Портали поврзани со Бугарија тераат хибридна кампања и шират дезинформации во македонскиот сајбер-простор, вели заменик шефот на македонската дипломатија од Луксембург. Зоран Димитровски обраќајќи се на Советот за европска демократија порача дека Владата презема мерки поради оваа појава.

– Во изминатиот период се соочуваме со засилени и сериозни дезинформациски и хибридни активности кои доаѓаат од структури и медиумски платформи поврзани со нашиот источен сосед и имаат за цел да ја поткопаат довербата во институциите, да го поткопаат нашиот идентитет и да создадат поделби во општеството – нагласи Димитровски и ја потврди подготвеноста на Македонија да се справи со хибридни закани и странски влијанија.

Тој истакна дека манипулациите и странските влијанија во информацискиот простор денес претставуваат една од најсериозните закани за демократската безбедност, со потенцијал да создадат поларизација, да ја нарушат довербата во институциите и да ги поткопаат демократските процеси, особено изборите.

Во своето обраќање, Димитровски ја поздрави иницијативата за воспоставување на Европскиот штит за демократија и Европскиот центар за демократска отпорност, оценувајќи дека тие претставуваат важен чекор во зајакнувањето на демократските институции, заштитата на изборните процеси и справувањето со странското влијание и хибридните закани.

Состанокот во Луксембург беше посветен на иницијативата „Европски штит за демократија”, а беше организиран од Кипарското претседателство со Советот на Европската Унија и Европската комисија.

На дискусијата учествуваа министри од земјите кандидатки и потенцијалните кандидатки за членство во Европската Унија, при што беа разгледани можностите за продлабочување на соработката во рамките на Европскиот штит за демократија, како и придобивките од заедничките активности за зајакнување на демократската отпорност.

Во фокусот на разговорите беа прашањата поврзани со заштитата на интегритетот на информацискиот простор, зајакнувањето на демократските институции, слободните и фер избори, независните медиуми, како и зголемувањето на општествената отпорност и граѓанското учество.

The post ПОРТАЛИ ПОВРЗАНИ СО БУГАРИЈА ВОДАТ КАМПАЊА ПРОТИВ МАКЕДОНСКИОТ ИДЕНТИТЕТ Владата презема мерки против хибридни закани appeared first on plusinfo.mk.

Хибридните и информациските закани се најсериозниот предизвик за државата и токму тие мора да бидат главен приоритет во реформите, порача премиерот Христијан Мицкоски на конференција организирана од Институтот за комуникациски студии. Тој истакна дека „национален интерес е да изградиме држава која препознава и реагира брзо и професионално“.

– Војната денес се води со збор, со манипулација и со монтирана вистина,“ рече премиерот, нагласувајќи дека дезинформациските кампањи веќе немаат само медиумска, туку и јасна безбедносна димензија.

Според него, државата во последниот период направила одреден напредок, но системот сè уште се соочува со недостиг од ресурси, недоволно обуки и слаба институционална меморија. Мицкоски оцени дека „реалноста е дека мора да се гради одржлив систем, а не привремени одговори“.

Во дел од обраќањето тој истакна дека е минато времето кога со замена на еден директор исчезнувало целото знаење во институцијата.

– Ќе воведеме задолжителни процедури, методологии, бази на податоци и стандарди, за повеќе да нема празнини и зависност од поединци – додаде Мицкоски.

Претставувајќи ги следните чекори, премиерот најави континуирани обуки за сите институции – од МВР и МО, до јавната администрација и локалната самоуправа – како и специјализирани програми за дигитална безбедност и медиумска писменост. Тој потсети дека ниту една држава не може да се брани без обучени луѓе.

– Хибридните закани не се победуваат со молк, туку со заедничка акција – рече Мицкоски, најавувајќи отворање платформа за редовна соработка со Универзитетите, истражувачките центри, медиумските здруженија, граѓанскиот сектор и приватниот сектор.

Тој порача дека Владата нема да дозволи импровизации.

– Овој пат градиме држава која стои цврсто и гледа напред – изјави премиерот, додавајќи дека целта е да се изгради општество што препознава манипулации и институции кои реагираат брзо и професионално.

