Натпросечно високи температури, особено во Повардарието, Скопската Котлина, Пелагонија и во источните делови на Македонија се очекуваат во текот на летото, кое ќе се карактеризира со повеќекратни и интензивни топлински бранови и со повремени, локално интензивни невремиња.

Професорот по метеорологија на Природно-математичкиот факултет и член на Советот за безбедност, д-р Владо Спиридонов, во неговиот најнов осврт за летото 2026 година посочува дека во најтоплите периоди температурите локално би можеле да достигнат и над 40 степени Целзиусови, а во најизложените подрачја не се исклучени вредности и до 42 степени, па дури и повисоки.

Во урбаните средини, особено во Скопје, ефектот на високите температури ќе биде изразен и во ноќните часови поради асфалтните површини, намалената вегетација и урбаната густина. Тоа може да влијае врз здравјето на луѓето, особено кај оние со кардиоваскуларни и со респираторни заболувања, како и да предизвика нарушување на сонот и намалена работна способност и продуктивност.

Спиридонов појаснува дека ваквите случувања се резултат на Ел Нињо, кој е еден од најзначајните двигатели на климатската варијабилност на глобално ниво.

– Неговото влијание најчесто се поврзува со засилување на временските и на климатските екстреми, вклучувајќи поинтензивни топлински бранови, продолжени сушни периоди, но и појава на интензивни врнежи и поплави во одделни региони. Дополнително, ваквите климатски аномалии влијаат врз земјоделството, водните ресурси, енергетиката, екосистемите и здравјето на населението. Во поширок регионален контекст, Југоисточна Европа влегува во лето со зголемена веројатност за натпросечни температури, при што Copernicus Climate Change Service ја издвојува оваа област како една од најтоплите во Европа во летото 2026 година. Ова дополнително укажува на засилување на топлотните екстреми, подолги сушни периоди и поголема атмосферска нестабилност – посочува професорот Спиридонов за МИА.

Тој вели дека Македонија, поради својата специфична географска поставеност и комбинацијата на котлини, планински масиви и медитеранско-континентални влијанија, претставува подрачје каде што ефектите од екстремната топлина можеет дополнително да бидат изразени.

Светската метеоролошка организација (СМО) соопшти дека постои речиси 80 проценти веројатност за развој на Ел Нињо во периодот јуни-август, а за периодот септември-декември веројатноста е зголемена на приближно 90 проценти. Актуелните прогнози навестуваат дека најверојатно ќе достигне умерен до силен интензитет. Светската метеоролошка организација нагласува дека навремените прогнози и системите за рано предупредување се клучни за намалување на ризиците и заштита на населението, особено во секторите земјоделство, енергетика и јавно здравје.

Во тој контекст, професорот Спиридонов вели дека се очекува летото да биде обележано со подолги сушни периоди.

„Намалените врнежи и високите температури ќе доведат до намалена влага во почвата, зголемено испарување и засилен воден стрес. Според пресметките, средниот SPI (Standardized Percipitation Index) изнесува приближно -1,5, што укажува на умерена до интензивна суша“, се наведува во освртот на Спиридонов.

Во вакви атмосферски услови ризикот од шумски и вегетациски пожари значително се зголемува и може да премине во високо до екстремно ниво, особено во подрачјата каде што се совпаѓаат повеќе неповолни климатски фактори. Особено критични се Повардарието, Тиквешијата, Гевгелиско-Валандовската Котлина, Струмичкиот регион и делови од источна Македонија, каде што релјефните карактеристики дополнително ги отежнуваат пристапот и интервенцијата.

– Најранливи се регионите со изразена суша и негативни SPI-вредности, каде што почвата и вегетацијата се веќе долгорочно исцрпени од недостиг на врнежи и високи температури. Клучните фактори што ја зголемуваат опасноста од пожари вклучуваат продолжен дефицит на врнежи, екстремно високи температури и повторливи топлотни бранови, кои доведуваат до забрзано сушење на вегетацијата и намалување на нејзината влажност до критични нивоа. Дополнително, ниската релативна влажност на воздухот во комбинација со засилен локален ветер создава услови за брзо ширење на пламенот и неконтролирано движење на пожарните фронтови – појаснува професорот Спиридонов.

