Сообраќајот на државните патишта низ земјава утринава се одвива непречено, но по влажни коловози, информираат од Авто-мото сојуз на Македонија.

Интензитетот на сообраќајот надвор од градските средини е умерен, а на граничните премини, од македонска страна, засега нема подолги задржувања за влез и излез од државата.

Од АМСМ апелираат возачите да ја прилагодат брзината на условите на патот и да ја почитуваат сообраќајната сигнализација. Посебна внимателност се препорачува на делници каде има можност од појава на одрони, особено низ котлините, речните долини и клисурите.

Како ризични се посочуваат патните правци Катланово – Велес, Маврово – Дебар – Струга, Виница – Берово и Кочани – Делчево.

The post ПАТИШТАТА ПРООДНИ, НО ЛИЗГАВИ Возете внимателно, постои ризик од одрони, предупредува АМСМ appeared first on plusinfo.mk.

Од почетокот на етапното воведување на новиот систем за гранична контрола во Европската Унија (ЕЕС) лани во октомври на над 27.000 лица им бил одбиен влез, соопшти денеска Европската комисија. Меѓу лицата на кои им е забранет влезот, околу 700 претставувале директна закана за безбедноста.

„Од почетокот на примената на ЕЕС регистрирани се над 52 милиони влегувања и излегувања. Комисијата го поздравува денешното целосно воведување на овој нов систем за влез во ЕУ и излез од блокот“, се наведува во соопштението.

Благодарение на новата автоматизирана контрола, регистрирањето на еден патник трае во просек 70 секунди, што значително ја забрзува процедурата, се наведува во соопштението.

Системот, се додава, ги заменува рачните печати и овозможува евиденција на личните и биометриските податоци, со цел полесно следење на пречекорувањата на престојот. Новите правила се однесуваат на државјани на трети земји кои не се членки на ЕУ или на Шенген-зоната (Исланд, Лихтенштајн, Норвешка и Швајцарија), а се применуваат за краткорочен престој до 90 дена.

Иако на почетокот на годината секторот за воздушен транспорт изрази незадоволство поради одложувањата, ЕК денеска потврди дека системот е успешно имплементиран на сите гранични премини на надворешните граници на ЕУ.

The post НАД 27.000 ЛИЦА СЕ ОДБИЕНИ ЗА ВЛЕЗ ВО ЕУ ПРЕКУ НОВИОТ СИСТЕМ ЕЕС Регистрирањето на еден патник трае во просек 70 секунди, тврди Европската комисија appeared first on plusinfo.mk.

Системот за влез во Европската Унија (ЕЕС – Entry/Exit System) од денеска треба да стане целосно оперативен и да ги регистрира сите странски државјани што ќе ги преминуваат надворешните граница на ЕУ преку кој било копнен премин, пристаниште или аеродром.

Со системот што почна да се применува делумно од 12 октомври лани, на надворешните граници на Европската Унија се воведува нов, дигитализиран начин на евиденција и контрола на државјаните што патуваат за краткорочен престој, а се од држави што не се членки на ЕУ.

Со денешното целосно воведување на ЕЕС системот, влезовите и излезите ќе се евидентираат електронски, а системот ќе овозможи обработка на основни биометриски податоци – отпечатоци од прсти и фотографија. Целта е побрза идентификација и поефикасно следење на дозволениот престој во согласност со правилото 90 дена во период од 180 дена.

Со новата мерка времето на задржување на граничните премини за влез во ЕУ ќе се зголеми.

Според Министерството за внатрешни работи, од страна на Граничната полиција на Македонија се преземени сите потребни мерки и активности, односно ставени се во функција сите расположливи материјално-технички и човечки ресурси, со цел да се обезбеди брз и непречен проток на патници на македонските гранични премини.

„Граничната полиција ќе постапува со засилена ангажираност на терен, континуирано ќе ја следи состојбата, ќе презема соодветни мерки за одржување на проточноста на сообраќајот и ќе ги информира граѓаните за сите важни информации поврзани со примената на системот“, информираа од МВР.

