На берзите цената на пченицата денеска е 6,0098 долари за бушел (бушел е еднаков на 27,216 кг) или 12 денари за килограм. Цената на  пченицата на последниот ден од тргувањето на новосадската продуктна берза – 4 декември е 24 динари за килограм.

– Цената на пченицата се стабилизира на одредено ниво од жетвата наваму, со мали осцилации. Во Србија се продава за 185 евра за тон. На Европската берза цената е 220 евра за тон, а на американската берза 203 долари за тон. Набавката на пченица чини и дополнителни 40 до 45 евра за превоз и тоа не е променето во овој период. Тоа е веќе планиран трошок. Во овој период и цената на струјата и нафтата имаат мали осцилации, што се смета за стабилна цена. Според ова, нема никакви услови за зголемување на цените на брашното и лебот – вели претседателот на Здружението на мелничко-пекарската индустрија Горан Малишиќ.

Тој смета дека големите пекарски капацитети кои користат гас во производството може да имаат дополнителни трошоци поради бугарската такса на гас.

– Но, ова нема да биде трошок кој ќе услови повисока цена на лебот и на другите производи на овие пекарници -додава Малишиќ.

Од мелничко-пекарската индустрија не очекуваат подрастична промена на цените на пченицата и енергенсите во наредниот период.

– Во нормални години, кога состојбата во светот е стабилна, цените не осцилираат многу. Имаме зголемување на цените од јануари до март, но лани поради војната во Украина се дестабилизира пазарот и на пченицата и на енергенсите. Годинава, меѓутоа, имаме стабилни цени и покрај војната на Блискиот Исток, но не поради тоа што не влијае војната на пазарот туку поради фактот што лани земјите беа принудени да направат големи резерви од пченица и на одделни енергенси и тоа влијае на намалување на побарувачката на пченица, а со тоа  и на нејзината цена. Ова очекувам да се задржи и во наредниот период и не очекувам некакво драстично зголемување на цените. Освен, се разбира, ако нема некоја екстремна состојба, како нова војна во Европа, која може драстично да ги дестабилизира цените – вели Малишиќ.

Годишно во земјава се увезуваат меѓу 60.000 и 100.000 тони пченица, зависно од годината и од домашното производство. Годишните потреби се проценуваат на 300.000 тони, а од домашното производство, зависно од годината, се обезбедуваат околу 250.000 тони пченица.

Мелничарите практикуваат најголемиот дел од потребните количини на пченица да ги обезбедат од домашно производство по жетвата, а дополнителните количини ги купуваат по жетвата или по Нова година.

The post САМО ЕКСТРЕМНА СИТУАЦИЈА МОЖЕ ДА ЈА ЗГОЛЕМИ ЦЕНАТА НА ЛЕБОТ И БРАШНОТО Мелничарите очекуваат стабилна цена на пченицата и по Нова година appeared first on plusinfo.mk.

Од пекарската индустрија објаснуваат дека секојдневно нивните трошоците за производство растат, па нема можност цените на нивните производи да се намалат. Според нив, проблем е и цената на работната рака, недостигот на работници, а ако продолжи трендот на зголемување на цената на нафтата и другите енергенси, кои се користат во индустријата ќе растат и цените на суровините и на пекарските производи.

Граѓаните кои секојдневно купуваат бурек и бели печива коментираат дека цените на овие производи се високи, а не ги намали ниту владината акција за гарантирани цени.

– Брашното е поевтино, маслото за јадење исто, а нашите бурекџилници никако да ги намалат цените на бурекот и белите печива. Никогаш еден ѓеврек не чинел колку и килограм брашно. Еве споредба брашно има и за 27 денари килограм-Битолското, и за 35 денари – Воденичар, или за 39 денари – Кадино. И маслото поевтине, го има и за 100 денари, ама ѓеврекот го купувам секое утро за 40 денари. Навистина го има и за  30 денари оној обичниот, но тоа е колку половина или килограм брашно. Да не зборуваме за бурекот или баничките и тие држат цена и се продаваат зависоно од филот од 60 до 80 денари четврт. Па има ли инспектори да проверат каде одат цените во бурекџилниците – вели скопјанин.

