Иранските власти на државната телевизија емитуваа соопштение за кое тврдат дека доаѓа од Моџтаба Хамнеи, новиот врховен водач на Иран. Во пораката се предупредува дека сите американски воени бази во регионот мора да бидат затворени, во спротивно „ќе бидат нападнати“.

Хамнеи, како што пренесува Би-Би-Си, порача дека Иран нема да се двоуми да „ја одмазди крвта на Иранците“ убиени во војната, нагласувајќи дека одговорност ќе се бара за секоја жртва.

– Ве уверувам дека нема да се воздржиме од одмазда за крвта на нашите маченици. Секој Иранец убиен од непријателот претставува посебен случај во досието на одмаздата – се наведува во пораката.

Ормускиот Теснец ќе се користи како средство за притисок

Во соопштението се истакнува дека затворањето на Ормускиот Теснец, една од најважните светски поморски рути за транспорт на нафта, ќе продолжи да се користи како средство за притисок врз САД и Израел.

Хамнеи исто така порача дека Иран во нападите гаѓа исклучиво странски воени бази во соседните земји, нагласувајќи дека Техеран сака пријателски односи со државите во регионот.

Воедно ги повика земјите од Персискиот Залив да ги затворат американските бази на своја територија.

Соседите да ги затворат американските бази

– Тие држави мора јасно да се определат кон оние што ја нападнаа нашата татковина и го убија нашиот народ. Им препорачувам што поскоро да ги затворат тие бази, бидејќи досега веќе требаше да сфатат дека американските ветувања за безбедност и мир беа ништо повеќе од лаги – порача тој.

Во обраќањето се заблагодари на „народот на Иран од сите слоеви на општеството кој застана против непријателот“, како и на иранските војници кои, како што рече, „со силни удари му го блокираа патот на непријателот“.

Тој исто така изрази сочувство до семејствата кои ги загубиле своите најблиски во војната и порача дека штетата ќе биде надоместена.

– Злосторствата против човештвото, особено оние извршени врз деца, нема да бидат игнорирани – се наведува во пораката.

Нападот врз училиште во Минаб го извршија САД

Хамнеи посебно го издвои случајот со градот Минаб, каде што во американски напад во близина на училиште загинале 168 лица, меѓу нив околу 110 деца.

Иран тврди дека училиштето било погодено од американска ракета, додека САД ја негираа одговорноста и соопштија дека истрагата е во тек. Сепак, првичните процени на американските воени истражители укажуваат дека нападот веројатно бил последица на американски удар заснован врз застарени разузнавачки податоци, додека конечниот заклучок сè уште не е објавен.

Не е познато во каква состојба се наоѓа

Хамнеи не се појави пред камерите, туку пораката ја прочита водител на државната телевизија. Израелските разузнавачки служби претходно проценија дека тој веројатно е ранет во првите напади на почетокот на војната, па засега не е познато во каква здравствена состојба се наоѓа.

Иранските власти не соопштија детали за евентуалните повреди ниту каде се наоѓа Хамнеи во моментов.

Објавена е и негова нова фотографија

Во меѓувреме, на официјалниот Телеграм канал на новиот врховен водач беше објавена и фотографија која, според иранските државни медиуми, го прикажува неговиот ракопис.

На фотографијата се гледа список со имињата на врховните водачи на Иран: Мојтаба Хамнеи, неговиот татко Али Хамнеи, како и првиот врховен водач на Исламската Република, Рухолах Хомеини.

Под списокот се наоѓа кратка рачно напишана порака: „Во името на Бога, Милостивиот, Семилосниот.“

The post СЕ ОГЛАСИ НОВИОТ ИРАНСКИ ВОДАЧ МОЏТАБА ХАМНЕИ Државната телевизија прочита негово соопштение, еве што порача appeared first on plusinfo.mk.