Со оглед дека новиот електронски систем на ЕУ – ЕЕС, беше во функција на влезните гранични премини во Шенген зоната и претходно, голем број од професионалните возачи се регистрирани во него. Според претседателката на Асоцијацијата на превозници „Макамтранс“ Билјана Муратовска, не се очекуваат зголемени застои и тесни грла на граничните премини за товарниот сообраќај од вообичаените, што не е случај со превозот на патници и патничките возила.

– Насоките за професионалните возачи, но и за вработените во превозните трговски друштва е редовно следење и броење на денови на престој во последните 180 дена, со правилно организирање на соодветна динамика за безбедно користење на превозните средства, со цел да не се појават проблеми и застој на територија на Шенген зоната – вели Муратовска.

Таа појаснува дека од 10 април ќе почне комбинирано броење на денови за престој особено за професионалните возачи. Тоа значи дека сè до истекување на 180 дена (10 октомври) ќе се користат податоците од електронскиот систем, но ќе се бројат и печатите евидентирани во патните исправи, сè додека не се овозможи добивање на работни визи од одредени држави со кои ќе се надминат проблемите до дефинитивно усвојување на новата Визна стратегија, каде возачите се признаени како професионалци.

The post СЕ ОЧЕКУВА МЕТЕЖ И ЗАСТОЈ НА ГРАНИЧНИТЕ ПРЕМИНИ Почнува целосната примена на ЕЕС системот за влез ЕУ appeared first on plusinfo.mk.

Бугарските превозници се жалат дека претрпуваат големи финансиски загуби поради блокадите што ги вршат превозниците од Србија, Босна и Херцеговина, Црна Гора и Северна Македонија протестираа поради проблемите со новиот систем за влез и излез од ЕУ. Транспортерите од Бугарија поради блокадите мораат да користат алтернативни патишта до европските дестинации, кои минуваат низ Романија, што го продолжува нивното растојание за 500-600 км, пишуваат бугарски медиуми.

Превозниците од Србија, Босна и Херцеговина, Црна Гора и Северна Македонија протестираа поради проблемите со новиот систем за влез и излез од ЕУ и економските загуби што произлегуваат од тоа за превозниците поради ограничувањето на престојот на територијата на земјите-членки на 90 дена во рок од 180 дена, објавија „Нова“ и „БНТ“.

Вчера, премините со Србија беа блокирани за тешки товарни возила во двата правци. Денес, по полноќ, сообраќајот беше ограничен за возила над 3,5 тони на нашите гранични премини со Северна Македонија „Врашка Чука“, „Брегово“, „Стрезимировци“, „Ѓуешево“, „Делчево“ и „Златарево“, пишуваат бугарските медиуми.

На заедничката граница меѓу Бугарија и Северна Македонија, блокадата ги опфаќа сите соседни гранични премини – Деве Баир – Ѓуешево, Делчево – Станке Лисичково и Ново Село – Златарево, на територијата на Република Северна Македонија. Бугарските возачи што минуваат се навремено известени за ограничувањата и опциите за чекање, со цел да се спречат метежи и тензии, пишуваат бугарските медиуми.

Протестот е планиран за 7 дена, но може да заврши порано доколку се одржи состанок со претставници на здруженијата и Европската комисија.

Во бугарските медиуми се пренесуваат ставови на транспортни здруженија дека ситуацијата е „економски неодржлива“ за компаниите, а се најавуваат и разговори меѓу претставници на транспортниот сектор и бугарските институции за координација на мерките и евентуален заеднички настап кон Европската комисија, со цел да се ублажат последиците од новиот систем за влез и излез во ЕУ.

Дополнително, бугарското Министерство за надворешни работи преку медиумите соопшти дека внимателно ја следи состојбата и дека, доколку ситуацијата ескалира, Бугарија ќе ги искористи дипломатските канали и контактите со Европската комисија за да се олесни режимот и да се најде решение за проблемите со новиот систем за влез и излез во ЕУ и примената на правилото 90/180 дена.

