The post СКАНДАЛ ВО СЛОВЕНИЈА • СЛОВЕНЕЧКАТА ПРЕТСЕДАТЕЛКА ИСВИРКАНА НА ДРЖАВНА СВЕЧЕНОСТ Ја молеше публиката: „Пуштете ме да завршам!“ appeared first on plusinfo.mk.

Кризните времиња – а ние не можеме да одречеме дека живееме во такво – наложуваат соодветно поведение, вклучувајќи го тука секако и правото на говор, особено кај оној дел од општеството којшто сака себеси да се претстави како прогресивен, интелектуален, елитен односно водечки во секој поглед. Но кога го спомнувам правото на говор не мислам на ограничувањето или ускратувањето на истото како основно човеково право. Но мислам на онаа лична, интелектуална одговорност пред себеси и пред јавноста тоа право да се „прочисти“, депропагандизира и по потреба деидеологизира односно да се насочи, колку што може, кон вистината, каква и да е.

Или, ако уште античките демократии умееле да ја направат разликата помеѓу исегорија (ἰσηγορία) како политичка привилегија на право на јавен збор и парезија (παρρησία) како слобода на бестрашен говор на граѓанинот, зарем ние не сме способни за тоа? Иако навидум слични, дури идентични, двата поими посочуваат на суштинска разлика, онаа што ни е неопходна денес.

А суштинската разлика, упростено, ја воведува во игра вистината како доминатен односно единствен можен начин на јавна комуникација во сложени, тешки времиња. На ова посочувал и Фуко, но за тоа малку подоцна. Се разбира, тој и таков говор не може никој да го наметне или наложи со декрет. Тој зависи од личниот морал, интегритет и професионална етика. Нема да спомнувам овде „патетични“ поими како чувства и почит кон сопствената земја и сограѓани, кон својата историја, култура и идентитет… Но тоа се поими што се наметнуваат самите по себе во вакви времиња.

Но ние паѓаме и на тој испит. Како што се продлабочува кризата со македонскиот евроинтегративен пат, зајакнува интензитетот и се проширува дијапазонот на пропагандистичкиот и навивачки говор на една категорија „интелектуалци“, насочен не само кон власта – која имате право да ја сакате или не, па следствено и да ја критикувате – туку и кон сите кои мислат поинаку! Што, да речеме, и не е најстрашната страна на овој тип клиентелистички говор. Проблемот се продлабочува што во тој говор, главно навредлив и неаргументиран, по правило нема одговор на дилемите во јавноста за македонскиот пат кон еу (малите букви се…), нема рационален дискурс, уште помалку дијалог или расправа за сите досега посочени „темни места“ во инсистирањата на источниот сосед и политикантската машинерија на еу, нема предвидливи одговори на поставените прашања од многумина компетентни кај нас итн.

Единствено што слушате се навреди за некакви недовршени Македонци, за неспособна власт, за македонски национализам или за идиотштината дека ние „мораме да се прилагодиме кон историската вистина дека во минатото сме биле дел од еден ист народ“ со источниот сосед, за некаков „достоинствен погреб на државата“, за бизарно аплицирање на некакви етолошки теории во антропоморфни релации и слично, сѐ со цел да се внесе чувство на несигурност кај граѓаните, забуни и дезориентација во однос на состојбите во државата и нејзините перспективи без исполнувањето на странскиот диктат и др. А после да се говори дека тоа го прави – некој друг!

Или, ако сакате, не можете ан блок да опонирате на нечие – и тука најмалку ја подразбирам власта! – рационално инсистирање на суверени права, на право на јазик, култура, историја…, но и на отпор против негациите на тие права, а притоа да не приведете ниту еден аргумент освен некакво лично пелтечење за неважни нешта. Односно, и упште попрецизно: не можете – како што тоа го прави дел од спомнатата „интелигенција“ – да инсистирате на одредено (наметнато) решение, но да не ги коментирате и сите дополнителни диктати што другата страна отворено ги наметнува. Можеби сме ние навистина „прост народ“ но оние „сложените“ немаат ли обврска да објаснат како според нив ќе се одвива идната македонско-бугарска приказна? Па дури и сите да сме за пред Кооператива со топло пиво, немаат ли слепциве морална и професионална должност да нѐ просветлат со нивните „вистини“:

Зашто, јавните прозивки и упатства од страна на оние Радев, Јотова, Борисов и други високи бугарски функционери не се поништуваат со приказни за некаков македонски национализам, за погреб на државата, за „глувчешки рај“…, туку бараат дециден одговор: што со ваквите диктати утре, откако оние 215 Бугари ќе бидат внесени во Уставот? Такви парезијастички одговори наложуваат вакви кризни времиња и само така и тогаш се добива доверба од јавноста!

