Драмски театар Скопје го објави Конкурсот за наградата „Горан Стефановски“ за најуспешен драмски текст од млад македонски автор на возраст до 30 години. Конкурсот ќе биде отворен до 28 февруари 2026 година.

Преку овој конкурс, театарот сака да даде поддршка на драмско творештво на младите автори и да ја афирмира современата македонска драма.

Право на учество имаат автори, државјани на Македонија, кои до денот на завршување на рокот за пријавување не навршиле 30 години. Поднесениот текст мора да биде оригинално, неизведено дело, а не адаптација или драматизација на веќе постоечки книжевни или драмски форми.

Пристигнатите текстови ќе ги разгледува стручна Комисија составена од пет члена, а добитникот ќе биде објавен на прес-конференција што ќе се одржи во пресрет на денот на раѓањето на Горан Стефановски – 27 април.

Наградата се состои од паричен дел во износ од 60.000 денари (еднократно) и потпишување авторски договор со НУ Драмски театар Скопје, продукција и изведба на наградениот текст на една од сцените на театарот – малата сцена или на сцената „Ристо Стефановски“ – во рок од две години од затворањето на конкурсот.

Авторот се обврзува дека до премиерата во Драмски театар Скопје, текстот нема да биде отстапен на други лица или институции.

Со оваа награда, НУ Драмски театар Скопје ја продолжува својата посветеност кон развојот на македонското драмско писмо, негувајќи го духот на Горан Стефановски, чии дела се длабоко вкоренети во историјата на театарот. Од „Јане Задрогаз“ (1974) до „Огнени јазици“ (2013), на сцената на Драмски беа поставени 15 негови претстави, од кои осум беа праизведби.

The post КОНКУРС ЗА ДРАМСКИ ТЕКСТ ОД МЛАД АВТОР Пријавувањето за наградата „Горан Стефановски“ е до 28 февруари 2026 година appeared first on plusinfo.mk.

Драмски театар Скопје не ја додели наградата „Горан Стефановски“ за најдобар драмски текст од млад автор до 30 години, беше кажано на денешната прес-конференција.

Како што соопшти Викторија Рангелова – Петровска, драматург и претседател на Комисијата, на конкуросот, кој првпат беше распишан годинава во февруари за најдобар драмски текст од македонски автор до 30 годишна возраст пристигнале четири апликации.

По анализата, Комисијата едногласно одлучила наградата „Горан Стефановски“ да не се додели. Рангелова – Петровска кажа дека кај пристигнатите дела има потенцијал и дека им е потребна доработка за да прераснат во квалитетни драмски текстови и одлуката да да не се додели наградата не треба да се толкува како дестимулација, туку како поттик за следните текстови.

„Авторите на доставените драмски текстови обработуваат различни теми, инспирирани од различни општествени состојби. По формата и структурата драмските текстови во најголем дел се обидуваат да ја следат класичната драмска структура и затворената форма, но не успеваат до крај да изградат цврста драмска целовитост. Драмските ликови/карактери не се јасно дефинирани и развиени во однос на ситуациите во кои се поставени. Дијалогот во драмските дела (во некои помалку, во некои повеќе) не е во целосна функција на отсликување на карактерите и не придонесува за развојот на драмското дејство. Комисијата заклучи дека доставените драмски материјали се развиени до ниво на драмски скици/зачетоци, на кои им е потребна доработка за да прераснат во квалитетни драмски текстови“, се вели во образложението на Комисијата кое го прочита Рангелова – Петровска.

Од денеска, 28 април 2025 година се објавува нов конкурс на кој авторите ќе треба да ги достават драмските текстови најдоца до први февруари 2026, а резутатите ќе бидат објавени на денот на раѓањето на Горан Стефановски, на 27 април.

Комисијата која решавала за наградата ја сочинувале: Викторија Рангелова-Петровска, (драматург и претседател на Комисијата) и членовите: Жанина Мирчевска (драматург), Венко Андоновски (книжевен теоретичар), Дејан Лилиќ (актер првенец) и Димче Николовски (режисер).

Директорот на театарот, Роберт Вељановски кажа дека нема да ја коментира одлуката на Комисијата, истакнувајќи дека станува збор за исклучително компетентни луѓе.

