Силни навреди и тежок говор на омраза кон македонските власти и кон македонските граѓани упатија дел од националистичките и радикални бугарски политичари откако Македонија распиша меѓународна потерница по бегството на Ива Михаилова на која во земјава ѝ се суди за сообраќајна несреќа со смртни последици.

Лидерот на партијата „Има таков народ“, Слави Трифонов, отиде најдалеку, со отворено негирање на македонскиот национален идентитет и пораки за претопување на Македонците. Трифонов го оспори правото на Македонците на сопствен национален идентитет и тврди дека Бугарија нема да ја предаде Михаилова на македонските власти.

„Навистина ми се повраќа од овие патетични искомплексирани луѓе, кои се крадци на бугарската историја“, напиша Трифонов, напаѓајќи ги македонските политичари. Тој ги нарече Македонците „Северномакедонци“ и го негираше нивниот идентитет.

„Како и да се нарекувате себеси – вие сте Бугари. Отсекогаш сте биле и секогаш ќе бидете. А конкретно вие во Северна Македонија, каде што ме слушате или ме читате токму сега, порано или подоцна, ќе клекнете и ќе се претопите“, рече Трифонов.

Ваквите изјави претставуваат директен напад врз националното самоопределување на Македонците.

Трифонов тврди дека Михаилова ќе остане во Бугарија.

„Ние, Бугарите, не предаваме!“, напиша тој, порачувајќи дека не верува оти постои бугарски функционер што би ја предал на Македонија.

Каракачанов го навреди Мицкоски

Поранешниот бугарски вицепремиер и министер за одбрана, Красимир Каракачанов, го искористи случајот за навредливи напади врз македонските власти. Во настап за телевизијата „Бугарија он ер“ на 13 октомври, тој изјави дека Скопје со години ја клевети Бугарија и дека тој не им верува на македонските политичари.

– Не верувам во ништо што кажуваат политичарите од Скопје. На тие луѓе не може да им се верува – изјави Каракачанов.

Тој ги нарече македонските власти измамници, а премиерот Христијан Мицкоски го нападна со лична навреда, нарекувајќи го „еден простак што се прави дека е премиер на соседна држава“.

Партијата ВМРО-БНД, предводена од Каракачанов побара целосно замрзнување на разговорите за европската интеграција на Македонија. Во соопштението објавено на 14 октомври, партијата побара од бугарските институции да ги отфрлат македонските барања за екстрадиција и судска соработка во случајот Михаилова.

„Нема преговори, нема укинување на ветото под никаков притисок, додека Скопје не стави крај на својот физички, административен и судски терор врз македонските Бугари“, се наведува во партиската реакција.

Ултрадесничарската „Преродба“ ја спореди Михаилова со Груевски

Ултрадесничарската бугарска партија „Преродба“ остро се спротивстави на екстрадицијата на Ива Михаилова. Пратеникот Коста Стојанов од собраниската говорница ја обвини Македонија за политичко лицемерие, споредувајќи го случајот со бегството на поранешниот премиер Никола Груевски.

– Политичко лицемерие е да се затвораат очите пред злосторствата на Груевски за милиони, а да се обвинува невино бугарско девојче – изјави Стојанов, пренесе бугарската новинска агенција БТА.

Партијата побара од бугарската влада да не ја екстрадира Михаилова и да ѝ обезбеди правна, дипломатска и конзуларна заштита. Со тоа „Преродба“ се приклучи на бугарските политички сили што се противат на нејзиното предавање на македонските власти.

Бугарија ја одби екстрадицијата

Ива Михаилова, која има и македонско и бугарско државјанство, е обвинета во Македонија за сообраќајна несреќа со смртни последици. По нејзиното бегство во Бугарија, Основниот суд во Кочани на 13 октомври ѝ определи притвор.

Истиот ден МВР распиша централна и меѓународна потерница по Ива Михаилова, а преку Интерпол – Скопје испрати и барање до Бугарија за нејзино апсење и екстрадиција.

Бугарското МВР потврди дека го примило барањето, но соопшти дека нема да преземе мерки за нејзино лоцирање, повикувајќи се на уставните одредби и правото да одбие екстрадиција на сопствен државјанин, без да објави формална одлука за одбивање.