Иако предвидувањата се дека нè очекува сушно лето со натпросечни температури, сепак периодично се најавуваат и краткотрајни, но интензивни непогоди, кои наместа може да предизвикаат и поплави. Ваквите појави, како што објаснува Спиридонов, настануваат во услови на многу загреан приземен слој на атмосферата, акумулирана енергија и локална нестабилност.

„Овие системи најчесто се манифестираат како краткотрајни, но интензивни временски епизоди, проследени со обилни врнежи, град и со силни налети на ветер. Во географскиот контекст на Македонија, ваквите појави имаат зголемен потенцијал за брза ескалација во поројни поплави, особено поради релјефната структура и брзото собирање на водата од планинските и ридските подрачја кон котлините. При сув претходен период почвата ја намалува својата апсорпциска способност, што дополнително го зголемува површинскиот истек и ризикот од ненадејни водни бранови. Последиците од ваквите настани може да вклучуваат локални поплавувања на урбани и рурални подрачја, ерозивни процеси, свлечишта и оштетување на патна, водоводна и земјоделска инфраструктура. Иако овие појави се просторни ограничени, нивниот интензитет и брз развој бараат постојано следење на атмосферската нестабилност и навремени системи за рано предупредување“, се наведува во освртот на Спиридонов.

Ваквите атмосферски состојби претставуваат предизвик и за земјоделството и за енергетиката. Ќе има намалени приноси и стрес за земјоделските култури, како и поголема потреба од наводнување, што секако ќе резултира со оптоварување на водните ресурси. Поради сушниот период и намалените хидролошки дотоци, се очекува и зголемена потрошувачка на струја.

Научно-аналитичкиот осврт на професорот Спиридонов е изработен во согласност со најавите за развој на Ел Нињо во текот на летото.

Тој за оваа анализа вели дека е наменета, пред сè, за подобра информираност на граѓаните и на институциите, со цел да даде подлабока процена на можните временски и климатски услови и да се укаже на потенцијалните опасности и ризици што може да ја погодат Македонија во наредните месеци.

The post НЀ ЧЕКА ВРЕЛО ЛЕТО, ПОТОПЛО ОД ПРОСЕЧНИТЕ, СО ТЕМПЕРАТУРИ И НАД 42 СТЕПЕНИ Опасност од горештини, суши, пожари и интензивни невремиња appeared first on plusinfo.mk.

Претстојното лето ќе биде значително потопло во Македонија. За околу 2 степени ќе биде потопло од повеќе годишниот просек.

Ќе бидеме сведоци на чести и екстремно топли бранови од Африка кои ќе условуваат да имаме екстремно високи температури на воздухот кои во најголем дел ќе надминуваат 35 степени, а во Повардарието, Скопската котлина и во југоисточните предели почесто температурите ќе надминуваат и 40 степени, особено во јули и во август 2026.

Повеќе за метеопрогнозата на Славчо Попоски на следниот ЛИНК.

The post ЈУЛИ И АВГУСТ ЌЕ БИДАТ ЕКСТРЕМНО ТОПЛИ Африкански бранови ќе донесат температури и до 40 степени appeared first on plusinfo.mk.

о следната седмица во Македонија ќе продолжат пријатните летни температури на воздухот, без најави за нов топол бран од Африка. Температурите наутро ќе се спуштаат во интервалот од 11 до 18 степени, а преку денот ќе се искачуваат во интервалот од 26 до 34 степени, пишува метопрогнозерот Славчо Поповски на неговиот портал Метеоаларм.

Врнежите ќе бидат под просекот за овој период од годината, но поради повремено спуштање на атмосферски фронтови од север, во попладневните часови можен е локален развој на пороен дожд, грмежи и засилен ветер.

Целата прогноза на Поповски може да ја прочитате на следниов ЛИНК.

The post ПРЕД НАС Е ПРИЈАТНА СЕДМИЦА, ГОРЕШТИНИТЕ СЀ УШТЕ НЕ ПОЧНУВААТ Можни се кратки локални дождови appeared first on plusinfo.mk.

Смртните случаи на 1.149 лица во Шпанија може да се припишат на неодамна завршениот 16-дневен топлински бран, проценува Институтот за истражување на јавното здравје „Карлос Трети“.

Системот „МоМо“ (Мониторинг на смртноста) на Институтот секојдневно го анализира бројот на смртни случаи во Шпанија и го пресметува отстапувањето од очекуваната стапка на смртност врз основа на евидентираните податоци од претходните години.