Слични коментари за цените на пекарските производи има и на социјалните мрежи.

„Повторно Брашното е 25 денари. Зејтинот 60 денари. Се најде ли некој еснаф пекар што ги намали цените на бурекот и печивата? Никогаш цената на ѓеврекот не била колку еден килограм брашно. Три дена никој да не им влезе во дуќан ќе видите како можело бурекот да биде 50 денари и ѓеврекот 15“, коментира граѓанин во група на Фејсбук.

Од мелничко пекарската индустрија појаснуваат дека цените на пекарските производи се повисоки бидејќи трошоците за производство се пораснати во изминатиот период. Тие велат дека поскапеле другите суровини за производство, цената на работната рака, а голем удел во цената има и зголемената цена на енергенсите и транспортот.

– Пекарите не можат да размислуваат за намалување на цената на производите бидејќи нивните трошоци се драстично зголемени. Проблемот на пекарската индустрија е тоа што најголемиот број од нив се мали компании каде што процесот оди рачно, а има недостиг од мајстори пекари, па се принудени за да ги задржат да ги плаќаат поскапо. Згора на тоа цената на нафтата која се користи во производство, но и за транспорт ги зголеми трошоците за 100%. Истовремено се зголемија и цените на месото и млечните производи кои ги користат во производството, како и додатоците, сусамот и друго што секако влијае на крајната цена на производот. Значи во крајната цена на бурекот или ѓеврекот не влегува само брашното и маслото за јадење, туку и низа други производи и работната рака. Сето ова говори дека и да сакаат пекарниците не можат да ги намалат цените на производите – вели Горан Малишиќ, претседател на здружението на мелничко-пекарската индустрија на Стопанската комора.

Според него, доколку цените на енергенсите растат, што веќе е видливо поради војната во Израел, тоа ќе влијае и на цената на суровините во мелничко-пекарската индустрија, па неминовно ќе биде и цените на брашното и пекарските производи да растат.

– Цените на суровините сега на светските берзи сè уште се стабилни, но секој конфликт, како и овој последниот во Израел, влијае на берзите и ако потрае ќе значи зголемување на цената на пченицата, а со тоа и на брашното и пекарските производи. Поради конфликтот, но и поради доаѓањето на зимата секојдневно расте и цената на нафтата и другите енергенси кои се голем трошок во оваа индустрија бидејќи се користат во процесот на производство и за транспорт. Само транспортот во оваа индустрија се зголеми за 100% што не е мал трошок, а ако нафтата достигне цена од 150 долари за барел како што се предвидува, состојбата ќе стане уште подраматична. Сега засега цените се стабилни и на нашите крајни производи – брашното и пекарските производи, но доколку на пазарот и конкуренцијата од регионот за брашното се променат, ќе растат и нашите цени – вели Малишиќ.

Тој смета дека владата треба да ја следи состојбата и во одреден момент да ја помогне оваа индустрија, за да опстанат фирмите, а граѓаните да не јадат поскапи производи.

– Доколку владата планира и натаму да ги чува замрзнати цените на овие производи, тоа ќе значи пропаѓање на голем број мелници и мали пекарници. За да не се случи вакво сценарио владата ќе мора да изнајде начин да ја помогне индустријата за да опстане. Ова го говорам и од причини што најголемиот дел од компаниите во оваа индустрија, поради ниските цени на производите се на работ на профитабилност или се во загуба. Таквата состојба не може да трае долго, па ќе има или зголемени цени на производите или ќе се затвораат компаниите – вели тој.

Речиси  85% од пазарот на бели печива во земјава покриваат малите пекарници.

The post ОВА НИКОГАШ НЕ БИЛО, ЕДЕН ЃЕВРЕК ПОСКАП ОД КИЛОГРАМ БРАШНО! Ништо не може да ги запре цените на белите печива appeared first on plusinfo.mk.