Но, бидејќи го спомнав Фуко, да појаснам дека на неговите шест предавања на Беркли (октомври/ноември 1983) насловени „Дискурс и вистина: проблематизацијата на парезијата“, тој го дефинира концептот на парезијата посочувајќи на неколку клучни критериуми: отвореност, вистинитост, опасност, критичност и должност. Секој од нив е интересен, но можеби овде треба да се потенцираа барем два – вистинитост и должност.

Фуко инсистира на вистинитоста на овој говор односно на значењето „да се каже вистината“. Но кај нас, па и не само кај нас, по правило има многу „вистини“. Но Фуко е дециден: „парезијстот говори вистина бидејќи знае дека тоа е вистина; и знае дека тоа е вистина бидејќи тоа е навистина вистина“! Таквиот говорник не е само искрен и не го кажува само својот став туку неговиот став е исто така вистина и таму „секогаш има точно совпаѓање помеѓу верувањето и вистината“!

Но како ние, или „обичниот граѓанин“, би знаеле дека тоа „е навистина вистина“ и кој ја кажува? Секако, тоа не е лесно прашање, ги интригирало уште Плутарх, Гален и други, но тука во игра влегуваат некакви предистории, претходни (не)морални биографии, идеолошко-политички и клиентелистички релации, етичките ставови на личноста, вистинитоста на претходните тврдења и теоретизирања итн. Или, како во нашиот најчест случај – ако говорникот упорно одбегнува соочување со фактите, со аргументираните анализи на можниот развој на настаните по прифаќањето на непринципиелниот диктат, ако крајно непринципиелно одбегнувате одговор на децидните ставови на соседните политиканти за нови и нови пристапни услови, ако дури ги игнорирате и оние европски гласови во полза на Македонија…, тогаш за каква „вистина“ може да стане збор? Односно, ако во недостаток на компетентен одговор на сето претходно спомнато користите само етикети и квалификации, соцреалистички флоскули и натегнати „филозофирања“… тогаш тоа не е сериозен и општествено одговорен говор. Да не спомнувам дека кај некои претставници на наводно академската заедница тоа преминува во уличарско лаење. Просто да ви е гнас да ги сретнете некаде!

Што е уште пострашно, претставниците на овој тип говор кај нас се главно оние со некакви академски титули или оние здодевни соцреалистички „општествено-политички работници“ кои одамна не знаат што да прават со себеси па се продаваат на сите што се подготвени да платат. Политикантите – онаа булумента скапо платени недоквакани простаци кои седат дури и во Собранието или други високи државни институции – не ги вбројувам овде бидејќи тие секако се (одлично) платени да говорат глупости.

Затоа, мораме да (му) веруваме (и на Фуко) дека вистината – или говорењето вистина, како сакате – е темелот на секоја демократија уште од времето на Атина. Ако воопшто и размислуваме за нив, за демократијата и вистината!

The post Компетентен говор или уличарско лаење appeared first on plusinfo.mk.

Меган Маркл се соочи со нови обвинувања дека користела вештачка интелигенција за својот говор во Женева, посветен на технологијата и безбедноста на децата. Откако предупреди за штетните ефекти од интернетот на настан во Швајцарија, критичарите се прашуваа дали нејзиниот говор звучел како да е создаден со помош на вештачка интелигенција.

Објавата на поранешната актерка на Инстаграм ја покажува како стои на подиум со натпис „Ниедно изгубено дете поради социјалните медиуми“. Маркл се појави како дел од настанот на Светскиот здравствен собир.

 

View this post on Instagram

 

A post shared by Meghan, Duchess of Sussex (@meghan)

Според порталот RadarOnline, Меган Маркл отпатувала сама во Женева, каде што со генералниот директор на Светската здравствена организација, Тедрос Аданом Гебрејесус, го открила „Споменикот на изгубениот екран“.

Порталот, повикувајќи се на неименуван извор, наведува дека онлајн критичарите прегледале делови од говорот преку „системи за препознавање текстови настанати со помош на вештачка интелигенција“. Изворот рекол дека формулациите во говорот звучеле „невообичаено, повторувачки и ритмички структурирано. Додал дека некои критичари веруваат дека говорот „има обележја на нацрт генериран од вештачка интелигенција“.

Настанот беше посветен на оддавање почит на децата кои починале поради, како што се вели, штетните ефекти од интернетот и дигиталната злоупотреба.

