Во денешно време се соочуваме со поинакви предизвици, но со подеднакво значење за иднината на нашата држава и народ. Како претседател на Владата, свесен сум за секој еден од нив, и покрај сите нив, еден од најважните е битката за стандардот и подобриот живот. Тоа е она што го бара и што му е потребно на народот. И битката за Европската Унија треба да се гледа низ поривот за подобар живот и стандарди, и затоа таа наша цел, и покрај сите удари и пречки, остана патот што сакаме да го изодиме, рече денеска премиерот Христијан Мицкоски во обраќањето по повод 23 Октомври, денот на македонската револуционерна борба.

– И овој пат е наше природно право, и иако многу пати откажувањата што ги направивме не беа достоинствени, не беа фер, народот со разочарување и со кнедла во грлото ги прифаќаше. Не е едно, не се две, туку тоа полека станува непринципиелен начин на однесување – рече Мицкоски.

Во контекст на последните барања, кои што се наша пречка, а тоа се уставните измени, главното прашање што се наметнува е: што добиваме ние од тоа, и дали конечно е ова крајот, рече премиерот.

– И дали е фер? Секој наш следен потег мора да биде низ призмата на одговорот на овие прашања и заштитата и обезбедување, прво на гаранции дека ова ќе биде последното, и дека ќе добиеме нешто опипливо и предвидливо – важно за државата и граѓаните, а потоа и нашиот источен сосед да покаже европски вредности и на ист начин да одговори за македонската заедница во Бугарија – потенцира Мицкоски.

Затоа што нашата определба за Европската Унија ја докажавме преку многу одрекувања, многу жртви, дури и по цена на сопствена штета, додаде тој, и никој нема право да каже дека не дадовме жртва и не плативме прескапа цена за она што го сакаме – членка на Европската Унија.

– Но, како и во историјата, така и денес, секогаш ќе има луѓе и страни кои се подготвени да дадат повеќе, да прифатат повеќе. Во таа смисла, нашата опозиција е подготвена да прифати многу повеќе, но и да отстапи и да даде многу повеќе. Затоа што таквата трговија со нашето, со заедничкото, за нив претставува картата со која сакаат да дојдат и да останат во политичкиот живот, не размислувајќи за штетата што ја прават, не само на себе, туку и на целата држава и сите идни поколенија. Јас сум беспрекорно свесен дека во остварувањето на таквите намери единствена пречка е ВМРО-ДПМНЕ и коалицијата која што ја предводи ВМРО-ДПМНЕ. Но, таа улога мораме свесно да ја носиме на плеќи заради нашиот народ, нашата татковина – дека никогаш нема да попуштаме кога се во прашање интересите за нашиот македонски идентитет и нашата држава Македонија – категоричен е Мицкоски.

Замислете ситуација да настапуваме единствено, а опозицијата да е таа што ќе нè притиска и храбри да ги чуваме црвените линии, околу кои нема да се создаваат облаци и прашини за куферчиња, поклони за источниот сосед и приказни за бизниси какви има сега, додаде тој.

– А, токму таквото нивно досегашно однесување ги закотви и ги закова на третото, четвртото место по поддршка, станувајќи спореден играч на политичката сцена овде дома, кај нас – рече премиерот Мицкоски во своето обраќање.

The post ИСТОЧНИОТ СОСЕД НА ИСТ НАЧИН ДА ОДГОВОРИ ЗА МАКЕДОНСКАТА ЗАЕДНИЦА ВО БУГАРИЈА Што добиваме ние од уставните измени, праша Мицкоски appeared first on plusinfo.mk.