Полицијата во текот на изминатото деноноќие интервенирала во 11 случаи на семејно насилство низ државата, а седум лица се лишени од слобода поради физички напади, закани и агресивно однесување кон членови на семејството.

Еден од најсериозните случаи е регистриран во Тетово, каде 51-годишна жена пријавила дека нејзиниот сопруг најпрво ѝ се заканувал нејзе и на нивната ќерка, а потоа се обидел да ја запали семејната куќа.

Во друг тежок случај во Гостивар, полицијата го лишила од слобода Х.Ќ., откако неговата 42-годишна сопруга пријавила дека околу четири часот наутро со автомобил ја пробил влезната врата од куќата на нејзините родители, со тврд предмет скршил прозорец, а потоа и физички ја нападнал. При полициската контрола било утврдено дека имал 1,70 промили алкохол во крвта.

Во Охрид бил приведен 34-годишниот Н.Д., кој, според пријавата, физички ја нападнал својата партнерка во семејниот дом.

Во Кичево, полицијата го привела 31-годишниот Т.С., кој агресивно се однесувал кон членовите на своето семејство и оштетил дел од покуќнината.

Во Гостивар, по пријава од 46-годишна жена, бил уапсен и 51-годишниот И.М., кој физички ја нападнал сопругата во нивниот дом.

Во Битола, полициски службеници го лишиле од слобода Е.А. (48), осомничен дека физички ја нападнал својата 26-годишна сопруга, додека на Градскиот пазар во истиот град бил приведен и О.В. (47) од струмичкото село Баница, кој со дрвен предмет ја нападнал својата сопруга.

Во Прилеп бил приведен и 43-годишниот А.А., кој, според полицијата, упатувал закани кон својот татко.

Покрај случаите во кои биле извршени апсења, во Скопје од Градската општа болница „8 Септември“ било пријавено дека 69-годишна жена побарала лекарска помош, тврдејќи дека била физички и психички малтретирана од својата ќерка.

Во Скопје, 51-годишна жена пријавила дека била физички нападната од својот вонбрачен партнер.

Во Куманово, пак, 44-годишна жена пријавила дека нејзиниот поранешен партнер ѝ упатувал закани.

Од Министерството за внатрешни работи информираат дека се преземаат мерки за целосно расчистување на сите случаи, по што против осомничените ќе бидат поднесени соодветни пријави.

The post СО ВОЗИЛО ЈА ПРОБИЛ ПОРТАТА И ЈА НАПАДНАЛ СОПРУГАТА Седуммина приведени по серија случаи на семејно насилство appeared first on plusinfo.mk.

Сообраќајот на „здуњската крстосница“ за време на викенд-шпицовите во летниот период ќе се регулира со сообраќајни полицајци, заклучи Локалниот совет за превенција на општина Гостивар.

Решението за големиот метеж и долгите колони кои се создаваат на магистралниот пат, доаѓа по реакциите на локалните жители. Тие, а и патниците кои се движат кон и од туристичките центри за викенди чекаат долго за да ја поминат крстосницата со семафорска регулација на магистралата Гостивар-Кичево.

За овој проблем денеска се разговараше на седницата на Локалниот совет за превенција, особено поради периодот кога доаѓаат иселениците и неколкукратно се зголемува бројот на возила.

Претставникот на гостиварската полициска станица извести дека како институција ги имаат детектирано проблемите кои се однесуваат на оваа сообраќајница во летниот период. Понуденото решение се состои во посебен план за регулација.

– Сообраќајот на оваа делница особено за време на викендите ќе се регулира физички, со сообраќаен полицаец, во периодите кога се таканаречените шпицовите и има голем број на возила – беше истакнато на седницата.

Според податоците на полицијата на оваа делница во еден ден поминуваат над 34.000 возила кои доаѓаат или се упатуваат кон Охрид, Струга, Кичево, Маврово и кон Дебар.

Се разговараше и за градскиот сообраќај во периодот кога бројот на возила неколкукратно се зголемува, а како можно решение кое треба да го намали притисокот од недостиг на паркинг места беше предложено за паркирање да се користат училишните дворови и површини.

Градоначалникот Ваљбон Лимани посочи дека можноста за бесплатно паркирање во училишните дворови општината ја применува веќе неколку години.

The post КРАЈ НА ДОЛГОТО ЧЕКАЊЕ НА РАСКРСНИЦАТА КАЈ ГОСТИВАР Наместо семафор, полицајци ќе регулираат за време на шпицот appeared first on plusinfo.mk.

Во текот на вчерашниот ден, полицијата евидентирала повеќе случаи на семејно насилство и закани во Скопје, Гостивар и Крива Паланка, при што во дел од нив осомничените се приведени, а за еден случај веќе е поднесена кривична пријава.