– Не ни можам да коментирам одлуката на Комисијата. Решив дека драмските текстови кои пристигнаа на конкурсот ќе ги прочитам од денеска натаму. За жал, резултатот од конкурсот е тој, но ќе се земам за право сето тоа да го префрлам на нешто што се вели кратки рокови. Ние на 5 февруари го објавивме конкурост. Но, секогаш е така кога е првата година. И затоа конкурост за 2026 година го отвораме денеска – изјави Вељановски.

Од Драмски театар велат дека сакаат да бидат тие кои ќе откријат ново име во македонската драматургија.

– Ако Горан Стефановски, Јордан Плевнеш, Жанина Мирчевски биле лансирани од Драмски театар, Дејан Дуковски од МНТ, не гледам причина зошто не би имале нов човек којшто со својот квалитет ќе заслужи да биде лансиран, а Драмски од секогаш бил театарот што им давал можност на младите автори – изјави Вељановски.

The post ДРАМСКИ ТЕАТАР НЕ ЈА ДОДЕЛИ НАГРАДАТА „ГОРАН СТЕФАНОВСКИ“ Комисијата смета дека четирите понудени текстови не се доволно квалитетни appeared first on plusinfo.mk.

Кај спомен-клупата во Дебар Маало посветена на Горан Стефановски денеска се одржа настан „Горан е тука“ по повод 73 години од раѓањето на познатиот драмски автор.

На местото каде што во 2019 година беше засаден чинар во негова чест – во триаголниот парк спроти кафеаните „Наџак“ и „Идадија“ – љубителите на театарот, пријателите, семејството и почитувачите на делото на Стефановски се собраа да му оддадат почит.

Кај спомен-клупата посветена на уметникот се одржаа уметнички изведби кои потсетија на делото на Стефановски и на неговата трајна вредност за македонската култура.

Настанот опфати читање избрани текстови, изведени од Саша Димитриевска, Мирјана Трпковска-Костовска и Трајанка Илиева-Вељиќ, музички сет на Игор Стефановски, синот на драматургот, пантомима на Дарко Вељиќ, настап на групата „Аудио Скопје“, живи статуи и учество на пријатели и колеги од театарот.

Градоначалникот на Општина Центар Горан Герасимовски истакна дека „Горан не беше само писател – тој беше совеста на едно време“ и дека „со секој збор создаваше светови во кои се огледува нашето минато и иднина“.

– Горан не е само спомен, тој е присуство. Преку новите културни сцени што никнуваат низ Центар, сакаме да ја пренесеме пораката дека културата е жив организам што нè обликува, ни дава идентитет и ни ја носи душата на времето. Чест ми е што ова центарско катче го носи токму неговото име. Горан е тука, во зборот, во мислата, во сцената што никогаш не згаснува. Ви благодарам што сте дел од ова заедничко сеќавање – истакна Герасимовски.

Настанот беше во организација на Здружението на граѓани „Тим Театрос К“, со поддршка од Општина Центар.

Горан Стефановски е роден на денешен ден во 1952 година во Битола. Почина на 27 ноември 2018 година во Кантербери, Обединето Кралство.

The post ЦЕНТАРЦИ ГО ОЖИВЕАЈА ДУХОТ НА ГОРАН СТЕФАНОВСКИ Одбележан роденденот на познатиот драмски автор appeared first on plusinfo.mk.

Четири пријави пристигнале на конкурсот за доделување на наградата „Горан Стефановски“ за најдобар драмски текст од македонски млад автор до 30 години.

Согласно Правилникот за доделување на наградата „Горан Стефановски“ формирана e Комисија составена од пет члена од редот на истакнати и компетентни лица. Од редот на вработените во НУ Драмски театар Скопје, за членови на Комисијата се именувани: Викторија Рангелова Петровска – драматург, Дејан Лилиќ – актер првенец и Димче Николовски – режисер асистент. Како надворешни членови се именувани Жанина Мирчевска – драматург и Венко Андоновски – теоретичар на театар/литература. Членовите на Комисијата се должни на првиот состанок да изберат претседател.

Мандатот на надворешните членови на Комисијата е две години со право на реизбор по поминати четири години од првиот завршен мандат, а внатрешните членови имаат право на реизбор на неограничен број пати.