Меган Маркл во својот говор нагласи дека децата се обликувани од „безмилосни алгоритми“, „експлоатација на вниманието на корисниците“ и „постојана изложеност на штетна содржина“.

Таа, исто така, изјави дека вештачката интелигенција „ги забрзува и засилува“ опасностите со кои се соочуваат децата низ целиот свет. Нејзината официјална објава на Инстаграм имаше наслов: „Светско здравствено собрание, Женева, Швајцарија, 2026 година“, а таа, исто така, ја означи и СЗО.

Друг извор од комуникациската бранша рекол дека говорите за големи настани често се резултат на соработка. Тој истакнал дека јавните личности можат да се потпрат на совети од консултанти, истражувачи, софтвер или „алатки за обработка на текст со вештачка интелигенција“.

Сепак, друг извор ја нарекол реакцијата „врв на иронијата“, тврдејќи дека критичарите ја искористиле оваа можност токму затоа што Маркл предупредила за опасностите од вештачката интелигенција.

Изворот, исто така, рекол дека за искусните набљудувачи, стилот на говорот „јасно сугерира употреба на вештачка интелигенција“. Сепак, извештајот не потврди дека нацртот на говорот навистина бил подготвен од вештачка интелигенција. Статијата потсетува дека Маркл и принцот Хари ја фокусирале својата фондација Арчвел на безбедноста на интернет и „Мрежата на родители“ (The Parents’ Network).

The post 🎥 МЕГАН МАРКЛ КОРИСТЕЛА ВЕШТАЧКА ИНТЕЛИГЕНЦИЈА ЗА ГОВОРОТ ВО ЖЕНЕВА? Војвотката од Сасекс зборуваше на настан посветен на технологијата и безбедноста на децата appeared first on plusinfo.mk.

Доналд Трамп го нарече „фантастичен“, демократите аплаудираа на спомнувањата на Магна карта, а заедничката седница на американскиот Конгрес го поздрави говорот со долги овации.

Обраќањето на кралот Чарлс пред американските законодавци, иако формално непартиско, не бегаше од политиката. И, иако претседателот не се навреди – „Одржа одличен говор, бев многу љубоморен“ – рече Трамп – јасно насочените алузии на теми кои тој претходно ги омаловажувал не ѝ промакнаа на американската јавност.

„Под слојот на шеги и протокол, кралот Чарлс испрати суптилни критики кон Трамп“ – пишува „Вашингтон пост“ во наслов. „Кралот Чарлс повикува на контрола врз извршната власт“ – наведува „Њујорк тајмс“.

– Фактот дека говорот на Чарлс беше толку внимателно склопен и изнесен со топлина и шарм, сам по себе претставуваше тивок укор за расфрланите и недисциплинирани јавни настапи на самиот претседател Трамп – оценува професорот Филип Марфи (Philip Murphy) од Универзитетот во Лондон.

Политичка порака под дипломатски плашт

Со оглед дека „специјалните односи“ меѓу Обединетото Кралство и САД се видливо разнишани, многу зависеше од овој говор – најзначајниот во досегашното владеење на Чарлс.

Во него се нагласува важноста на НАТО, се повикува на континуирана поддршка за Украина и се предупредува на ризиците од изолационизмот. Спомнувањата на Магна карта и принципот дека извршната власт мора да биде ограничена со систем на „проверки и балансирање“ беа дочекани со ентузијастички аплауз од демократите.

Посебно одекна цврстото инсистирање на „мојот премиер“, Кир Стармер, кого Трамп јавно го навредуваше, како и кралската наклонетост кон британскта Кралската морнарица, која Трамп ја исмејуваше во своите изјави поврзани за војната во Иран.

– Тешко е да се замисли дека можел да оди подалеку – и во кажаното, и во премолченото. Одлично е одмерен: многу храбро, многу паметно, многу прецизно – вели историчарот Ентони Селдон (Anthony Seldon), оценувајќи го говорот како „исклучителен“.

Како се коваше говорот

Ваквите говори се тимска работа. Добрите говорници одлично го познаваат карактерот на личноста за која пишуваат.

Клучната фигура во овој потфат е личниот секретар на кралот, сер Клајв Олдертон (Clive Alderton) – главниот посредник со „Број 10“ (No 10, односно Даунинг стрит 10 – седиштето на британската влада). Олдертон е искусен дипломат и поранешен амбасадор, кој го советувал Чарлс уште како принц од Велс, а сега и како крал, координирајќи се со Форин офисот, британското Министерство за надворешни работи.