– Засега цената е таа што ја имаме на пазарот. Домашното брашно е поевтино и од увозното. Но, дали цената ќе оди нагоре, не можам да кажам, бидејќи ќе зависи од конкуренцијата и нашите трошоци во наредниот период, односно цената на струјата, нафтата и се разбира на пченицата која се набавува за дополнување на резервите направени во јули. Моменталната берзанска цена е 21 денар за килограм. Претходно одеше и до 22 денари, може да падне и под оваа цена. Или моменталните набавки кои мелниците мораат да ги направат поради нискиот квалитет на домашната пченица ги чинат од 205 до 210 евра по тон за кои се плаќаат дополнителни царински давачки и цена на транспорт кои ги зголемуваат трошоците на 245 односно 250 евра по тон зависно колку е оддалечена мелницата од границата. Меѓутоа, цената на берзите варира секој ден и за секоја набавка е различна. Така ќе биде до Нова година, но потоа ќе видиме што ќе се случува, бидејќи вообичаено цените на берзите на почетокот на секоја година растат и има проблем со набавките – вели Горан Малишиќ, претседател на Здружението на мелничко-пекарска индустрија на Стопанската комора.

Мелничката индустрија подолг период кубури со пари и поради тоа одамна не планира резерви од пченица за подолг период, туку ги надополнува според цените на пазарот. Дополнително, годинава домашната пченица беше со слаб квалитет, поради што мелниците ќе треба да увезат поголеми количини поквалитетна пченица за да го добијат стандардниот квалитет на брашното.

– 90% од домашната пченица беше неквалитетна, но ние го намаливме критериумот за да бидеме коректни кон домашните производители и откупивме планирани количини по цена од 9 до 12 денари по килограм. Остатокот мораме да го увеземе за да добиеме стандарден квалитет на брашното, што нѐ чини повеќе од вистинската цена. Секаде цената, според берзите е 160 евра по тон, но ние плаќаме многу повеќе и до 250 евра поради транспортот и другите трошоци за увоз – појаснува Малишиќ.

Според него, моментално се прави паника со цените, па и најавата на одделни пекарници дека имаат намера да ги зголемат цените на лебот во септември е во тој контекст.

– Најавата е легитимна бидејќи се темели на трошоците, но нема да има големо поскапување бидејќи ќе се усогласат цените со трошоците, а тоа ќе значи 1 до 2 денари повисока цена на лебот, се разбира доколку се случи тоа зголемување – вели Малишиќ.

Тој додава дека од големите пекарници моментално нема најава за потреба од зголемување на цената на лебот.

– Кај нас нема најава за зголемување на цената на лебот. Претходно веќе имаше корекција на цените и мислам дека наредните месец-два нема да има ново зголемување на цената и ако има тоа ќе биде минимално. И, пак, ќе кажам сè зависи од случувањата на пазарот кои се зависни од актуелните политички состојби во светот – вели Малишиќ.

Претставници на дел од пекарската индустрија деновиве најавија дека од септември е неопходно ново поскапување на лебот, доколку државата не помогне за оваа индустриска гранка да не трпи големи загуби поради високите цени на пченицата на светските берзи, како последица на излегувањето на Русија од Договорот за извоз на украинско жито.

– Од крајот на јули, по излегување на Русија од Договорот за извоз на украинско жито, цените на берзите се зголемија за 10 до 15%. Исто така и покачувањето на цените на млечните и месни производи има удел, затоа што и овие продукти партиципираат во пекарската индустрија. Внимателно се следи ситуацијата и секој производител утврдува дали ќе ги покачи цените или ќе продава по исти цени – изјави Горан Ѓоргиевски, претседател на Агро-бизнис комората при Сојузот на стопански комори.

The post ЌЕ ПОСКАПИ, НЕМА ДА ПОСКАПИ? Брашното засега иста цена, а лебот може да скокне за денар-два appeared first on plusinfo.mk.

