Гувернерот на Народната банка Трајко Славески изразува загриженост поради најавеното зголемување на надоместоците во платниот промет од страна на неколку банки во земјата, оценувајќи дека во моментот не постојат оправдани причини за ваков потег.

– Народната банка е непријатно изненадена од одлуката на дел од банките да ги зголемат надоместоците што ги плаќаат граѓаните и компаниите за услугите во платниот промет. Особено загрижува фактот што во повеќето случаи станува збор за двоцифрени процентуални зголемувања- вели гувернерот Славески.

Тој потсетува дека минатата година, на иницијатива на Народната банка и во соработка со банкарскиот сектор преку Македонската банкарска асоцијација, биле направени напори за намалување на одредени надоместоци, што дало позитивни резултати за корисниците на банкарските услуги.

– Сега сме сведоци на обратен процес за кој не гледаме економска оправданост. Ги повикувам банките кои најавија зголемување на провизиите во најкус можен рок да ги преиспитаат своите одлуки и да се откажат од најавените поскапувања- нагласи гувернерот.

Воедно, тој посочува дека Комисијата за заштита на конкуренцијата треба внимателно да ги следи случувањата во банкарскиот сектор и да оцени дали ваквото однесување упатува на координирано дејствување што би можело да биде на штета на клиентите.

Осврнувајќи се на можностите за институционален одговор, Славески истакнува дека Министерството за финансии и Народната банка треба да разгледаат подготовка на измени во законската рамка, по примерот на повеќе европски и други земји, со кои би се овозможило регулирање на висината на надоместоците што банките ги наплаќаат за услугите во платниот промет.

Притоа, тој појаснува дека Народната банка во моментов нема законска надлежност директно да ги регулира провизиите што ги наплаќаат банките.

– Иако во јавноста често постои перцепција дека Народната банка може да интервенира во висината на банкарските провизии, постојната законска рамка не предвидува таква можност. Регулирањето е оставено на пазарните механизми и конкуренцијата, но актуелните случувања укажуваат на потребата од преиспитување на овој пристап- вели Славески.

Според него, потребата од евентуално законско регулирање произлегува од фактот што платниот промет претставува услуга од јавен интерес, неопходна за секојдневното функционирање на граѓаните и компаниите.

– Платниот промет има карактеристики на услуга од јавна корист, слично како снабдувањето со електрична енергија, вода или природен гас, што дополнително ја отвора дебатата за соодветен модел на регулирање на надоместоците во оваа област- додава Славески.

The post НЕКОИ БАНКИ НЕОПРАВДАНО ГИ ЗГОЛЕМИЈА ПРОВИЗИИТЕ Славески ги повика да ги преиспитаат одлуките appeared first on plusinfo.mk.

Претседателката Гордана Сиљановска-Давкова денеска во изјава за медиумите не го откри името на кандидатот што ќе го предложи за иден гувернер. Таа рече дека веќе знае кој ќе биде предлогот за иден гувернер на Народната банка.

– Не го кажувам прво името пред новинарите, се надевам дека не се лутите, но веќе мислам дека знам. Со право се создаде дебата и прашања, но сепак мислам дека е нешто што треба да се практикува за секоја функција – да седнете со сите кои се споменуваат и да разговарате. Да ги прашате што мислат за другите или што мисли дека тој ќе направи, а не е направено…Уште повеќе би сакала да има повеќе кандидати, но, тоа не е можно секогаш – изјави Сиљановска-Давкова.

Таа рече дека е важно и кој ќе биде заменик-гувернер за НБРМ.

-Тие треба да соработуваат, тоа е систем за макроекономската стабилност. Да бидам искрена, ако ги оценуваме кандидатите, тие со кои разговарав, низ призма на експертско знаење – немам проблем. Сме имале среќа во оваа држава, одлично сме се однесувале кон оваа функција. Во среда веќе ќе знам (н.з. за тоа кој ќе биде предлог). Јас во меѓувреме консултирав и експерти од областа, луѓе кои се врвни, па дури и кои биле на функцијата -рече таа.

Сиљановска-Давкова требаше вчера да го достави предлогот до Собранието, но, од нејзиниот Кабинет, информираа дека ќе направи дополнителни анализи по што предлогот ќе го достави до Парламентот.

Тројца најсериозни кандидати се споменуваат актуелната гувернерка Анита Ангеловска-Бежоска, професорот на Економскиот факултет Трајко Славески и поранешниот министер за финансии Зоран Ставрески.

Мандатот на актуелната гувернерка завршува утре.

ЌЕ РАЗМИСЛИ УШТЕ НЕКОЈ ДЕН КОГО ДА ПРЕДЛОЖИ ЗА ГУВЕРНЕР Сиљановска Давкова денеска нема да даде предлог за нов шеф на Народната банка

The post УТРЕ ЌЕ СЕ ЗНАЕ КОГО ЌЕ ПРЕДЛОЖИ ЗА ГУВЕРНЕР За Сиљановска Давкова важно е и кој ќе биде заменик гувернер appeared first on plusinfo.mk.

Премиерот Христијан Мицкоски најави дека до крајот на неделата ќе има јасна позиција кој ќе добие поддршка за нов гувернер на Народната банка и оти изборот ќе биде на пленарна седница во Собранието на 20 мај. Еден од условите за поддршката од ВМРО-ДПМНЕ  и Владата, како што изјави денеска, е стриктно бранење на фиксниот курс на денарот.

Петгодишниот мандат на актуелната гувернерка Анита Ангеловска Бежоска која стапи на функцијата на 22 мај 2018 година, истекува на 21 мај, а Мицкоски уверува дека рокот ќе биде испочитуван.

– Веќе имавме разговори со претседателката на оваа тема, очекувам да ги продолжиме, до крајот на неделата ќе биде јасна позицијата. Очекувам в понеделник да биде информирано Собранието, на 20-ти ќе има седница, разговарав со претседателот на Собранието за дополнување  на дневниот ред на 20, така што рокот ќе биде испочитуван – рече Мицкоски, на новинарско прашање, по присуство на настан во општина Аеродром.

Мицкоски посочи дека не е важно кој е негов фаворит, нагласувајќи дека сите кандидати се вонсериски искусни и оти е убеден дека ќе ја одржат макроеконоската стабилност.

Во медиумите деновиве се вртат имињата на сегашната гувернерка Анита Ангеловска Бежоска, поранешните министри за финансии Зоран Ставрески и Трајко Славески  како и поранешната вицегувернерка  Маја Кадиевска-Војновиќ.

Претседателот на државата го предлага гувернерот на Народна банка.

Според Законот за Народна банка, мандатот на гувернерот трае 7 години со право на еден реизбор.

Доколку не се избере нов гувернер во Собранието, за што треба 61 глас, функцијата продолжува да ја врши актуелниот, сè додека не се назначи негов наследник.

The post МИЦКОСКИ НЕ ОТКРИВА КОЈ Е НЕГОВ ФАВОРИТ ЗА ГУВЕРНЕР НА НАРОДНА БАНКА Но од идниот гувернер бара само фиксен курс на денарот appeared first on plusinfo.mk.