Со одлуката на 88-члениот Совет на експерти, Моџтаба Хамнеи, вториот син на неодамна убиениот ајатолах Али Хамнеи, и официјално е прогласен за нов врховен лидер на Исламската Република Иран. Неговото издигнување на најмоќната функција во државата доаѓа во критичен момент, по серијата воени удари од страна на САД и Израел во кои загина неговиот татко, но и неговата сопруга, Захра Хадад Адел.

Рани години и воено искуство

Моџтаба Хамнеи е роден во 1969 година во светиот град Машхад, десет години пред Исламската револуција во 1979 година. По падот на шахот и воспоставувањето на новиот поредок, неговото семејство се преселило во Техеран.

Неговата биографија е тесно поврзана со воената историја на земјата. Во текот на Иранско-ирачката војна, тој активно учествувал на фронтот како дел од баталјонот „Хабиб ибн Мазахир“, единица во рамките на Корпусот на иранската Револуционерна гарда (ИРГЦ). Оваа единица се смета за клучна во неговиот подем, бидејќи многу негови соборци подоцна зазедоа високи позиции во разузнавачките структури на Корпусот, најверојатно со поддршка токму на фамилијата Хамнеи.

Човек од сенка и „чувар на портите“

Откако неговиот татко стана врховен лидер во 1989 година, Моџтаба почна да гради тивко, но огромно влијание. Тој и неговото семејство добија пристап до милијарди долари и деловни средства управувани од иранските фондации, кои се хранат од државни компании и поранешни имоти на шахот.

Иако никогаш немал официјална владина позиција, американските дипломатски депеши објавени од „Викиликс“ уште во 2008 година го опишуваат како „скриена сила“ во режимот. Во овие документи се наведува дека тој дејствувал како „главен чувар“ на пристапот до неговиот татко, па дури и дека ги прислушувал неговите телефонски разговори за да го контролира протокот на информации. Дипломатите тогаш го карактеризираа како „способен и силен менаџер“ кој се подготвува за национално лидерство.

Врски со безбедносниот апарат и меѓународни санкции

Моџтаба Хамнеи е познат по неговата исклучително блиска соработка со паравоените структури. Според извештаите на американското Министерство за финансии, тој работел директно со крилото за операции во странство „Кудс“ и со доброволната милиција „Басиџ“, која беше одговорна за насилното задушување на внатрешните протести.

Поради овие активности, САД му воведоа санкции во 2019 година, со образложение дека ги спроведува дестабилизирачките регионални амбиции и потисничките внатрешни политики на неговиот татко.

Контроверзи околу наследството

Изборот на Моџтаба предизвика внатрешни дебати во Иран, бидејќи критичарите сметаат дека пренесувањето на власта од татко на син ја претвора теократијата во еден вид наследна монархија – токму она против што се бореше Револуцијата во 1979 година.

Сепак, неговиот легитимитет меѓу тврдокорните поддржувачи на режимот е дополнително засилен по неодамнешните трагични настани. Со оглед на тоа што неговиот татко и неговата сопруга беа убиени во воени дејствија, „хардлајнерите“ во Техеран сега го гледаат не само како лидер, туку и како син на маченици во војната против Америка и Израел.

Како нов врховен лидер, Моџтаба Хамнеи сега има апсолутна власт над иранската стратегија, армијата и нуклеарната програма, додека Револуционерната гарда е директно одговорна пред него.

The post СИНОТ НА ХАМНЕИ ПРОГЛАСЕН ЗА НОВ ВРХОВЕН ЛИДЕР НА ИРАН Има апсолутна власт врз армијата и врз нуклеарната програма appeared first on plusinfo.mk.

Американскиот претседател Доналд Трамп изјави дека во заедничките американско-израелски напади во саботата се убиени потенцијални наследници на врховниот лидер на Иран. Неговите коментари, дадени за Еј-Би-Си Њуз (ABC News) доаѓаат во време на неизвесност околу транзицијата на власта во Иран по смртта на ајатолахот Али Хамнеи.

Во разговор со новинарот Џонатан Карл, Трамп тврдеше дека нападот бил исклучително успешен.