Комисијата е должна да ги оценува поднесените драмски текстови и постапката за избор на најдобар драмски текст од млад автор да ја спроведе во согласност со критериумите наведени во Правилникот. Пријавениот драмски текст покрај останатите критериуми треба да биде неизведуван и да биде оригинално авторско дело, а не драматизација или адаптација на романи, новели или мотиви на постојни драмски дела.

Авторот на наградениот драмски текст ќе биде објавен на прес конференција во пресрет на 27 април, денот кога бил роден Горан Стефановски. Добитникот на наградата ќе потпише авторски договор со НУ Драмски театар Скопје согласно кој театарот се обрзува да го инкорпорира наградениот драмски текст во предлог-програмата на театарот и да го продуцира со изведба на малата сцена или на сцената „Ристо Стефановски“ во театарот во рок од две години сметано од денот на завршување на Конкурсот. Добитникот ќе добие еднократна парична награда во висина од 60.000 денари, а авторот се обврзува да не го оттуѓува текстот поточно авторското право на други правни и физички лица сè до праизведбата во НУ Драмски театар Скопје.

На сцената на Драмски е поставена импресивна бројка од 15 премиери на Горан Стефановски почнувајќи од 1974 година кога се постави праизведбата на „Јане Задрогаз“ во режија на Слободан Унковски до праизведбата на „Огнени јазици“ исто така во режија на Слободан Унковски“ во 2013 година. Осум драмски текста се праизведбени постановки токму во Драмски театар.

Конкурсот има за цел да го негува сеќавањето на Горан Стефановски, да ја афирмира современата македонска драма, да го поттикне македонското драмско творештво и да го одржи континуитетот на македонското драмско писмо.

The post ЧЕТИРИ ДРАМСКИ ТЕКСТА ПРИЈАВЕНИ ЗА НАГРАДАТА „ГОРАН СТЕФАНОВСКИ“ Формирана комисија што ќе ги оценува текстовите appeared first on plusinfo.mk.

Драмски театар Скопје од оваа година ја востановува наградата „Горан Стефановски“ за најдобар драмски текст од македонски млад автор до 30 години возраст.

Наградата за најдобар драмски текст од македонски автор до триесет години ќе го носи името „Горан Стефановски“ и ќе се избира по пат на Конкурс во кој е опишана формата и содржината на пријавата за конкурирање, како и начинот на спроведување на постапката за избор. Конкурсот ќе биде јавно објавуван секоја година преку медиумите и на веб страната на НУ Драмски театар Скопје. Рокот за поднесување на пријава и останатата потребна документација е 15 дена од денот на објавувањето на Конкурсот. За спроведување на изборот за најдобар драмски текст од македонски автор на возраст од 30 години е задолжена Комисија од 5 члена, а авторот на наградениот драмски текст ќе биде објавуван на прес конференција во пресрет на 27 април, денот кога бил роден Горан Стефановски.

Право на учество на Конкурсот за избор за најдобар драмски текст од македонски млад автор на возраст до триесет години имаат автори кои се македонски државјани и се на возраст до 30 (триесет) години, сметано до денот на завршување на пријавувањето.

Конкурсот има за цел да ја афирмира современата македонска драма, да го поттикне македонското драмско творештво и да го одржи континуитетот на македонското драмско писмо. Пријавениот драмски текст треба да биде неизведуван и да биде оригинално авторско дело, а не драматизација или адаптација на романи, новели или мотиви на постојни драмски дела.

Добитникот на наградата ќе потпише авторски договор со НУ Драмски театар Скопје согласно кој театарот се обрзува да го инкорпорира наградениот драмски текст во предлог-програмата на театарот и да го продуцира со изведба на малата сцена или на сцената „Ристо Стефановски“ во театарот во рок од две години сметано од денот на завршување на Конкурсот. Добитникот ќе добие еднократна парична награда во висина од 60.000 денари, а авторот се обврзува да не го оттуѓува текстот, поточно авторското право на други правни и физички лица сè до праизведбата во НУ Драмски театар Скопје.

Директорот Роберт Вељановски ја истакна радоста и едногласната подршка на ансамблот што токму Драмски ја востановува наградата „Горан Стефановски“ од причина што и Горан го имаше Драмски за „свој театар“. Од 1974 година кога се постави праизведбата на  „Јане Задрогаз“ во режија на Слободан Унковски до праизведбата на „Огнени јазици“ исто така во режија на Слободан Унковски“ во 2013 година, на сцената на Драмски театар се поставени импресивна бројка од 15 негови премиери, а осум од нив се праизведбени постановки.

