Премиерот и претседател на ВМРО-ДПМНЕ, Христијан Мицкоски, денеска во Централниот штаб на партијата му оддаде последна почит на прерано починатиот Јовица Илиевски, градоначалник на Општина Брвеница од редовите на ВМРО-ДПМНЕ.

Мицкоски во својата порака изрази длабока тага по повод загубата на својот пријател и сопартиец, истакнувајќи дека неговото заминување е голема загуба за семејството, пријателите, но и за жителите на Општина Брвеница, која Илиевски неизмерно ја сакал и за која несебично работел.

На денешната седница, Владата ја разгледа и ја усвои информацијата доставена од Министерството за локална самоуправа во врска со настапување на законски основ за престанок на мандатот на градоначалникот на Општина Брвеница.

Согласно Законот за локалната самоуправа, Министерството е должно во рок од 15 дена од приемот на известувањето да ја информира Владата за настапувањето на овој законски основ, по што Владата, во рок од 30 дена, ја започнува постапката за распишување на нови избори за градоначалник.

„Во таа насока, сакаме да ја информираме јавноста согласно запазените законски предвидени рокови, Владата ја усвои информацијата и донесе Одлука за престанок на мандатот на градоначалникот на Општина Брвеница, со што се создаваат законските предуслови за спроведување на понатамошната постапка согласно важечките прописи и важечки рокови“ – соопшти владата.

The post ВО БРВЕНИЦА ЌЕ СЕ РАСПИШАТ ВОНРЕДНИ ЛОКАЛНИ ИЗБОРИ Партијата и премиерот Мицкоски се простија од прерано починатиот градоначаник Јовица Илиевски appeared first on plusinfo.mk.

Градоначалникот на општина Карпош Сотир Лукровски денеска се врати на своето работно место, и по подолго боледување, повторно ги презеде градоначалничките надлежности. Во негово отсуство, општината ја водеше заменик-градоначалникот Неделчо Крстевски, кој доби овластување привремено да управува со работата на локалната самоуправа.

Градоначалникот на Карпош Лукровски на 8 мај годинава замина на боледување, а сите права и обврски од градоначалничката функција ги пренесе на совеникот Крстевски. Подолгото боледување на Лукровски предизвика шпекулации околу неговото можно повлекување од функцијата, како и евентуално распишување избори за градоначалник на Општина Карпош, но таквата можност премиерот Христијан Мицкоски ја отфрли.

Лукровски за своето враќање објави подолг статус на Фејсбук, во кој се заблагодари на премиерот и на колегите и ги осуди како што рече, обидите на некои поединци и партии, да стекнат евтини политички поени.

„Животот е борба исполнета со предизвици, но не затоа што е против нас, туку затоа што секој предизвик нè принудува да растеме, да учиме и да станеме посилни.

Изминатиот период за мене беше едно големо искушение. Се соочив со здравствен предизвик кој ме натера да сфатам дека вистинската сила не е никогаш да не паднеш, туку секогаш да најдеш сила повторно да станеш.

Денес, со голема благодарност и искрена радост, повторно се враќам на своето работно место. Ова враќање за мене не претставува само продолжување на професионалните обврски, туку и лична победа над здравствените предизвици со кои се соочив во изминатиот период. Во ова искуство научив дека со трпение, истрајност, верба и поддршка, дури и најтешките битки можат да се добијат“, објави Лукровски.

Тој вели дека е згрозен од одредени поединци кои се обиделе да дојдат до политички поени на сметка на неговата состојба.

„Најодговорно сакам да ги демантирам сите шпекулации и лаги врзани за моето име, згрозен сум од начинот со кој што одредени поединци и партии пробаа да дојдат до евтини политички поени на сметка на мојата состојба. Само оние кои недоволно ме познаваат може да поверуваат дека сум се откажал. Сега по божја волја се враќам со нова енергија, со уште поголема посветеност и со јасна цел – да продолжам да работам одговорно, чесно и посветено, во интерес на граѓаните и развојот на нашата општина. Да сте ми живи и здрави“, напиша Лукровски на Фејсбук.

Од Општина Карпош потврдија дека градоначалникот Сотир Лукровски од денеска ги продолжува своите редовни работни активности и обврски.