– Нападот беше толку успешен што ги елиминираше повеќето кандидати. Нема да биде ниту еден од оние за кои размислувавме бидејќи сите се мртви. Вториот и третиот на листата се мртви – рече тој.

Трамп се осврна и на атентатот врз Хамнеи.

– Јас го средив пред тој да ме докрајчи мене. Тие се обидоа двапати. Па, јас го средив прв – изјави тој.

Да ве потсетиме дека во 2024 година, Министерството за правда на САД објави федерални обвиненија поврзани со спречен заговор чија цел беше да се убие Трамп пред претседателските избори. Според судските документи, иранските власти побарале од еден осомничен, Фархад Шакери, да се обврзе да го надгледува и на крајот да го извршува атентатот врз Трамп.

The post ГО СРЕДИВ, ПРЕД ТОЈ ДА МЕ СРЕДИ МЕНЕ! Трамп вели дека се мртви и повеќето наследници на Хамнеи appeared first on plusinfo.mk.

Иран го именуваше ајатолахот Алиреза Арафи за член на привремениот лидерски совет, кој ќе ја предводи земјата по убиството на врховниот лидер, ајатолахот Али Хамнеи.

– Советот за одредување на интересите на државата го избра ајатолахот Алиреза Арафи за член на привремениот лидерски совет – соопшти портпаролот на советот, Мохсен Дехнави.

Привремениот совет, во кој ќе бидат вклучени претседателот и шефот на судството, ќе ја води земјата додека Собранието на експерти „не избере постојан лидер во најбрз можен рок“.

Алиреза Арафи е влијателна фигура во иранската религиозна хиерархија, познат како директор на Исламските семинарии и член на Советот на чувари, што го прави клучна личност во привремената власт.

The post ИРАН ИМА ПРИВРЕМЕН ЛИДЕР Алиреза Арафи именуван по убиството на Хамнеи appeared first on plusinfo.mk.

Иранскиот министер за надворешни работи, Абас Арагчи, изјавил дека состојбата во земјата „дојде под целосна контрола“. Но, според „Гардијан“ сведоштвата што стигнуваат од земјата откриваат сосема поинаква слика на репресија, крв и на страв.

На повик на претседателот Масуд Пезешкијан, илјадници луѓе денеска излегоа на плоштадот во Техеран за да го поддржат режимот и да им оддадат почит на загинатите безбедносни сили. Претседателот на парламентот, Мохамед Багер Галибаф, изјавил дека Иран води „војна против терористи“ и дека „Трамп ќе научи незаборавна лекција ако нападне Иран“.

„Намерно им пукаа во лице“

Махса, новинарка од Машхад, успеала да испрати порака пред целосниот прекин на интернетот:

– Тие се нафрлаат во толпата со комбиња и велосипеди. Ги видов како намерно пукаат во луѓе во лице. Улиците се полни со крв. Се плашам дека ќе бидам сведок на море од мртви луѓе.

Сведоштва од Техеран потврдуваат дека снајперисти пукаат во толпата. Се појавиле снимки со тела наредени во импровизирани мртовечници. Државната телевизија тврди дека загинатите биле убиени од демонстранти, но независни извори, како организацијата ХРАНА, наведуваат дека најмалку 538 лица се убиени, меѓу нив 490 демонстранти, додека над 10.600 се уапсени.

Is Iran headed for collapse? Protests, arson and Trump’s dire warning to Tehran

Watch: https://t.co/WueLfhqzNb | #IranProtests #Iran #Tehran #AyatollahAliKhamenei #USIran #DonaldTrump pic.twitter.com/Cqtv1zEiu2

— Business Today (@business_today) January 12, 2026

„Почнуваат да го прават тоа“

Неколку часа пред изјавата на Арагчи, Доналд Трамп изјавил дека Иран побарал преговори, но истовремено размислувал за „многу силна“ воена акција.

На прашање од новинарите, Трамп одговорил:

– Изгледа дека почнуваат да го прават тоа – алудирајќи на убиствата на демонстрантите.

Втора фаза од израелската војна?