The post БУГАРСКИ РАДИКАЛИ СО ЖЕСТОК ГОВОР НА ОМРАЗА КОН МАКЕДОНИЈА ЈА БРАНАТ БЕГАЛКАТА МИХАИЛОВА Потерницата по Ива го разбуди националистичкото лудило во Софија appeared first on plusinfo.mk.

Лидерот на СДСМ Венко Филипче губи контрола, со навреда кон премиерот, го нарече идиот. Ова е срам за македонската политичка сцена, за СДСМ и за Филипче како нејзин претседател – рече Никола Мицевски, пратеник и координатор на Пратеничката група на ВМРО-ДПМНЕ.

– Вакви срамни навреди кон претседател на Влада не и доликуваат на една опозиција која претендира да биде некогаш власт. Ова е говор на омраза и говор на човек кој очигледно се наоѓа во сериозна криза и сложена состојба.

Филипче, манифестира силен страв и остава впечаток дека е притиснат од внатрешни поделби и притисоци. Ова е говор на уценет човек. Ова не е речник што доликува на доктор и на човек кој е дел од академската заедница.

Секој нека се запраша: дали би му довериле одговорност и управување со вашите животи на човек кој во јавната комуникација употребува вокабулар како „идиот“? Дозволете да констатирам дека ваквиот вокабулар не доликува на професор, доктор и политичар – рече Мицевски.

Како координатор на пратеничката група на ВМРО-ДПМНЕ Мицевски рече дека, заедно со пратениците, јасно го осудува говорот на омраза на пратеникот Венко Филипче.

– Навистина сме загрижени. Ова не е само прашање на воспитување, туку и на начинот на кој се однесува под политички притисок. Зошто е толку нервозен и зошто инсистира на капитулација пред Бугарија? Суштината на неговиот денешен испад и недоличното манифестирање и невоспитано однесување, не е во тоа дали Исланд е дел од заедничкиот европски пазар. Прашањето е дали презел политички обврски што сега не може да ги исполни и дали токму тоа е причината за ваквата нервоза. Инаку, Зошто толкава возбуда околу прашањето дали Исланд е дел од европскиот пазар? Тоа не е суштината – рече Мицевски.

Пратеникот Антонио Милошоски исто така го осуди речникот на лидерот на СДСММ.

– Ова е недоличен говор за еден професор и претседател на партија. Ваков вокабулар („таков идиот, комплетен”) и навреди повеќе се одлика на нервозен и уценет човек, наместо на опозиционен политичар кој има амбиција да биде премиер на држава. Гневот и омразата никогаш не со добри сојузници во јавните настапи. Загрижувачки – рече Милошоски.

The post ОД СТРАВ ИЛИ ОД УЦЕНЕТОСТ, ФИЛИПЧЕ СРАМНО ИЗГУБИ КОНТРОЛА Силни осуди за говорот на омраза и недоличниот речник на лидерот на СДСМ appeared first on plusinfo.mk.

Полицијата го расчисти случајот со видеото на ТикТок на кое се гледа палење на македонското знаме. Утврдено е дека авторот на профилот е малолетник под 14-годишна возраст од Тетово.

Случајот го расчистиле Секторот за внатрешни работи Тетово – Одделението за компјутерски криминал, во координација со Секторот за компјутерски криминал и дигитална форензика при Министерството за внатрешни работи.

Видеото било откриено на 22 септември, при мониторинг на социјалните мрежи. Од МВР велат дека со содржината било сторено кривично дело „предизвикување омраза, раздор или нетрпеливост врз национална, верска и друга дискриминаторска основа“, предвидено и казниво според член 319 став 1 од Кривичниот законик.

По преземените оперативни мерки, на 23 септември бил утврден идентитетот на авторот на профилот.

Со малолетникот бил извршен службен разговор во полициските простории, во присуство на негов родител и претставници од Центарот за социјална работа Тетово. Според МВР, малолетникот го признал делото.

Со согласност на родителот, за потребите на постапката и фотодокументирањето на доказите, полицијата го обезбедила мобилниот телефон од кој било поставено видеото.

Во текот на разговорот, малолетникот посочил уште три малолетни лица кои, според неговите наводи, учествувале во настанот. Од полицијата најавуваат дека тие дополнително ќе бидат повикани во полициска станица за целосно расчистување на случајот.

По целосното документирање на предметот, МВР најавува дека до надлежното Основно јавно обвинителство Тетово ќе биде поднесен соодветен поднесок.

