Државата до крајот на годинава главно ќе ги обезбедува потребните пари на домашниот финансиски пазар, преку државни хартии од вредност и рефинансирање на доспеаните долгови, а во подготовка е и нова граѓанска обврзница, најави министертката за финансии Гордана Димитриеска-Кочоска во гостување на ТВ „Сител“.

Граѓанската обврзница им овозможува на граѓаните да ѝ позајмат пари на државата за определен период, а за возврат да добијат камата. По истекот на рокот, државата треба да им ја врати вложената сума. На овој начин Владата обезбедува средства директно од граѓаните, наместо да се задолжува само кај банките и другите инвеститори.

Истовремено, дел од средствата за капитални инвестиции се пренаменуваат поради неуспешни тендери и доцнење на проектите, информираше министерката, додека Владата ги разгледува опциите за ново задолжување во странство во 2027 година.

За новата граѓанска обврзница засега не беа соопштени износот што државата планира да го прибере, каматната стапка и рокот на достасување.

Министерката се осврна и на намалувањето на капиталните расходи кај одредени институции, објаснувајќи дека средствата се пренаменуваат преку механизмот КАПЕФ, кога е извесно дека проектите нема да можат да се реализираат во предвидениот рок.

Како конкретен пример го посочи неуспешниот тендер во Управата за извршување санкции, за кој биле предвидени повеќе од 200 милиони денари.

– Не станува збор за тоа дека некои проекти скроз сме ги прекинале, туку можеби од одредени институции, таму каде што, на пример, не се готови тендерите или, на пример, во Управата за извршување санкции имаме тендер којшто беше неуспешен, а имаше прилично средства – повеќе од 200 милиони денари предвидени за таа намена – истакна Димитриеска-Кочоска.

Според неа, бидејќи тендерската постапка ќе мора да се повтори, предвидените пари објективно не можат да се потрошат до крајот на годината.

– Повеќе од очигледно е дека до крајот на годината не можат да се реализираат, бидејќи допрва ќе треба да се повтори тендерот – рече министерката.

Слични проблеми со динамиката на реализација има и кај одредени проекти во Министерството за животна средина и просторно планирање.

Димитриеска-Кочоска нагласи дека проектите за кои веќе се потпишани договори продолжуваат да се реализираат и дека пренамената се однесува на средства што не можат да бидат искористени во тековната буџетска година.

Зборувајќи за состојбата на меѓународните финансиски пазари, министерката предупреди на големата неизвесност, растот на глобалниот јавен долг и притисоците поврзани со цените на енергенсите.

Таа оцени дека досегашните владини интервенции во даноците и акцизите помогнале да се спречи прелевање на ценовните шокови врз другите сектори.

– Не можеме да зборуваме за простор во буџетот и огромни бафери за да можеме да се справиме не знам како, но секогаш носиме одлуки врз база на тоа како нашите одлуки денес ќе влијаат во иднина – изјави Димитриеска-Кочоска.

Министерката смета дека граѓаните треба да бидат свесни за неизвесноста во светската економија и да штедат, додека Владата внимателно го следи движењето на цените и состојбите на меѓународните пазари.

– Ние не дозволивме ценовниот шок да се прелее во другите сектори, заради тоа ние денес имаме една од најниските инфлации – рече таа.

Во однос на задолжувањето во странство, Димитриеска-Кочоска потврди дека државата ќе мора да издаде нова еврообврзница за да обезбеди средства за сервисирање на обврската од 2023 година.

Таа објасни дека издавањето еврообврзница на крајот од годината може да биде понеповолно поради зголемената побарувачка за пари на меѓународните финансиски пазари.

Затоа се разгледуваат повеќе можности за задолжувањето во 2027 година, меѓу кои и поделба на планираниот износ на две одделни емисии.

– Факт е дека мора да издадеме еден дел обврзница за да може да ја сервисираме обврзницата којашто беше издадена во 2023 година и којашто беше со каматна стапка повисока од 6 отсто – нагласи министерката.

Подготовките за буџетот за следната година, според неа, се одвиваат во рамките на параметрите утврдени со фискалната стратегија.

Во наредниот период се предвидени координативни состаноци со владините ресори за усогласување на нивните финансиски потреби и приоритети.

Меѓу секторите на кои ќе им биде посветено посебно внимание се здравството и Фондот за здравствено осигурување.