The post БУГАРСКИТЕ ПРЕВОЗНИЦИ СЕ ЖАЛАТ НА БЛОКАДИТЕ Трпат загуби, возат по 500-600 километри повеќе appeared first on plusinfo.mk.

Прекин на товарниот сообраќај на граничните премини во државата најавен е за денеска од 12.00 часот, поради јавен протест организиран од асоцијацијата „Макам-транс“, информира Министерството за внатрешни работи.

Протестот  ќе се одвива на граничните премин Деве Баир, Делчево, Ново Село, Дојран, Богородица, Меџитлија, Ќафасан, Блаце и Блато, при што ќе бидат затворени коловозните ленти и терминалите наменети за товарен сообраќај.

Патничкиот сообраќај, како што велат од МВР, ќе се одвива непречено на сите гранични премини.

Според најавата на организаторот, протестот е предвидено да трае до 7 дена, со можност да биде прекинат и порано, доколку во меѓувреме дојде до надминување на причините поради кои е организиран.

Од МВР посочуваат дека ќе преземат соодветни мерки за одржување на јавниот ред и мир и за обезбедување безбеден и непречен сообраќај, со посебен акцент на движењето на патничките возила, автобусите и возилата кои превезуваат лекови, жива стока, опасни материи и други приоритетни пратки.

МВР апелира граѓаните и превозниците навремено да се информираат за состојбата на граничните премини, да ја следат официјалната комуникација и, доколку е потребно, да користат алтернативни гранични премини.

The post КАКО ЌЕ СЕ МИНУВА ГРАНИЦА ДОДЕКА ТРААТ БЛОКАДИТЕ? Полицијата даде појаснување за граѓаните и за бизнисите appeared first on plusinfo.mk.

Од утре напладне камионџиите организирани преку здружението „Макам-транс“ излегуваат на протест, со целосна блокада на граничните премини за товарен сообраќај.

Како што најавуваат организаторите, ќе бидат блокирани терминалите и сообраќајните ленти за камиони на граничните премини Деве Баир, Делчево, Ново Село, Дојран, Богородица, Меџитлија, Ќафасан, Блаце и Блато. Протестот е планиран да трае до седум дена, но може да заврши и порано доколку се најде решение за проблемот.

Билјана Муратовска, генерален секретар на Асоцијацијата на здруженијата на работодавачите на превозните трговски друштва на Република Македонија, „Макам-транс“, изјави дека се свесни за последиците од блокадата, но истакнува дека ако се реализираат нивните барања, придобивките ќе бидат огромни во однос на раст и развој на економијата во државата и во Западен Балкан.

Муратовска вели дека засега нема никакви сигнали од Европската комисија за какви било преговори во однос на решавање на проблемот со евиденција на престој во шенген-зоната во согласност со правилото 90/180 дена за професионалните возачи.

– Доколку до понеделник не се добие каква било информација од ЕУ, протестот во сите четири држави ќе почне точно во 12 часот за сите возила што излегуваат од државата, а за сите возила што ќе влегуваат во државата граничните премини се затвораат во 00.00 часот со цел сите што се враќаат дома да може да влезат и да му се приклучат на протестот – изјави Муратовска.

Главното барање на превозниците е да се најде решение за престојот на возачите во шенген-зоната, како што појаснува Муратовска, да не се евидентираат денови или да ни издаваат некој вид визи што не се лимитирани со број на денови.

– Новите правила ќе значат целосен колапс на економијата во државата, односно во целиот регион на Западен Балкан, вклучувајќи ја и Турција (држави што не се членки на ЕУ и на шенген-зоната), поради прекин на синџирот на снабдување. А транспортната индустрија во која има вложен огромен капитал и обезбедува прилив на ефективни странски пари во буџетот ќе биде целосно разнишана – укажува Муратовска.

Протестот, истакнува, почнува на 26 јануари, а според реакцијата на ЕУ, ќе зависи дали ќе почне или ќе трае кратко, но сепак максимално траење на блокадите ќе биде 7 дена, што е синоним за еден просечен циклус на превоз на стока.