Првата верзија на говорот ги поставува државните, дипломатските и трговските цели. Бакингемската палата, Даунинг стрит и Форин офис работеле синхронизирано – без простор за грешки.

Во процесот биле вклучени и Тео Рајкрофт (Theo Rycroft) и Тобин Андреа (Tobyn Andreae), додека од американска страна ставовите на Белата куќа дискретно ги пренесувале Кристијан Тарнер (Christian Turner) и Џејмс Роско (James Roscoe).

Нацртите се усогласувале до последен момент, а самиот крал активно интервенирал – со рачни забелешки, додавања и бришења.

Суптилни пораки, долгорочен ефект

Говорот содржеше и хумор, кој ја олесни тежината на пораката. Според Марфи, резултатот бил прифатлив за голем дел од американската политичка елита – ако не и за администрацијата на Трамп.

Но, ефектот не треба да се мери веднаш.

– Трамп веќе во понеделник ќе биде пак – Трамп – вели Селдон.

– Вистинското влијание се мери долгорочно: како ќе постапуваат републиканците и демократите во иснина; како ќе гледаат на НАТО, на војната во Украина, на унилатералното однесување на САД и на проширувањето на извршната власт надвор од рамките што ги замислиле основачите на државата – Мора да се гледа на долг рок. Повеќе од ова не можеше – додава тој.

Биографот Џонатан Димблби (Jonathan Dimbleby) смета дека говорот содржел скриен укор кон трампизмот и елоквентен повик за зачувување на демократијата и владеењето на правото.
Тој додава дека односите меѓу Европа и САД се поважни од кога било.

– Нема ништо во говорот што „Број 10“ не би го одобрил; голем дел е изработен токму од владата и Форин офис – изјави Димблби за Би-би-си.

Поранешниот амбасадор Ким Дарок (Lord Darroch) оценува дека говорот бил храбар, одлучен и навистина одличен – иако без директни напади, полн со индиректни укори. Тој ги посочува темите како климатските промени и поддршката на НАТО за САД по нападите на 11 септември како суптилни сигнали, спротивни на ставовите на Трамп.

Реакции од републиканците

Републиканскиот конгресмен Мајкл Баумгартнер (Michael Baumgartner) оцени дека Чарлс завршил одлична работа за Велика Британија, но воедно додаде:

– Не се важни зборовите, туку делата. Ќе треба да видиме конкретни чекори од британскиот народ за исполнување на тие ветувања. Во кралот видовме токму тоа што традиционално го очекуваме од Велика Британија – рече Баумгартнер.

КРАЛОТ ЧАРЛС ТРЕТИ МУ ОДРЖА ЛЕКЦИЈА НА ДОНАЛД ТРАМП Брилијантниот британски хумор го освои Конгресот

The post КАКО СЕ KАЛЕШЕ ГОВОРОТ ЗА КРАЛОТ ЧАРЛС ВО КОНГРЕСОТ Тимската работа вроди брилијантен плод appeared first on plusinfo.mk.

Шокира фактот дека во 2025 имало 4.745 пријави за семејно насилство и шест случаи на убиство, а за два месеца во 2026 – веќе четири случаи на фемицид. Овие алармантни бројки се слика на општество во коешто е загрозено најосновното човеково право – правото на живот. Не цитирам статистика, туку нотирам пораз на институционалната превенција и навремената акција. Зад бројките се кријат животни приказни, семејни трагедии, неостварени соништа. Ова го нагласи претседателката Гордана Сиљановска Давкова, на пленарната седница во Собранието „Правата и можностите на жените – достигнувања и перспективи“, која секоја година се одржува по повод Меѓународниот ден на жената 8 Март.

– Страшно е секој 8 Март, да броиме нови жртви, да презентираме најнови статистики, да дебатираме за политики, да усвојуваме стратегии, посочувајќи ги истите проблеми, презентирајќи брутални статистики, предлагајќи претходно предложени, но непреземени мерки и активности. И овој 8 Март, непосредно по несфатливата смрт на Ивана и на Катја, тешко ми е да го доживеам како Ден на жената! Симболиката на празникот се изгуби во мракот на суровата, непоимлива и неприфатлива реалност – рече претседателката.

Таа посочи дека кучен момент е оној на пријавувањето и ако жената се соочи со човек којшто ѝ влева разбирање, поддршка, сигурност и надеж, таа ќе се охрабри да се избори за себе, ама ако биде пречекана од профил, за кој навредувањето и тепањето се дел од заедницата, ќе се посомнева во ефектите од преземениот чекор и ќе трпи. Затоа, посочи Сиљановска Давкова, обучените и сензибилизираните полицајци, социјални работници и судии се активни спасители или пасивни соучесници во делото.