The post НОВА ГРАЃАНСКА ОБВРЗНИЦА ДО КРАЈОТ НА ГОДИНАТА Димитриеска-Кочоска објасни зошто се кратат капиталните расходи appeared first on plusinfo.mk.

Владата ја продолжува мерката за намалување на данокот на додадена вредност (ДДВ) за дизелот од 18 отсто на 10 отсто до 20 октомври 2026 година.

Како што соопшти министерката за финансии Гордана Димитриеска-Кочоска на својот Фејсбук профил, целта на одлуката е ублажување на ценовните притисоци врз домаќинствата и стопанството, како и одржување на економската стабилност.

„Продолжуваме со мерките за заштита на стандардот на граѓаните и стабилноста на домашната економија. Владата ја продолжува мерката за намалување на ДДВ за дизелот од 18 отсто  на 10 отсто, до 20 октомври 2026 година. Со оваа мерка влијаеме врз малопродажните цени на горивата и ги ублажуваме надворешните ценовни притисоци, со цел да го намалиме финансискиот товар врз граѓаните и стопанството“, напиша Димитриеска-Кочоска.

Додава дека надлежните институции остануваат фокусирани на движењата на глобалните берзи.

„Продолжуваме внимателно да ги следиме состојбите на меѓународните пазари и навремено да реагираме со мерки што придонесуваат за заштита на животниот стандард и економската стабилност“, истакна министерката за финансии Димитриеска-Кочоска во објавата. 

The post ДИЗЕЛОТ ОСТАНУВА СО НАМАЛЕН ДДВ ДО 20 ОКТОМВРИ Владата внимателно ги следи берзите и ќе реагира доколку има потреба appeared first on plusinfo.mk.

Македонската економија во вториот квартал од годинава порасна за 4,3 отсто, што министерката за финансии Гордана Димитриеска-Кочоска го оцени како еден од најдобрите квартални резултати во последните две и пол години.

Во објава на Фејсбук, таа посочува дека поважно од самиот резултат е континуитетот на позитивните економски движења.

– Од раст од 1,6 отсто во првиот квартал од 2024 година, денес сме на 4,3 отсто. Тоа значи дека не зборуваме за еден добар квартал, туку за континуитет, за економија која расте и постепено добива сила. Дали е ова доволно? Не е – вели Димитриеска-Кочоска.

Според податоците за структурата на БДП, растот е забележлив во повеќе сегменти од економијата.

Бруто-инвестициите во вториот квартал се зголемиле за 16,5 отсто, извозот на стоки и услуги за 10,4 отсто, додека градежништвото пораснало за 21,9 отсто.

Позитивни движења, според министерката, има и во преработувачката индустрија, трговијата, транспортот и угостителството. Растот е поддржан и од домашната потрошувачка.

Димитриеска-Кочоска посочува дека резултатот е постигнат во услови на умерен раст на европската економија, глобални неизвесности и геополитички ризици.

Растот од 4,3 отсто, според неа, е над просекот на Европската Унија, кој изнесува 1,2 отсто, како и над растот во еврозоната од 1 отсто.

Министерката најавува дека Владата и во следниот период ќе се фокусира на инвестициите, капиталните проекти и поддршката за приватниот сектор.

– Нашата политика е јасна – повеќе инвестиции и капитални проекти, силна поддршка на приватниот сектор, подобро и попредвидливо деловно опкружување и одговорно управување со јавните финансии – порача таа.

Според Димитриеска-Кочоска, повисок и одржлив економски раст не може да се постигне преку ноќ. Таа вели дека се потребни стабилност, предвидливост, доверба и континуитет во економските политики.

Целта, како што наведува, е растот да донесе повеќе инвестиции, посилни компании, нови можности и повисок животен стандард за граѓаните.

– Бројките ја покажуваат насоката. Наша обврска е да продолжиме по неа – порача министерката.

The post МАКЕДОНСКАТА ЕКОНОМИЈА РАСТЕ ЗА 4,3 ОТСТО Димитриеска-Кочоска вели дека може и повеќе appeared first on plusinfo.mk.

Министерката за финансии Гордана Димитриеска – Кочоска денеска оцени дека Буџетот не е во лоша кондиција и оти наплатата на даноците се одвива согласно проекциите.