Земјоделците велат дека годинава ќе имаат добри приноси и квалитет на пченицата, но велат дека сè уште нема договорена цена меѓу нив и мелничарите.

– Нема цена. Ќе видиме која ќе биде откако ќе почне жетвата за неколку дена. Она што го нудат мелничарите е далеку од нашата производна цена и во никој случај нема да можеме да ги покриеме трошоците. Очекуваме добар принос и квалитет на пченицата, но додека не почнеме да жнееме нема да знаеме точно со какви приноси располагаме. Жетвата не е почната и нема реализиран откуп за да знаеме како ќе се движат цените. Добро е што владата ќе дава дополнителни субвенции од 3 денари бидејќи секој даден денар за земјоделците е добредојден. Посебно сме задоволни што се прифати нашето барање за откуп на повеќе пунктови за стоковите резерви, со цел да се откупи домашното производство – вели Петре Стојкоски, претседател на Асоцијацијата на земјоделци.

Официјално, од 70 000 хектари, што е зголемување за 13% во споредба со лани, се очекуваат околу 260.000 тони пченица, но дождовите може да ги намалат приносите за 10 до 20%.

Мелничарите кои почнаа да ги откупуваат првите тони пченица велат дека можат да ја дадат само пазарната цена која се движи од 9 до 11 денари за килограм, зависно од квалитетот на пченицата.

– Годинава квалитетот на пченицата е понизок и не можеме да ја ставиме во ниту една класа, барем за оние количини кои веќе се откупени. Хектолитарот изнесува од 63 до 68 што е долна граница за квалитет и се рангира во добиточна храна. Но како мелници не смееме да дозволиме нашите клиенти да претрпат штета во година кога квалитетот на пченицата е низок и затоа се обидуваме да откупиме што поголеми количини пченица, а потоа со мешање со поквалитетна увозна пченица, ќе добиеме квалитетно брашно. Колку понеквалитетни пченица купуваме од домашно производство толку повеќе ќе треба да увеземе поквалитетна, што пак прави да работиме на ниво на рентабилност или во загуба секоја година. Берзанската цена во Србија во моментов е 9,5 денари за килограм и таа цена ја даваме на земјоделците. Зависно од квалитетот, цената може да биде и 10 и 11 денари по килограм. Тоа значи дека земјоделците ќе добијат цена од 15 до 17 денари за килограм, ако тука се пресметаат и 3 денари дополнителна субвенција и 3 денари досега земени субвенции од владата – вели Горан Малишиќ, претседател на Здружението на мелничари.

Според него, годинава пченицата има понизок квалитет не толку поради дождовите кои се навремени, туку повеќе како резултат на ненавремената прихрана и недоволната употреба на заштитни средства. Ваквото тврдење на мелничарите Стојкоски го окарактеризира како дезинформација бидејќи, како што вели, жетвата не е почната за да се утврди квалитетот и приносите.

– Ние тврдиме дека имаме најдобар квалитет на пченица во последните години и имаме добри приноси. Значи, нашето спроти нивното тврдење. Пченицата главно е во Пелагонија, а таму не е почната жетвата за да се види со каков квалитет и приноси располагаме. Сè додека не почне жетвата, ниту ние, ниту мелничарите можат да кажат каков е квалитетот на пченицата. Да потсетам, тие ќе ја кажат откупната цена, а ние ќе кажеме колку ќе чини лебот подоцна. Приносите и квалитетот ќе ги видиме најверојатно за 3 дена кога официјално почнува жетвата – додава тој.

Министерството за земјоделство и годинава најави дека ќе побара одобрување од страна на владата да се субвенционира пченицата со дополнителни 3 денари по килограм од интервентниот фонд, а субвенции ќе има и за јачменот.