– Зарем сè уште не сфативме и не научивме дека фемицидот не е ненадеен изблик на гнев, туку врв и крај на долг, мачен процес на психолошки притисок, манипулација, тортура, страв, неизвесност и малку желби и надеж. До кога post festum ќе ламентираме и ќе тагуваме, наместо навреме да спречуваме и соодветно да санкционираме и да се радуваме со потенцијалните, но спасени жртви? Што стана со уставната обврска за посебната грижа и заштита на семејството? – запраша Сиљановска Давкова.

Претседателката од собраниската говорница запраша како е можно институциите да се имуни на предупредувачките сигнали, зошто системот на социјална заштита, полицијата, обвинителството и судството не реагираат навреме и до кога ќе ги менуваме законите, наместо оние што не ги применуваат?

Таа нагласи дека не е доволно во Кривичниот законик да се предвиди кривично дело фемицид, кога толку често доаѓа до преквалификација, ако надлежните не постапуваат по службена должност, иако измените на Кривичниот законик тоа го овозможуваат, ако се преферира условната казна, наместо највисоката.

– Зошто честопати, владеењето на правото се трансформира во владеење на насилните мажи? Не е доволно да потпишете документ и да го ратификувате, славејќи го достигнувањето – рече Сиљановска Давкова.

Таа потсети дека со ратификацијата на Истанбулската конвенција државата презела обврска да воспостави сеопфатен и функционален систем на превенција, заштита и санкционирање, заснован на разбирањето дека насилството врз жените е поврзано со структурната нееднаквост.

– Не дозволувајте одбележувањето на 8 Март да се сведе на протоколарна форма којашто ќе го исцрпи своето значење во симболични гестови и пригодни зборови. Розите коишто денес ќе ја разубават просторијата, утре тивко ќе почнат да ја губат свежината, а вниманието коешто трае еден ден не е доволно. Жените не очекуваат привремена, празнична галантност, врзана за празничниот ден, туку трајна сигурност што произлегува од стабилен, функционален и правичен систем – нагласи Сиљановска Давкова.

The post ОВА Е ПОРАЗИТЕЛЕН 8 МАРТ Сиљановска Давкова критикуваше дека е недоволна заштитата на жените appeared first on plusinfo.mk.

Американскиот претседател Доналд Трамп постави нов рекорд со своето обраќање за состојбата во земјата, одржувајќи говор пред Конгресот кој траеше речиси два часа.

Неговото излагање траеше 1 час и 48 минути, со што ги надмина сите претседатели откако почна да се води евиденција во 1964 година, покажуваат податоците на „American Presidency Project“.

Претходниот рекорд од околу 1 час и 29 минути го држеше демократот Бил Клинтон за време на неговото обраќање во 2000 година.

Америка е посилна од кога било досега

Американскиот претседател Доналд Трамп синоќа се пофали на почетокот од своето обраќање за состојбата во САД.

– Нашата нација е повторно поголема, подобра, побогата и посилна од кога било досега. Ова е златното доба на Америка – изјави Трамп пред двата дома на Конгресот во Вашингтон, осврнувајќи се на достигнувањата на неговата администрација откако стапи на должност во јануари 2025 година.

Ова обраќање за состојбата доаѓа во особено значајна година за Соединетите Американски Држави, кои слават 250 години од Декларацијата за независност во јули.

Цврсти имиграциски политики

Американскиот претседател ги бранеше своите цврсти имиграциски политики.

– Првата должност на американската влада е да ги заштити американските граѓани, а не илегалните странци – порача тој.

Американскиот претседател (79) ги прекори демократите велејќи: „Треба да ви биде срам што не се спротивставивте“. Ова доведе до дофрлања од демократскиот табор, пренесе ДПА.

Бруталните пресметки на Трамп со имигрантите спроведени од американската Агенција за имиграција и царина (ИЦЕ) предизвикаа масовни протести против рациите во многу градови, вклучително и Минеаполис во Минесота, каде двајца американски граѓани (Рене Гуд и Алекс Прети) беа убиени во јануари за време на операциите „Metro Surge“.

Демократската претставничка Илхан Омар од Минесота викаше „Убивате Американци“ и „Убивте Американци“, како одговор на коментарите на Трамп. Таа исто така го нарече претседателот „лажго“ кога тој ја обвини сомалиската заедница во Минесота за измама од 19 милијарди долари.

