На Одделот за физикална медицина и рехабилитација во ГОБ „8 Септември“ во Скопје наскоро ќе биде во функција хипербарна комора за лекување на пациенти со хронични рани, дијабетично стапало, изгореници, но и за спортисти.

Новата услуга е овозможена со донација од Фондацијата „Д-р Верица Механџиска“.

– Услугата најчесто ќе ја користат пациентите со хронични рани, кои тешко заздравуваат, дијабетично стапало, изгореници, но исто така и од пластична хирургија, пулмологија, сегментите кои работат на зајакнување на имунитетот и не само пациенти, туку и здрави спортисти кои понатаму преку проектите што ги планираме ќе бидат користени за зајакнување на нивните спортски перформанси. За кратко време ќе стане достапна за пациентите – изјави денеска директорот на ГОБ „8 Септември“, Синиша Стојкоски, кој ја претстави новата опрема пред премиерот Христијан Мицкоски и пред министерот за здравство Азир Алиу.

Мицкоски се заблагодари на Фондацијата „Д-р Верица Механџиска“ за оваа донација.

– Јас сум исклучително благодарен што имаме вака општествено одговорни компании коишто на овој начин покажуваат само дека покрај тековното работење на компаниите, тие треба да бидат и општествено одговорни, и со самото тоа да направат подобри услови за живот на граѓаните во Македонија. Јас сум од срце благодарен и на компанијата и на фондацијата што го препозна сето тоа и што навистина активно е општествено одговорна во Македонија како компанија – рече Мицкоски.

На проектот за хипербарната комора се работело пет месеци.

Премиерот Мицкоски истакна дека е благодарен што има општествено одговорни компании кои помагаат да има подобри услови за граѓаните.

– Би сакал помалку пациенти кои ќе имаат потреба за третман на изгореници, а повеќе во делот на спортот, но во животот не се знае што може да се случи и да се има ваква услуга е додадена вредност за здравствениот систем – рече Мицкоски.

Министерот Алиу ја поздрави соработката помеѓу приватниот и јавниот сектор истакнувајќи дека ќе се придонесе за поквалитено и поблиско здравство до граѓаните.

– Во успешните земји соработката помеѓу јавниот и приватните институции е клучна за иновации, нови технологии, за подобро здравство и ние ги следиме таквите чекори – изјави Алиу.

The post БОЛНИЦАТА „8 СЕПТЕМВРИ“ ЌЕ ДОБИЕ ХИПЕРБАРНА КОМОРА Ќе се користи за лекување на хронични рани, дијабетично стапало, изгореници… appeared first on plusinfo.mk.

Општата болница со проширена дејност – Кочани од денеска ја стави во функција хипербарната комора, што ја доби како донација, а во која соодветна здравствена помош за рехабилитација ќе добиваат повредените од трагичниот пожар во клубот „Пулс“.

Со терапијата во комората ќе се овозможи брза и успешна ревитализација на изгорениците, како и санирање на последиците од интоксикација на организмот по вдишувањето на штетните гасови од чадот во пожарот.

– Вкупно 27 повредени во „Пулс“ од денеска почнаа со рехабилитација во нашата болница. Заедно со нив медицинска нега за опоравување од повредите добиваат уште 11 лица. Тие се распределени на одделнијата за неврологија, хирургија и физикална терапија. Здравствената состојба им е стабилна – информираа од Општа болница – Кочани.

Санирањето на повредите од пожарот ќе трае подолг период, но со користењето на хипербарната комора се очекува времето за рехабилитација значително да се скрати. Според експертите, користењето на комората во период од еден час, заменува престој во планина во период од 7 до 10 дена.

The post СТИГНА СПАСОТ ЗА ПОВРЕДЕНИТЕ ОД „ПУЛС“ Хипербарната комора во Кочани ќе го забрза нивното закрепнување appeared first on plusinfo.mk.