– Во земјава се затвораат за товарен сообраќај граничните премини: Деве Баир, Делчево, Ново Село, Дојран, Богородица, Меџитлија, Ќафасан, Блато и Блаце, а Табановце – Прешево ќе биде затворен од српската страна. Со оваа блокада свесни сме дека ќе има одредени минимални финансиски загуби за сите, но сепак придобивките од ова, ако се реализираат нашите барања, ќе бидат огромни во однос на раст и развој на економијата во државата и во Западен Балкан – вели Муратовска.

Причина за протестот е новиот систем за влез и излез што го воведе Европската Унија, според кој возачите на камиони се евидентираат како туристи. Иако тие само транзитираат низ земјите од Шенген-зоната за да достават стока, честите преминувања на границите значат брзо трошење на дозволените 90 дена престој, по што им се оневозможува да продолжат со работа.

Протестот се одржува во координација со транспортерите од Србија, Босна и Херцеговина и Црна Гора, кои исто така најавија блокади на граничните премини кон Шенген-зоната.

Од Владата за Сител велат дека се во постојана комуникација со Брисел и дека активно се работи на изнаоѓање решение што ќе овозможи нормално функционирање на транспортот и непречен проток на стоки.

– Преку дијалог со Европската Унија, партнерските земји и превозниците се бара итно решение за надминување на проблемот – велат од Владата.

Во однос на економските последици, од Владата предупредуваат дека најпогодени ќе бидат извозно ориентираните компании, како и фирмите што работат во Технолошко-индустриските развојни зони, кои остваруваат целосен девизен прилив.

– Секое блокирање на транспортот значи директен удар врз економската активност. Прекините во испораките можат да предизвикаат сериозни штети и за домашните компании и за странските инвеститори – посочуваат од Владата.

Сепак, како што информираат од Министерството за внатрешни работи, додека трае протестот нема да има прекин, односно блокада на движењето на патничките возила, автобусите и возилата кои превезуваат лекови, жива стока, опасни материи и други приоритетни пратки.

– Протестот е предвидено да трае седум дена, со можност да биде прекинат и порано, доколко во меѓувреме дојде до надминување на причините поради кои е организиран. Министерството за внатрешни работи во согласност со своите законски надлежности, ќе преземе соодветни мерки и активности за одржрување на јавниот ред и мир, како и за обезбедување безбеден и непречен сообраќај, со посебен акцент на движењето на патничките возила, автобусите и возилата кои превезуваат лекови, жива стока, опасни метрии и други приоритетни партки – велат од МВР за ТВ Сител.

Во Македонија има околу 2.700 превозници за меѓународен транспорт, а најголемиот дел од увозот и извозот се одвива по копнен пат, што дополнително ја зголемува сериозноста на најавените блокади.

The post МАКЕДОНИЈА ПРЕД ТРАНСПОРТЕН ХАОС Камионџиите од утре ќе блокираат 9 гранични премини, бараат итно решение од Брисел appeared first on plusinfo.mk.

Сообраќајот на државните патишта во земјава се одвива непречено, по претежно влажни коловози. Од АМСМ информираат дека сите патни правци се проодни и безбедни за сообраќај, но поради врнежите од снег се препорачува зголемено внимание при возење.

Екипите на ЈП „Македонија пат“ се целосно екипирани и со расположлива механизација и работна сила континуирано работат на расчистување на снегот. Во координација со ЈП за државни патишта и Министерството за транспорт се спроведуваат активности со цел да се обезбеди непречено и безбедно одвивање на сообраќајот.

Надлежните апелираат возачите да управуваат внимателно и совесно, задолжително да користат зимска опрема, да ја почитуваат сообраќајната сигнализација и да ја прилагодат брзината според условите на патот.

Од АМСМ потсетуваат дека од 15 ноември 2025 година е на сила законската обврска за задолжително поседување зимска опрема во возилата, без оглед на моменталните временски услови. Оваа обврска важи до 15 март 2026 година.

Интензитетот на сообраќај надвор од градските средини е умерен. На граничните премини од македонска страна, засега нема подолги задржувања за влез и излез од државата.