Трамп исто така ги повика демократите да го одобрат предлог-законот воведен од републиканците за реформа на изборниот систем – таканаречениот „SAVE America Act“. Меѓу другото, нацрт-законот предвидува дека граѓаните мора да приложат документи како доказ за американско државјанство при регистрација за гласање.

Во Соединетите Американски Држави не постојат национални правила за тоа како се идентификуваат избирачите при гласање. Гласачките права се првенствено работа на сојузните држави.

Иран никогаш нема да има нуклеарно оружје

Трамп рече дека никогаш нема да дозволи Иран да има нуклеарно оружје.

– Мојот избор е да се реши овој проблем преку дипломатија. Но, едно е сигурно, никогаш нема да дозволам спонзорот број еден на теророт во светот, што тие се убедливо, да има нуклеарно оружје – рече Трамп.

Трамп рече дека сè уште не добил никаква обврска од иранската влада дека ќе се откаже од нуклеарното оружје.

The post ТРАМП ГО УРНА РЕКОРДОТ НА КЛИНТОН СО СВОЈОТ ГОВОР Ова е златното доба на Америка! appeared first on plusinfo.mk.

Поп-ѕвездата Кети Пери и поранешниот канадски премиер Џастин Трудо го привлекоа вниманието на новинарите во Давос, каде што се одржува Светскиот економски форум.
Овојпат, Пери седеше во првиот ред, а Трудо на сцената кадешто зборуваше за важноста на меката моќ и пристапот усмерен на човекот во геополитиката. Потоа, двајцата го напуштија местото држејќи се за раце.

Врската очигледно се развива во вистинска насока и парот споделува се повеќе заеднички моменти. За време на празниците пејачката објави фотографии на кои тие споделуваа романтични моменти.

Да потсетиме, гласините за романсата на Пери и Трудо започнаа во текот на летото, кога беа забележани на состанок во Монтреал. Извори подоцна тврдеа дека Трудо бил особено упорен и патувал да ја види за време на нејзините паузи од турнеите, а во декември беше објавено дека врската станала посериозна.

The post КЕТИ ПЕРИ ВО ПУБЛИКА, ЏАСТИН ТРУДО НА СЦЕНА Пејачката го следеше говорот на својот партнер на Светскиот економски форум во Давос appeared first on plusinfo.mk.

Од овој конгрес испраќаме една порака што треба да одекне низ секој град, секое село, секое семејство и секое срце: Македонија може, Македонија знае, Македонија ќе успее. Со визија, со работа, со единство. Со сила што не се гледа само во говори, туку во секојдневното креирање просперитет. Нашата задача не е да ветиме иднина, туку да ја создадеме. А, ако стоиме цврсто, обединети и сигурни во правецот, тогаш иднината ќе личи на нас, а не ние на неа – рече во своето обраќање на денешниот XVIII конгрес на ВМРО-ДПМНЕ, претседателот Христијан Мицкоски.

Тој додаде дека денес се затвора една етапа на неизвесност и се отвора деценијата на зрелоста, на растот и развојот на Македонија.

– Денес, пред оваа сала, ја затвораме една етапа на неизвесност и ја отвораме деценијата на зрелоста. Деценија во која државата не само што ќе опстане, туку ќе расте, ќе се стабилизира, ќе напредува, ќе стане пример. Деценија во која ќе покажеме дека политиката може да биде чесна професија, дека лидерството може да биде служба, а државата заеднички дом што го чуваме и го градиме со љубов, упорност и дисциплина – рече Мицкоски.

Мицкоски посочи дека ова е нашата обврска, нашата чест и нашата заедничка мисија, повикувајќи на поддршка за стратешките документи, визија и планови кои ќе носат на партискиот Конгрес.

– Секое време бара прилагодување. Ние мора да се прилагодиме на времето кое доаѓа и на генерацијата на која мораме да и дадеме шанса. Ова е словото врз кој е го темелиме идниот развој. Заедно и обединети, за визија која ќе ја гради државата и заедничката иднина. Ве повикувам да ја поддржите оваа стратегија и пропратните доктринарни, стратешки документи, визија и планови – повика Мицкоски.

Претседателот на ВМРО-ДПМНЕ рече дека визијата „Македонија 2030“ е визија за стабилна, продуктивна, правична и европски позиционирана држава, со економија што расте на знаење и труд, со институции што опстојуваат над политичките циклуси, со самосвесен национален идентитет, со зелен и технолошки развој, и со општество што верува во заедничката иднина.