Системот вклучува надворешни фактори што можат да го објаснат отстапувањето, особено температурите објавени од Националната метеоролошка агенција.

Системот не може да ја утврди апсолутната каузалност на смртните случаи и метеоролошките услови, но овие статистики претставуваат најдобра проценка за бројот на смртни случаи за кои жештината е одлучувачки фактор.

Во јули, „МоМо“ припиша околу 1.060 смртни случаи на топлотниот бран, што претставува зголемување од 50% во споредба со јули 2024 година.

The post НАД 1.000 МРТВИ ВО ШПАНИЈА ПОРАДИ ЖЕШТИНИТЕ Последниот 16-дневен топлински бран однесе 1.149 животи appeared first on plusinfo.mk.

Времето утре ќе биде сончево со мала до умерена локална облачност. Попладне, претежно во источните делови ќе има услови за изолирана појава на нестабилност со краткотраен пороен дожд и грмежи. Ќе дува слаб до умерен ветер од северен правец, поизразен долж Повардарието.

Максималната температура ќе се искачи до 36-от степен.

Во Скопје, времето ќе биде сончево со мала до умерена облачност. Ќе дува слаб до умерен ветер од северен правец. Температурата ќе достигне до 35 степени.

Следува период на стабилно и топло време со пораст на дневната температура.

The post ГОРЕШТИНИТЕ СЕ ВРАЌААТ Утре до 36 степени appeared first on plusinfo.mk.

Македонија ја очекува уште еден исклучително топол ден, според прогнозата на УХМР за понеделник, 21 јули. Времето ќе биде претежно сончево и многу топло, со слаб до умерен ветар од западен и од југозападен правец.

Минималните утрински температури ќе изнесуваат од 14 до 19 степени Целзиусови, а максималните дневни температури ќе изнесуваат од 31 до 40 степени Целзиусови.

Во Скопје времето ќе биде сончево и многу топло, со слаб до умерен ветар од југозападен правец.

The post СЛЕДУВА ПЕКОЛЕН ПОНЕДЕЛНИК Температурите ќе достигнат 40 степени, сонцето ќе пече низ цела земја appeared first on plusinfo.mk.

Времето утре, 5 јули, ќе биде сончево и многу топло со мала до умерена облачност. Ќе дува слаб до умерен ветер претежно од југоисточен правец. Температурите ќе бидат во интервал од 11 до 41 степени.

Во Скопје ќе биде сончево и многу топло со слаб до умерен јужен ветер. Темпратурите ќе бидат во интервал од 18 до 41 степени.

До вторник ќе се задржи многу топло време со дневна температура насекаде над 30°C, а наместа ќе надминува 40°C.

Во недела во попладневните и вечерните часови ќе има услови за локална нестабилна облачност со пороен дожд и грмежи. Во среда и четврток ќе дува засилен северен ветер, кој ќе предизвика значително опаѓање на дневната температура.

The post НÈ ЧЕКА МНОГУ ТОПОЛ ВИКЕНД В недела попладне ќе заврне appeared first on plusinfo.mk.

Македонија влегува во период на пеколни горештини – температурите од утре до средината на следната недела ќе бидат над 30, а локално и над 40 степени Целзиусови, соопшти Управата за хидрометеоролошки работи.

– Очекуваме сончево и многу топло време под влијание на топла воздушна маса од југ. Апелираме граѓаните да бидат претпазливи и да ги следат препораките од здравствените власти – изјавија од УХМР.

Според најавите, во недела попладне и навечер се можни локални врнежи и грмежи, но горештините ќе продолжат и понатаму.

Во меѓувреме, Институтот за јавно здравје (ИЈЗ) излезе со препораки за заштита, особено за постарите лица и хронично болните. Се препорачува избегнување директна изложеност на сонце од 11 до 17 часот, носење лесна облека, капа и очила за сонце, користење крем со УВ фактор над 30 и зголемен внес на течности – без чекање на чувство на жед.

Алкохолот, кофеинските пијалаци и екстремно ладните пијалаци се строго непожелни, а оние со ограничен внес на течности треба да се консултираат со својот матичен лекар.

– Особено е важно хронично болните со кардиоваскуларни, белодробни и невролошки заболувања да ги следат препораките, да ја земаат редовната терапија и при какви било промени да се јават кај својот лекар – велат од ИЈЗ.