Бидејќи станува збор за лице помладо од 14 години, натамошното постапување се спроведува согласно законските правила што се однесуваат на малолетни лица.

The post 📽️ ВИДЕОТО СО ЗАПАЛЕНОТО МАКЕДОНСКО ЗНАМЕ ГО ОБЈАВИЛ ТЕТОВСКИ МАЛОЛЕТНИК Полицијата го расчисти настанот во кој учествувале уште три деца appeared first on plusinfo.mk.

ВМРО-ДПМНЕ е згрозена од морбидните и нечовечки пораки кои се шират од профил кој во јавноста се поврзува со структури блиски до Венко Филипче и СДСМ, се вели во соопштение на партијата.

„Во време кога целото општество се простува од големиот македонски актер Гоце Тодоровски, крајно вознемирувачки и неприфатливо е некој да се радува на неговата смрт, а истовремено да упатува пораки со кои посакува смрт на други луѓе, во случајов на Богдан Илиевски.

Написот на објавената фотографија од актерските великани Ванчо Петрушевски, Гоце Тодоровски и Богдан Илиевски, на кој се вели дека двајцата, сега веќе покојни глумци, „двајца долу, уште еден остана”, е јасна морбидна порака за посакување смрт на млад човек, јавна личност и новинар.

Ова не е политика, ова е дно на човечноста и опасен говор на омраза кој не смее да се премолчи или да се релативизира. Бараме надлежните институции веднаш да реагираат и да постапат согласно законите за да го истражат случајот и да го идентификуваат профилот.

Од друга страна, очекуваме и Венко Филипче и раководството на СДСМ јавно да се оградат од ваквите морбидни пораки кои доаѓаат од профили, зад кои стојат луѓе блиски до нив. Никој не смее да биде над законите и за ваквите постапки мора да има одговорност, без разлика кој стои зад нив и на која политичка опција ѝ припаѓа“ – се вели во соопштението на ВМРО-ДПМНЕ.

ПРОФИЛ БЛИЗОК НА ФИЛИПЧЕ И НА СДСМ СЕ РАДУВА НА СМРТТА НА ГОЦЕ ТОДОРОВСКИ Посакува смрт на Бетмен Велит

The post ЗГРОЗЕНИ СМЕ ОД МОРБИДНИТЕ ПОРАКИ НА ПРОФИЛ БЛИЗОК ДО ФИЛИПЧЕ И СДСМ Институциите веднаш да постапат и да има одговорност appeared first on plusinfo.mk.

Повеќе интернет-портали и фејсбук-страници на македонски јазик кои се дизајнирани да наликуваат на медиумски редакции од земјава се, всушност, експозитури на бугарската „Фондација Македонија“ на контроверзниот Виктор Стојанов, објави порталот „360 степени“ во свое истражување.

Речиси 140 илјади профили ги следат овие страници само на Фејсбук. Најголем дел од содржините пласирани во оваа мрежа на портали и страници на социјалните медиуми се вообичаени, но дел се презентирани на начин што предизвикуваат жестоки дебати за односите меѓу Македонија и Бугарија, за односите меѓу Македонците и Албанците и слично.

За илустрација, на сите пет страници, на 13 јули 2026 година е објавен дел од интервју на Арбен Таравари за поткастот „Почетна пресметка“, со наслови од типот: „Таравари: Македонците немаат поблизок народ од Бугарите, мора да го сфатат тоа“ или „Бугарите апсолутно треба да влезат во Уставот, сметам дека и ВМРО го има истиот став“.

Овие провокативни наслови, со пробугарски агол, предизвикуваат стотици полемични коментари, но и навреди на национална основа. Тоа се случува неколкупати дневно. Формулата е иста – објава на содржина со провокативен наслов за меѓудржавни или меѓуетнички односи, по што редовно доаѓа јавна препирка што ескалира во навреди и говор на омраза во коментарите.

Овие фејсбук страници, чии сопственици, според правилата на Фејсбук, не се јавно достапни, споделуваат вести од шест портали од кои пет се регистрирани во Македонија.