– Предлагаме дополнителни 3 денари за предаден килограм пченица кај регистрирани откупувачи. Со ова производителите на пченица, покрај основните плаќања кои веќе се исплатени, покрај зелената нафта за која ќе добијат зелени картички во текот на летото, во овој период ќе ја утврдиме и оваа поддршка и овие средства ќе бидат исплатени исто така брзо и навремено. Дополнително планираме и авансна исплата на субвенциите кои ќе ги добијат земјоделците до сеидбата – информираше деновиве Николовски.

Тој информира дека и за јачменот ќе има дополнителни субвенции.

– Во Уредбата за директни плаќања креираме мерка за дополнителна субвенција за остварено производство на јачмен во вредност од 12.000 денари по хектар, без скалесто субвенционирање. Мерката е наменета за производителите на јачмен, кои оствариле минимален принос од 3.000 кг/ха и кои своето производство го имаат продадено кај регистрирани откупувачи или складирано во регистрирани објекти, продадено на домашни фарми, или пак производството го искористиле во сопствените фарми во период до 31 август 2023 година – појасни Николоски.

Министерството за земјоделство го зголеми и рокот за предавање во складишни капацитети на производството од пченица и јачмен, кој наместо од 1 август, ќе почнува од 15 јуни и ќе трае до 1 септември 2023 година, со цел да се опфатат и оние земјоделци кои досега веќе го предале своето производство.

Опозициската ВМРО-ДПМНЕ смета дека и годинава владата доцни со објавување на субвенциите за житарките.

На прагот од жетвата на пченицата каде мелничарите најавуваат откупна цена на пченицата од 10 денари, пред неколку дена излезе научната фела со пресметка дека производната цена на пченицата е 19,06 денари за килограм. Што значи дека вашите дополнителни 3 денари за кулограм ни од далеку нема да ја доближат цената до производната затоа што разликата од откупна до производна е над 9 денари за килограм. А каде е печалбата за земјоделците? – праша вчера Цветан Трипуновски, претседател на комисијата за земјоделство на партијата.

Земјава годишно произведува околу 260.000 тони лебно зрно, а останатите количества до потребните околу 320.000 тони, ги увезува.

The post СУБВЕНЦИИ ЌЕ ИМА, АМА НЕМА ОТКУПНА ЦЕНА ЗА ПЧЕНИЦАТА Ќе се чека да почне жетвата за да се виде со каков квалитет е зрното appeared first on plusinfo.mk.

Неизвесно е по која цена годинава земјоделците ќе ја продадат пченицата. На 3 недели до жетвата само се почнати преговори за висината на откупната цена меѓу земјоделците, откупните компании, мелниците и министерството за земјоделство. Земјоделците тврдат дека годинава нема да дозволат нивниот труд да биде обезвреднет и бараат да се почитуваат законите за формирање на цената. Тие тврдат дека годинава нема да дозволат да се обезвредни нивниот труд, па ако треба државата да го активира и интервентниот фонд.

Мелничарите, пак, очекуваат цена која ќе биде слична на онаа во регионот и ветуваат дека ќе ја откупат целокупната понудена количина.

Но, факт е дека цената на житото кај нас зависи од цената што ќе ја диктираат берзите на нашите соседни земји, пред сè Србија и Бугарија, па и Хрватска. Така, пред жетвата никој не сака да шпекулира за цената на житото.

Според податоците на Министерството за земјоделство, годинава се очекува да се соберат повеќе од 253.000 тони пченица бидејќи приносите по хектар се повисоки, а површините под оваа култура се зголемени за 4.000 хектари.

Земјоделците се надеваат дека повисоките приноси и квалитет на пченицата ќе го видат и во цената при откупот.

– Годинава имаме добри приноси (4 тони по хектар) и подобар квалитет на пченицата. Зголемени се и површините под оваа култура и очекуваме откупната цена да не биде под производната и додадениот процент за трошоци. Имавме високи трошоци при сеидбата и прихранувањето на пченицата. Житото го сеевме со нафта по цена од 110 денари по литар, имавме скап семенски материјал и ѓубрива по цена од 2.700 денари… Нашите трошоци се повисоки од лани и затоа нема да дозволиме откупната цена да биде под економски оправданата цена – вели Петре Стојкоски, претседател на асоцијацијата на земјоделци.