„И во периодот на неговото отсуство, Општина Карпош функционираше организирано, професионално и непречено, согласно воспоставените процедури, надлежности и редовната динамика на општинската администрација. Тековните проекти, услугите кон граѓаните и секојдневните активности на општинските служби се реализираа континуирано, со цел граѓаните да не почувствуваат застој во работењето на локалната самоуправа.

Со враќањето на градоначалникот Лукровски на работните обврски, Општина Карпош продолжува со уште поинтензивна координација на започнатите активности и со јасен фокус на реализација на приоритетите значајни за граѓаните“ – се вели во сопштението на Општина Карпош.

The post ЛУКРОВСКИ СЕ ВРАТИ НА ГРАДОНАЧАЛНИЧКАТА ФУНКЦИЈА ПО ПОДОЛГО БОЛЕДУВАЊЕ „Згрозен сум од тие што се обидоа да дојдат до евтини политички поени на моја сметка“ appeared first on plusinfo.mk.

Градоначалникот на општина Бутел Дарко Костовски информира за голема градежна офанзива која се спроведува со силна динамика во населеното место Скопје Север, во која ќе бидат вложени повеќе од 60 милиони денари, или околу милион евра.

„Денеска ја завршивме реконструкцијата на вториот крак на улицата Боро Менков. Реконструкцијата ги опфати и тротоарите, како и паралелните паркинзи. Ги реконструираме и сите пристапни патеки до зградите.

Со оваа реконструкција се опфатени зградите на улиците Боро Менков, Костурска, Лазо Москов, Гоце Стојчевски. Наскоро ќе се реконструира и улицата Костурска заедно со двата големи паркинг – простори и пристапни патеки.

Исто така, за првпат ќе се изгради и тротоар за безбедно и непречено движење. Ова е најголемата градежна офанзива која се одвива во Скопје Север“ – пишува градоначалникот Костовски на неговата Фејсбук-страница.

The post СКОПЈЕ СЕВЕР Е ВО ГОЛЕМА ГРАДЕЖНА ОФАНЗИВА Се реконструираат улици, тротоари, паркинзи… appeared first on plusinfo.mk.

Премиерот Христијан Мицкоски со тага соопшти дека починал градоначалникот на општина Брвеница, Јовица Илиевски.

Во својата објава на Фејсбук, Мицкоски истакна дека Илиевски бил работлив, чесен и скромен човек кој целосно бил посветен на граѓаните и на општината што ја водел.

„Јовица беше работлив, чесен и скромен човек, целосно посветен на луѓето и на општината што ја водеше. Функцијата ја разбираше како обврска кон граѓаните, а довербата што ја доби ја оправдуваше со работа, со присуство и со резултати“, напиша Мицкоски.

Тој додаде дека Илиевски бил постојано меѓу луѓето, ги слушал нивните потреби и се борел за нивните интереси, поради што граѓаните му ја довериле функцијата и за втор мандат.

„Беше секогаш меѓу луѓето. Ги слушаше, им помагаше и се бореше за нивните потреби. Затоа граѓаните му ја дадоа довербата и за втор мандат“, се наведува во објавата.

Премиерот го опиша Илиевски и како голем љубител на спортот, со силна енергија и отворен пристап кон граѓаните.

„Ќе го паметиме и како голем вљубеник во спортот, човек со силна енергија, искрен пристап и отворено срце“, истакна Мицкоски.

Во пораката тој изрази сочувство до семејството, блиските и сите кои го познавале и почитувале.

„Во овие болни моменти, моите мисли се со неговото семејство, со неговите најблиски, со граѓаните на Брвеница и со сите што го познаваа и почитуваа“, напиша премиерот.

На крајот од објавата, Мицкоски порача дека делото на Илиевски ќе остане запаметено.

„Јоцо, на последните избори ја добивме најважната битка за твојата Брвеница, твоето дело и споменот за тебе нема да биде заборавен. Вечен спомен“, стои во објавата.

Илиевски беше роден на 3 мај 1968 година. Беше градоначалник на Брвеница од 2021 година, реизбран и на последните локални избори, а претходно, од 2013 до 2017 година, тој беше член на советот на Општината.

The post ПОЧИНА ГРАДОНАЧАЛНИКОТ НА БРВЕНИЦА ЈОВИЦА ИЛИЕВСКИ Премиерот Мицкоски ја сподели тажната вест appeared first on plusinfo.mk.