Според податоците достапни на македонскиот интернет провајдер МАРНЕТ, vestimak.mk и vestimk.mk ги регистрирал извесен Александар Смиљков. Иако се две засебни веб-страници, е-адресата за контакт е иста: vestimak.mk@gmail.com. Другите три веб-страници – 24mk.mk, mk24.mk и utre.mk ги регистрирало лицето Асен Петровски. Иако се три засебни веб-страници, е-адресата за контакт е иста: v4vfoundation@yahoo.com.

Во својата анализа „360 степени“ потсетува дека на 4 март 2026 Јавното обвинителство соопшти дека е отворен предмет за „ширење расистички и ксенофобичен материјал по пат на компјутерски систем“, за што е осомничено едно лице, чие име не беше наведено, но од неофицијални извори повеќе портали објавија дека станува збор за Виктор Стојанов, основачот на Фондацијата „Македонија“.

На барање на „360 степени“ Јавното обвинителство одговорило дека „постапката е во тек, се обезбедуваат докази и се вршат вештачења“. Според неофицијални извори од истрагата, над 20 портали во земјава се под лупа на МВР и АНБ за ширење говор на омраза.

The post ГЛУМАТ МАКЕДОНСКИ ПОРТАЛИ И ФЕЈСБУК ПРОФИЛИ, А ШИРАТ ОМРАЗА КОН МАКЕДОНЦИТЕ Еве кои се бугарските медиумски орудија впрегнати во антимакедонската агенда appeared first on plusinfo.mk.

Шведската европратеничка Абир ал-Сахлани поднесе полициска пријава против данскиот европратеник Кристофер Сторм, тврдејќи дека станала жртва на расистички говор на омраза по жестока расправија околу миграциската политика во Европскиот парламент. Таа вели дека по инцидентот се чувствува понебезбедно од кога било досега и предупредува дека атмосферата во европските институции драматично се влошува.

Случајот започнал по гласањето за построги правила за депортација на мигранти. Според Ал-Сахлани, дел од европратениците од крајната десница почнале да скандираат „Испратете ги назад“, што таа го оценила како нечовечка и опасна порака насочена кон луѓето со мигрантско потекло. Во јавна објава ги нарекла „фашисти од крајната десница“ и предупредила дека ваквата реторика го поткопува достоинството на Европскиот парламент.

Набргу потоа, данскиот европратеник Кристофер Сторм на социјалните мрежи ѝ одговорил со пораката „Оди дома“. Ал-Сахлани, која е родена во Ирак и како дете дошла во Шведска, оценила дека таквата порака не може да се сфати поинаку освен како расистичка навреда, поради што решила случајот да го пријави во полиција.

Таа објаснила дека не покренала постапка против сите што ја навредувале, туку само против данскиот колега, бидејќи смета дека токму неговата изјава има елементи на говор на омраза. Друг европратеник, Финецот Себастијан Тинкинен, исто така ја нападнал на социјалните мрежи, но неговата порака не била предмет на пријавата.

Кристофер Сторм категорично ги отфрла обвинувањата. Тој тврди дека неговата порака не била мотивирана од раса или етничко потекло, туку претставувала политички одговор на, како што вели, навредливите квалификации што Ал-Сахлани ги упатила кон десничарските европратеници. Според него, не станува збор за говор на омраза, туку за политичка полемика.

Ал-Сахлани изјави дека во последните денови добива и бројни закани и навредливи пораки, поради што признала дека никогаш досега не се чувствувала толку небезбедно како сега. Според неа, ваквите напади не се насочени само кон неа лично, туку и кон сите припадници на малцинските заедници кои се активни во европската политика.

Нејзината политичка група „Обнова на Европа“ јавно застана зад неа и го осуди инцидентот. Поддршка изрази и претседателката на Европскиот парламент Роберта Мецола, која порача дека говорот на омраза и заплашувањето немаат место во европските институции и најави дека ќе бидат разгледани можни дисциплински мерки.

The post ШВЕДСКА ЕВРОПРАТЕНИЧКА ВО ПОЛИЦИЈА ПРИЈАВИЛА КОЛЕГА ОД ДАНСКА Ги обвинила „фашистите од крајната десница“ и сега се чувствува небезбедно appeared first on plusinfo.mk.

Францускиот напаѓач се огласи откако сенаторката Селесте Амариља објавила серија навредливи пораки по натпреварот меѓу Франција и Парагвај на Светското првенство.

Мбапе порача дека ставовите на Амариља не се одраз на вредностите на Парагвај и на луѓето кои ја поддржувале својата репрезентација на шампионатот.