Во Гостивар, 47-годишна жена од гостиварско село пријавила дека на 20 јуни, околу 13 часот, додека била на работното место во угостителски објект, нејзиниот сопруг С.М. дошол и барал пари, при што ѝ упатувал закани. Таа дополнително пријавила дека вчера повторно добила порака со заканувачка содржина од него. Од полицијата велат дека се преземаат мерки за расчистување на случајот.

Во Скопје, полициски службеници го привеле 40-годишниот Р.В., откако претходно било пријавено дека во семејниот дом физички ја нападнал својата 64-годишна мајка. По целосното документирање на случајот против него ќе биде поднесен соодветен поднесок.

Уште едно приведување имало и во Крива Паланка. Полицијата го лишила од слобода 46-годишниот Д.М. од кривопаланечко село, осомничен дека физички ја нападнал својата 37-годишна сопруга. Тој бил задржан во полициска станица, а по расчистувањето на случајот ќе следува соодветна пријава.

Во меѓувреме, во Скопје е пријавен и случај на физички напад меѓу сосетки. Дваесет и деветгодишна скопјанка пријавила дека на подрачјето на Чаир била физички нападната од својата сосетка И.Ф. По целосното документирање на случајот ќе биде поднесен соодветен поднесок.

Дополнително, Надворешната канцеларија за криминалистички работи Гостивар поднела кривична пријава против 50-годишниот М.Т. поради сомнение за кривичното дело „загрозување на сигурноста“. Според пријавата, на 13 јуни, во дворот на семејната куќа во гостиварско село, тој упатил сериозни закани по животот на својата 69-годишна мајка.

The post НЕМААТ МИР МАЈКИ, СОПРУГИ, ПАРТНЕРКИ… Полицијата интервенирала во повеќе случаи на семејно насилство appeared first on plusinfo.mk.

Тројца мопедисти се здобиле со тешки телесни повреди во три одвоени сообраќајни несреќи што вчера се случиле во Скопје, Ресен и Гостивар.

Првата несреќа била пријавена околу 8:40 часот на регионалниот пат Скопје–Велес, каде што се судриле патнички автомобил „Фолксваген голф“ со скопски регистарски ознаки, управуван од 75-годишниот Г.С. од Скопје, и мопед „Хамачи“, кој го управувал 54-годишниот Т.Т. од Скопје. Во судирот мопедистот се здобил со тешки телесни повреди, констатирани во ЈЗУ „Св. Наум Охридски“ во Скопје.

Неколку часа подоцна, околу 14:35 часот, на регионалниот пат Гостивар–Вруток, во селото Здуње, дошло до судир меѓу патнички автомобил „Опел“, управуван од 44-годишниот Б.Ј. од Гостивар, и мопед со гостиварски регистарски ознаки, управуван од 26-годишниот М.Т. од Гостивар. И тој мопедист се здобил со тешки телесни повреди и бил пренесен во Медицинскиот центар во Гостивар.

Третата несреќа се случила околу 17:25 часот на крстосницата меѓу улиците „Кочо Рацин“ и „Христо Герасовски“ во Ресен. Во судирот учествувале автомобил „Мерцедес“ со ресенски регистарски ознаки, управуван од 22-годишниот Љ.Н. од селото Дрмени, и мопед што го управувал 48-годишниот М.Т. од Ресен. Возачот на мопедот се здобил со тешки телесни повреди, констатирани во Клиничката болница во Битола.

Увид на местата на трите сообраќајни несреќи извршиле увидни екипи на Министерството за внатрешни работи, кои ги утврдуваат причините за несреќите.

The post ВЧЕРА БИЛ ЦРН ДЕН ЗА МОТОРЏИИТЕ ВО МАКЕДОНИЈА Тројца повредени во три одвоени сообраќајки appeared first on plusinfo.mk.

Според податоците со кои располага Сеизмолошката опсерваторија при Природно-математичкиот факултет во Скопје, во 00 часот и 06 минути беше почувствуван земјотрес чиј епицентар потекнува од епицентралното подрачје Тетово-Гостивар, со Рихтерова локална магнитуда, ML3.0.

Според досегашните податоци со кои располага опсерваторијата, земјотресот е почувствуван од жителите на градовите Гостивар, Тетово и околината, со интензитет од III степени според Европската макросеизмичка скала.

За потребите на сеизмолошките истражувања, доколку сте го почувствувале земјотресот, може да пополнете прашалник на Сеизмолошка опсерваторија при Природно-математичкиот факултет во Скопје достапен на следникот ЛИНК.

The post РЕГИСТРИРАН ЗЕМЈОТРЕС МЕЃУ ГОСТИВАР И ТЕТОВО Бил со јачина од 3,0 Рихтерови степени appeared first on plusinfo.mk.

Во Гостивар ноќеска биле испукани неколку истрели од огнено оружје од патничко возило, а неколку часа подоцна во полициската станица сам се пријавил 65-годишен жител на градот, од кого бил одземен пиштол.

Според информациите од СВР Тетово, инцидентот бил пријавен околу 00:13 часот, кога било соопштено дека непознато лице, кое се движело со возило „џип“, испукало неколку истрели, по што заминало кон центарот на Гостивар.