На сцената на Драмски театар се играни следните претстави на Стефановски:

1. Јане Задрогаз – праизвеба: 1974; режија Слободан Унковски
2. Диво месо – праизведба: 1979; режија Слободан Унковски
3. Хај – Фај – премиера: 1983; режија Љубиша Георгиевски
4. Дупло дно – премиера: 1984; режија Слободан Унковски
5. Тетовирани души – праизведба: 1985; режија Паоло Маџели
6. Кула Вавилонска – праизведба: 1990; режија Слободан Унковски
7. Чернодрински се враќа дома – праизведба: 1992; режија Слободан Унковски
8. Сега му е мајката – праизведба: 1995; режија Димитар Станковски
9. Диво месо – премиера: 2000; режија Александар Поповски
10. Тетовирани души – премиера: 2001; режија Сашо Миленковски
11. Жив чоек / Everyman – премиера: 2004; режија Дејан Дамјановски
12. Лет во место – премиера: 2005; режија Љупчо Ѓорѓиевски
13. Демонот од Дебармаало – праизведба: 2006; режија Слободан Унковски
14. Огнени јазици – праизведба: 2013; режија Слободан Унковски
15. My Name is Goran Stefanovski (компилација на фрагмети од драмите Црна дупка, Лонг плеј, Сараево, Казабалкан, Хотел Европа, Евроалиен и Одисеј) – премиера: 2022; режија Бранислав Миќуновиќ.

Драмски театар Скопје денеска го објави Конкурсот за доделување на награда „Горан Стефановски“ за најдобар драмски текст од македонски млад автор на веб страната на НУ Драмски театар Скопје и ќе трае заклучно со 15. ден од објавувањето.

Идејното решение за Конкурсот е направено од Дарија Пројковска и Бранко Прља од порталот Арно.мк со помош на вештачка интелигенција со идеја да се мотивираат што повеќе луѓе да ги користат АИ моделите во други креативни проекти.

The post ДРАМСКИ ТЕАТАР ВОСТАНОВИ НАГРАДА „ГОРАН СТЕФАНОВСКИ“ Објавен конкурс за најдобар драмски текст од македонски млад автор appeared first on plusinfo.mk.

По исклучително успешните две премиерни изведби, претставата „Замисли нов свет“ го привлече вниманието на јавноста и доби исклучително позитивни рецензии како од посетителите, така и од критичката фела во земјата. Сосем очекувано, таа ќе продолжи да биде дел од редовниот репертоар на МНТ и во новата 2025 година, почнувајќи од 17 јануари, и со веќе закажани изведби на 13.02, 21.03 и 26.04.

Претставата „Замисли нов свет“ е работена како колаж од делата на македонскиот драматург Горан Стефановски, со мотиви позајмени од неговите драми, но и од неговите размислувања надвор од театарот. Се работи за проект инициран од Македонски Телеком, во партнерство со МНТ и во копродукција со Сектор Филм, со кој беше заокружена целогодишната иницијатива на компанијата под слоганот #НаправиМесто. Иницијативата e идеја на агенцијата Saatchi&Saatchi, дел од Publicis Groupe Скопје, која благодарение на големата упорност и труд, успеа да ги спои театарот, маркетингот и бизнис заедницата во хармоничен спој кој ќе остави траен траг во домашната култура.

„Препознатливата минималистичка сценографија во функција на постмодернистичката режија на Витошевиќ, надополнета со прецизни визуелни ефекти, тонирана музика и осум актери кои го оставија срцето на штиците што живот значат, гравираа речиси двочасовно волшепство, што ни ги растресе емоциите и мислите“, пишува во рецензијата на ТРН.мк.