„Вие не го претставувате Парагвај, земја која покажа страст, борбен дух и чест во текот на целото натпреварување“, навел францускиот репрезентативец.

Тој оцени дека нејзините настапи го засениле историскиот успех на парагвајската селекција.

„Поради вашата неодговорност и отворен расизам, целиот свет веќе го заборави патувањето и успехот на парагвајските фудбалери. Наместо тоа, во центарот на вниманието се најде некомпетентна жена која испраќа лоша слика за својата држава“, порача Мбапе.

Расистички пораки по натпреварот

Според медиумските извештаи, сенаторката по натпреварот објавила повеќе навредливи пораки насочени кон француската репрезентација и лично кон Мбапе откако Мбапе поситгна гол од пенал за победа на Франција(1-0).

Таа го нарече „колонизиран Камерунец кој очајно се обидува да се претстави како Французин“, додаде дека е „арогантен, новопечен богаташ и грдосија“, како и дека е „насилник кој не научил ни да пишува“.

Претходно, таа исто така реагираше на тоа што Мбапе не му подаде рака на парагвајскиот голман Орландо Гил по натпреварот, пишувајќи:

„Требаше да му го покажеш средниот прст, Орландо. Јас тоа го правам во Сенатот и ништо не ми е!“

„Нема да дозволам да се шири омраза“

Француската ѕвезда порача дека нема намера да молчи кога станува збор за расизам и за говор на омраза.

„Никогаш нема да дозволам луѓе како вас слободно да шират омраза и расизам низ целиот свет“, истакнал Мбапе.

Случајот повторно ја отвори дебатата за расизмот во спортот и за одговорноста на јавните личности кога настапуваат во јавноста и на социјалните мрежи.

The post МБАПЕ РАСПАЛИ ПО ПАРАГВАЈСКАТА СЕНАТОРКА ПО НАВРЕДИТЕ „Не сте достојни на функцијата и не го претставувате Парагвај“ appeared first on plusinfo.mk.

Вонреден надзор на Агенцијата за аудио и аудиовизуелни медиумски услуги утврдил дека Македонската радио-телевизија, односно Вториот програмски сервис МРТ2, го прекршил член 48 од Законот за аудио и аудиовизуелни медиумски услуги, откако во својата програма емитувал содржина што поттикнува етничка нетрпеливост. Надзорот бил спроведен по службена должност и се однесувал на емитување од 28 март, во рамки на музичката програма „Билбилите на Кораб“.

„Надзорот покажа дека спротивно на член 48 став 2 од ЗААВМУ, емитуваната содржина на МРТ2, во рамки на музичката програма „Фестивал на детска песна – Билбилите на Кораб“, поттикнува и шири нетрпеливост врз основа на национална и етничка припадност преку иредентистички симболи и експлицитни политички пораки за промовирање на моноетнички, иредентистички „аманет“ за обединување на територии“ – се вели во заклучокот на Извештајот на ААВМУ.

Предмет на анализата била изведбата на песната „Албански територии (Trojet Shqiptare)“, дел од детски фестивал снимен во 2023 година, а емитуван три години подоцна. Регулаторот оценил дека токму овој временски јаз дополнително ја засилува одговорноста на јавниот сервис, бидејќи уредничкиот тим имал доволно време да ја прегледа и евентуално да ја отстрани спорната содржина пред да ја пласира пред јавноста.

Во извештајот се наведува дека прекршувањето се однесува на законската забрана за емитување содржини што поттикнуваат дискриминација, омраза или нетрпеливост врз етничка и национална основа. Оценката е дека прикажаната програма не останала во рамките на уметнички израз, туку содржела јасни политички пораки со иредентистички карактер.

Карта на „Голема Албанија“ и територијални претензии

Клучен дел од наодите се однесува на визуелните елементи на настапот. Детето кое ја изведувало песната било облечено во маица со карта на т.н. „Голема Албанија“, а на сцената биле користени и симболи како двоглавиот орел. Според регулаторот, ваквите симболи, иако можат да имаат историски или културен контекст, во конкретниот случај биле употребени за промоција на идеја за територијално обединување.

Дополнителна тежина, според извештајот, носи и самиот текст на песната, кој содржел пораки за обединување на територии од повеќе држави во регионот, вклучително и делови од Северна Македонија. Овие пораки биле оценети како експлицитни и како директно поврзани со концепт што може да предизвика меѓуетнички тензии.