–  Не би рекла дека буџетот е во лоша кондиција, но нема за се, исто како и дома. Никогаш буџетот на Македонија немал простор за се, не е ова првпат. Можеби јас како министер сега сум порестриктивна, не сакам да се трошат пари непродуктивно затоа што по короната бевме сведоци на тоа дека пари се трошеа многу непродуктивно – одговори Димитриеска – Кочоска на новинарско прашање.

Таа додаде дека сега само потранспарентно се зборува за работите за кои претходно некои не сакале да зборуваат.

Во рамки на се што е возможно и расположливо, потенцираше, правиме максимум, „а последниот податок за инфлацијата јасно покажува дека тоа што ни беше цел го постигнавме“.

Прашана за очекувањата за инфлацијата до крајот на годината посочи дека очекува да биде во границите од претходниот месец.

– Кога работите во услови на јавен долг кој цело време се движи под 60%, ние не го зголемуваме, како секоја претходна влада. Многу е тешко да ги менаџирате сите работи за да ја издржите психолошката граница. И во такви услови многу е подобро да проектирате малку попесимистичко сценарио и секогаш да се радувате дека ќе биде подобро од тоа што сте го проектирале затоа што немаме комоција. Друго е да имавме сега, денес, 50 или 55% јавен долг во однос на БДП, па сега уште 5% да имаме простор да си правиме математика. Ние немаме и поради таа причина малку одиме со попесимистичко сценарио иако проекциите на ММФ и на Светската банка се под нашите за инфлацијата до крајот на годината. Верувам дека ова што го добивме последниот месец ќе остане горе долу во тие граници – рече министерката за финансии.

The post БУЏЕТОТ Е ВО ДОБРА КОНДИЦИЈА, НО НЕМА ЗА СЀ Димитриеска-Кочоска очекува државната каса да се полни според планот appeared first on plusinfo.mk.

Средствата по поволни услови кои беа обезбедени од унгарската Експорт-импорт банка, не ги гледаме како трошок за буџетот, туку како инвестиција, затоа што поддршката за домашните компании е инвестиција во економскиот раст, наведува министерката за финансии Гордана Димитриеска-Кочоска во објава на својот ФБ профил.

– Пред повеќе од две години, ја препознавме потребата за развој на компаниите кои имаат идеи и потенцијал за инвестиции, но за реализација на истите им беше потребно подостапно и поповолно финансирање. Затоа, заедно со бизнис секторот и банките креиравме и дефиниравме модел со кој 250 милиони евра се ставија на располагање за развојни инвестиции во домашниот приватен сектор, по најповолни услови и со лесен пристап да стигнат до крајните корисници – вели министерката.

Таа додава дека првата транша кон домашните компании беше исплатена во март минатата година и дека до овој момент во македонската економија се инјектирани вкупно 239 милиони евра, износ кој поттикна значаен инвестициски циклус во приватниот сектор и придонесе за поголемо производство, нови вработувања и поголема конкурентност на домашните компании.

– Целта на Владата беше да препознае што им е потребно на домашните компании и да создаде услови тие потреби да се претворат во реални инвестиции. Интересот покажа дека мерката одговара на реалните потреби на бизнисот. Влеговме во овој проект со јасна цел, преку поддршка на приватните инвестиции да поттикнеме значаен инвестициски циклус во домашната економија. А ефектот е поголем бидејќи средствата што ги обезбедува Владата се надополнуваат со сопствени средства на компаниите – посочува министерката за финансии.

Според министерката, најважното прашање сега не е само колку средства се пласирани, туку што се случува со економската активност како резултат на ваквиот пристап до капитал и зголемените инвестиции.

Додава дека индикатори се охрабрувачки. Корпоративното кредитирање во овој период во кој се реализира оваа мерка, бележи просечен годишен раст од 15%, односно во периодот од март минатата година до јуни оваа година се движи помеѓу 13,5% и 16,5% што покажува зголемена кредитна активност и подобар пристап на компаниите до финансиски средства. Растот на БДП во првиот квартал од 2026 година изнесуваше 3,1%, по растот од 3,5% во четвртиот квартал од 2025 година, 3,8% во третиот и 3,8% во вториот квартал. Еден од значајните придонеси кон растот се јавните и приватните инвестиции.

Позитивни и охрабрувачки сигнали, стои во објавата, гледаме и кај извозот, индустриското производство и вработеноста.

