Наместо да се извини за штетите кои им ги направи на граѓаните, Филипче повторно се бори за нови тендери и се промовира како алтернатива, обвинува партијата ВМРО-ДПМНЕ додавајќи дека „некој како Филипче, кој беше еден од тендерџиите кои го компромитираа јавното здравје, нема кредибилитет повторно да се стреми кон позиција на моќ“.

ВМРО-ДПМНЕ бара оставка од Филипче. Во соопштението се вели дека „неговата оставка не треба да биде негова лична одлука, таа е долг кон народот, кој премногу долго ја плаќа цената на неговите одлуки“.

Во текстот се тврди дека додека бил на функција Филипче бил дел од корумпирана мрежа на наградување партиски поданици.

„Неговото министерствување не беше само неуспешно, туку ја стави здравствената грижа на продажба, каде што милионски тендери се делеа како политички подароци, додека здравјето на луѓето го стави на чекање.

Однесувањето на Филипче е вистински пример за злоупотреба на власта. Кога ја постави Ирина Пановска за директорка на Клиниката за хематологија, Пановска не беше само директорка, туку и главен канал за доделување тендери на фирмата Д-р Пановски – приватна фирма во сопственост на нејзиниот татко.

Филипче направи брутален судир на интереси, дозволи државна институција годишно преку ќерката назначена за директор да доделува милионски тендери на фирмата на нејзиниот татко. Татко-веледрогерист, ќерка-директор.

Овој случај не е изолиран. Овој случај се вклопува во пошироката шема на клиентелизам и непотизам што го одбележа мандатот на Филипче. Таа негова пракса на фаворизирање на фирми преку милионски тендери доведе до колапс, а институциите станаа банкомати за него и неговиот избран круг.

Наместо да се посвети на важните проблеми, преку мрежа на корпуција Филипче го крахираше здравството, и заедно со останатите челници на СДСM ги пљачкаа државните ресурси, и ги оставија граѓаните да чекаат со години за најосновни услуги. Оваа мрежа на интереси, замотана во институционална тишина, претставува најсилен удар врз народот.

Под маската на „технократ“, Филипче во суштина беше играч на банда која си поддаваше тендери користејќи го пинг-понг ефектот. Овие тендери беа само мал дел од системот на СДСM, каде партиските лојалности доаѓаа пред добробитот на граѓаните.

Дали сега кога Филипче е во опозиција, одлучи да се појави како загрижен играч за проблемите во здравството? Граѓаните добро знаат кој го донесе здравствениот систем на колена и дека тоа е директна последица на неговото неспособно и корумпирано управување. Дали тој самиот се нуди како решение за политиките кои тој ги креираше и до каде оди оваа негова хипокризија?“, реагира ВМРО-ДПМНЕ.

The post „НАМЕСТО ДА СЕ ИЗВИНИ, ФИЛИПЧЕ БАРА НОВИ ТЕНДЕРИ“ Кој го клекна на колена македонското здравство? appeared first on plusinfo.mk.

Поранешниот министер за здравство и актуелен лидер на СДСМ Венко Филипче аминувал милионски тендери на екс-директорката на Хематологија, Ирина Пановска, кон фирма на нејзиниот татко, обвини пратеникот Миле Лефков од ВМРО-ДПМНЕ на прес-конференција.

Лефков тврди и дека тоа е причината што Филипче станал претседател на СДСМ. Во продолжение е неговата изјава:

„Грдото лице на власта на СДСМ и ДУИ, Филипче како министер аминуваше милионски тендери од Ирина Пановска кон фирмата на татко ѝ.

Не поминуваат изговорите кои Филипче ќе ги каже и ги кажуваше во минатото, дека тој немал врска со тендерите, туку Клиниката. Филипче како министер можеше да ја разреши директорката на Хематологија Ирина Пановска, доколку навистина сакаше да ги спречи тендерите од ќерка на татко.

Филипче не само што не ја разреши, туку со своето недејствување и ги аминуваше милионските тендери од Клиниката за Хематологија каде директор беше ќерката Пановска, кон Веледрогеријата д-р Пановски на нејзиниот татко Пановски.

По неколку милиони секоја година завршуваа од сметката на Клиниката за Хематологија на сметка на д-р Пановски. Тоа е грдото лице на власта на СДСМ и ДУИ, тоа е причината за која Филипче стана претседател на СДСМ. Кога ќе биде прозван за одговорност или ќе биде поведена постапка против него, да се вади на политички притисок и со надеж дека некогаш во иднина повторно ќе може да се повтори шемата со Пановски и ним сличните.