Регулаторот нагласува дека контекстот во кој е емитувана содржината е исклучително чувствителен, имајќи ги предвид регионалните прашања поврзани со идентитетот и територијалниот интегритет. Фактот што програмата била емитувана на јавен сервис со национална покриеност дополнително го зголемува нејзиното влијание врз јавноста.

Уредничкиот тим да биде земен на одговорност

Посебно е истакната одговорноста на уредничкиот тим на МРТ2, кој има крајна контрола врз програмата што се емитува. Во извештајот се вели дека пропустот не може да се смета за случаен, туку укажува на системски недостатоци во уредничката политика и во механизмите за контрола на содржината.

Анализата опфаќа и прашањето за намерата, при што се наведува дека таа може да биде директна или да произлегува од професионална небрежност. Во секој случај, емитувањето на ваква содржина се толкува како давање легитимитет на идеи што се спротивни на принципите на соживот и мултиетничка кохезија.

Во извештајот се оценува и потенцијалното влијание врз публиката, особено врз малолетниците. Се предупредува дека ваквите пораки можат да предизвикаат страв, револт или дополнително радикализирање, а користењето деца за нивно пренесување се квалификува како сериозна злоупотреба.

Говорот на омраза не е слобода на говор

Агенцијата се повикува и на праксата на Европскиот суд за човекови права, нагласувајќи дека слободата на изразување не е апсолутна и може да биде ограничена кога станува збор за говор што поттикнува омраза или ја загрозува јавната безбедност. Во конкретниот случај, се оценува дека се исполнети сите услови за такво ограничување.

Прекршен е законот за медиумиски услуги 

Заклучокот на регулаторот е дека МРТ2 со емитувањето на спорната содржина го прекршил член 48 од Законот, бидејќи поттикнал и ширел нетрпеливост врз етничка основа. Како мерка се предлага јавна опомена и обврска медиумот да го усогласи своето работење со законските одредби, по што ќе следи и контролен надзор.

Што се пее во пасната за орелот?

Во извештајот на АААВМУ се цитира и превод на песната која ја изведува 13-годишното девојче во спорната емисија:

Летај ти орел, летај, и над нашето знаме застани,
над Албанија, Косово, Улцињ и Тетово гордо исправи се ти.
Ќе дојде ден кога сите ќе бидеме заедно,
зашто нè врзува еден народ, еден јазик, една крв.
Земјата и небото ќе се обојат црвено и црно,
а ние ќе славиме во слобода.
Оваа слобода што денес ја уживаме,
нашите херои не смееме да ги заборавиме.
Тие ни оставија аманет
нашите земји да ги обединиме.
Ќе дојде ден кога сите ќе бидеме заедно,
зашто нè врзува еден народ, еден јазик, една крв.
Земјата и небото ќе се обојат црвено и црно,
а ние ќе славиме во слобода.

Целиот извештај на ААВМУ може да го прочитате на следниот ЛИНК.

МРТ ЌЕ ГО РАСЧИСТУВА СКАНДАЛОТ СО ПЕСНАТА ЗА „ГОЛЕМА АЛБАНИЈА“ Ќе се лоцира уредничката одговорност

The post ЕМИТУВАНАТА СОДРЖИНА ШИРИ ОМРАЗА И ЕТНИЧКА НЕТРПЕЛИВОСТ Агенцијата за медиуми со остра осуда за националистичката провокација со „Голема Албанија“ на МРТ2 appeared first on plusinfo.mk.

Јована Јеремиќ, контроверзната српска телевизиска водителка, се најде под забрана во Црна Гора, откако регулаторните власти одлучија да го ограничат реемитувањето на нејзините утрински емисии што се емитуваат во рамки на програмата на српската телевизија Пинк.

Одлуката значи дека програмите „Ново јутро“ и сродните формати, во кои таа е водителка, нема да можат да се реемитуваат на територијата на Црна Гора во одреден период, поради оценка дека содржините содржеле елементи што можат да поттикнат омраза и дискриминација.

Регулаторот оценил дека во повеќе изданија на емисијата биле изнесувани ставови и квалификации кои се сметаат за навредливи кон одредени национални и етнички заедници, што е спротивно на правилата за прекугранично емитување и заштита на достоинството на граѓаните.