Осум години не биле утврдувани сите даночни обврзници за данок на имот во Општина Дебрца, поради што СВР Охрид поднесе кривична пријава против поранешен градоначалник.

Пријавата е поднесена против З.Н. (60) од селото Волино, поради постоење основи на сомнение за сторено кривично дело „злоупотреба на службена положба и овластување“.

Според полицијата, во периодот од 2017 до 2025 година, додека ја извршувал функцијата градоначалник на Општина Дебрца, осомничениот не извршил соодветен надзор при утврдувањето на правните и физичките лица кои биле сопственици, корисници или носители на право на располагање со недвижен имот на територијата на општината.

Од СВР Охрид наведуваат дека поради пропуштање на должен надзор не биле утврдени сите лица кои подлежеле на обврска за плаќање данок на имот, ниту било спроведено нивно реоданочување.

Според сомнежите, со ваквото постапување дел од даночните обврзници останале надвор од системот за наплата на данок на имот.

Полицијата соопшти дека со ваквите дејствија била предизвикана штета на Општина Дебрца во износ од 431.245 денари.

Случајот е доставен до надлежното обвинителство, кое треба да одлучи за понатамошното постапување.

Кривичната пријава се темели на сомнежи за злоупотреба на службената положба, а евентуалната одговорност ќе биде предмет на натамошна постапка пред надлежните институции, велат од МВР.

The post ОСУМ ГОДИНИ НЕ НАПЛАЌАЛ ДАНОК НА ИМОТ Екс-градоначалник во Дебрца ја оштетил општината за над 7.000 евра appeared first on plusinfo.mk.

Градоначалникот на Град Скопје Орце Ѓорѓиевски објави дека е започната темелна реконструкција на патот кон Средно Водно.

– Водно е душата на Скопје. Место каде генерации скопјани пораснале, место каде се бара мирот по напорниот ден, каде семејствата го поминуваат слободното време. Токму затоа, со сериозен пристап и силна динамика, започнавме темелна реконструкција на патот кој води кон Средно Водно – вели скопскиот градоначалник.

Покрај реконструкцијата на коловозот, се уредуваат и сливниците за атмосферските води кои долги години беа нефункционални и неодржани, а се обновуваат и еластичните одбојни огради (банкини), кои исто така повеќе децении стојат оштетени и непроменети.

– Решаваме еден долгогодишен проблем и овозможуваме поголема безбедност, подобра заштита на патот и негово подолгорочно одржување. Паралелно, во континуитет се одржуваат и патеките кон Водно, се уредува просторот и се заменува дотраената урбана опрема, за ова место повторно да го добие изгледот што го заслужува. Водно се белите дробови на Скопје и само со заеднички придонес ќе остане нашето најубаво место – истакнува Ѓорѓиевски.

The post ТЕМЕЛНО СЕ РЕКОНСТРУИРА ПАТОТ КОН СРЕДНО ВОДНО Градоначалникот Орце Ѓорѓиевски вели дека Водно е душата на Скопје appeared first on plusinfo.mk.

Не сум дојден да живеам на грбот на граѓаните и работам домаќински, чесно и одговорно, вели градоначалникот Орце Ѓорѓиевски во објава на Фејсбук. Ѓорѓиевски истакнува дека не користи службено возило туку сопствен, дека горивото го плаќа од сопствената плата, дека сам ги покрива службените патувања и дека буџетот за службени трошоци во Град Скопје е пренаменета за капитални проекти.

„Секој денар од буџетот мора да се врати назад кај граѓаните во нови улици, булевари, мостови, чист град, подобри услуги и проекти кои го менуваат Скопје.  За само 6 месеци, градот кој беше оставен во огромна дупка го исправивме на нозе. Го вративме редот, ја вративме работата и ја вративме надежта дека Скопје може поинаку“.

Градоначалникот вели дека да се биде прв човек на градот е чест, но уште поголема одговорност.

„Одговорност пред граѓаните. Пред мојот народ“.

Тој вели дека претстојат многу капитални проекти и дека Градот продолжува со уште посилна реализација и, како што вели, со уште поголема одговорност.