– Сите податоци покажуваат дека економската активност се движи во посакувана насока и се потврда за позитивните ефекти на политиките коишто ги спроведуваме. Токму затоа поддршката за домашниот бизнис ја гледаме како инвестиција во растот на економијата. Овие податоци се важни бидејќи покажуваат дека економските политики треба да се мерат преку конкретните резултати и промените во реалната економија. Целта на Владата е јасна: повеќе инвестиции, зголемено производство, посилни домашни компании, нови работни места, конкурентна домашна економија и одржлив економски раст – вели министерката Димитриеска-Кочоска.

Истакнува дека Владата со посветеност ќе продолжи да креира и спроведува мерки кои ќе им овозможуваат на компаниите да растат, да инвестираат и да создаваат нова вредност за целата економија.

The post 239 МИЛИОНИ ЕВРА ВЕЌЕ СЕ ПЛАСИРАНИ ВО ДОМАШНИОТ БИЗНИС Димитриеска-Кочоска вели дека поддршката за компаниите е инвестиција, а не трошок appeared first on plusinfo.mk.

The post ПРУГИ, БОЛНИЦИ, ЕЛЕКТРАНИ НА ПРВАТА КОНЕЧНА ЛИСТА НА ЈАВНИ ИНВЕСТИЦИИ Реформа за поефикасна реализација на капиталните проекти appeared first on plusinfo.mk.

Со денешното потпишување на договорот за инвестициски грант обезбеден преку Инвестициската рамка за Западен Балкан (WBIF) на Европската Унија, како и на договорите за финансирање со Европската инвестициска банка (ЕИБ) и Европската банка за обнова и развој (ЕБОР), почнува третата фаза од финансирањето на изградбата на железничката делница Крива Паланка-Деве Баир од Коридорот 8.

Договорите се потпишаа во Владата, а присуствуваа премиерот Христијан Мицкоски, вицепремиерот и министер за транспорт Александар Николоски, министерката за финансии Гордана Димитриеска-Кочоска, заменик шефот на Делегацијата на ЕУ Бен Нупнау, директорот на ЕБОР за Македонија Фатих Туркменоглу, директорот на ЕИБ во Македонија , Бјорн Габриел, како и директорот на Железници – Инфраструктура, Синиша Ивановски.

Преку Инвестициската рамка за Западен Балкан на ЕУ се обезбедени 149 милиони евра грант за изградба на третата делница од железничкиот коридор 8.

– Денешното потпишување претставува продолжување на визијата што ја постави оваа Влада – Македонија да ја искористи својата уникатна позиција како раскрсница на двата коридора, 8 и 10, и на тој начин да го докаже своето место како срце на Балканот. Изградбата на Коридорот 8 е еден од врвните приоритети на Владата. Ова е исклучитлено значаен ден, зашто по скоро две години работа доаѓаме до реален и остварлив проект, што може да биде реализиран – рече Николоски.

Успеавме да постигнеме договор со Бугарија за изградба на прекуграничниот железнички тунел што треба да ги спои двете држави, додаде тој.

– Очекуваме на крајот од овој месец да се одржи вториот меѓувладин состанок во Скопје, а пораката е јасна – двете држави испраќаат заедничко писмо до ЕУ, ЕИБ и до ЕБОР за обезбедување грант за изградба на тунелот кој, убеден сум, ќе биде далеку поголем од оние грант средства за кои досега се зборуваше. Овој настан покажува како може да се реализираат проекти, да се решаваат проблеми од минатото,  да се стават работите на вистинските шини и да се движат – истакна министерот Николоски.

Според министерката Димитриеска-Кочоска, со документите што денеска се потпишааа се создаваат услови за непречено продолжување на реализацијата на еден од најзначајните инфраструктурни проекти во државата.

– Денеска потпишуваме амандмани кон договорите за финансирање и амандман на договорот за грант за проектот „Изградба на нова железничка делница Крива Паланка-граница со Република Бугарија, како дел од железничкиот Коридор 8“, со кој се обезбедува финансиска конструкција што ќе овозможи целосна реализација на проектот, а кој не само што ќе обезбеди подобра поврзаност меѓу Јадранското Море и Црното Море, туку ќе придонесе и за поголема економска интеграција, полесно движење на луѓето и на стоките, како и за нови можности за развој на македонската економија и на целиот регион – рече министерката.