Стојковски очекува годинава државата да го активира и интервентниот фонд, ако биде формирана цена која нема да ги покрие нивните трошоци.

– Ќе бараме државата да не дозволи цената на пченицата годинава да биде под производната и да се земат предвид трошоците. Притоа ќе треба да се активира и интервентниот фонд кој е формиран за тоа. Потенцирам дека ние нема да дозволиме да се формира цена на наша штета – вели Стојкоски.

Мелничарите и откупувачите велат дека и годинава ќе ја откупат целата понудена количина пченица, ако цената е на ниво или пониска од таа во регионот.

– Цената на берзите последниов месец варира, а состојбата во Украина со поплавите и стопирањето на договорот за извоз дополнително ќе влијае на цената. Тоа значи дека до жетвата, кога ги откупуваме потребните количини пченица, не се знае колкава ќе биде цената. Очекуваме и годинава откупната цена да биде близу до онаа што ќе се утврди во регионот и како и минатите години, заедно со откупните компании да го откупиме сè тоа она што ќе го понудат земјоделците. Се разбира, ако цената е иста или приближна со онаа од регионот, бидејќи нема компанија која би работела со загуби – вели Горан Малишиќ, претседател за Здружението на мелничко пекарската индустрија.

Годишно мелничарите откупуваат по 75.000 тони пченица од домашно производство, а остатокот од потребите го надополнуваат со увоз.

– Годинава ќе има поголеми количини бидејќи за 12 отсто се зголемени површините под пченица. Вообичаено откупуваме меѓу 65.000 до 75.000 тони. Во тие рамки ќе биде и годинашниот откуп. Сепак, потенцирам, сето што ќе биде понудено ќе биде и откупено бидејќи нашите потреби се поголеми од она што се нуди на домашниот пазар – вели Малишиќ.

Според него, од цената на пченицата ќе зависи и која ќе биде цената на брашното кое ќе се произведува од оваа реколта.

Министерот за земјоделство Љупчо Николовски неодамна во Битола се пофали дека годинава се очекува поголемо производство на лебно жито од лани, но во однос на цената се повика на потсекторската група која треба да ја договори и да ја следи примената.

– Да ги почекаме анализите на подсекторската група која денес има состанок и активно следење на откупот на пченицата. Минатата година постигнавме рекордни цени во откупот на пченицата, јачменот и оризот. И оваа година ја усвоивме програмата за Интервентниот фонд како финансиската поддршка надвор од субвенциите и сите останати мерки за интервенција на пазарот и поддршка на производителите – рече Николовски.

Лани просечната откупна цена на почетокот на жетвата изнесува 17.33 денари за килограм.

На берзите цената на пченицата изминатите денови варира како последица на повеќе настани кои се случија во светот. Најважната вест која направи пресврт во ситуацијата е процената на резервите на пченица во Франција, а тие се повисоки од очекуваното. Во јунската прогноза тие изнесуваат 2,89 милиони тони што е повеќе од минатомесечната која изнесуваше 2,72 милиони тони. Очекувањето на жетвата е под притисок од влијанието на временските услови. Во Европа најпогодени се централните и северните делови. Во САД приносите би можеле да бидат најниски во последните 50 години.

На париската берза за храна (MATIF) цената на пченицата денеска изнесува 238,5 евра по тон, за испораките во септември, а на американската берза 688 евра по тон.

Влијание на цената на пченицата има и извештајот на американското министерство за земјоделство (USDA), кој даде долгорочна прогноза за понудата и побарувачката за сезоната 2023/24, која е подобра од онаа во мај. Прогнозата за глобалното производство на жито беше зголемена за 14,2 милиони тони на рекордни 2.834 милијарди тони. Нагорните ревизии главно се однесуваат на Русија, Индија и Украина. Овие прогнози беа направени пред уништувањето на браната Нова Каховка во Украина.

