Денешниот ден – 19 мај се следи со особено внимание од научниците и здравствените власти поради можноста да почнат да се појавуваат нови случаи на андскиот сој на хантавирус, поврзани со епидемијата на крузерот „Хондиус“.

На бродот, кој пловел под холандско знаме, патувале околу 150 патници и членови на екипажот од 23 држави кога била регистрирана епидемијата. Досега починаа три лица – постар брачен пар од Холандија и германски државјанин, додека Светската Здравствна Организација потврди 10 случаи на инфекција со хантавирус.

Крузерот во меѓувреме пристигнал во Ротердам, а патниците и дел од екипажот веќе го напуштиле бродот. Дел од нив се ставени во карантин во повеќе држави поради страв од понатамошно ширење на вирусот.

Страв од „трета генерација“ на инфекции

Американскиот научник Стивен Квеј предупредува дека денешниот датум може да биде пресвртница, бидејќи според досегашните пресметки токму сега би можеле да почнат да се појавуваат т.н. случаи од „трета генерација“ – луѓе кои се заразиле од патници што биле на крузерот.

Според анализите, просечниот инкубациски период бил околу 22 дена, а слични модели биле забележани и за време на претходни епидемии на андскиот сој на хантавирус во Aргентина.

– Сега имаме еден нулти пациент и девет случаи на пренос од човек на човек. Ако по 19 мај продолжат да се појавуваат нови инфекции, тоа би можело да значи пренос од втора на трета генерација – предупредил Квеј за британскиот весник „Телеграф“.

Сомнежи дека вирусот може да се пренесува и преку воздух

Дополнителна загриженост предизвикуваат информациите дека некои заразени лица наводно немале близок контакт со „нултиот пациент“, туку само престојувале во исти простории или трпезарии.

Професорот Џозеф Ален изјавил дека лекар од крузерот изразил сомнеж оти вирусот можеби се пренесувал и преку воздух, а не само преку близок контакт и телесни течности.

Сепак, експертите нагласуваат дека ризикот за пошироката јавност засега останува низок и дека нема официјална потврда за широко воздушно пренесување на вирусот.

Следен клучен датум е 21 јуни

Ако во следните недели не се појават нови случаи од „трета генерација“, тогаш 21 јуни би можел да биде датумот кога епидемијата официјално би се сметала за завршена, бидејќи тогаш истекува максималниот период на инкубација поврзан со првичниот кластер на инфекции.

The post ДЕНЕС СВЕТОТ ЧЕКА ОДГОВОР • ЌЕ ПОЧНЕ ЛИ НОВА ПАНДЕМИЈА? Научниците стравуваат од ширење на хантавирусот appeared first on plusinfo.mk.

Француската влада објави дека стратешките резерви со маски ги надминуваат целите поставени по пандемијата на ковид-19 и дека земјата е подготвена за евентуален епидемиски бран со хантавирусот.

Од канцеларијата на премиерот Себастијан Лекорну посочиле дека дополнителни резерви имаат и болниците, компаниите и локалните власти, што би овозможило заштитата да трае и подолго.

Властите нагласуваат дека Франција има домашен производствен капацитет од 2,6 до 3,5 милијарди маски годишно. Тој број, според нив, би бил доволен и за сценарио слично на пандемијата со ковид-19.

Досега е регистриран еден случај на вирусот во земјата, тоа е патничка од крузерот MV Hondius која е во изолација во болница во Париз.

Хантавирусот е ретка болест што најчесто се пренесува преку заразени глодари или нивниот измет, а Светската здравствена организација предупредува дека кај одредени соеви смртноста може да достигне и до 50 проценти.

Француските власти сепак тврдат дека вирусот е значително помалку заразен од ковид-19 и дека засега нема регистрирано ширење на инфекцијата во земјата.

The post „ИМАМЕ ЗАЛИХИ ЗА ТРИ МЕСЕЦИ“ Франција е спремна за евентуална епидемија од хантавирус appeared first on plusinfo.mk.