„Не сме сите исти.Нас нѐ прават различни чесноста, транспарентноста и домаќинското работење од нашите претходници. Скопје заслужува градска власт која не троши за себе, туку работи за народот.
И токму така ќе продолжиме“, истакнува Ѓорѓиевски.

The post „НЕ КОРИСТАМ СЛУЖБЕН АВТОМОБИЛ, САМ ПЛАЌАМ ЗА ПАТУВАЊА И ЗА ГОРИВО“ Секој денар треба да оди кај граѓаните, вели Ѓорѓиевски appeared first on plusinfo.mk.

Градоначалникот на Општина Аеродром, Дејан Митески спречил обид за нелегално истурање на градежен шут на дива депонија во Ново Лисиче од камион со натпис од фирмата „ХСА-Констракшн“. Тој објави видеоснимка на Фејсбук на која се гледа како бара инспекција и полиција, додека возачот на камионот кој го истовара шутот му дава телефонски да се слушне со газдата на фирмата.

Од општината велат дека е пријавено во МВР и дека е направен записник. На местото веднаш излегол инспектор за животна средина од Општина Аеродром, а во понеделник ќе биде повикана фирмата на која ќе ѝ биде врачен записник и решение за казна за загрозување на животната средина.

„Граѓанин пријавил дека, додека се движел кон Долно Лисиче, после мостот на река Вардар од лева страна, забележал товарно возило со скопски регистарски ознаки со натпис на правно лице, како на јавна површина истура шут и градежни материјали, по што веднаш пријавил во полиција и во Општина Аеродром. Возилото заминало пред пристигнување на полициски службеници. На местото на настанот била присутна и инспекторка за животна средина од општина Аеродром која извршила фотографирање и појаснила дека преку општината ќе преземат мерки за настанот“, информира МВР.

Најниската казна е 9.000 евра, а највисоката над 80.000 евра во зависност од тоа за каква фирма станува збор.

Газда на фирмата „ХСА-Констракшн“ е Харис Качапор, кој е добро познат на обвинителството и на полицијата. На Качапор во моментов му се суди за смртоносното прегазување на поранешниот директор на ОХИС, Јорго Ќука. Тој е обвинет за тешки дела во сообраќајот за кое е предвидена казна од четири до 20 години затвор.

Сообраќајката се случи на 3 ноември на булеварот Гоце Делчев, а Качапор тогаш го остави возилото, по што полицијата го уапси неколку часа подоцна. Полицијата го пронајде во болница, пришто Качапор се правдаше дека отишол на лекар и не избегал од местото на несреќата. Откако беше приведен, му беа изречени мерки на претпазливост.

Качапор е претходно осудуван. Се гонеше во предметот „Синџир“ за делата „злосторничко здружување“, „даночно затајување“ и „перење пари“, а организатор на операцијата беше Љупчо Пецов Ѓаволот, тогаш во бегство. Качапор се спогоди со обвинителството и доби условна казна и требаше да врати пари во буџетот.

Фирмата „ХСА-Констракшн“ е од селото Батинци и формирана е во 2014 година. Дејноста ѝ е изградба на други објекти од нискоградба. Во 2025 година, според податоците на Бизнис мрежа, имала добивка од 359.000 евра.

The post 🎥 ГАЗДАТА НА КАМИОНОТ ФАТЕН КАКО ИСТУРА ШУТ Е ОБВИНЕТ ЗА ПРЕГАЗУВАЊЕ НА ЈОРГО ЌУКА Има условна казна за перење пари во предметот „Синџир“ appeared first on plusinfo.mk.

СВР – Струмица до Основното јавно обвинителство – Струмица поднесе кривична пријава против К.К.(36), С.Р.(38), М.Т.(42), С.О.(61) и Ѓ.М.(54), сите од Струмица, поради основано сомневање дека К.К., С.Р. и С.О. сториле кривичното дело „несовесно работење во службата“ по член 353-в, М.Т. го сторила кривичното дело „злоупотреба на службената положба и овластување“ по член 353, а Ѓ.М. сторил кривично дело „бесправно градење“ по член 244-а од Кривичниот законик, соопштија денеска од Министерството за внатрешни работи.

