Црна Гора може да наиде на неочекувана политичка пречка токму кога влегува во завршната фаза од преговорите со ЕУ. Шпанија инсистира каталонскиот, баскискиот и галицискиот да добијат официјален статус во Унијата пред следното проширување, а Мадрид веќе го поврзува решавањето на ова прашање со приемот на идните членки.

Шпанската влада, сепак, не објавила дека ќе го блокира членството на Црна Гора.

Државниот секретар за европски прашања Фернандо Сампедро Маркос изразил уверување дека јазичното прашање ќе биде решено многу пред следното проширување и потврдил дека Мадрид го поддржува црногорското членство.

Шпанија уште во 2023 година побара каталонскиот, баскискиот и галицискиот да станат официјални јазици на ЕУ. Мадрид сега го засилува притисокот бидејќи со приемот на идните членки може дополнително да се зголеми бројот на официјални јазици.

– Време е, 40 години откако Шпанија се приклучи на Европската Унија, да се стави крај на дискриминацијата на 20 милиони Европејци – рече Сампедро.

Германија се спротивставува на поврзувањето на двете прашања. Нејзиниот државен секретар за европски прашања Гинтер Крихбаум предупреди против „билатерализација на процесот на европска интеграција“ и го повика Мадрид да покаже „малку повеќе европски дух“.

Црна Гора ги отвори сите 33 преговарачки поглавја, а 18 веќе се привремено затворени. Во Брисел е формирана и работна група за подготовка на пристапниот договор, додека Подгорица сака да ги заврши преговорите до крајот на 2026 година и да стане членка во 2028 година.

Само неколку дена претходно се појавија информации дека Холандија, Хрватска, Естонија, Литванија и Латвија побарале дополнителна проверка на исполнувањето на критериумите пред затворањето нови поглавја.

Делегацијата на ЕУ во Подгорица потоа ги отфрли тврдењата дека петте држави побарале запирање на преговорите, а холандскиот амбасадор објасни дека станува збор за редовна проверка дали Црна Гора ги исполнила условите за затворање на секое поглавје.

The post ШПАНИЈА МОЖЕ ДА ЈА СОПНЕ ЦРНА ГОРА НА ПРАГОТ НА ЕУ Мадрид става 3 јазици на вратата пред следното проширување appeared first on plusinfo.mk.