Девизните резерви на крајот на октомври 2025 година изнесувале 4,84 милијарди евра и во однос на претходниот месец бележат зголемување за 120,5 милиони евра, соопшти Народната банка.

Најголем дел од девизните резерви се пласирани во хартии од вредност (71,1%), по што следуваат монетарното злато (15,9%) и валутите и депозитите (13%).

Ако се анализираат податоците за пласманот на девизните резерви може да се види дека веќе втор месец се зголемува вредноста на монетарното злато и резервите во валути и девизи, но се намалува пласманот на резервите во хартии од вредност.

Во септември златото во вкупните девизни резерви изнесуваше 15,2%, а во август 13,6%, процент кој е речиси идентичен во последните години.

Девизните резерви пласирани во хартии од вредност во септември изнесуваа 74,7%. во август 74,6%, додека пак резервите пласирани во валути и депозити во септември имале процентуално учество од 10%, а во август 11,7%.

Од Народна банка велат дека зголемувањето на вредноста на златото во државните резерви не е поради тоа што се купува злато, туку е резултат на цената на златото.

-Количината на злато во девизните резерви во 2025 година е непроменета. Притоа, растот на вредноста на златото, изразена во паричен износ, во целост се должи на повисоката цена на златото- велат од Народна банка.

Извор: НБ

Според официјалните податоци, Македонија чува околу 7 тони злато кое се чува во банка во Банката на Англија.

Гувернерот на Народната банка, Трајко Славески, во јули оцени дека и покрај стабилноста на девизните резерви, нивото на монетарното злато не е задоволително. Тој изрази недоумение зошто е прекината праксата на зголемување на златните резерви, особено во услови кога цената на златото на светските берзи континуирано расте.

– Не знам зошто е запрена практиката да се зголемува износот на монетарното злато. Во минатото го откупувавме домашното злато од рудниците и го стававме во резервите. Цената на златото само во последната година се зголеми двојно. Во услови на глобална несигурност, инвеститорите секогаш бараат сигурни средства, а златото е едно од нив – рече Славески.

Девизните резерви се средства коишто ѝ се веднаш расположливи на монетарната власт и се контролирани од монетарната власт, а служат за финансирање на платниот биланс преку интервенција на девизниот пазар со цел да се влијае врз девизниот курс и/или за други цели.

Останатите девизни средства се составени од девизните средства на централната банка коишто не ги исполнуваат основните критериуми за нивно вклучување во девизните резерви.

The post ПОРАСНА ВРЕДНОСТА НА ЗЛАТОТО ВО ДЕВИЗНИТЕ РЕЗЕРВИ НА НАРОДНА БАНКА Во октомври учеството на златото во резервите изнесува 15,9% appeared first on plusinfo.mk.