Сопственикот на телевизијата Пинк, Жељко Митровиќ, се појави во емисијата „Хит твит“ заедно со Александар Вучиќ кој, како што рече, е негов пријател од гимназиските денови и го поздрави со песната „И во добро и во лошо“. Претходно беше прашан за гласините дека телевизијата Пинк би можела да биде згасната. Неговиот одговор не донесе конкретно разјаснување, но навести дека работите не се толку едноставни.

Митровиќ заедно со поранешниот претседател на Србија влезе во студиото на својата телевизија, а водителката Верица Брадиќ го праша директно: Најавуваат гасење на Пинк?

– Мора да кажат на кој Пинк мислат, бидејќи ги имаме 80, така што… – одговори Митровиќ.

Потоа додаде дека Пинк е само бренд, објаснувајќи дека телевизијата е програма, а не само  заштитен знак.

– Тоа не е баш така лесно – рече тој.

Шпекулациите за иднината на Пинк се засилија по најавите за големи отпуштања во деловниот систем на Митровиќ. Тој неодамна соопшти дека ги распуштил сите ансамбли во белградскиот Театар „Одеон“, по што 150 луѓе останале без работа. Истовремено најави дека ќе мора да отпушти уште околу 1.000 вработени во десетина компании кои, како што рече, сè уште не успеале финансиски да застанат на нозе.

Митровиќ овој потег го опиша како „еден од најтешките денови“ во неговиот живот, а во објавата на социјалните мрежи им се заблагодари на луѓето со кои соработувал и порача дека се надева дека повторно ќе се сретнат во подобри времиња.

Засега нема конкретна потврда дека Пинк ќе биде затворен, ниту детали за евентуална промена на неговото работење или брендот.

The post 📽️ ГАЗДАТА НА ПИНК НАЈАВУВА ОТПУШТАЊЕ НА 1.000 ВРАБОТЕНИ Жељко Митровиќ проговори за шпекулациите за гасењето на неговата телевизија appeared first on plusinfo.mk.