Во пукањето нема пријавено повредени лица.

Околу два часа подоцна, во 02:10 часот, во Полициската станица во Гостивар сам се пријавил А.М. (65) од Гостивар. Од него биле одземени пиштол „берета“, кој го поседувал со дозвола, една рамка со осум куршуми и уште една празна рамка за истото оружје.

Полицијата работи на целосно расчистување на случајот, а по неговото документирање против А.М. ќе биде поднесена соодветна пријава.

The post ПУКАЛ ПА САМ СЕ ПРИЈАВИЛ ВО ПОЛИЦИЈА На гостиварец му е одземен пиштол appeared first on plusinfo.mk.

Маж од Гостивар пријавил во полиција дека бил измамен за 1.200 евра, откако му било ветено дека ќе добие возачка дозвола без да полага.

Според информациите од Министерството за внатрешни работи, 43-годишниот гостиварец случајот го пријавил вчера во Полициската станица Гостивар.

Како што навел во пријавата, пред околу четири месеци, преку свој пријател стапил во контакт со лице од Скопје. На средба во главниот град, осомничениот му ветил дека ќе му обезбеди возачка дозвола без да полага испит, за што побарал 1.300 евра и копија од личната карта.

Во следниот период, оштетениот во неколку наврати му исплатил вкупно 1.200 евра. Бидејќи ветената возачка дозвола никогаш не ја добил, сфатил дека станува збор за измама и случајот го пријавил во полиција.

Од МВР информираат дека се преземаат мерки за целосно расчистување на случајот.

The post МУ ВЕТУВАЛ ВОЗАЧКА БЕЗ ПОЛАГАЊЕ, ГО „ЗАКРПИЛ“ ЗА 1.200 ЕВРА Скопјанец измамил Гостиварец appeared first on plusinfo.mk.

Дваесет и двегодишна жена од Гостивар пријавила дека подолг период била изложена на физичко и психичко насилство од нејзиниот партнер.

Според пријавата, пред три години тој ѝ нанел тешка телесна повреда, а пред една недела повторно физички ја нападнал и упатил закани кон неа и нејзин пријател.

По судска наредба, полицијата извршила претрес во домот на осомничениот, при што била пронајдена ловечка пушка што му припаѓала на неговиот починат татко.

Случајот се расчистува, а против осомничениот ќе бидат преземени соодветни законски мерки.

The post ГОСТИВАРКА ПРИЈАВИЛА ДОЛГОГОДИШНО НАСИЛСТВО Полицијата пронашла ловечка пушка во домот на осомничениот appeared first on plusinfo.mk.

На територијата на Македонија до 18 часот денеска се регистрирани вкупно шест пожари на отворен простор, соопштуваат надлежните служби.

Од нив, еден пожар останува активен, еден е ставен под контрола, а четири се целосно изгаснати.

Активен е пожарот во гостиварскиот регион, во близина на селото Чегране, каде што се зафатени ниска вегетација и грмушки, а екипите остануваат на терен и работат на негово целосно локализирање.

Под контрола е ставен пожарот кај селото Железница во Општина Кратово, каде што горела депонија.

Во текот на денот, пожарникарите интервенирале на повеќе локации и успешно ги изгаснале пожарите во неколку општини низ државата. Меѓу нив е пожарот меѓу селата Муртино и Банско во струмичкиот регион, каде што биле зафатени ѓубре, ниска вегетација и шибје.

Изгаснат е и пожарот во Општина Теарце, во близина на бензинската пумпа „Стјудес Петрол“, каде што горела ниска вегетација.

Дополнително, под контрола се ставени и пожарите на потегот меѓу селата Панчарево и Црник во Општина Пехчево, како и кај селото Долно Дуќани во велешкиот регион.

Надлежните служби и понатаму ја следат состојбата на терен, особено поради високите температури и зголемениот ризик од нови пожари.

Институциите апелираат до граѓаните да бидат крајно внимателни при движење и престој на отворено, да избегнуваат активности што можат да предизвикаат пожар и да пријават секое сомнително однесување.

The post ОГНОТ КАЈ ЧЕГРАНЕ СЀ УШТЕ ГОРИ Пожари избувнаа на повеќе локации, дел веќе се изгаснати appeared first on plusinfo.mk.

40-годишен маж од гостиварско село е кривично пријавен откако физички го нападнал својот татко и го повредил со нож, соопштија од Надворешната канцеларија за криминалистички работи Гостивар.

Инцидентот се случил по претходна семејна расправија во семејниот дом, по што ситуацијата ескалирала во насилство.

Од полицијата информираат дека против Ш.А. (40) е поднесена кривична пријава поради постоење основи на сомнение за сторено кривично дело „телесна повреда“.

The post КРВАВА СЕМЕЈНА ДРАМА ВО ГОСТИВАРСКО Син со нож го нападнал сопствениот татко по жестока расправија appeared first on plusinfo.mk.