Филипче се преиграл во пресметките. Ниту од одговорност ќе може да се избега, ниту пак народот ќе му даде шанса пак да го краде“, изјави Лефков.

The post ФИЛИПЧЕ АМИНУВАЛ ТЕНДЕРИ ОД ЌЕРКА НА ТАТКО Милиони од Хематологија завршувале во фирма кај д-р Пановски, тврди Лефков  appeared first on plusinfo.mk.

Сместен е на нов кат на површина од 800 метри квадратни и е донација од Амбасадата на САД, која преку Европската команда на американската армија финансиски ја поддржа изградбата со милион евра. Останатите средства се обезбедени од ФЗО со поддршка од Министерството за здравство и од Владата.

Директорката на Клиниката за хематологија Ирина Пановска Ставридис информираше дека станува збор за регионален Центар за трансплантација на хематопоетски матични клетки кој освен пациенти од Македонија, има капацитет да лекува и пациенти од Косово, Црна Гора, Босна и Херцеговина, како и од Албанија, земји каде што овие интервенции сѐ уште се недостапни.

– Ова е една од најважните инвестиции во јавното здравство во последните години. Со отворање на овој Центар за трансплатација на хематопоетски матични клетки на нашата Клиника се воведуваат највисоки светски стандарди за лекување на едно од најтешките хематолошки заболувања. Трансплантација на хематопоетски матични клетки претставува најсложена биолошка интервенција при која клетките на пациентот се заменуваат со матични клетки на здрав донор, со што може да се излекуваат најтешките малигни хематолошки заболувања – рече Пановска Ставридис за време на свеченото отворање на Центарот.

Како што посочи таа, за потребите на овој Центар се планираат и 30 нови вработувања на медицински кадар.

Директорката информираше дека од 2018 година до денес се извршени вкупно 320 трансплантации. Сега се очекува двојно зголемување на нивниот број.

Министерот за здравство Фатмир Меџити во своето обраќање рече дека годишно ќе бидат лекувани најмалку 50 до 60 пациенти од земјава и 10 до 15 лица од соседните земји, кои досега не биле прифаќани поради немањето простор и капацитет на установата.

The post СКОПЈЕ ЌЕ СТАНЕ ЦЕНТАР ЗА ЛЕКУВАЊЕ НА ТЕШКИ МАЛИГНИ ЗАБОЛУВАЊА НА КРВТА Новиот Центар за трансплантација на хематопоетски клетки ќе прима годишно 120 пациенти appeared first on plusinfo.mk.

„Пеевме за дечињата од хематологија. Секоја сабота во 20 часот ќе има пеење. Ти честитам Марија Тасев за иницијативата и честа вака граѓански да се вклучиме во една хумана мисија. Го снимив видеото единствено за да знаете дека и вие некоја сабота можете да им ја развеселите вечерта на овие деца кои цела година немаат излезено од клиниката. Вечерва имаше средношколци, родители на деца што победиле канцер, но и други граѓани како нас што едноставно сакаме да развеселуваме детски срца“, пишува во објавата.

Видеото можете да го погледнете тука.

The post ВИДЕО КОЕ ЌЕ ВИ ЈА СТОПЛИ ДУШАТА Под прозорот на Клиника, им пееја на децата од хематологија во Скопје appeared first on plusinfo.mk.

– Пандемијата со ковид-19 има големо влијание врз времето потребно за поставување на финалната дијагноза кај пациентите кои страдаат од хематолошки малигни заболувања. Дисконтинуитетот во патот на дијагностика на пациентот со малигна лимфаденопатија доведе и до намален број на ново дијагностицирани пациенти. Голем дел од пациентите од страв од самата пандемија остануваат дома, самите не можат да ги препознаат симптомите на малигна лимфаденопатија и сето ова води кон задоцнето поставена дијагноза, а со тоа и полош клинички исход за пациентите. Ги советувам пациентите да не се плашат од евентуална зараза со коронавирусот затоа што на клиниката строго се почитуваат и спроведуваат сите здравствени протоколи. Со цел прегледите да бидат побрзи и безбедни, со пократок ред на чекање и да се запази социјалната дистанца, а притоа пациентите да добијат современа и комплетна услуга, по принципот еден пациент во една ординација, работата на клиниката се одвива во две смени. Апелирам и до матичните лекари да ја користат новата е-амбуланта, дел од „Мој термин“ (телефонска консултација со матични лекари) која овозможува закажување на консултативен термин со одреден специјалист за своите пациенти за кои сметаат дека имаат потреба од специјалистичка консултација. Бидејќи психо-физичкото здравје на пациентите кои веќе имаат поставена дијагноза малигнен лимфом е многу важно,  подготвивме и соодветна брошура на тема „Водач за пациентите со не-хочкинов лимфом“ – изјави проф. д-р Ирина Пановска Ставридис.