Потпретседателот на Иран, Мохамад-Реза Ареф, ги нарекол немирите „втора фаза од војната на Израел против иранскиот народ“. Тој изјавил дека владата ги прифаќа „протестите и критиките“, но не и „немирите“.

Според него, „непријателите“ ги саботирале економските реформи и ја дестабилизирале внатрешната сцена.

„Пукаа во невооружени демонстранти“

Сара, бизнисменка од Техеран, сведочи:

– Атмосферата беше мирна, имаше семејства и постари луѓе. Одеднаш дојдоа безбедносните сили и почнаа да пукаат одблиску.

Видео снимките прикажуваат толпи покриени со солзавец, луѓе кои бегаат и викаат „Бесрамно!“. Деветнаесетгодишна студентка изјавила:

– Видов баба како пее „Смрт за Хамнеи“ додека носи чадор. Тоа е симбол на отпорот.

Протестите не стивнуваат

Протестите кои се закана за Исламската република и можност за враќање на друг систем започнаа на 28 декември, официјално поради падот на валутата и економската криза. Сега протести има во повеќе од 100 градови.

Владата не објавила официјални податоци за бројот на жртви, но независните организации предупредуваат дека бројките растат.

Синот на поранешниот шах на Иран, Реза Пахлави, претходно повика да се окупираат централни градски простори и да се задржи притисокот. Веењето на знамето на монархијата со лав и сонце на еден од протестите и поддршката и повиците кон Пахлави ги засилија дебатите околу тоа каква промена бараат демонстрантите.

The post „НАМЕРНО ИМ ПУКААТ ВО ЛИЦЕ“ Контрапротести во Иран, власта тврди дека ја презема контролата appeared first on plusinfo.mk.

Масовните протести се далеку од револуција. Народот во Иран веќе го доживеал ова. Во 2009 година – поради наводна изборна кражба; во 2019 година – поради цените на горивата; во 2022 година – поради злоставувањата на полицијата за морал, пишува Скај њуз Лондон, во својата анализа за последниот развој на настаните во Иран.

Властите го усовршија својот метод: преку бруталноста на Револуционерната гарда и милициите Басиџ, убиства на демонстранти, масовни апсења, јавни погубувања и исклучување на интернетот.

Последната точка е од огромно значење. Тоа значи дека луѓето не знаат дали некој друг излегол на улица. Не можат да се поврзат. Не знаат дали вреди да продолжат да ги изложуваат главите над бедемот по последните две ноќи на протести, кои беа однапред најавени и координирани.

Видеата што ќе ги видат ќе бидат оние на државната телевизија, каде ќе слушнат закани дека ќе се користи смртна казна врз демонстрантите наречени „вандали“ или „терористи“, и каде ќе гледаат провладини толпи, како и контролирани, но сепак злосторнички задушувања.

Тешко е да се одржи темпото на протестите низ сите 31 покраина на Иран, особено кај протест без очигледен лидер (барем внатре во самиот Иран), ако луѓето се ставени во информациски мрак.

Реза Пахлави, син на поранешниот шах, јасно има извесна поддршка на улиците, но тој е во САД и неговите повици за штрајкови и понатамошни протести тешко се пробиваат.

И, секако, исклучувањето на интернетот им овозможува на властите да вршат репресии по сопствен избор, без видливоста што би ја донела поврзаноста на мрежата. Истото се случи во 2019 година, кога беа убиени најмалку 1.500 демонстранти. Сè уште сме далеку од такви бројки, иако поради недостигот на информации, тоа е тешко да се процени.

Единствената пречка режимот да го продолжи овој информативен мрак е бесконечната економската штета што ќе ја нанесе на веќе издишаната економија. Но, има уште многу простор за тоа колку можат да заострат репресиите, а тие не покажуваат никаков знак дека ќе попуштат.

Револуциите би барале поддршка од елита – делови од безбедносниот апарат да одлучат дека повеќе нема смисла да продолжат да му се покоруваат на 86-годишниот врховен лидер. Тоа, исто така, не изгледа дека се случува.