Таа оцени дека за реализација на стратешките проекти не е доволна само политичката определба, туку е неопходно да постои и стабилна и одржлива финансиска рамка.

– Владата има јасна определба за реализација на стратешките инфраструктурни проекти. Во изминатите две години интензивно работиме на забрзување на динамиката на проектите што беа наследени со застој, како и на започнување нови инвестиции што придонесуваат за подобри услови за живот, унапредување на економијата и напредок на евроинтегративниот процес. Поддршката на капиталните проекти, покрај средствата обезбедени од меѓународните финансиски институции, се реализира и преку силна буџетска поддршка. Со Ребалансот на Буџетот за 2026 година обезбедивме дополнителни 5,8 милијарди денари за капитални расходи, односно 14,3% повеќе во однос на иницијално планираните средства. Тие се инвестиција во повисока конкурентност на македонската економија, во подобра регионална поврзаност, во нови можности за бизнисот и во повисок животен стандард за граѓаните – рече Димитриеска-Кочоска

Остануваме посветени, нагласи таа, на реализацијата на овие цели, водејќи сметка истовремено да ја зачуваме стабилноста на јавните финансии.

– Токму таквиот пристап преку одговорно управување со јавните финансии, обезбедување средства за капитални инвестиции и силно партнерство со меѓународните финансиски институции создава основа за одржлив економски раст, поголема конкурентност и побрза интеграција на нашата држава во европските транспортни и економски текови – рече Димитриеска-Кочоска.

The post МАКЕДОНИЈА ДОБИ 149 МИЛИОНИ ЕВРА ГРАНТ ЗА ПРУГАТА КОН БУГАРИЈА Потпишани договорите за изградба на делницата Крива Паланка – Деве Баир appeared first on plusinfo.mk.

Ребалансот на Буџетот за 2026 година, којшто беше усвоен во Собранието во понеделникот, е добро решение и еден од ретките ребаланси на Буџетот низ годините во којшто има зголемување на ставката на капитални расходи. Ова го истакна министерката за финансии Гордана Димитриеска-Кочоска во гостување во Дневникот на МТВ.

– Овој ребаланс е едно добро решение, имајќи ја предвид, целокупната состојба во економијата,  не само во Македонија, туку гледано и геополитички и имајќи ги предвид неизвесностите коишто ги имаме пред нас. Ова е еден од ретките ребаланси на буџетот каде што имаме зголемување на ставката на капитални расходи. При тоа  морам да кажам дека станува збор за зголемување на капитални расходи коишто директно значат одредени инвестиции. Значи, ние тука не зборуваме за одредени трансфери, аванси, префрлања на јавни претпријатија и така натаму, коишто во минатото беа евидентирани како капитални расходи, а при тоа не гледавме никаде инвестиција. Имено тоа ме радува.  Првпат, значи  има корекција на расходна страна или зголемување од околу 6 милијарди денари – рече Димитриеска-Кочоска.

Таа додаде дека речиси во сите министерска има зголемување на средства, но најголем дел од предвиденото зголемување на капиталните расходи се во делот на АА програмата, каде што има навистина висок процент на реализација на капиталните инвестиции и дека навистина работите на терен се гледа дека се одвиваат со забрзана динамика. Понатаму во Министерството за животна средина и просторно планирање, каде има зголемување во повеќе ставки. Најголемиот дел е кај капиталните расходи при тоа 700 милиони денари се предвидени за пречистителната станица во Скопје. Во Министерството за животна средина и просторно планирање има повеќе проекти коишто се поврзани со финансирање поврано со  ИПА. Има зголемување и на ставки во Министерството за одбрана во делот на капиталните расходи.

Министерката појасни дека со Ребалансот проектираните вкупни приходи ги покриваат тековните расходи и дека останува разлика којашто е насочена кон капитални расходи.

– Тоа значи дека целиот буџетски дефицит во суштина оди на финансирање на капиталните расходи или она што меѓу граѓаните е познато како инвестиции. И мора да се согласиме тука сите дека секојдневно најпрвин гледаме дека во секое едно, би рекла, населено место имаме пуштање во употреба на некој проект. Што значи дека навистина имаме реализација на теренот. И тоа секој граѓанин може да го види со голо око, што јасно покажува дека да, тоа купче, би рекла, можеби најмногу тежи. Од друга страна гледано и од економските параметри, преку бруто домашниот производ и растот на БДП, јасно покажува дека навистина и Владата има придонес, да кажеме, преку растот БДП, иако тој не е резултат само на тоа што го прави Владата, но и Владата има делумно придонес во растот на бруто домашниот производ – рече Димитриеска-Кочоска.