Раното дијагностицирање на хематолошки малигни заболувања може да спаси живот. Пред повеќе од една година новиот коронавирус започна да се шири низ светот и предизвика пандемија, а со тоа и кризна состојба на светско ниво. Она што навистина загрижува е тоа што што поради стравот и мерките на претпазливост пациентите одбегнуваат да одат на рутински прегледи кај своите матични лекари и се почесто одлучуваат да останат дома дури и кога имаат симптоми и нарушено здравје.

Ваквата состојба е особено загрозувачка за лицата кои имаат хематолошки заболувања. Тие не се изложени на поголем ризик да бидат нападнати од коронавирусот, но се изложени на опасноста од неоткривање на болеста на време.

Имајќи ја во предвид важноста на навременото дијагностицирање на ваквите заболувања, Здружението за Хематологија на Македонија изработи и нов „Алгоритам за дијагностика на зголемени лимфни јазли во тек на пандемија“. Новиот алгоритам веќе е достапен за сите матични лекари и општи болници на ниво на целата држава.

Во изминатиот период беа организирани и неколку едукативни вебинари за стручната јавност, како и гостувања во телевизиски емисии од областа на здравството, на тема: „Што преставува лимфомот“ се со цел да ја зголеми јавната свесност за оваа болест, нејзините рани симптоми, како и кој е најбрзиот пат до соодветна дијагностика, затоа што смртноста на недијагностицираните и не третирани малигни болести е поголема од смртноста предизвикана од ковид 19.

The post Хематологија апелира граѓаните редовно да одат на преглед appeared first on plusinfo.mk.

„За овој начин на лекување нашите пациенти претходно одеа да се лекуваат надвор од нашата земја, а фотоферезната имунолошка клеточна терапија популарно наречена фотофереза од сега им е достапна на Клиниката за хематологија. Станува збор за специјална машина во која дел од крвта на пациентот се третира со специјален фотосензитивачки лек и потоа се изложува на специфична светлосна комора во која се активира. Крвта потоа се враќа назад и делува во организмот“, се наведува во соопштението.

Министерот за здравство Венко Филипче, денеска беше во посета на пациент врз кој се вршеше оваа терапија, а новата метода на лекување ја спроведува стручен тим на Клиниката, предводен од директорката на Хематологија д-р Ирина Пановска Ставридис.

За усовршување на овој начин на лекување со медицинскиот тим на Хематологија работи едукатор од Германија.

„Имуномодулаторна терапија, нуди надеж за болните кои страдаат од Т-клеточни лимфоми, пациенти кои развиваат акутна или хронична форма на болеста GVHD, за лекување определени имунолошки болести и состојби како системска склероза, кронова болест. Со фото-имуната терапија се тертираат и пациенти после трансплатација на солидни органи – срце и бели дробови, во случаи кај кои телото го отфрла органот. Клиниката за хематологија, освен во третманот на пацинети вложува и во едукација и усовршување на својот медицински персонал, од следниот месец медицински тимови од оваа Клиника ќе одат во Загреб, на едукација и усовршување на нови методи на лекување.

Министерството за здравство гради модерен здравствен систем за сите, за Клиниката за хематологија, минатата година, обезбеди  апарат за крио презервација, односно за смрзнување на крвни матични клетки“, соопшти Министерството.

The post Воведена е фотофереза – имуномодуларна терапија на Клиниката за хематологија appeared first on plusinfo.mk.

Д-р Марица Павковиќ, вонреден професор, хематолог на Универзитетската клиника за хематологија во разговор за Плусинфо објаснува кои се ризик факторите и причините за појава на лимфомот, како се дијагностицира и лекува, но и за влијанието на пандемијата со ковид-19 врз дијагностиката на малигните лимфоми.