Џокерот е Доналд Трамп. Тој вети дека ќе удри силно по Иран ако режимот отвори оган врз демонстрантите. А тука е и Израел, кој би можел да ја искористи приликата за нов напад. Исламската теократија во Иран е поранлива отколку кога и да било. Но таа самата е родена од револуција, а врховниот лидер ајатолахот Али Хаменеи воопшто не е расположен да покаже слабост.

The post БЕЗ ИНТЕРНЕТ И БЕЗ ТРАМП – НИШТО Анализите покажуваат дека режимот во Иран е далеку од паѓање appeared first on plusinfo.mk.

Врховниот лидер на Иран, ајатолахот Али Хамнеи, изјави дека САД сакаат Техеран „да им биде послушен“, но дека „иранскиот народ ќе се спротивстави на таква тешка навреда“, јавија државните медиуми во неделата, објави Ал Џазира.

– Тие сакаат Иран да биде послушен кон Америка. Иранската нација со сета своја моќ ќе се спротивстави на оние кои имаат такви погрешни очекувања. Луѓето кои нѐ повикуваат да не извикуваме слогани против САД… да имаме директни преговори со САД, гледаат само на изгледите… Ова прашање е нерешливо – рече Хамнеи за време на религиозен настан во неделата.

Според Хамени, Трамп го поттикнал израелскиот премиер Бенјамин Нетанјаху и го поддржал во нападот врз Иран за да се наметнат политички промени, но, како што посочи, и двајцата биле изненадени кога откриле дека Иран се бранел достоинствено.

„Американците и Ционистите сакаат раздор во Иран“

Коментарите на Хамнеи доаѓаат откако Иран и европските сили во петокот се согласија да продолжат разговори за обид за повторно започнување целосни преговори за ограничување на нуклеарното збогатување на Техеран. Франција, Британија и Германија рекоа дека би можеле повторно да активираат санкции на ОН против Иран преку механизмот „снепбек“ ако Техеран не се врати на преговарачката маса. Разговорите се очекува да се одржат во вторник.

Техеран ги прекина нуклеарните преговори со САД откако Вашингтон и Израел ги бомбардираа неговите нуклеарни објекти за време на 12-дневната војна во јуни.

– Патот на непријателот е да создава раздор во Иран – рече Хамнеи, обвинувајќи ги „агентите на Америка и ционистичкиот режим“, алузија на Израел, дека се обидуваат да посеат поделби.

Тој ги повика Иранците да останат обединети за да се спротивстават на она што го опиша како напори на САД да ја потчинат земјата.

Хамнеи тврди дека Иран победил во 12-дневната војна

Врховниот лидер на Иран, кој го има последниот збор за сите стратешки прашања, ретко се појавуваше во јавноста откако Израел нападна нуклеарни цели низ целата земја во јуни. Хамнеи тврди дека Иран победил во кратката војна, иако важни нуклеарни и воени објекти беа оштетени или уништени.

Европските држави, заедно со САД, тврдат дека Иран работи на развој на нуклеарно оружје. Но, Иран постојано нагласува дека неговата нуклеарна програма е за цивилни цели.

Во 2015 година, Иран го потпиша историскиот нуклеарен договор со САД и со европските земји, со кој се согласи да ги намали своите нуклеарни амбиции во замена за укинување на санкциите.

Но, за време на својот прв мандат, американскиот претседател Доналд Трамп се повлече од договорот во 2018 година и повторно воведе санкции како дел од својата политика на „максимален притисок“. Најблискиот регионален сојузник на Вашингтон, Израел, исто така, се спротивстави на договорот со Иран.

12-дневната војна изби во јуни 2025 година, токму кога Техеран и Вашингтон требаше да ја одржат шестата рунда разговори за иранската нуклеарна програма. Преговорите, што започнаа неколку недели претходно, беа прекинати поради конфликтот.

Односите меѓу Техеран и Вашингтон беа прекинати по Исламската револуција во 1979 година кога беше соборена прозападната влада на шахот Мохамед Реза Пахлави.