Во интервјуто се осврна на прибирањето приходи во Буџетот при што истакна дека полнењето е редовно и дека објавените податоци покажуваат дека кај сите даночни ставки има добра наплата. Единствената ставка кај која има пониска наплата се акцизите што е директно поврзано со мерките што беа преземени од страна на Владата.

Во врска со јавниот долг и задолжувањата, потенцира дека состојбата со јавниот долг досега успешно се менаџира, дека работите се под контролиа и дека задолжувањата креираат економски раст.

The post ПРВПАТ ИМАМЕ КАПИТАЛНИ РАСХОДИ ВО БУЏЕТОТ ШТО ЗНАЧАТ ОДРЕДЕНИ ИНВЕСТИЦИИ НА ТЕРЕН Димитриеска-Кочоска тврди дека државната каса редовно се полни appeared first on plusinfo.mk.

Собранието денеска го усвои Дополнетиот ребаланс на Буџетот за 2026 година со кој се обезбедуваат повеќе средства за развој и капитални инвестиции, поддршка на земјоделството, социјалната заштита, општините и за реализација на развојните приоритети на Владата, како и за непречено исполнување на законските обврски, соопшти Министерството за финансии.

Министерката за финансии Гордана Димитриеска-Кочоска во експозето по предлогот истакна дека тој претставува навремено и одговорно усогласување на буџетските проекции со новите економски околности и обезбедува средства за исполнување на законските обврски кои во меѓувреме се случуваа, како и за реализација на развојните приоритети согласно степенот на нивната реализација, се вели во соопштението.

Со Дополнетиот ребаланс вкупните приходи се ревидираат на 379,5 милијарди денари (6,15 милијарди евра), што претставува зголемување од 1,2 проценти во однос на иницијалниот Буџет. Вкупните расходи се ревидираат на 425,8 милијарди денари или повеќе за 2,8% од првичните проекции. Буџетскиот дефицит е проектираниот на 46,3 милијарди денари или 4,1% од БДП.

– Со овие измени обезбедуваме средства за исплата на зголемените плати во секторите каде што е предвиден раст, дополнителна поддршка за земјоделството, повеќе средства за социјална заштита и за општините. Она што особено го издвојува овој ребаланс е обезбедувањето дополнителни средства за забрзување на инвестицискиот циклус и за реализацијата на инфраструктурните проекти – рече министерката.

Таа додаде дека измените се насочени кон продолжување на политиките за економска стабилност, развој и одговорно управување со јавните финансии и потенцира дека денес со изгласувањето на Ребалансот продолжува инвестицискиот циклус, изградбата на инфраструктурата, поддршката за локалниот развој и се обезбедува сигурност и предвидливост за граѓаните и стопанството.

Со ребалансот се обезбедуваат 5,8 милијарди денари (94 милиони евра) повеќе средства за капитални инвестици и се проектирани на ниво од 46 милијарди денари (745,5 милиони евра)  што е 14,3% повеќе во споредба со иницијалниот буџет, а заради забрзаната динамика на реализација на капиталните проекти. Имено, во првата половина од годината реализацијата на капитални расходи достигна 19,4 милијарди денари, што претставува раст од 53,5 проценти во однос на истиот период минатата година. Зголемувањето на ставката за капитални расходи и инвестиции во инфраструктурата е причината за корекцијата на дефицитот од 0,6 процентни поени во однос на иницијалната проекција на буџетскиот дефицит.

Средствата се насочени кон реализација на проекти коишто директно го подобруваат животот на граѓаните и ќе создадат економски придобивки во наредните години. Планирано е финансирање проекти во патната инфраструктура и железничката инфраструктура, во областа на животната средина и комуналната инфраструктура, енергетика, образованието и детската заштита, земјоделство, правосудството, како и средства за капитални проекти во општините, односно поддршка на локалниот развој.

Со ребалансот се обезбедени дополнителни средства за сервисирање на најприоритетните обврски коишто произлегоа од потпишаните колективни договори, односно за повисоки плати, повеќе средства за земјоделството, како и за социјалната заштита.