Универзитетската клиника за хематологија од почетокот на пандемијата продолжи без прекин со лекување на малигните болести на крвта, со придржување на сите епидемиолошки препораки. Работат во две смени за да бидат порелаксирани и побезбедни прегледите, без гужва, со пократок ред на чекање и со запазување на социјалната дистанца. Пациентите, вели докторката, добиваат современа и комплетна услуга.

– Воведовме и е-амбуланта за подобра комуникација со матичните лекари. Навистина нема потреба да постои страв кај јавната популација да се јави на матичен лекар или пак да се обрати на Клиниката за хематологија. Чувањето на здравјето на пациентите и медицинскиот персонал се врвни приоритети во услови на пандемија. Смртноста на недијагностицираните и нетретирани малигни болести е поголема од смртноста предизвикана од ковид-19, па во фаза на пандемија треба сите пациенти да настојуваме да ги дијагностицираме навремено – порачува д-р Павковиќ.

Д-р Павковиќ може ли прво да објасниме што е лимфомот и какви типови на лимфоми постојат?

– Лимфомите се хетерогена група на малигни заболувања на крвта или поедноставно кажано тие се тип на карцином на крвта што започнува во белите крвни клетки (лимфоцити). Лимфомите настануваат како резултат на стекнати во текот на животот, генетски промени или мутации во лимфните клетки, кои доведуваат до неконтролирана делба на малигно променетата клетка. Овие абнормални лимфоцити се множат и се акумулираат во лимфните јазли и другите човекови органи нарушувајќи ја нормалната рамнотежа во човековото тело. Лимфомот може да се шири и да се појави и надвор од лимфниот систем бидејќи лимфоцитите циркулираат насекаде низ телото.

Според Светската здравствена организација, постојат околу 60 различни типови на лимфоми. Постојат два главни подтипа на лимфом: Хочкинов лимфом и не-Хочкинов лимфом (НХЛ). Не-хочкиновите лимфоми се делат на Б и Т-НХЛ во зависност од тоа дали потекнуваат од Б или Т лимфоцитите. За читателите, најважна е поделбата на лимфомите според нивните биолошки или клинички карактеристики на агресивни и индолентни лимфоми. Агресивните, брзо растечки, високо малигни лимфоми се болести каде туморските клетки многу бргу се делат и акумулираат во организмот. Доколку не се дијагностицираат и лекуваат на време, болеста може да биде фатална за 6 месеци до 2 години. Овој тип на лимфоми со адекватен третман може да се излекува кај 60-70% од пациентите.

Индолентните или споро растечки, ниско малигни лимфоми се болести каде туморските клетки побавно се делат, болеста поспоро напредува и пациентите со оваа болест може да живеат со години, со адекватен третман.

Кои се ризик факторите и причините за појава на лимфомот?

– Приближно 1 од 50 лица во светот има ризик да заболи од оваа болест во тек на својот животен век. Во 2018 година биле дијагностицирани околу 500.000 нови случаи на НХЛ во светот, а ова заболување било причина за повеќе од 248.000 смртни случаи истата година. Не-Хочкиновиот лимфом е седмо по честота малигно заболување во светот кај двата пола. Мажите заболуваат почесто од жените во сооднос 2:1. Најчесто заболуваат лица на возраст од 65-74 години со тренд на пораст со зголемување на возраста. Инциденцата е во постојан пораст во споредба со 70-тите години од минатиот век (зголемена е за околу 80%); на секои 90 секунди се дијагностицира по околу еден нов случај. (Инциденца на Б-НХЛ во светот: 3/100.000 кај мажи, 2,6/100.000 кај жени. Инциденца на Б-НХЛ во РСМ: 177 во 2017 година, 148 во 2019 година). Како и кај останатите малигни заболувања, причината за болеста е непозната. Ризик фактори за развој на овие болести се генетска предиспозиција, примарни и секундарни имунодефицитни состојби, одредени онокгени вируси (EBV, ХИВ), изложеност на канцерогени хемиски супстанци, радиоактивно зарачење. Важно лимфомите не се заразни и не се пренесуваат од човек на човек.

Кои се симптомите на лимфомот? Kога пациентите треба да се обратат на лекар?

