Ивана Ковач својот 49. роденден, кој го прослави на 1 септември, го одбележа со нова песна. Хрватската пејачка ја објави преработката на песната „Zalij to cvijeće suzama sreće“ од нејзиниот татко, легендарниот Мишо Ковач.

Станува збор за втора песна од богатиот репертоар на Мишо на која Ивана ѝ даде свој музички печат. Проектот со преработки на неговите песни започнал по идеја на Нено Нинчевиќ, а Ивана на него соработува со Тони Рајновиќ.

– Нема подобра прослава на роденденот од тоа кога на луѓето ќе им дадеш нешто што го сакаш – изјавила Ивана.

За преработките таа и соработниците намерно избираат песни кои можеби не се меѓу најголемите хитови на Мишо, но имаат посебно значење за неа.

– Ќе ги земам и најпознатите, но повеќето ќе бидат песни кои ги знаат само најголемите Мишови обожаватели и кои имаат најголемо значење за мене – објаснила пејачката.

Песната „Zalij to cvijeće suzama sreće“ потекнува од седумдесеттите години, а Ивана вели дека за продолжението на проектот им била потребна токму една побрза и повесела песна.

Нејзината поврзаност со музиката на татко ѝ, сепак, е многу подлабока. Таа се присетила на детството и моментите кога Мишо се враќал дома, ја пуштал својата музика, а семејството заедно ги слушало песните.

– Кога си дете полно со љубов и немаш грижи, поинаку го перцепираш целиот свет. Тој ќе дојдеше дома, ќе ги пуштеше песните, ние ќе ги слушавме и тоа се всади во мене како нешто прекрасно – раскажала Ивана.

Првата преработка, „Malo mi je jedan život s tobom“, ја претстави летово, а токму реакцијата на нејзиниот татко на двете песни за неа e особено важна. Мишо, како што открива Ивана, бил воодушевен од она што го слушнал.

– За првата целосно полуде, а кога му ја испратив втората, по 15 минути му се јавив и веднаш ме праша: Кога ја правиш третата? – откри таа за хрватските медиуми.

Ивана вели дека токму радоста што му ја носи на својот татко ѝ дава дополнителен поттик да продолжи со проектот.

– Една од големите радости ми е што тоа нему му создава огромна среќа. Толку е среќен поради тоа и кога знаеш дека на тој начин некому му носиш среќа, сè е тројно поубаво и поемотивно – изјави пејачката.

За неа, токму емоцијата што музиката ја предизвикува кај луѓето е еден од најважните делови од нејзината работа.

The post 🎥 ИВАНА КОВАЧ ПРЕРАБОТИ УШТЕ ЕДНА ПЕСНА НА МИШО КОВАЧ Музичката легенда е воодушевена од новите верзии на неговите стари хитови appeared first on plusinfo.mk.

Хрватската музичка сцена остана без уште едно препознатливо име. Дени Кожиќ, загрепски гитарист, пејач и кантавтор кој свиреше со некои од најпознатите хрватски рок-бендови, ненадејно почина на 1 септември 2026 година, само 19 дена пред својот 62. роденден.

Од Кожиќ на социјалните мрежи се прости Дубравко Иваниш, фронтменот на Pips, Chips & Videoclips, потсетувајќи на периодот во кој Кожиќ свирел со бендот.

– Нè напушти Дени Кожиќ, мојот запруџански гуру и извесно време член на Pips во концертната ера на „Drveće i rijeke“. Музичар од глава до пети и заебан лик приватно. Животот, за моја среќа, нè спои сè до денешни дни. Дени, испиј една и за мене намќорот, штом ќе стигнеш таму. Те сакам, се гледаме – напиша Иваниш.

Кожиќ е роден на 20 септември 1964 година, а неговата активна музичка кариера започнала во средината на осумдесеттите години. Во текот на децении оставил трага на загрепската рок-сцена, пред сè како гитарист, иако подоцна се посветил и на сопственото авторско творештво.

Пошироката публика го памети и од спотот за „Dobre vibracije“ на Јуре Стублиќ и Филм, во кој со гитара се појавува на врвот на облакодер на плоштадот Бан Јелачиќ. Бил поврзан и со Психомодо Поп. Членовите на бендот во 2009 година зборувале за него како за долгогодишен пријател и го поканиле да им се придружи на концертот во загрепскиот Boogaloo. Таму свирел акустична и електрична гитара.

Првиот бенд Кожиќ го основал уште како ученик во осмо одделение, заедно со Саша Брнчиќ и Каменко Шимуновиќ. Го нарекле „Obiteljska zavjera“, според истоимениот филм на Алфред Хичкок.

На почетокот на осумдесеттите години посетувал Школа за применета уметност, каде што љубовта кон гитарата и музиката го поврзала со Влатко Чавар Брада и Роберт Јуриќ Јура, пишува порталот „Ravno do dna“.

Кон крајот на 1984 година, по отслужувањето на воениот рок, Кожиќ и Јуриќ започнале да ја развиваат идејата за нов бенд, а набргу им се придружил и Чавар. Така настанал „Ritam s ovoga svijeta“.