„Пријавената М.Т. во време на сторување на делото вработена како советник – урбанистички аналитичар во Сектор за урбанизам комунални работи и градежно земјиште при Општина Струмица, ги пречекорила границите на своите службени овластувања, така што постапувајќи спротивно од одредбите на Законот за градење и ограничувањето на деталниот урбанистички план, според кој на конкретната локација воопшто не била предвидена градба, изготвила одобрение за реконструкција. Ваквото нешто воопшто не можело да се смета за реконструкција од причина што предвидените градежни дејствија всушност претставувале нова градба. Истото било евидентно и во самиот основен проект доставен од подносителот во постапката, која постапка наместо да се води како постапка за реконструкција, истата имала елементи на спроведена и одобрена постапка за изградба на нов објект. Пријавената С.Р. во време на сторување на кривичното дело – раководител на Сектор за урбанизам комунални работи и градежно земјиште при Општина Струмица, постапила несовесно при вршењето на своите службени овластувања, пропуштила должен надзор во целата постапка и го одобрила предметното одобрение за реконструкција иако знаела, односно морала да знае, дека не се работи за реконструкција туку за изградба на сосема нов објект на место каде што согласно деталниот урбанистички план не е предвидена изградба на објект“ – пишува во соопштението.

Во соопштението се додава и дека првопријавениот К.К. во време на сторување на делото – градоначалник на општина Струмица, исто така, постапил несовесно при вршењето на своите службени овластувања, како што се наведува во соопштението, пропуштил должен надзор во постапката и притоа го потпишал изготвеното одобрение за реконструкција.

Единствен поранешен градоначаник на Струмица со иницијали К.К. е Констадин Костадинов, од редовите на СДСМ, која ја вршеше оваа функција, прво како в.д. градоначалник од 2016 до 2017 година, а потоа од 2021 до 2025 година. На крајот на вториот мандат Костадинов влезе во конфликт со раководството на партијата, по што го замрзна своето партиско членство и не беше кандидат на СДСМ на последните локални избори.

„Пријавениот Ѓ.М. без да чека правосилно завршување на постапката по предметното барање за реконструкција, започнал со градба на сопствена одговорност и ризик, при што под изговорот за реконструкција на постоечки објект на парцела каде согласно ДУП не е предвидена градба изградил нов објект од втора категорија. Пријавената С.О. во време на сторување на кривичното дело во својство на овластен градежен инспектор при Општина Струмица во постапката која ја водела против Ѓ.М., наместо да констатира дека се работи за бесправно градење на градба од втора категорија, односно наместо да констатира кривично дело, кое се гони по службена должност, таа констатирала дека се работи за прекршок од Законот за градење, иако согласно документите кои ги извела како доказ во постапката на инспекцискиот надзор, можела и морала да знае, дека не се работи за реконструкција на постоечки објект, туку всушност се работи за изградба на сосема нов објект“ – се вели во соопштението ан СВР Струмица.

The post КРИВИЧНА ПРИЈАВА ЗА ПОРАНЕШНИОТ ГРАДОНАЧАЛНИК НА СТРУМИЦА КОСТАДИН КОСТАДИНОВ Со соработниците „протнале“ новоградба како реконструкција appeared first on plusinfo.mk.

Градоначалникот на Скопје Орце Ѓорѓиевски денеска присуствуваше на настан организиран по повод Светскиот ден на лицата со Даунов синдром, кој се одржа во Скопската Зоолошка градина.

Настанот беше реализиран во соработка со здруженијата „Видлива поддршка” и „Трисомија 21″, при што беа засадени дрвца како симбол на животот, растот и надежта.

„Со оваа симболична активност се испрати порака за важноста на прифаќањето, еднаквоста и поддршката за лицата со Даунов синдром, како и за потребата од градење општество без бариери. Засадените дрвја претставуваат траен потсетник дека секое дете заслужува љубов, почит и можност да го достигне својот потенцијал.

Град Скопје и понатаму останува посветен на унапредување на инклузивните политики и создавање средина во која различностите се прифаќаат како вредност, а не како пречка.

Преку вакви иницијативи се зајакнува свеста за значењето на солидарноста, емпатијата и заедничката одговорност во градењето похумано и праведно општество за сите“ – се вели во соопштението на Град Скопје.

The post ЗАСАДЕНИ ДРВЦА ВО ЗНАК НА ПОДДРШКА, ЕМПАТИЈА И ЉУБОВ Настан во Зоолошката градина во чест на лицата со Даунов синдром appeared first on plusinfo.mk.