Претседателот Мицкоски, истакна дека „Македонија 2030“ не е декларативен документ, туку темелна политичка рамка. Мицкоски потенцираше дека реализирањето на оваа визија бара сериозна, континуирана и одговорна политика која ја става државата пред дневната партиска добивка.

– Периодот 2025–2030 е стратешка раскрсница за државата. Во свет на променети геополитички рамнотежи, нови економски модели и еволуирани демократски стандарди, Македонија може да напредува само ако има политичка сила што води со јасна визија и со чувство за историскиот момент – рече Мицкоски.

Тој продолжи дека ВМРО-ДПМНЕ, како најголем носител на државноста, ја презема таа улога со целосна свест за одговорноста која ја носи секој следен чекор.

– Партијата влегува во новата декада со уверување дека политичката зрелост не се мери со реторика, туку со способност да се трасира правец што ја штити државата денес и ја јакне за утре. Визијата за современа Македонија почива на јасни принципи: држава што го чува својот идентитет; држава што ја брани својата суверена позиција; држава што ја гради својата европска перспектива врз основа на партнерства, реформи и достоинствено претставување – рече Мицкоски.

The post МАКЕДОНИЈА МОЖЕ, МАКЕДОНИЈА ЗНАЕ, МАКЕДОНИЈА ЌЕ УСПЕЕ! Завршна порака на Мицкоски од Конгресот во Кавадарци appeared first on plusinfo.mk.

Христијан Мицкоски, претседателот на ВМРО-ДПМНЕ, на отворањето на денешниот 18. Конгрес на партијата кој се одржува во спортскиот комплекс ,,Јасмин” во општина Кавадарци под мотото „Визија што гради држава – За генерацијата што доаѓа 2030″, имаше свое обраќање и се осврна на темата за државноста. Тој истакна дека наследството за јазик, државност и културната самобитност создаваат три обврски за денешната генерација, а самото историско наследство е најсилен мотив државата да биде поефикасна и поорганизирана.

– Историското наследство на македонската државност не е сентимент или украс. Тоа е обврска. Од Илинденската идеја, преку АСНОМ, до независноста во 1991 година, секоја генерација ја има истата должност: да ја штити државата институционално, безбедносно, економски и културно. Историјата не е товар, туку темел врз кој се гради современата национална самодоверба – рече Мицкоски.

Мицкоски трите обврски на денешната генерација се континуитет, модернизирање и достоинството на македонската државност и идентитет.

– Наследството на борбата за слобода, јазик, државност и културна самобитност создава три обврски за денешната генерација: прво, да се зачува континуитетот и достоинството на државноста и идентитетот , да се модернизира државата така што ќе биде отпорна на надворешни притисоци и внатрешни слабости, и трето да се спречи злоупотребата на историјата за дневнополитички цели – кажа Мицкоски и додаде:

,,Во 21 век, историското наследство не може да биде изговор за застој. Напротив, тоа е најсилен мотив државата да биде поефикасна, поорганизирана и повредносно кохерентна. Жртвите и идеалите на претходните генерации ја прават сегашната неефикасност, институционална слабост или корупција уште понедозволиви”.

Премиерот и претседател на ВМРО-ДПМНЕ рече дека денеска не зборуваме за бројки, туку зборуваме за обнова на македонската самодоверба.

– Денес, тука, не зборуваме само за програми, за платформи, за бројки или мерки. Зборуваме за нешто поголемо. За обновата на македонската самодоверба. За враќање на чувството дека оваа земја не е случајност, туку наследство, не е експеримент, туку победено право, не е компромис, туку завет од генерации што се бореле за да постоиме ние. И затоа, нашиот повик денес е повисок од политиката. Тој е повик да престанеме да бидеме публика во сопствената држава. Да престанеме да дозволуваме стравот, цинизмот или навиката да го определуваат нашиот пат. Македонија не смее да живее во дефанзива. Таа мора да застане исправено, со достоинство, со јасна мисла и со волја што не се крши – рече Мицкоски.

Затоа, додаде Мицкоски, денес ја обновуваме големата идеја, дека државата е заеднички дом на сите, но обврска пред секого, дека слободата не е подарок, туку дисциплина, дека модерната Европа не е географија, туку вредност и дека напредокот не доаѓа од оние што чекаат, туку од оние што тргнуваат да го создадат.