Во образложението се наведува дека станува збор за континуитет на проблематична реторика, а не за изолиран инцидент, што ја условило мерката за привремено ограничување на реемитувањето на спорните содржини.

Случајот предизвика силни реакции во регионалната јавност, бидејќи Јеремиќ е една од најгледаните и најконтроверзни ТВ водителки во Србија, со емисија која редовно генерира висока гледаност и медиумско внимание.

Самата водителка реагираше дека мерката ја смета за политички мотивирана и дека, според неа, забраната само дополнително ќе ја зголеми популарноста на емисијата и интересот на публиката.

The post ЈОВАНА ЈЕРЕМИЌ ПОД ЗАБРАНА ВО ЦРНА ГОРА Нема веќе да шири омраза и дискриминација appeared first on plusinfo.mk.

Кога една од кандидатите за државен јавен обвинител (цинично) сугерира дека „Кога кандидат однапред се исклучува без анализа на неговата програма и професионален пат, тоа отвора прашања за природата на критериумите што се применуваат“ и дека „избор од вакво значење мора да биде заснован на квалитет, а не на подобност“, само во едно има право: во вториот дел, оној за квалитетот. Во сѐ друго греши односно измислува/конструира, емотивно реагира и некритички се самопромовира. Зошто?

Затоа што изјавата на власта вели дека „од четворицата кандидати за кои Советот на јавни обвинители даде позитивно мислење, на владината листа сега се три имиња, а меѓу нив не е и бившата обвинителка од СЈО…“! Тоа ќе рече дека немало исклучување „однапред“ туку – одназад, после разгледувањето, или анализата, како сакате, на понудените кандидати за кои Советот на јавни обвинители дал позитивно мислење. И што е тука спорно, кој вели односно каде пишува дека Владата не ценела програми и професионален пат или, повторно, и крајно несоодветно и саморекламирачки, кандидатката што реагира сака да каже дека е во сѐ подобра од другите кандидати, па и во „програмата и професионалниот пат“?!

Ако пак во тој „професионален пат“ ги вклучува и оние години во таканареченото сјо (малите букви се реален одраз неговиот морален статус денес), тогаш останува самоубиственото прашање на „кадровската“ структура на тоа сјо, па следствено и на „шефицата“ и нејзините најекспонирани „помошнички“ и начинот на којшто беа бирани: врз основа на кои и какви анализи на квалитет, програми, дотогашен професионален пат…? И зошто дотичната и тогаш не реагираше дека во оваа држава има(ло) и постручни и покомпетентни лица за тие места, особено за „шефицата“?

Впрочем, како и зошто сите, само кога се власт или дел од неа, си спомнуваат дека постои нешто што се вика квалитет, стручност, компетентност…, а не само партиска, роднинска, пријателска… подобност? Како во тоа „фамозно“ сјо не им пречеше медиокритетството на „шефицата“ или бонусите ги бришат сите сомнежи, немаат боја и подобност?

Како што, на пример, на Оливер Спасовски, само пред некој ден, а после цели девет години, му текна дека треба да се размисли дали не треба да се менува системот на генерално урбанистичко планирање, дека треба да се видат и други искуства во таа насока и сл.? А не се сеќава на „чичко Коле“ од Лагадин и наредбата на неговиот тогашен шеф дека таму се работи за „корка леб“ а не за цел хотел и дека на човекот мора да му се помогне?

Или, да го дообјаснам насловот: сетете се на еден неодамнешен простачки и крајно навредлив тон за кандидатка за Комисијата за заштита од дискриминиција, прогласена од еден шарлатан за „кафе-куварка“ жената која, ако не повеќе, ги исполнувала формалните услови на конкурсот! За да нема недоразбирања, треба да се знае дека дотичната дипломирала на Правниот факултет „Јустинијан први“, а магистрирала на Европскиот универзитет. И одеднаш, некој „стручњак“ од онаа партиска клиентела ја прогласува за – „кафе-куварка“, па дури и „опскурна“! Ама затоа цела секта ќе се крене на нозе, сосе соопштенија и навреди за странски шеф на држава, а во одбрана на нивното Црвенкапче и нејзината „стручна“ поткованост за местото заменик генерален секретар на нато (малите букви се…).