– Најчест симптом на лимфомите е зголемен лимфен јазол, тврд на палпација, безболен, без промена на околната кожа и без знаци на воспаление. Зголемените лимфни јазли најчесто се јавуваат на вратот, под мишките или во препоните. Но лимфомот може да почне од секој орган и ткиво во човековото тело. Две третини од болните немаат други тегоби, освен појава на зголемени лифни јазли, додека една третина од болните имаа и други знаци или симптоми како слабеење, ноќно потење, покачена температура особено во вечерните часови, чешање без исип по телото, замор, малаксалост. Може да се јави сува кашлица и гушење, недостаток, глад за воздух поради зафатеност на лимфните јазли во белите дробови и медијастинумот или стомачни болки и тегоби поради зголемување на лимфните јазли во стомакот.

Што претставува терминот лимфаденопатија? Дали секој зголемен лимфен јазол значи лимфом?

– Лимфаденопатија e состојба на промена во големината, бројот и конзистенцијата на лимфните јазли. Лимфаденопатијата е синоним на отечени или зголемени лимфни јазли. Претставува сериозен симптом кој бара темелно дијагностичко иследување со цел да се утврди причината за нејзината појава. Кај помлади лица до 30 години, во 20% од случаите лимфаденопатијата е последица на малигни причини, многу почесто кај оваа возрасна група причина за зголемување на лимфните јазли се воспалителни процеси и инфективни причинители. Кај пациенти постари од 50 години, во 60%-70% од случаите лимфаденопатијата е последица на малигни причини како метастази од други карциноми (карцином на бели дробови, дојка, желудник, грло) или лимфоми. Затоа, кај секоја лимфаденопатија треба да се преземат брзи и темелни иследувања со цел да се постави дефинитивна дијагноза.

Како се дијагностицира лимфомот?

– Се почнува со преглед на болниот и основни лабораториски анализи како седиментација, крвна слика, биохемиски анализи, по потреба микробиолошки и вирусолошки анализи. Најважна дијагностичка процедура е тенко иглената аспирациона биопсија/пункција (ТАИБ) и хируршката биопсија. Тенко иглена аспирациона биопсија претставува брза, евтина, безбедна, минимално-инвазивна дијагностичка процедура со која патологот со помош на игла и шприц зема материјал од лимфната жлезда и го анализира под микроскоп. Оваа метода овозможува брза, ориентациона дијагноза (бенигно воспаление или малигно) и ја намалува анксиозноста и чувството на исчекување кај пациентот. Дефинитивната дијагноза се поставува со хируршка биопсија на лимфната жлезда или друг тумор, со што се добива материјал кој патологот понатаму го анализира, типизира и одредува дали се работи за воспалителен процес, лимфом или метастаза од друго малигно заболување. Ова е единствениот метод со кој се поставува точна и прецизна дијагноза. Во одредување на стадиумот или раширеноста на болеста се користат методи како КТ, рендген или ултразвучен преглед, па сѐ до најсофистицираната метода на ПЕТ скен.

Како се лекува и каква е прогнозата?

– Лимфомите се лекуваат со хемотерапија и/или радиотерапија. Типот на хемотерапија зависи од подтипот на лимфом. Последните децении направен е голем напредок во лекувањето на овие заболувања со откривање и воведување во третманот на нови цитостатици и специфична биолошка терапија. Биолошката терапија подразбира употреба на моноклонални антитела специфични за маркери на површината на малигните клетки кои селективно ги уништуваат само малигните лимфомски клетки. Ова доведе до значајно подобрување на преживување на болните и зголемување на процентот на излекувани пациенти.

Како ги лекувате пациентите на Универзитетска клиника за хематологија во Скопје?

– Универзитетска клиника за хематологија во Скопје ги следи сите најнови препораки на светските хематолошки здруженија за третман на овие заболувања и ги има на располагање сите современи препарати за третман за пациентите со лимфом. Третманот се избира за секој пациент посебно со индивидуализиран пристап. Изборот зависи од повеќе фактори: типот на лимфом, стадиумот или раширеноста на заболувањето, како и општата здравствена состојба на пациентот. Третманот се состои од комбинирана терапија на повеќе цитостатици со специфични моноклонални антитела.

Моноклоналните антитела делуваат специфично (на CD20-рецепторот) со целно уништување само на туморските клетки и поштедување на здравите клетки. Целта на третманот е да доведе до конечно излекување на болеста или постигнување на долготрајна ремисија. 5-годишното преживување кај НХЛ е 70%.

Дали пандемијата со ковид-19 има импакт врз дијагностиката на малигните лимфоми и доколку постои како можат да се надминат сите овие предизвици?

