Службениците во јапонската префектура Аомори ангажираа 1.800 луѓе, кои со помош на јажиња и тркала, треба да ја поместат палатата Хиросаки, тешка 360 тони. Инаку, ова здание мораше да се премести од неговата првична местоположба, заради реновирање, или поточно за поправка на ѕид оштетен во земјотрес.

Работата за зачувување на палатата трае од 2015 година, а ѕидот беше завршен во декември 2024 година. Притоа, сите 2.185 камења се вратени на нивната првична положба. Откако таа задача беше завршена, службениците повторно побараа помош од јавноста оваа година, за да ја вратат куќата на нејзината првобитна местоположба, објави „Гардијан“.

– Во последните два дена имавме околу 8.000 апликации за 1.800 места, што е околу четирипати повеќе од бројот на апликации, па затоа не сите можеа да учествуваат – изјави Кенсуке Хајасака, раководител на одделот за паркови и зелени површини во Хиросаки.

Тој рече дека луѓе дошле од цела Јапонија, како и од Југоисточна Азија, Европа и Северна Америка. За да се зачува историската градежна структура, се користела техника позната како „хикија“ – во којашто градбата се поставува на тркала и така се поместува, наместо да се демонтира. Во 2015 година, градот ги покани луѓето да дојдат и директно да учествуваат, па тогаш се случи првата хикија, иницирана од граѓаните – по еден век.

– Бидејќи палатата е прогласена за важно национално културно богатство, ние не ја демонтиравме – рече Хајасака.

Рачното преместување на палатата ќе продолжи до крајот на август, при што се очекува околу 4.100 луѓе да ја поместат за вкупно 5 метри, а преостанатите 73 метри ќе бидат извршени со машини до крајот на годината.

Главното здание во град-дворецот Хиросаки е една од 12 уникатни градби што останале во Јапонија во дозниот среден век и единствено во областа Тохоку на североистокот на оваа далекуисточна островска земја. Палатата му припаѓала на самурајскиот Цугару клан.

Таа првично е изградена во 1611., но првата градба изгорела откако удар од гром запалил продавница за барут во 1627 година. Сегашната е онаа што била обновена во 1810., а палатата сега е централен дел од паркот што привлекува околу два милиони посетители секоја година за време на сезоната на црешите. Хајасака објави дека палатата повторно ќе биде отворена за посетители по крајот реновирањето во 2033 година.

The post 📽️ 1.800 ЛУЃЕ СО ЈАЖИЊА ЈА ПОМЕСТУВААТ ПАЛАТАТА ТЕШКА 360 ТОНИ Неверојатната јапонска операција привлече 8.000 пријавени appeared first on plusinfo.mk.