Сите сцени и мотиви во претставата се инспирирани од творештвото на Горан Стефановски, а истото важи и за насловот – „Замисли нов свет“, кој суптилно испраќа порака за надеж и го повикува гледачот да погледне напред, кон нешто подобро. Низ самата претстава се испреплетени ликови кои добро ги познаваме од драмите „Диво месо“, „Лет во место“, „Дупло дно“ и сме ги читале, гледале, слушале одново и одново и одново. „Замисли нов свет“ раскажува приказна исткаена од материјалот на нашата заедница, онаа во која имаме пораснато и која нѐ има обликувано. Секоја од сцените е емотивна, моќна и внимателно одбрана за да го прикаже патот кон себепронаоѓање кој мораме да го поминеме сите ние за да дознаеме кои сме навистина.

„’Замисли нов свет’ е претстава што може да донесе и поширока публика во театар. Јасна, чиста, гласна, убава… ‘Замисли нов свет’ ќе ве натера да размислувате за себе, за животот, за нас и колективното“, пишува во рецензијата на УМНО.мк.

Уште на самата премиера, на која беа присутни некои од највпечатливите јавни личности и претставници на самиот државен врв, можеше да се забележи дека не се работи за обична театарска претстава. Насловот кој асоцира на надеж ни порачува дека околу нас може да постои нешто убаво, кое најпрво треба да го замислиме. А изведбите на актерите ни помогнаа да ја разбудиме фантазијата и во само час и половина успеаја на сцената на Македонскиот народен театар да создадат еден нов свет, инспириран од сите нас, а изграден од зборовите на Горан Стефановски.

Одлично избраната актерска екипа направи спој на различни генерации актери – некои од нив познати и добро афирмирани, а останатите блескави млади ѕвезди чие време допрва доаѓа. Особено внимание привлече враќањето на сцената на Верица Недеска, која по повеќе од 20 години повторно застанува на драмските штици за нејзината улога во „Замисли нов свет“. Заедно со неа, во претставата се појавуваат Игор Ангелов, Нина Деан, Филип Трајковиќ, Дамјан Цветановски, Ана Јовановска, Стефан Спасов и Антонио Ташковски.

Драматизацијата на претставата ја направи Ана Ристоска-Трпеноска, а како режисер на истата се потпишува Нела Витошевиќ.  За сценографијата е задолжен Константин Трпеноски, а костимите се авторство на Роза Трајчевска-Ристоска. Претставата е совршено надополнета и со оригинални песни помеѓу сцените, компонирани од Огнен Анастасовски, по текстовите на Стефановски како и изјави од неговите интервјуа. Овој уникатен проект е инициран и финансиски поддржан од Македонски Телеком, во еден редок спој на бизнис заедницата и театарот, кој се надеваме дека ќе инспирира повеќе вакви соработки во иднина.

Јавноста ќе може да ја погледне следната изведба на претставата „Замисли нов свет“ веќе на 17 јануари, во редовниот термин на МНТ од 20 часот. На репертоарот на МНТ веќе се закажани и наредните изведби на 13 февруари, 21 март и на 26 април.

The post ПОРАКИТЕ НА ГОРАН СТЕФАНОВСКИ И ГОДИНАВА НА РЕПЕРТОАРОТ НА МНТ Продолжува да игра „Замисли нов свет“ appeared first on plusinfo.mk.

„Замисли нов свет“ е претстава која треба да се види и доживее! Премиерната изведба одлична, со фантастични ликови, и длабоки и суштински дијалози кои сите не засегаат. Еден и пол час театарска претстава исполнета со емоции, себе преиспитување, потсетување на она што сме, но и што можеме да бидеме“, се вели во соопштение до медиумите.

Миграциите, недоразбирањата меѓу генерациите, љубовта и загубата, распадот на вредностите го сочинуваат тематскиот опсег на претставата „ Замисли нов свет“. Работена според сцени од 7 култни текстови на Горан Стефановски, претставата беше поздравена од публиката со голем и долготраен аплауз.

– „Замисли нов свет” е претстава која создава чувство на поврзаност со сета своја магија на сцената, од музичката изведба, визуелните ефекти, докажа дека културата може да биде препознаена, а театарот е моќен медиум што може да влијае и да ги менува на подобро работите во едно општество. Со вакви проекти се вреднува интелектуалниот труд – нешто што е нормално кога се занимавате со уметност во други развиени земји” – изјави драматургот Ана Ристоска–Трпеноска.