Мицкоски заклучи дека хибридните закани ја загрозуваат довербата меѓу луѓето и ја прават државата ранлива.

– Нашата задача е да ја вратиме довербата и да изградиме систем што нема да падне при првиот силен удар – заврши премиерот.

The post ВОЈНАТА ДЕНЕС СЕ ВОДИ СО ЗБОР, СО МАНИПУЛАЦИЈА И СО МОНТИРАНА ВИСТИНА Мицкоски најави системска борба со хибридните закани appeared first on plusinfo.mk.

Министерот за дигитална трансформација Стефан Андоновски изјави дека се хибридни закани пораките по електронски пат што во петокот ги добија училиштата со предупредувања за поставени експлозивни направи, за кои се утврди дека се лажни дојави по проверките од полицијата.

– Разликата од претходно е што веднаш, уште утрото, се слушнавме со министерката (за образование), организиравме со министерот за внатрешни работи една ад хок работна група која ги разгледа проблемите со кои се соочува системот, развивме неколку методологии коишто треба да се следат во наредниот период за превентива на подолг рок – изјави Андоновски при посетата на ОУ „Димитар Македонски“ по повод одбележување на Денот на безбеден интернет.

Посочи дека МВР, МОН и општините постапиле „многу соодветно во текот на денот“, дека биле решени последиците и оти сега се работи и на причините „зошто ова ни се случува“.

– Хибридни напади ќе има, напади на нашата сајбер инфраструктура ќе продолжат, но многу е важно како институциите одговараат, а сега одговараат системски и во соработка едни со други. Стоиме на располагање да му помагаме на Министерството за образование и наука и на сите други институции ако и понатаму се појават вакви проблеми – рече Андоновски одговарајќи на новинарски прашања.

The post СЕ ПОДГОТВУВА ПРОТОКОЛ ЗА СПРАВУВАЊЕ СО ХИБРИДНИ ЗАКАНИ Можно е да има нови дојави за бомби во училиштата appeared first on plusinfo.mk.

„На седницата беше констатирано дека безбедносната состојба е стабилна и дека не постојат реални закани по безбедноста на граѓаните. Безбедносно-разузнавачката заедница е во секојдневна меѓусебна комуникација и координација, како и со меѓународните партнери од безбедносниот сектор со кои постојано работат на размена на информации и искуства во справувањето со хибридните закани“, се вели во владиното соопштение.

„Од седницата на Советот произлезе заклучок да се формира оперативен тим за сајбер безбедност и хибридни закани со кој ќе раководи Бирото за јавна безбедност во рамки на Министерството за внатрешни работи. Оперативниот тим ќе биде составен од експерти од Бирото за јавна безбедност, Агенцијата за разузнавање, Агенцијата за национална безбедност и Служба-Сектор за воена безбедност и разузнавање. Предвидено е по потреба да бидат вклучени и други институции и експерти“, се додава во написот.

„Главни задачи на оперативниот тим ќе бидат стручната процена и препораки, изработка на минимум стандарди и опрема за градење отпорност на секоја институција и зајакнување на комуникацијата со јавноста на дневно ниво. Меѓу другото, донесен е и заклучок со кој се зајакнува комуникацијата со партнерски институции во делот на проценката на отпорност и заштита на системот“, велат од Владата по средбата.

На седницата беа присутни и првиот заменик-претседател на Владата Артан Груби, министерот за внатрешни работи Оливер Спасовски, министерот за надворешни работи Бујар Османи, министерката за одбрана Славјанка Петровска, директорот на Агенцијата за национална безбедност Зарко Милошевски, директорот на Агенцијата за разузнавање Еролд Муслиу, раководителот на Служба-Сектор за воена безбедност и разузнавање полковник Ивица Ампов, а како ад-хок присуствуваше и директорот на Бирото за јавна безбедност Сашо Тасевски.

Седницата беше свикана на иницијатива на канцеларијата на Советот предводена од секретарот Даниела Илиоска.

The post НЕ ПОСТОЈАТ РЕАЛНИ ЗАКАНИ Советот за координација се состана, ќе се формира и тим за сајбер-безбедност составен од експерти appeared first on plusinfo.mk.