The post „АМЕРИКАНЦИТЕ И ЦИОНИСТИТЕ САКААТ ИРАН ДА КОЛЕНИЧИ, Е НЕ МОЖЕ“ Тешко дека Техеран ќе преговара со САД, вели Хамнеи appeared first on plusinfo.mk.

Американскиот претседател Доналд Трамп денес беше особено вознемирен од изјавата на врховниот лидер на Исламската Република Иран, ајатолахот Али Хамнеи, кога во видео порака рече дека Техеран, покрај тоа што го победил Израел, постигнал и „победа над режимот на Соединетите Американски Држави“. Трамп даде изјава на социјалната мрежа „Truth“.

Како што истакна на самиот почеток, „изјавата на ајатолахот Али Хамнеи е глупава и лажна“.

– Зошто таканаречениот „Врховен лидер“, ајатолахот Али Хамнеи, од земјата разорена од војна Иран, толку отворено и глупаво би изјавил дека ја добил војната со Израел, кога знае дека оваа изјава е лага, бидејќи едноставно не е вистина? Како човек со голема вера, тој не треба да лаже. Неговата земја беше уништена, неговите три злобни нуклеарни постројки беа уништени, а јас точно знаев каде се криеше, и не дозволив Израел, ниту вооружените сили на САД, убедливо најголемите и најмоќните во светот, да му го одземат животот. Го спасив од многу грда и срамна смрт, и не мора да каже: Ви благодарам претседателе Трамп – напиша американскиот претседател.

Трамп додаде дека барал Израел да врати голема група авиони кои се упатувале директно кон Техеран.

– Тие чекале „голем ден“, можеби дури и конечен нокаут! Ќе има огромна штета, а многу Иранци ќе бидат убиени. Тоа требаше да биде најголемиот напад во војната, далеку подобар од сите претходни. Во текот на изминатите неколку дена работев на евентуалното укинување на санкциите и други работи што би му дале на Иран многу поголема шанса за целосно, брзо и темелно закрепнување, санкциите побрзајте! Но, не, наместо тоа добив изјава полна со гнев, омраза и гадење, и веднаш ја прекинав целата работа за ублажување на санкциите и останатото – нагласи американскиот претседател.

Според него, Иран мора повторно да се приклучи на текот на светскиот поредок, во спротивно само ќе им биде полошо.

– Тие секогаш се толку лути, непријателски настроени и незадоволни и погледнете каде ги одвело тоа: изгорена, разурната земја без иднина, уништена армија, ужасна економија и смрт околу нив. Тие немаат надеж, а само ќе биде полошо! Жалам што иранското раководство би разбрало дека повеќе често се постигнува со мед отколку со оцет. Мир! – заклучи Трамп.

ХАМНЕИ СЕ ВРАТИ СО ЗАКАНИ Шлаканица за САД и за Израел во првиот говор на ајатолахот

The post „ГО СПАСИВ ОД МНОГУ ГРДА И СРАМНА СМРТ“ Изјавата на ајaтолахот Хамнеи многу го налути Трамп appeared first on plusinfo.mk.

Израел имал планови да го убие врховниот лидер на Иран, ајатолахот Али Хамнеи, за време на неодамнешната 12-дневна војна, но вистинскиот момент никогаш не дошол, изјави министерот за одбрана на Израел Бени Кац во интервју, пренесува Хиндустани тајмс.

Кац во текот на 12-дневниот конфликт на социјалните мрежи отворено му се закани на Хамнеи дека ќе го убие. Во гостувањето на телевизија Кац ги потврди овие намери на владата во Тел Авив.

– Проценувам дека ако Хамнеи беше на нишан, ќе го елиминиравме. Но, Хамнеи го разбра ова, отиде во илегала во многу големи длабочини и ги прекина контактите со командантите кои ги заменија тие команданти кои беа елиминирани, па затоа на крајот не беше реално – изјави министерот.