– Ние сме тие што мора да тргнат. Затоа што никој од надвор нема да ни ја изгради државата, ниту ќе ни ја заштити историјата, ниту ќе ни ја напише визијата. Тоа е наша чест, наша должност и наша генерациска мисија. А ако нешто научивме во сите овие години, тоа е дека Македонија не паѓа кога е тешко, паѓа кога се откажува. Денес одбиваме да се откажеме. Одбиваме да ја прифатиме идејата дека малата држава мора да има мали амбиции. Одбиваме да веруваме дека нашите деца треба да си заминат од овде за да успеат, одбиваме да ја прифатиме приказната дека Македонија е премногу мала за големи работи. Напротив. Македонија е доволно голема колку што е голема нашата волја да ја направиме подобра. И денес таа волја постои. Зрела е. Посилна од било кога. Затоа што денес не почнуваме нешто ново, денес продолжуваме нешто започнато пред генерации. Го продолжуваме стремежот за државност, за достоинство, за место под сонцето што никој не може да ни го одземе – истакна Мицкоски.

Нека се слушне од оваа сала, посочи Мицкоски, до секој дом во земјава, дека ова е времето на создавање не на чекање, на визија не на страв, на обединување не на пресметки, на изградба не на извинување.

– Македонија влегува во деценијата на зрелост. А ние, собрани денес, сме должни да бидеме генерацијата што ќе ја постави темелната линија, дека државата може, дека државата знае и дека државата ќе успее. Ова е нашето ветување. Ова е нашиот завет и ова е нашата мисија – порача Мицкоски.

The post ИСТОРИСКОТО НАСЛЕДСТВО НА МАКЕДОНИЈА Е ОБВРСКА, А НЕ УКРАС ИЛИ СЕНТИМЕНТ Мицкоски на отворањето на Конгресот на ВМРО-ДПМНЕ во Кавадарци appeared first on plusinfo.mk.

Претседателот на Одборот на БИ-БИ-СИ, Самир Шах, официјално се извини за начинот на кој бил уреден говорот на американскиот претседател Доналд Трамп во документарецот „Панорама“, нарекувајќи го тоа „грешка во проценката“, додека Трамп најави и правна акција.

Извинувањето доаѓа по силни критики и протекувањето на интерна белешка, која доведе до оставки на генералниот директор на БИ-БИ-СИ и извршната директорка на вестите.

Во писмената изјава испратена денеска до собраниската Комисија за култура, медиуми и спорт, Шах, кој беше назначен на функцијата од 4 март 2024 година до 3 март 2028 година, ја призна грешката. „Прифаќаме дека начинот на кој беше уреден говорот остави впечаток на директен повик за насилно дејствување“.

По објавувањето на интерната белешка од поранешниот советник Мајкл Прескот, БИ-БИ-СИ примил над 500 поплаки. Во белешката на Прескот се тврди дека монтажата е „целосно погрешна“ и дека јавноста е доведена во заблуда бидејќи изгледало дека Трамп експлицитно ги поттикнува немирите

Споредбата на оригиналните и монтираните снимки покажува како БИ-БИ-СИ селективно го монтирала говорот на Доналд Трамп, што резултираше со обвинување дека организацијата направила да изгледа појасно дека тој го охрабрил нападот врз американскиот Капитол. Издание на Панорама, емитувано една недела пред изборите во САД во 2024 година, споило клипови од говорот на Трамп одржан на 6 јануари 2021 година. Споеното видео сугерира дека Трамп ѝ рекол на толпата: „Ќе одиме до Капитол и јас ќе бидам таму со вас и ќе се бориме. Ќе се бориме до пеколот“. Зборовите се земени од делови од неговиот говор со разлика од речиси еден час. Во монтажата бил изоставен делот каде што Трамп, говорејќи за маршот до Капитол, изјавил дека сака неговите поддржувачи „мирно и патриотски да направат нивниот глас да биде слушнат“.

Набргу по објавувањето на писмената изјава, БИ-БИ-СИ Вести објави дека претседателот Трамп испратил писмо до корпорацијата во кое се заканува со правна акција. Шах, во интервју за БИ-БИ-СИ Њуз, изјави дека добиле комуникација од тимот на Трамп и размислуваат како да одговорат, додавајќи дека бидејќи Трамп е „склон кон судски спорови“, треба да бидат подготвени за сите исходи. Шах потенцираше дека размислува и лично да му се извини на Трамп.

Шах најави низа потези за зајакнување на процесот на надзор и обезбедување „појасна одговорност“, не само во информативната, туку и во другите програми на сервисот.

The post БИ-БИ-СИ СЕ ИЗВИНУВА, ТРАМП ЌЕ ТУЖИ Монтажата била „грешка во проценката“!? appeared first on plusinfo.mk.