Сите актери, Верица Недеска, Дамјан Цветановски, Игор Ангелов, Филип Трајковиќ, Нина Деан, Ана Јовановска, Стефан Спасов и Антонио Ташковски кои срдечно ја отпоздравија, па од јануари 2025 година публиката ќе има можност да ја гледа на редовен репертоар.

Претставата ја користи музиката на Огнен Атанасовски.

„Огромно браво за идејата на Saatchi&Saatchi Скопје, и за Телеком кој овозможи реализација на ваков значаен театарски и културен проект, и услови за многу млади уметници да ја покажат својата креативност и да ги пренесат своите пораки на публиката“, се вели во соопштението.

„Замисли нов свет“ е проект на Телеком во копродукција со МНТ во режија на Нела Витошевиќ. Претставата, како што се вели во соопштението, треба „да нѐпоттикне сите нас да размислуваме на добрите работи и конекции што можат да се случат ако се согласиме да ги надминеме разликите и помислиме на големиот број работи кои нѐ поврзуваат“.

„Претставата е всушност колаж од делата на нашиот најпознат драмски автор и преку низа на уникатни ликови и ситуации зборува за она за кое и самиот Стефановски беше заинтересиран целиот негов живот: за луѓето и нивните карактери, за општеството и за сите начини на кои можеме да го направиме светот околу нас подобро место за живеење“, велат од тимот.

„Замисли нов свет“ е претстава за надежта и за човековиот дух кој низ разни генерации и состојби ќе успее да најде начин да се бори со сите проблеми кои ги задава животот. Целиот склоп на текстот е приказна за заедништво што ни покажува дека сите можеме да учиме едни од други и да си го најдеме своето место во општеството“, велат од тимот и порачуваат дека претставата е доказ дека уметноста е и треба да биде „движечка сила за општествена трансформација“ и „инспирација за многу генерации“.

The post 📷 „ЗАМИСЛИ НОВ СВЕТ“ ЈА ИМАШЕ СВОЈАТА ПРЕМИЕРА Претставата обработува 7 култни текстови на Горан Стефановски appeared first on plusinfo.mk.

На денешен ден, Македонија се сеќава на Горан Стефановски – еден од најголемите писатели и драматурзи на Балканот, чија уметничка визија и генијалност го обликуваа театарот и литературата не само во Македонија, туку и во цела Европа. Роден во Битола на 27 април 1952 година, неговиот живот беше посветен на создавање дела што ги предизвикуваа и инспирираа многу генерации. Со неговото неуморно творештво, Горан Стефановски ја осветли и разгледа драматургијата во сите свои форми, започнувајќи од театрални дела како „Диво месо“ и „Лет во место“, па се до неговите подоцнежни адаптации на антички грчки драми и сценарија за филмови.

Неговата работа беше пофалена за длабоката анализа на идентитетот, културната историја и политиката, а неговите претстави се изведувани на најголемите сцени во светот. Стефановски не само што беше признат драматург, туку и признат професор, кој ги воспитуваше новите генерации на талентирани драматурзи и театарски работници на Факултетот за драмски уметности во Скопје, како и на универзитети во Велика Британија и Шведска.

Но, и покрај тоа што Македонија го изгуби неговиот генијален ум со неговата смрт во 2018 година, неговото наследство продолжува да живее. Така, денес, неговото влијание е сепак живо и актуелно.

Дел од мислите во делата на Стефановски:

„Чекам веќе десет часа, а неа ја нема. Да знам дека ќе дојде, воопшто не би ја чекал“. (Конзервирани импресии),

„Боже. Сите ги мразам. Сите ми се грди, гадни и туѓи. Светот ми е нејасен и мачен. Лебот горчлив. Смилуј се Господи, поништи нè. Направи ја оваа година 1878 последна. Што ќе сме ти вакви?,

Сврти ја земјата наопаку, истури ги сите води, дупките наполни ги со сè што е живо, пушти оган да ги претвори во мрши, да ги засмрди, да ги сврти во пепел, па ветер да го развее пепелот по црни неба. Па наврти води да ги измијат трагите дека некогаш нешто лазело по земјава. И така да биде крај.

