Од денеска возачите на камиони и автобуси од Македонија можат да аплицираат за хрватската долгорочна виза Д, која може да важи до една година, но нема да им дозволи неограничено движење и престој во други шенгенски земји, поради што превозниците предупредуваат дека клучниот проблем на професионалните возачи не е решен.

Од „Макамтранс“ велат дека  визата важи само за Хрватска и не може да се користи во други земји од шенген зоната.

-Визата за долг престој „Д“ важи исклучиво за билатерален превоз на стока во кој се вклучени трговски друштва со седиште во Хрватска. Возачот со „виза Д“ на влез на територија на Хрватска на граничен премин треба да пријави каков вид на превоз врши (доколку е билатерален превоз МК-HR и обратно) од страна на контролниот орган возачот ќе биде евидентиран во националниот систем каде што деновите за престој на територија на Хрватска нема да се бројат – велат оттаму.

Доколку се врши транзит на стока низ Хрватска за друга земја во шенген зоната, тогаш визата „Д“ престанува да важи на границата на Хрватска.

– Возачите на товарни возила или автобуси кои превезуваат патници или стока во други земји членки на Шенген зоната, односно кои транзитираат низ Хрватска, ќе бидат регистрирани од страна на граничните органи на Хрватска во Системот за влез/излез (Entry/Exit System – EES). По креирањето на досието во EES, ќе им се бројат деновите на престој поминати во Шенген зоната, со примена на правилото за максимален престој од 90 дена во кој било период од 180 дена – велат од Макамтранс.

Главната поволност за возачите на товарни возила кои вршат транзит низ Хрватска е тоа што визата им дозволува времето поминато низ  Хрватска нема да им се брои .

Според правилата за хрватската виза „Д“ барањата мора да се поднесат најрано два месеца, а најдоцна 30 дена пред планираниот почеток на вршењето патен превоз на стока и патници преку електронскиот систем за аплицирање „Crovisa“, по што следува физичко поднесување на документацијата во надлежната амбасада на Република Хрватска.

Таксата за виза е 93 евра.

Проблемот со системот за влез и излез во шенген-зоната Македонија го решава преку потпишување на билатерални договори со земјите кои се наоѓаат на двете рути по кои се движат македонските превозници до одредени дестинации во Европската Унија. Досега, владата потпиша такви договори со Хрватска Швајцарија и Романија, додека интензивно се работи на договори со Австрија, Унгарија и Германија.

The post КАМИОНЏИИТЕ ПОЧНАА ДА АПЛИЦИРААТ ЗА ХРВАТСКА „Д“ ВИЗА Што се добива со оваа виза? appeared first on plusinfo.mk.