Еден од најпознатите светски тенори Хозе Карерас вечерва ќе настапи во Скопје на голем музички спектакл заедно со дел од најзначајните имиња на македонската музичка сцена.

На концертот, кој ќе се одржи на Плоштад „Македонија“ со почеток во 20 часот, ќе настапат Миле Кузмановски, Сузана Спасовска, Наум Петрески, Маја Оџаклиевска, Каролина Гочева, Калиопи Букле, Влатко Стефановски, Ана и Игор Дурловски и Дешира Амети-Крлиу. Тие ќе бидат придружувани од Македонската филхармонија.

Настанот е со бесплатен влез и отворен за сите граѓани, а се организира во рамки на програмата за одбележување на 35 години независност на Македонија.

Концертот ќе се одвива во два музички дела. Во првиот сегмент публиката ќе има можност да ги слушне македонските музички ѕвезди во придружба на повеќе од 60 музичари од Македонската филхармонија.

Со оркестарот ќе диригира Сашо Татарчевски, додека новите оркестрации и аранжмани специјално за концертот ги подготви маестро Николче Мицевски.

Вториот дел од вечерта е резервиран за Хозе Карерас, кој пред скопската публика ќе го изведе својот препознатлив светски репертоар, заедно со Македонската филхармонија. Оркестарот ќе биде предводен од неговиот долгогодишен диригент Дејвид Хименез.

Од „Авалон продукција“ најавуваат и неколку специјални музички спојувања меѓу македонските изведувачи и Карерас, кои засега остануваат изненадување за публиката.

Концертот е втор голем настан во рамки на јубилејната програма, по најавениот настап на Дејвид Гета – „Monolith Stadium Show“, а овојпат акцентот е ставен на класичната музика и македонската музичка традиција.

Музичката прослава продолжува на 2 септември на платото на Т-АРЕНА во Скопје, каде што ќе настапат Слаткаристика, Суперхикс, 2 Бона, Фанк Шуи и Дина Јашари.

Организаторите најавуваат вечер посветена на различни генерации и на дел од најпопуларните македонски музички артисти. И овој настан ќе биде отворен за сите и со бесплатен влез.

The post МУЗИЧКИ СПЕКТАКЛ ВО СКОПЈЕ ЗА 35 ГОДИНИ НЕЗАВИСНОСТ Хозе Карерас и најголемите македонски ѕвезди вечерва на Плоштад „Македонија“ appeared first on plusinfo.mk.

Со досега најголем музичко-сценски спектакл виден во Македонија вечер во Охрид продолжува одбележувањето на 35-годишнината на независноста. Музичко-сценскиот спектакл ќе се одржи на стадионот „Билјанини извори“ со почеток во 19:30 часот, а караванот ќе посети и 11 други градови.

Преку музика, глума и танц, во форма на мултимедијален сценски спектакл ќе биде раскажана приказната за 35 години независност на нашата татковина, истакнувајќи ги најзначајните историски моменти, подеми, предизвици и достигнувања од изминатите три и пол децении.

На 11 август спектаклот ќе биде изведен во Битола пред платото на Офицерскиот дом, а на 12 август во паркот пред Општина Велес.

Во пресрет на 8 септември, во наредниот период караванот ќе посети 11 градови низ државата, носејќи ја празничната атмосфера поблиску до сите граѓани. Останатите градови ќе бидат дополнително објавени.

На 15 август во Градскиот парк во Струмица со почеток во 20:00 часот концерт ќе одржат трите легендарни македонски бендови Меморија, Мизар и Синтезис.

Легендите на електронската музика Пол Ван Дајк и Пол Окенфолд ќе настапат заедно на 16 август исто така во Градскиот парк во Струмица, во рамки на одбележувањето 35 години независност на Македонија.

За 1 септември е најавен настапот на славниот шпански тенор Хосе Карерас на Плоштадот Македонија заедно со македонски ѕвезди меѓу кои ќе настапат Влатко Стефановски, Каролина Гочева, Калиопи, Сузана Спасовска, Наум Петрески, Игор Дурловски и Ана Дурловски. Целиот концерт ќе го придружуван од Оркестарот на Филхармонијата.

Кулминација ќе биде последниот перформанс на 4 септември на Плоштадот „Македонија“ во Скопје, на кој ќе настапат повеќе од 120 уметници. Музичкиот дел од одбележувањето завршува на 8 септември со настапот на Дејвид Гета на скопскиот стадион „Тоше Проески“.

Манифестацијата „35 години независност на Македонија“ започна на 2 Август – Илинден во Битола.

The post КАРАВАНОТ „СИЛНО СВЕТНАЛ ДЕН“ ТРГНУВА ОД ОХРИД Големиот музички спектакл за 35 години независност ќе кулминира на 8 септември во Скопје appeared first on plusinfo.mk.