Да останат само камен и вода, да се тријат еден од друг, бесконечно, во вековите што идат. И така да биде мир и волјата твоја. Амин“. (Лет во место),

„Има помалку души одошто луѓе. Знаете ли тоа? Има повеќе тела одошто души. Па една душа опслужува повеќе тела. Душите се како кучиња. Сакаат да се блиску до господарот. А вам ви е гајле. Ги пуштате да гладуваат, да лутаат неспокојно“. (Жив Човек),

„Ќе има војна… Ќе има војна… – Доста беше и ваков мир“. (Диво месо),

„Денес сè се купува и продава. Дури и она кое луѓето мислат нема цена. Тоа обично е и најевтино.“ (Диво Месо),

„Иднината никако да дојде, минатото никако да си отиде, а ние овде глумиме сегашност.“ (Тетовирани души).

The post МАКЕДОНИЈА ГО ИЗГУБИ НЕГОВИОТ ГЕНИЈАЛЕН УМ СО НЕГОВАТА СМРТ Шест години без македонскиот горостас Горан Стефановски appeared first on plusinfo.mk.

Македонски Телеком ги заокружува активностите од иницијативата #НаправиМесто со уникатен театарски проект насловен „Замисли нов свет“, создаден како колаж од делата на Горан Стефановски, во соработка со Македонскиот народен театар.

Направи место

Со иницијативата #НаправиМесто, Телеком ја отвори темата за предизвиците со кои се соочуваме како општество и повика на нивно надминување и на вистинско поврзување меѓу луѓето. Во текот на годината беа реализирани низа проекти на оваа тема, се приклучија голем број значајни личности, се адресираа многу проблеми, се отворија чувствителни теми и се работеше на прифаќањето на разликите меѓу луѓето. Иницијативата се поврзува со пораките од делата на еден од нашите најголемите драмски автори – Горан Стефановски, коишто се врежани во нашата меморија и се подеднакво силни и вистинити и денес.

Замисли нов свет

Театарскиот проект „Замисли нов свет“ ги оживува зборовите на Стефановски за вечните вредности како што се човечноста, разбирањето и поврзаноста, квалитети што често се губат во денешното секојдневие.

Претставата е направена во соработка со Македонскиот народен театар, во режија на Нела Витошевиќ, со драматуршка адаптација на Ана Ристоска-Трпеноска и во продукција на Владимир Анастасов и Ангела Несторовска од Сектор филм. Обединува врвна актерска екипа од различни генерации: Игор Ангелов, Верица Недевска, Дамјан Цветановски, Филип Трајковиќ, Нина Деан, Ана Јовановска, Стефан Спасов и Антонио Ташковски. Музиката е дело на композиторот Огнен Анастасовски, сценографијата на Константин Трпеноски, а костимите на Роза Трајчевска-Ристоска.

Претпремиерата и премиерата на „Замисли нов свет“ се закажани за 16 и 17 декември, а претставата понатаму ќе биде дел од репертоарот на МНТ како вредна инвестиција којашто го пренесува творештвото на Стефановски и неговите пораки до идните поколенија.

Оваа претстава не само што ги заокружува активностите на иницијативата #Направи место, туку е и поддршка на трајните вредности и на уметниците коишто оставиле безвремен белег во нашата култура.

The post „ЗАМИСЛИ НОВ СВЕТ“ – КОЛАЖ ОД ДЕЛАТА НА ГОРАН СТЕФАНОВСКИ Театарски проект инициран од Телеком во соработка со МНТ appeared first on plusinfo.mk.

– Преку овој чин се оддава почит и се чува споменот за Горан Стефановски и неговата улога во развојот на македонската драматургија и театар, и воедно се проширува заложбата на ДТС за афирмација на македонските млади автори и македонското драмско писмо – велат од театарот.

Стефановски како млад драмски автор со драмските дела „Јане Задрогаз“ и „Диво месо“ во соработка со ДТС постигна успеси за паметење. За временската рамка во која ќе се одвива конкурсот и пропозициите од истиот, јавноста ќе биде дополнително информирана.

ДТС ќе партиципира и во Фондацијата „Горан Стефановски“ основана со одлука на УКИМ под иницијатива на Факултетот за драмски уметности. И ќе земе активно учество во реализацијата на програмските активности на истата.

The post ДРАМСКИ ТЕАТАР ДОДЕЛУВА НАГРАДА „ГОРАН СТЕФАНОВСКИ“ Ова признание ќе оди во рацете на млад драмски автор за најдобар драмски appeared first on plusinfo.mk.