– За жал, пандемијата со ковид-19 има сериозно влијание врз дијагностиката на малигните лимфоми, како впрочем и кај сите други малигни и хронични болести. За ова говорат искуствата и статистиките и од другите земји, на пример во САД во текот на трите пролетни месеци на „lockdown” за 46 проценти е намален бројот на новодијагностицирани пациенти со шесте најчести видови на канцер; две третини од скрининг прегледите за најчестите малигни заболувања не се реализирани, што секако ќе доведе до одложено и задоцнето дијагностицирање на малигните заболувања, кои ако се откријат навреме може да бидат излекувани.

Нашите искуства го потврдуваат овој светски тренд па така во 2019 година вкупниот број на новодијагностицирани лимфоми во Македонија бил 148, за да заклучно со 30 јуни 2020 година имаме само 55 новодијагностицирани пациенти со Б-НХЛ, што значи имаме пад од 31% во споредба со лани во истиот период кога бројот на новодијагностицирани лимфоми бил 80.

Заклучно со 15-ти октомври оваа година имаме 89 новодијагностицирани лимфоми што значи има пад од 21% во споредба со лани во истиот период. Овој тренд се забележува и кај другите малигни заболувања на крвта како миеломи, хронични лимфатични леукемии и др. Сметаме дека тоа се должи на стравот на пациентите да се јават на лекар во услови на пандемија, поради што прегледите ги одлагаат до значајно напредување на симптомите и знаците на болеста.

За таа цел Клиниката се одлучи да организира кампања на тема „Да го победиме лимфомот“ со цел да допреме до општата популација. Околу три четвртини (74%) од глобалната популација не знае дека лимфомот е тип на малигно заболување. Помалку од половина од сите луѓе во светот (49%) знаат по нешто за лимфомот. Да им помогнеме на луѓето да ги препознаваат симптомите на лимфомот и да побараат на време помош од лекар. Раното дијагностицирање и адекватниот третман за оваа малигна болест се од витално значење. Ако пациентите се третираат навреме, многу од нив може да се излекуваат и да имаат долг, квалитетен и среќен живот. Апел до сите здравствени работници: Бидете во контакт со Вашите пациенти, останете безбедни, останете здрави!

The post Д-р Марица Павковиќ: Лимфомите може да се излекуваат ако навреме дојдете на лекар appeared first on plusinfo.mk.

Раното дијагностицирање и адекватниот третман на малигните болести се од витално значење, порачуваат лекарите од Хематологија. Ако пациентите се третираат навреме, многу од нив може да се излекуваат и да имаат долг, квалитетен и среќен живот.

Клиниката работи во две смени, со цел прегледите да бидат порелаксирани и безбедни, без гужва, со пократок ред на чекање и да се запази социјалната дистанца, а притоа пациентите да добијат современа и комплетна услуга, по принципот еден пациент во една ординација.

– Завршија времињата кога мораше на преглед пациентите да одат на преглед рано наутро гладни. Амбулантата работи до 19 часот, па и во попладневните термини пациентите можат да добијат комплетен преглед, со лабораториски и дијагностички услуги – порачуваат од Универзитетската клиника за хематологија.

На оваа клиника во јуни почна со работа новата е-амбуланта, која овозможува закажување на консултативен преглед со одреден специјалист за сите пациенти кои сметаат дека имаат проблем и имаат потреба од специјалистичка консултација. 

– Матичните лекари слободно може да ја користат оваа е-амбуланта. Навистина нема потреба да постои страв кај јавната популација да се јави на матичен лекар или пак да се обрати на Клиниката за хематологија. Чувањето на здравјето на пациентите и медицинскиот персонал се врвни приоритети во услови на пандемија. Смртноста на недијагностицираните и нетретирани малигни болести е поголема од смртноста предизвикана од ковид-19, па во фаза на пандемија треба сите пациенти да настојуваме да ги дијагностицираме навремено – апелираат од Хематологија.

Универзитетска клиника за хематологија Скопје има обезбедено најсовремен третман за пациентите со лимфом. Третманот се избира за секој пациент посебно. Изборот зависи од повеќе фактори: новодијагностициран или релапсен лимфом, агресивен или индолентен стадиум на заболувањето, општа здравствена состојба на пациентот. Третманот се состои од комбинирана терапија на повеќе цитостатици со моноклонални антитела.