Дополнително, преку вградувањето на амандманите, се обезбедија средства за жените коишто вршат земјоделска дејност, средства за воспоставување национална СОС линија за поддршка на жртвите на родово и семејно насилство, како и средства за отворање и ставање во функција на два згрижувачки центри за жртви на семејно и родово базирано насилство. Исто така, дополнителни 6 милиони денари се обезбедија за транспорт на вода за населението во Гостивар поради прогласената епидемија, 1 милион денари за Управата за извршување на санкции; 10 милиони денари во МОН за реконструкција на факултети, 12 милиони денари во Јавното обвинителство за продолжување на лиценца за набавка на софтвер, 170 милиони денари за изградба на дистрибутивни центри во Скопје и Струмица и реновирање и адаптација на зградата на ИПАРД, како и 80 милиони денари во Агенцијата за стокови резерви.

Растот на БДП за 2026 година со Ребалансот е проектиран на 3,5%.

ПОВЕЌЕ ПАРИ ЗА ИНВЕСТИЦИИ, ЗА ЗЕMЈОДЕЛСТВОТО И ЗА ОПШТИНИТЕ Димитриеска-Кочоска го презентира дополнението на ребалансот на буџетот пред пратениците

The post 745,5 МИЛИОНИ ЕВРА ЗА КАПИТАЛНИТЕ ИНВЕСТИЦИИ Собранието го усвои ребалансот на буџетот appeared first on plusinfo.mk.

Заврши комисиската расправа во Собранието за Предлог-ребалансот на Буџетот за 2026 година. Со министерката за финансии Гордана Димитриеска Кочоска разговараме за причините за ребалансот, за прашањата поврзани со стабилноста на јавните финансии и за приоритетите на управување со државната каса во периодот што следува.

• Министерке, во комисиската расправa беа прифатени и амандмани од опозицијата. Тоа е нешто што кај нас не се случува баш често во парламентoт. Што следува понатаму и каква порака испрати собраниската расправа?

– Комисиската расправа заврши согласно со предвидената процедура и сега следува Владата да го утврди дополнетиот текст на Предлог-ребалансот, во кој ќе бидат вградени амандманите што беа прифатени како основани во текот на комисиската расправа. Потоа документот ќе биде доставен на пленарна седница и очекувам до крајот на месецот да биде усвоен од Собранието.

Собраниските комисии се местото каде што треба да се води аргументирана и конструктивна дебата и да се изнесуваат предлози насочени кон подобрување на законските решенија во интерес на граѓаните. Токму затоа прифативме амандмани што придонесуваат за подобрување на предложените решенија.

Со прифатените амандмани обезбедивме дополнителна поддршка за жените кои вршат земјоделска дејност, средства за воспоставување национална СОС линија за поддршка на жртвите на родово и семејно насилство, како и средства за отворање и ставање во функција на два згрижувачки центри за жртви на семејно и родово базирано насилство. Тоа е уште една потврда дека кога постојат квалитетни и аргументирани предлози кои се во интерес на граѓаните, Владата има капацитет и политичка волја да ги прифати.

Остануваме отворени за аргументирана дебата, бидејќи веруваме дека Собранието е местото каде што преку размена на аргументи и заемно почитување се носат подобри решенија. Но, истовремено, овие амандмани не ја менуваат суштината на ребалансот. Основната цел останува иста: стабилни јавни финансии, редовно исполнување на сите законски обврски и обезбедување дополнителни средства за развојни политики.

Во услови кога светската економија се соочува со сериозни предизвици, ние избравме да реагираме навремено и одговорно. Не дозволивме неизвесноста да се преслика врз граѓаните и врз стопанството, туку преку ребалансот создадовме услови државата да продолжи со инвестициите и да обезбеди континуитет во реализацијата на сите приоритетни политики.

Очекувам и пленарната расправа да биде конструктивна и пратениците да го препознаат значењето на овој ребаланс, кој создава услови за продолжување на позитивните економски трендови и реализација на стратешките развојни приоритети на државата.

• Што беше клучната причина Владата да предложи ребаланс на Буџетот и дали тоа значи дека има проблем со јавните финансии??

– Тоа е една од најчестите заблуди кога станува збор за ребалансот на Буџетот. Во конкретниот случај, ребалансот не е последица на недостиг на приходи, ниту на нарушена ликвидност. Напротив, приходите се реализираат согласно очекувањата, а јавните финансии остануваат стабилни.

