплосана во пожар на 25 септември 1983 година.

Минатата година во Софија е организирана изложба посветена на Државниот циркус на кој меѓу другите експонати е изложен и специјално направен модел на старата зграда.

Универзалната сала во Скопје постоеше повеќе од шест децении, пред да заврши во пламен на 9 април 2024 година.

The post 📷 УНИВЕРЗАЛНАТА САЛА ВО СКОПЈЕ БИЛА НАПРАВЕНА ПО УРНЕК НА СОФИСКИОТ ЦИРКУС Необичен момент ги поврзува двете идентични градби appeared first on plusinfo.mk.