Или можеби треба да се потсетат колку вистински кафеготвач(к)и „што не беа на увид на јавноста“ посеа нивната секта/коалиција за оние седум криминално-коруптивни години и кои навистина беа еклатантна „навреда за институциите“? Меѓу нив и онаа во Судскиот совет. Па дури и на највисоки, министерски позиции, а не само во својство на членови на некакви комисии и други тела. Ако пак заборавиле, нека се потсетат дека и нивните бивши премиери беа магистри по којзнае што, сегашниот „лидер“ им е лекар, министерот за надворешни им беше исто така лекар, имаа еден и како министер за култура… Како тие не беа „кафе-кувари“ и „опскурни“, иако според резултатите се покажаа токму како такви?

Впрочем, можеби треба да се потсетат и на двајцата претходни републички обвинители кои, барем според резултатите, беа под нивото и на кафеготвачи! Нивните кафиња по правило беа страотно блуткави, најчесто со партиско-поданички горчлив вкус.

Но всушност, сето тоа е продукт на нашава хибридна демократија, на овој „систем“ којшто повеќе личи на крпеница од демократски прогласи, соцреалистички анахронизми, европски директиви, нво измислици итн. И којшто „систем“ исто така ни го посеаја нивни„стручњаци“ со цел извршната власт секогаш да има „свеќа“ во формата на секакви комисии, совети, невладини „стручни“ шушумиги што ќе ѝ стојат над главата дури и за витални прашања/позиции во државата. Тоа пак, од друга страна, придонесе за цунами од „експерти“ во сите области, при што луѓе со трагикомично познавање дури и на мајчиниот јазик и правопис се перчат со експертизи во сите области, најголемиот дел универзитетски професори не само што не објавуваат трудови дома и надвор туку немаат ни основни скрипти (не пак книги) за областите за коишто се самопрогласиле за компетентни…, итн., итн.

Наместо да го олеснуваат патот во извршувањето на власта и практикувањето на претпоставената демократија, „системот“ е смислен до крајност да го комплицира донесувањето дури и едноставни и логични решенија (како што впрочем е и изборот на државен обвинител како дел од извршната власт!), или пак – како што укажува Претседателката – често да го дерогира и здравиот разум низ „автентични толкувања“ на сѐ и сешто.

Се разбира, демократијата подразбира и контрола на власта, ако треба и во поострена форма за одредени прашања, но кога секој шутрак со професорска тога смислува процедури и лавиринти за додатно комплицирање на нештата, тогаш тоа се вика поинаку а не – демократија.

Тука, секако, спаѓа и доменот на таканареченото јавно мислење, групашко-партиски односно „идеолошки“ парцелисано во неколку медиумски табори, во коишто нема место за друго мислење. Токму затоа и дотичната кандидатка од почетокот беше привилегирана да каже што има – ако воопшто нешто има! – на неколку национални медиуми но не и другите кандидати, навивачки се следеше нејзината „трка“ по функцијата небаре од тоа зависи државата и сите ние во неа… Сето тоа всушност претставува(ше) смислено насилство врз граѓанинот, притисок врз оние кои беа ставени во позиција да одлучуваат, врз целокупната јавност. Иако тоа „да се биде или не“ беше де факто само конструкција што требаше да обезбеди покомотен дополнителен живот на неколкумина поединци/групи во сегашната т.н. опозиција односно сигурност дека барем во тој мандат ќе бидат поштедени.

И сето тоа, како впрочем и сѐ друго што ни се сервира и ни се случува, е само уште една форма на индоктринација којашто избегнува да говориме со речникот на аргументите и фактите, којашто се труди да го ретушира дури и блиското минато, диктирајќи арбитрарно однесување во јавноста. И сето тоа, повторно, е нова деградација и потценување на граѓанинот и неговото мислење и сопирачка на развојот на демократските процеси во земјата.

П.С.

Дали сектана што ја глуми некогашната партија СДСМ ќе реагира и на пишувањето на скандинавскиот медиум кој отворено го навредува генералниот секретар на нато (малите букви се реален одраз на безбедносна организација што ја смета Шеќеринска за компетентна за воени прашања) велејќи дека „Марк Руте не е сериозен – треба да биде сменет“? Зашто, по ѓаволите, па тој е директен шеф на „нашана“ Црвенкапче. Некој мора да реагира!

The post Кафеготвач(к)и appeared first on plusinfo.mk.