Претседателот на САД Доналд Трамп, исто така, му се закани на Хамнеи по животот за време на војната на 17 јуни:

„Знаеме точно каде се крие таканаречениот „Врховен лидер“. Тој е лесна цел, но е безбеден таму – Нема да го извадиме (Убиеме!), барем не засега“, напиша Трамп на својата социјална мрежа TruthSocial.

.Хамнеи стана главна цел на Израел минатата недела откако иранска ракета погоди болница во Бершеба, повредувајќи околу 80 лица и уништувајќи неколку делови од објектот.

По тој напад, Кац предупреди дека „Хамнеи ќе плати за своите злосторства“ и рече дека идните операции ќе ги „тресат“ темелите на иранскиот режим, како што е цитирано во извештајот на „Њујорк пост“.

Ајатолахот исчезна од очите на јавноста цели седум дена, откако започнаа израелските воздушни напади на 13 јуни. Тој повторно се појави во четврток со смели тврдења дека Иран победил и против Израел и против САД.

– Исламската Република победи и, како одмазда, ѝ зададе шлаканица на Америка – рече Хамнеи, и покрај сериозната штета нанесена на војската и инфраструктурата на Иран.

Тој, исто така, ги отфрли извештаите од САД и Обединетите Нации дека бил успешен нападот врз трите клучни ирански нуклеарни постројки.

Кратката војна меѓу Израел и Иран заврши со посредство на САД и Катар и начелен договор за примирје меѓу двете страни.

Интересно е што и двете страни прогласија победа во војната.

По конфликтот, останува нејасно дали Иран ќе седне на преговарачката маса со САД во врска со нуклеарниот договор кој предвидува забрана на развивање оружје за масовно уништување.

Исто така, нејасно е во колкав дел американскиот напад ги оштети постројките длабоко под земја каде Иран го чуваше збогатениот ураниум потребен за создавање на нуклеарното оружје.

The post БАРАЛЕ ПОГОДЕН МОМЕНТ ДА ГО ЛИКВИДИРААТ АЈАТОЛАХОТ Шокантно признание од израелскиот министер за одбрана appeared first on plusinfo.mk.

Врховниот лидер на Иран, ајатолахот Али Хамнеи, даде изјава на социјалните мрежи откако го немаше цела недела. Неговата појавување во јавноста доаѓа по загриженоста дека тој бил префрлен на непозната локација кога избувна војната со Израел која траеше 12 дена.

Ајатолахот напиша на Икс дека мора да му честита на својот Иран и тврдеше дека „Соединетите Американски Држави влегоа во војната затоа што веруваа дека ако не го сторат тоа, Израел ќе биде целосно уништен“.

„Чувствувам потреба да испратам неколку честитки до големата нација Иран. Прво, честитки за победата над лажниот ционистички режим. И покрај целата негова пропаганда и сите негови тврдења, ционистичкиот режим речиси се распадна и беше уништен под ударите на Исламската Република“, изјави Хамнеи во својата прва објава.

По ова следеше втора честитка во која тој „ѝ честита на саканата земја Иран за победата над американскиот режим“.

„Американскиот режим влезе во директна војна затоа што веруваше дека ако не го стори тоа, ционистичкиот режим ќе биде целосно уништен. Но, не доби ништо од таа војна. И тука, Исламската Република победи, а за возврат ѝ зададе силен шлаканик на Америка“, пишува ајатолахот.

Запрашан за отсуството на Хамнеи во последните денови, неговиот близок помошник и раководител на архивата на Врховниот лидер, Мехди Фазели, рече дека „луѓето одговорни за безбедноста на Врховниот лидер добро си ја вршат работата“, додавајќи дека „со Божја волја, народот наскоро ќе ја прослави победата заедно со својот лидер“.

The post АЈАТОЛАХОТ СЕ ЈАВИ ПО 7 ДЕНА, ПРОГЛАСИ ПОБЕДА Хамнеи ги прозва владите во Тел Авив и во Вашингтон appeared first on plusinfo.mk.