Нејзиниот подем започна на Тик-Ток каде што уште како студентка објавувала снимки од своето пеење. Првично не планирала да стане изведувачка. Стела студирала јавно здравство на Универзитетот Тулејн и долго време сакала да пишува песни за други пејачи. Како дете свирела гитара, но имала голема трема од настапување пред публика.

Пресвртот се случил откако се преселила во Лос Анџелес и почнала посериозно да се занимава со музика. Нејзината песна „Thinking ‘Bout You“ прво привлече внимание на Тик-Ток, а потоа дојде „Boston“. Стела раскажала дека рефренот го напишала додека чекала да дојде музичарот Винсент Мејсон, кој денес ѝ е момче. Седнала на пијано, го напишала рефренот за само неколку минути, го снимила со телефонот и го објавила на Тик-Ток. Следното утро сфатила дека луѓето масовно реагираат на песната.

„Boston“ потоа стана огромен хит. Песната стигна до второто место на Billboard Hot 100 и има собрано стотици милиони слушања на Spotify. Нејзиниот дебитантски албум „Long Way Home“ беше објавен на 21 август, а нејзината прва соло турнеја беше распродадена за помалку од пет дена.

Но, со успехот дојдоа и контроверзии. Слушателите веднаш забележаа сличност меѓу „Boston“ и „Stick Season“ на Ноа Кахан. Дополнително внимание привлече фактот што Стела претходно објавувала повеќе снимки на Тик-Ток на кои ја пее токму песната на Кахан. Иако таа тврди дека додека го пишувала „Boston“ воопшто не размислувала на Кахан, неговиот тим стапил во контакт со неа, по што Кахан добил авторски кредит за песната.

Критиките се проширија и на други песни од нејзиниот дебитантски албум. „Summer You Were Mine“ содржи елементи од песната „There’s Your Trouble“ на The Chicks, а авторите на оригиналната песна се наведени во кредитите. Деновиве слушателите почнаа да забележуваат сличности и меѓу „Why Wouldn’t We“ и хитот на Блејк Шелтон од 2017 година „I’ll Name the Dogs“. За оваа последна споредба засега нема информација дека е постигнат договор или дека Шелтон добил авторски кредит.

Покрај музиката, голема тема во приказната за Стела е и нејзиното семејно богатство. Таа е ќерка на Ерик Лефковски, милијардер и коосновач на Groupon, кој денес е извршен директор на биотехнолошката компанија Tempus AI. Business Insider, повикувајќи се на Forbes, неговото богатство го проценува на околу 5,4 милијарди долари. Токму поради тоа на интернет почнаа да ја нарекуваат непо бебе, односно лице кое полесно напредува благодарение на семејните врски и привилегии.

Стела не крие дека растела во големо богатство и признава дека финансиската сигурност ѝ овозможила нешто што многу млади музичари го немаат – време да се обидува и да ризикува без страв од финансиски неуспех. Сепак, таа нагласува дека нејзините родители не се од музичкиот или филмскиот свет и дека не наследила контакти во забавната индустрија. Нејзиниот татко, пак, имал големо влијание врз нејзиниот музички вкус, бидејќи во автомобилот и дома постојано слушале кантри музика.

Интересно е што нејзината приказна воопшто не започнала како типичен пат кон музичката сцена. Како тинејџерка се соочила со тешки семејни загуби – кога имала 13 години, нејзината мајка добила рак, а неколку години подоцна од истата болест починала и нејзината најдобра пријателка од средно училиште. Тоа искуство дополнително ја поттикнало да пишува песни, но во тоа време таа повеќе размислувала за кариера во јавното здравство.

Денес Стела е една од најбрзо растечките нови имиња на американската поп-кантри музика. Нејзиниот успех неодамна беше проследен и со критики по настапот во Grand Ole Opry, по што во нејзина одбрана јавно застана кантри-пејачката Келси Балерини. Таа порача дека кантри музиката отсекогаш била отворена за различни гласови и различни животни приказни.

Во меѓувреме, странските медиуми забележуваат еден необичен парадокс: критиките за богатството на нејзиното семејство и обвинувањата за сличностите со други песни истовремено ја прават уште поприсутна во јавноста. Business Insider оценува дека во време кога секојдневно се објавуваат огромен број нови песни, контроверзите околу еден изведувач може дополнително да ја зголеми љубопитноста на публиката.