За жал, велат од Клиниката за хематологија, пандемијата со ковид-19 има импакт врз дијагностиката на малигните лимфоми, како и кај сите други малигни болести

Податоците говорат дека во 2019 година вкупниот број новодијагностицирани лимфоми бил 148.  Заклучно со 30 јуни 2020 година има 55 новодијагностицирани пациенти со Б-НХЛ, што значи има пад од 31 отсто во споредба со лани во истиот период кога бројот на лимфоми бил 80.

За таа цел Клиниката за хематологија организираше едукативни вебинари на тема „Заедно да ги надминеме актуелните предизвици и да обезбедиме навремена дијагноза и современ третман за сите пациенти со CD20+ Б – клеточни малигнитети“ со цел едукација и подобра конекција на терцијалното здравство со матичните лекари, интернисти и ОРЛ специјалисти на ниво на целата држава.

– Оваа наша иницијатива резултираше со подобрена дијагностика. Но сепак сѐ уште е голем импактот на пандемијата, па заклучно со 15-ти октомври (откриени се 89 лимфоми) што значи има пад од 21 отсто во споредба со лани во истиот период. За таа цел клиниката се одлучи да организира кампања на тема „Да го победиме лимфомот“ со цел да допреме до општата популација – велат од Хематологија.

Околу 74 отсто од глобалната популација не знае дека лимфомот е тип на малигно заболување. Помалку од половина од сите луѓе во светот (49%) знаат по нешто за лимфомот. Да им помогнеме на луѓето да ги препознаат симптомите на лимфомот, кои тешко се идентификуваат бидејќи често пати не се разликуваат од многу помалку сериозните состојби во организмот како: инфекција со ковид-19, грип, туберкулоза и хроничен замор, и да побараат помош од лекар. Раното дијагностицирање и адекватниот третман за оваа малигна болест се од витално значење, порачуваат лекарите од Хематологија. Ако пациентите се третираат навреме, многу од нив може да се излекуваат и да имаат долг, квалитетен и среќен живот. Оттаму и апелот што го упатуваат до сите здравствени работници:

– Бидете во контакт со Вашите пациенти, останете безбедни, останете здрави. Клиниката во овој момент работи на нов алгоритам на дијагностика кој ќе функционира во услови на пандемија, а ќе овозможи брза и рана дијагностика на малигните лимфоми преку адекватна соработка и мултидисциплинарен пристап од страна на сите засегнати здравсвени работници. Наскоро новиот алгоритам ќе биде достапен за сите матични лекари и општи болници на ниво на цела држава. Исто така клиниката подготвува и нова брошура за пациентите со лимфоми.

The post Апел од Клиниката за хематологија: Не ги одложувајте прегледите поради коронавирусот! appeared first on plusinfo.mk.

Со оваа инвестиција целосно ќе се заокружи процесот на обнова на просторните услови во рамки на Клиниката започнат во 2017 година. Финансиската поддршка се реализира преку Амбасадата на САД во Република Северна Македонија.

Амбасадорката Брнз изјави дека проширениот и обновен објект на клиниката ќе биде од корист не само за граѓаните на Северна Македонија туку и за целиот регион.

Таз изрази благодарност на директорката на клиниката Ирина Пановска Ставридис за овој проект, но и за другите залагања за унапредување на болницата. Благодарност искажа и до министерот Филипче за партнерската соработка и за раководењето на активностите за справување со корона-кризата.

– Многу работи се сменија откако почнавме да разговараме за овој проект. С. Македонија стана дел од НАТО, станавме сојузници, доби покана од ЕУ за започнување на пристапниот процес, а се случи и пандемијата со ковид-19. Тоа што не се смени во сите овие години е заложбата на САД да работи со С. Македонија за подобрување на здравствениот систем. Среќна сум што таа соработка се развива. Ќе продолжиме да работиме заедно не само за справување со пандемијата, туку и за зајакнување на здравствениот систем, науката, технологијата во интерес на сите граѓани – рече амбасадорката Брнз.

Министерот Филипче потсети дека Амбасадата на САД беше првата што помогна со лична заштитна опрема, со 60 респиратори што ги добивме преку НАТО и со уште еден проект којшто е вреден 300 илјади евра за поддршка на нашиот здравствен систем во делот на медицинска опрема која ни е потребна за справување со ковид кризата.

