Младинскиот културен центар (МКЦ) во Скопје следната година прославува јубилеј 55 години, јубилеј кој е сведок за 55 години културолошко просветлување на плејада млади луѓе и генерации. Но тоа не е случај и изминативе неколку години. Како гром од ведро небо ја погоди јавноста веста дека во срцето на МКЦ, во просториите се одржува турбо-фолк аудиција, каде што жири комисија е турбо-фолк пејачот Аца Лукас. Од тој момент и најхрабрите оптимисти за враќањето на старите патеки на МКЦ ги положија своите копја и се предадоа поразени, дека МКЦ и таа двигателска сцена згаснува полека.

Иако МКЦ како не многу голема институција во срцето на градот, секогаш кога се менувал директор, сериозно ја бранувала јавноста и медиумите и добивало на тежина, небаре се менува министер или висок владин функционер. Имало безброј дебати за одлуките на градските власти, каде што културната сцена и јавноста, многу добро знаат која е улогата на МКЦ и какво влијание може да има во креирањето на културната сцена на градот и државата. Впрочем тоа се гледа и изминативе неколку години.

Констатацијата на културните работници е дека откако пропадна МКЦ, пропадна и ноќниот и културен живот во Скопје, често потенцирана реченица помеѓу младите, но и повозрасните кои паметат како изгледало Скопје пред една деценија. Дали конечно дојде време да се врати ноќниот и културниот живот во Скопје како некогаш и Скопје да биде рамо до рамо со европските метрополи?

Сè погласно се зборува дека конечно високо на агендата на градските власти дојде и МКЦ и се подготвува сериозен рестарт на самата институција, но и многу новитети за кои се зборува одреден период помеѓу упатените. Следната година е јубилејна, па се очекува и достојно да биде прославена со сериозна програма.

Изминативе денови сме сведоци на разни шпекулации дека во моментов се случува промена на директорот на МКЦ, но сè уште нема официјална потврда од ниедна страна.  Во моментов во МКЦ се случува Скопје Филм Фестивал и навидум сè изгледа како да функционира нормално.

Главното прашање е следното: Дали оваа гарнитура е свесна која е улогата на МКЦ во градот Скопје за профилирање и воспитување на младите генерации преку културно-забавниот живот?  Ќе се придвижи ли културниот и забавниот живот на Скопје близу и налик на светските метрополи?

Поставивме неколку прашања до кабинетот на градоначалникот на Скопје, Орце Ѓорѓиевски, поврзани со промената на директорот на МКЦ и шпекулациите за можни нови имиња, како и за планови поврзани со враќање на културно-забавниот живот во Скопје, но до моментот на објавување на овој текст не добивме одговор.

Доброупатени извори од Градот кратко нè брифираа дека изминативе неколку месеци Ѓорѓиевски, заедно со уште неколку соработници, слушнал и разменил голем број мислења на луѓето од културната фела, независната културна сцена, алтернативната културна сцена, клубската сцена и многу други релевантни фактори, притоа што успеал да ги апсорбира нивните идеи, критики и сугестии и да ги префрли во план по кој ќе се дејствува. Една од главните теми била сериозен рестарт на пропаднатиот Младински културен центар. Неофицијално ја имал и поддршката од сите овие луѓе доколку остане на зборот и им овозможи услови и слобода на колективот на МКЦ и скопската урбана сцена да креираат културно-забавен живот по примерот на светските метрополи.

Дополнително потенцираат дека новиот директор на МКЦ бил добро познато лице и име на јавноста, кое има поддршка од релевантни фактори и Градот, како и план да ги направи потребните чекори за рестарт на МКЦ и културно-забавниот живот во Скопје што го креира оваа институција.