На првиот албум на групата, објавен во 1986 година, гостувале познати имиња од тогашната рок-сцена. Маргита Стефановиќ од EKV свирела клавијатури, учествувале членовите на дувачката секција на Haustor, Никола Сантро, Игор Павлица и Алчео Марти, додека придружен вокал снимил Марино Пелајиќ од Film. Продуцент на албумот бил Ведран Божиќ.

По објавувањето на албумот, бендот не ја добил очекуваната поддршка од издавачите, а Кожиќ го напуштил по промотивните концерти. Во потрага по нови музички искуства, му се придружил на Академскиот хор „Иван Горан Ковачиќ“, а во 1987 година бил и еден од авторите на радиодрамата „Univerzijalnih 87 jada“ на Радио 101, емитувана во годината кога Загреб бил домаќин на Универзијадата.

Во следните години Кожиќ беше дел од низа бендови и музички проекти, најчесто како гитарист. По една деценија помината со други изведувачи, во 2014 година реши повеќе да се посвети на сопствените песни.

Тогаш го објави првиот соло-сингл „Nasukan“, со кој започна да го гради својот авторски репертоар.

Следуваа песните „Major Tom“, „Eko gorivo“ и „Dvoje“. Последната ја сними со Љубица Гурдулиќ, поранешна членка на Svadbas. Тоа бил негов прв дует, а песната ја продуцирал Тин Остреш.

The post ПОЧИНА ПОЗНАТИОТ ХРВАТСКИ МУЗИЧАР ДЕНИ КОЖИЌ Свиреше со Филм, Пипс чипс и видео клипс, Психомодо Поп appeared first on plusinfo.mk.

Стјепан „Џими“ Станиќ, еден од најпрепознатливите хрватски музичари и симбол на загрепската музичка сцена, почина на 30 август 2026 година, во 98. година од животот. Пејачот, гитарист, контрабасист, џез-музичар и забавувач зад себе остави кариера подолга од седум децении, а речиси до последните денови ѝ остана верен на сцената. Јавноста го памети по специфичниот длабок глас, шармот, хуморот и препознатливиот младешки дух.

Роден е во Загреб на 20 јануари 1929 година, а со музика почнал да се занимава уште како млад. Прво свирел тамбура, а потоа гитара и контрабас, инструмент кој ќе му донесе една од најнеобичните епизоди во неговата кариера. Во 1956 година, кога легендарниот американски џез-трубач Дизи Гилеспи настапувал во Загреб, неговиот контрабасист не можел да настапи, па Станиќ бил повикан да го замени и таа вечер свирел со еден од најголемите џез-музичари на 20 век. Подоцна се споменувало и дека Гилеспи бил толку импресиониран што сакал Станиќ да му се придружи во неговиот бенд.

Иако бил одличен инструменталист, пошироката публика најмногу го знае по неговиот глас и по песните што со децении беа дел од хрватската и регионална музичка меморија.

Меѓу најпознатите се „Kauboj Jimmy“, „Prolazi sve“, „Jutro će promijeniti sve“, „Kukavica“, „Moja kobila Suzy“ и „Dimnjačar“. Неговиот репертоар се движел од џез и свинг до шлагери, светски евергрини и духовити песни, а токму комбинацијата од музикалност и сценски хумор го направи најпрепознатлив. Хрватската енциклопедија го опишува како пејач со длабок и култивиран глас, но и како изведувач со исклучителен шарм и хумор.

Еден од најзначајните моменти во неговата кариера се случил во 2013 година, кога го добил Поринот за животно дело. Но, наградата не означила и крај на неговата кариера. Станиќ продолжил да снима и да настапува и по деведесеттата година од животот. Неговиот албум „91+“, снимен со оркестарот на Јосип Цвитановиќ, во 2021 година го добил Поринот за најдобар албум во категоријата забавна музика. Тоа беше уште едно признание за музичар кој одбиваше да се повлече само затоа што му поминале годините.

Посебно место во неговиот живот имаше сопругата Барбара, со која често настапуваше. Нивните заеднички изведби беа дел од препознатливиот свет на Станиќ, во кој музиката, хуморот и приватниот живот често се преплетуваа. ХРТ во своето сеќавање на музичарот го опиша како човек кој ја носел радоста кон музиката, луѓето и животот, а неговата сцена не била само место за настап туку негов природен простор.

Интересот за неговото дело продолжува и по неговата смрт. ХРТ најави дека на 4 септември, на Првата програма, ќе го прикаже документарниот филм „Jimmy“ од 2017 година, единствениот документарец посветен на неговиот живот. Филмот бил снимен кога Станиќ имал 88 години и го прикажува музичарот кој и тогаш, по речиси седум децении кариера, не размислувал за повлекување од сцената. Така, и по неговото заминување, публиката ќе има можност повторно да го види човекот кој успеа да остане дел од музичката сцена низ речиси цел еден век.

The post 🎥 ЏИМИ СТАНИЌ ПOМИНА НА СЦЕНА ПОВЕЌЕ ОД 70 ГОДИНИ, А СВИРЕЛ И СО ДИЗИ ГИЛЕПСИ Познатиот регионален музичар и пејач почина во 98-та година од животот appeared first on plusinfo.mk.