– Ова е уште еден доказ дека пријателите и партнерите треба да се тука и да се најдат кога е најмногу потребно, а САД го докажаа токму тоа дека стратешкото партнерство вреди тогаш кога пријателите се тука да помогнат и да се најдат да се пребродат тешки моменти, посебно една ваква криза која што е криза во целиот свет – рече Филипче.

Тој кажа дека со поддршка од САД која трае подгол период, реновирани се капацитети и во болницата „8 Септември“, изградена е нова зграда во болницата во Демир Хисар, реновирано е одделението за неврологија во Клиничкиот центар, а во тек се работи и на Клинката за максилофацијална хирургија.

– Овој проект за надградување физичка и инфраструктура на Клиниката за хематологија за нашите пациенти значи многу. Значи дека таа нова метода која што започна да се прави на оваа Клиника благодарение на овој тим, на овие лекари предводени од директорката и менаџерите на Клиниката пред две години, метода која што дотогаш не беше можно да се направи на нашата Клиника и пациентите се праќаа во странство, практично ќе значи дека ќе се одвива во многу подобри услови, ќе имаат пристап многу поголем број пациенти и секако метода која што ќе може како и сега да се нуди во околните земји поради тоа што таа метода не се прави никаде во нашиот поблизок регион – рече Филипче и им се заблагодари на сите вклучени во проектот и на сите ангажирани во справувањето со пандемијата на ковид-19.

Тој изрази надеж дека соработката со Амбасадата и со САД ќе продолжи и понатаму поради тоа што  кризата покажа оти врските посебно во делот на здравството се многу битни и нераскинливи.

Директорката на Клиниката за хематологија Ирина Пановска Ставридис посочи дека со помошта од САД ќе се надгради еден спрат на клиниката и ќе се зголемат просторните капацитети. Со оваа донација се заокружува процесот на реновирање што заедно со веќе воведените нови и современи методи за лекување прави клиниката да прерасне во регионален центар за лекување на пациентите со малигни хематолошки заболувања.

– Досега нашата клиника имаше капацитет да спроведува 50-60 трансплантации годишно и притоа пациентите од регионот коишто бараа здравствена помош кај нас многу често не можевме да ги прифатиме бидејќи немавме просторни услови. Сега со новоизградениот оддел ние прераснуваме во регионален центар и директна корист со оваа донација ќе имаат сигурно околу стотина македонски здравствени корисници и на годишно ниво и 20 пациенти од регионот – истакна Ставридис.

The post Со донација од американската амбасада Хематологија ќе добие уште еден кат appeared first on plusinfo.mk.

Клиниката соопшти дека се работи за заеднички проект подготвен во соработка со еминентните експерти, акад. д-р Димитар Ефремов, кој раководи со Одделот за молекуларна хематологија во ICGEB, д-р Милена Стефановиќ и д-р Илир Демири од ЈЗУ Клиниката за инфективни болести и фебрилни состојби, академик д-р Александар Димовски од Центарот за генетски инженеринг и биотехнологија од Македонската академија на науките и уметностите (МАНУ), доц д-р Венко Филипче – Министерство за здравство.

Од Клиниката посочуваат дека ковид-19 е болест која има неколку фази и секоја од нив е со свои специфики и бара различен тип на интервенција. Цели на нивните истражувања се: да се утврди зошто кај некои пациенти имуниот систем не успева да се справи со ковид-19 инфекцијата во почетните фази; дали може да се предвиди текот на болеста и дали, евентуално, би можело да се интервенира за да се превенира тежок облик или несакан исход.

– За таа цел ќе испитуваме два сегмента од имуниот систем. Едниот се т.н. природни антитела, тоа се вид антитела кои се во состојба да неутрализираат различни вируси и кои имуниот систем ги произведува независно од претходни инфекции или вакцинации, а вториот сегмент се цитотоксичните Т лимфоцити. Очекуваме резултатите од спроведените анализи да имаат улога во добивање подлабока слика за имунолошкиот одговор на секој од пациентите со ковид-19 поединечно, со што би било можно и дизајнирање индивудализиран тераписки пристап за секој пациент – информира Клиниката за хематологија.

Во соопштението Клиниката додава дека овој меѓународно поддржан проект ни дава шанса да се вклучиме во глобалната научна борба за справување со пандемијата КОВИД-19 и покажува дека во мала земја како нашата е препознат потенцијал за научно-истражувачка работа. 

The post Проект на Клиниката за хематологија избран меѓу 38 во светот да биде финансиран за истражување за ковид-19 appeared first on plusinfo.mk.