Потребата од ребаланс произлезе од променетите економски околности во текот на годината. Геополитичките случувања, растот на цените на енергенсите и промените на меѓународните пазари влијаеја врз одредени буџетски проекции. Како одговорна Влада, наша обврска е тие проекции навремено да ги усогласиме со реалната состојба.

Истовремено, во меѓувреме произлегоа и дополнителни законски обврски, пред сè поради потпишаните колективни договори, како и потребата од дополнителна поддршка за земјоделството, социјалната заштита и општините.

Но, она што најсилно го карактеризира овој ребаланс е определбата за инвестиции. Одлучивме средствата да ги насочиме таму каде што ќе создадат најголема додадена вредност за економијата. Затоа велам дека ова не е кризен ребаланс, туку развоен ребаланс.

• Кои се клучните приоритети на ребалансот и што конкретно ќе почувствуваат граѓаните?

Со ребалансот средствата ги насочуваме кон јасно утврдени приоритети. Пред сè, обезбедуваме непречена исплата на сите законски обврски на државата. Тоа значи редовна исплата на платите, пензиите, социјалните надоместоци и сите останати обврски што државата ги има кон граѓаните.

Дополнително обезбедуваме повеќе средства за земјоделските субвенции, за студентскиот и ученичкиот стандард, за спортот, за социјалната заштита, како и за општините, кои ќе можат да реализираат повеќе локални инфраструктурни проекти.

Најголемиот акцент, сепак, е ставен на капиталните инвестиции. Со ребалансот тие достигнуваат околу 46 милијарди денари, како резултат на тоа е корекцијата на буџетскиот дефицит од 0,6 проценти. Со други зборови, средствата не ги трошиме за непродуктивни расходи, туку ги инвестираме во инфраструктура која ќе создава економски раст и во наредните години. Остануваме целосно посветени на фискалната дисциплина и среднорочната фискална консолидација.

Паралелно со тоа, државата продолжува редовно да ги сервисира сите свои обврски. Само во првата половина од годината се сервисирани над 60 милијарди денари по основ на отплата на главнина и околу 12 милијарди денари за камати, што е силна потврда за финансиската дисциплина и одговорното управување со јавниот долг.

Нашата цел е задолжувањето да биде во функција на развојот. Инвестициите што денес ги реализираме во патишта, железници, енергетика, образование, здравство и комунална инфраструктура ќе создадат повисока економска активност, нови работни места и подобар животен стандард.

Паралелно, обезбедуваме и значително повеќе средства за проектите што ги реализираат општините. Нашата определба е секој регион да има корист од капиталните инвестиции, затоа што токму тие се двигател на економскиот раст и отвораат нови можности за локален развој.

• И покрај глобалната неизвесност, економските показатели покажуваат позитивни движења. Колку тие Ви даваат основа за оптимизам?

– Фактите покажуваат дека македонската економија е стабилна. Во првиот квартал од годинава економијата оствари реален раст од 3,1 проценти, а особено охрабрува што растот е широко поставен. Градежништвото расте со 7,2 проценти, услугите со 3,6 проценти, позитивни резултати бележи и земјоделството.

Растат платите, пензиите и кредитната активност, а извозот и странските директни инвестиции испраќаат силен сигнал дека довербата во македонската економија се зголемува. Во првиот квартал странските директни инвестиции достигнаа 218,6 милиони евра, што е раст од 46,8 проценти во однос на истиот период минатата година.

Овие резултати не се случајни. Тие се резултат на политиките што ги спроведуваме, стабилни јавни финансии, поддршка на инвестициите, подобра наплата на приходите, намалување на сивата економија и силен инвестициски циклус.

Нашата цел останува иста, да создадеме услови економијата да продолжи да расте, да привлечеме нови инвестиции и да обезбедиме подобар животен стандард за граѓаните. Верувам дека ребалансот на Буџетот е уште еден чекор во таа насока.

The post ГОРДАНА ДИМИТРИЕСКА КОЧОСКА • ОВА НЕ Е КРИЗЕН, ТУКУ РАЗВОЕН РЕБАЛАНС НА БУЏЕТОТ Јавните финансии се стабилни, акцентот е на капиталните инвестиции appeared first on plusinfo.mk.