The post УТРЕ СТИГНУВА ПЕКОЛНИОТ БРАН Над 40 степени во Македонија, надлежните со итни препораки до граѓаните appeared first on plusinfo.mk.

Десетици милиони луѓе во големите градови низ североисточниот дел на САД вчера беа изложени на рекордно високи температури кои се очекувани бидејќи топлотен бран го зафати поголемиот дел од земјата од крајот на минатата недела, а некои туристички атракции денеска треба да бидат затворени.

Се очекува температурите во Вашингтон и Бостон да се искачат до 38 степени Целзиусови, надминувајќи ги претходните рекорди за дури 6 степени, наведува Националната метеоролошка служба.

Во Централ Парк во Њујорк, температурите достигнуваат до 37 степени Целзиусови.

Според NWS, рекордна жештина е можна и во други делови од источниот дел на САД, вклучувајќи ја северна Џорџија, Северна и Јужна Каролина, Вирџинија, Мериленд и Пенсилванија.

– Се чини дека денеска е веројатно најлошиот ден во однос на рекордните жестини во пошироката област – ​​рече Боб Оравец, главен прогнозер во Националната метеоролошка служба во Колеџ Парк, Мериленд, додавајќи дека најинтензивната жештина е концентрирана на североистокот.

Екстремната жештина предизвикува прекини во јавниот превоз низ североисточниот дел на САД. Американскиот оператор за патнички железници „Амтрак“ соопшти дека ќе мора да ги забави возовите помеѓу 12.00 и 20.00 часот на линиите помеѓу Вашингтон и Њујорк и помеѓу Филаделфија и Харисбург, што би можело да доведе до доцнења.

Дури и некои туристички атракции се засегнати. Споменикот на Џорџ Вашингтон ќе биде затворен вчера и денеска поради жештината, објави Националната служба за паркови.

Градежните компании се принудени да се прилагодат на временските услови за да ги заштитат своите работници.

Оравец од Националната метеоролошка служба изјави дека температурите од денеска треба полека да почнат да опаѓаат.

– Се предвидува дека максималната температура во четврток во Њујорк ќе биде околу 29 °C, а во петок треба да биде околу 24 °C“ – рече тој.

The post ЕКСТРЕМНИ ЖЕШТИНИ ВО САД Затворени турустички атракции, во некои градови запрен е јавниот превоз appeared first on plusinfo.mk.

Црвениот крст на град Скопје подготви акциски план што опфаќа теренски активности за справување со топлински бранови, информира организацијата. Согласно искуствата од претходните години, мобилни екипи составени од лекар или парамедик ќе патролираат низ градот Скопје, ќе дистрибуираат вода и летоци со совети, ќе им мерат притисок на граѓаните кои ќе се пожалат на тегоби, а за потешките случаи ќе биде обезбеден и транспорт до најблиската медицинска установа или до домот на лицето.

– За активностите во наредниот период ќе бидат ангажирани 15 волонтери од тимот за одговор при катастрофи, 5 возила ќе патролираат низ градот. За наредните денови – среда, четврток и петок, планирано е 5 мобилни тимови да излезат на терен и тоа во периодот од 11 до 16 часот. Тие ќе патролираат низ централното градско подрачје и на поголемите автобуски постојки – се додава во соопштението.

Активостите ќе продолжат согласно прогнозите за високите температури.

– Планот ја опфаќа и грижата за здравствената и психо-физичката состојба на бездомниците во Скопје. Во пунктот за бездомници во Момин Поток на располагање ќе биде мобилниот телефон 071-223-972 за дојави од граѓани за бездомници кои се погодени од топлинскиот бран – истакнуваат од Црвениот крст.

Од УХМР вчера најавија дека денеска и во следните денови времето ќе биде натпроселно топло, со температури до 40 степени.

The post ЗА ВРЕМЕ НА ГОРЕШТИНИТЕ ТИМОВИ НА ЦРВЕНИОТ КРСТ ЌЕ ДЕЛАТ ВОДА И ЌЕ ИМ МЕРАТ ПРИТИСОК НА ГРАЃАНИТЕ Пет мобилни екипи со лекари и со парамедици ќе патролираат низ Скопје appeared first on plusinfo.mk.