Посебна внимателност се препорачува на патиштата низ котлини, речни долини и клисури, каде што постои можност од појава на одрони, особено на делниците Катланово – Велес, Маврово – Дебар – Струга, Виница – Берово и Кочани – Делчево.

Од АМСМ информираат и дека патниот правец Охрид – Ресен преку Националниот парк Галичица е затворен за сообраќај за сите видови возила во периодот од 21 ноември 2025 до 31 март 2026 година.

The post СООБРАЌАЈОТ СЕ ОДВИВА НЕПРЕЧЕНО Влажни коловози и апел за внимателно возење appeared first on plusinfo.mk.

Грчкиот министер за заштита на граѓаните, Михалис Хрисохоидис, упати јасно предупредување дека Владата повеќе нема да дозволи блокирање на царинските служби на граничните премини. Во изјава за грчките медиуми, тој нагласи дека блокадите на земјоделците предизвикуваат сериозни последици по државната економија.

Хрисохоидис истакна дека државата покажала голема толеранција во изминатите 40 дена, но дека ситуацијата со стотиците илјади тони производи кои не можат да поминат е неодржлива.

– Нема шанси повторно да се затвори царинска служба и тоа го нагласувам јасно. Тоа се влезовите на земјата, имаме огромни проблеми, нè пријавуваат другите земји во Европската Унија, но не е само тоа, главно е дека се попречува функционирањето на економијата, се попречува работењето на бизнисите кои бараат снабдување со производи, со суровини, гориво и слично. Ова не може да продолжи. Обесштетувањата што ќе се побараат ќе бидат огромни – изјави Хрисохоидис.

Протестите на земјоделците започнаа кон крајот на ноември и ги зафатија граничните премини кон Македонија, Бугарија и Турција. Иако тракторите остануваат на патиштата, земјоделците веќе формираа делегација која треба да се сретне со премиерот Киријакос Мицотакис за да се најде решение за нивните барања.

The post НЕМА ПОВЕЌЕ БЛОКАДИ НА ГРАНИЦИТЕ, ВЕЛИ ГРЧКИ МИНИСТЕР „Ги толериравме земјоделците во последните 40 дена“ appeared first on plusinfo.mk.

Сообраќајот на државните патишта во земјава се одвива во зимски услови, по претежно влажни коловози, а сите патни правци во моментов се проодни.

Како што информираат од ЈП „Македонијапат“, на одредени делници кои минуваат низ усеци и клисури постои можност за појава на поситни одрони, поради што се препорачува зголемена внимателност.

Од јавното претпријатие апелираат возачите да управуваат внимателно со возилата, да ја почитуваат поставената сообраќајна сигнализација и брзината да ја прилагодат според условите на патот.

Од Автомото сојузот на Македонија (АМСМ) информираат дека граничниот премин Евзони (Богородица) е отворен за сообраќај за сите видови возила од 23:10 часот.

Истовремено, од АМСМ соопштија дека на граничниот премин Ники (Меџитлија) е воведена забрана за движење на товарни возила, која ќе важи до денеска до 10:00 часот, додека сообраќајот за патнички моторни возила се одвива непречено.

The post ПАТИШТАТА СЕ ПРООДНИ, НО РИЗИЧНИ „Македонијапат“ со предупредување до возачите appeared first on plusinfo.mk.

Сообраќајот на државните патишта се одвива во зимски услови, по претежно суви коловози. Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата, информира Авто-мото сојузот на Македонија.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

На Граничниот премин Меџитлија/Ники има забрана за движење на товарни возила до утре до 10:00 часот. Сообраќајот за патнички моторни возила ќе се одвива со нормален тек.

Од синоќа, сообраќајот на Граничниот премин Богородица/Евзони е пуштен за сите видови возила.

АМСМ потсетува дека во сила е законската обврска за задолжително поседување на зимска опрема во возилата, без оглед на моменталната временска состојба.

The post ПРЕМИНОТ БОГОРОДИЦА Е ПУШТЕН ЗА СИТЕ ВОЗИЛА На Меџитлија има забрана за товарни возила appeared first on plusinfo.mk.