Глобалната потрошувачка на жито е намалена за 1,8 отсто на 2.818 милиони тони. Потрошувачката ќе биде помала од очекуваната реколта.

The post ПЧЕНИЦАТА УБАВО РОДИ, ЦЕНАТА ЌЕ СЕ „ПОРАЃА“ СО МАКИ Земјоделците решени овојпат да не останат со куси ракави appeared first on plusinfo.mk.

Мелничарите велат дека, и покрај тоа што украинската пченица е со светска цена од 12 денари по килограм, македонските мелници не можат да ја увезат бидејќи немаат пари да ја платат, а згора на тоа од лани без образложение не се спроведува договорот за слободна трговија со оваа земја потпишан во 2001 година.

– Нема да има ефект од најавениот увоз на пченица од Украина, бидејќи мелниците не можат да се задолжуваат повторно кај банките за да го платат овој увоз. Не веруваме и дека ќе се почитува договорот за слободна трговија и увоз без царина, бидејќи некои мелниците кои лани се обидоа да договорат увоз од украина имаа проблем на царина. Договорија увоз на пченица од оваа земја по пониски цени, но мораа да платат по 5.000 евра царина за секој камион што ќе влезе во земјава, и се откажаа. Нејасно е дали годинава ќе профункционира договорот или е само изјава за јавност на министерот која е спротивна од она што лани е договорено во земјите од ЦЕФТА. Сепак и годинава се орентираме на домашната пченица која очекуваме да ја достигне берзанската цена која подолг период паѓа – вели Горан Малишиќ, претседател на Здружението на мелничко-пекарската индустрија во Стопанската комора.

Тој додава дека мелниците моментно работат со загуба бидејќи трошат скапа суровина за производство на брашно, а не можат да ја зголемат неговата цена бидејќи се увезува многу поевтино српско брашно.

– Лани ја плативме пченицата по 23 денари за килограм, цена по која сега се увезува српското брашно. Тоа значи дека ние брашното го продаваме по дисконтна цена и трпиме загуби поради скапите резерви обезбедени на почетокот на годината. Дневно секоја мелница, ако произведува брашно, произведува и загуба од 2 до 3 милиони денари. Затоа и неколкуте мелници кои останаа на пазарот веќе размислуваат да го намалат производството и не знаат што да прават со вработените, бидејќи за нив треба да се обезбедат плати – вели Малишиќ.

Тој додава дека поради променливата владина политика згаснува еден од поважните сектори во земјава.

Земјоделците, пак, се загрижени од можниот увоз на пченица од Украина, кој може да влијае на намалување на домашното производство веќе годинава, бидејќи ќе се соочат со откупна цена која ќе биде далеку пониска од производната.

– Ако Министерството за земјоделство и нашата држава не сакаат ние да произведуваме пченица слободно нека повели и нека увезувааат. Следната година ние нема да ја произведуваме оваа култура и тогаш ќе станеме целосно зависни од увоз – вели Петре Стојкоски, претседател на Асоцијацијата на земјоделци.

Тој потсетува на планот на владата за зголемување на површините под житни култури за да се намали  зависноста од увоз, но и дека поради ниската откупна цена неоткупени останале околу 8 милиони килограми пченица на кои може да смета државата.

Годишно, зависно од произведените количини, во земјава се увезуваат по 80.000 до 100.000 тони пченица главно од соседните држави.

Владата досега не донела одлука за увоз на пченица од Украина, но ако има потреба и добра цена за трговците, ќе се дозволи увоз на жито, изјави неодамна министерот за економија Крешник Бектеши.

– За нас приоритет е домашното производство, но бидејќи тоа не е доволно за покривање на потребите, ние дозволуваме увоз на жито и други житарки. Неодамна потпишавме и договор за слободна трговија со република Украина. Во врска со увозот на жито ќе одиме во насока на одлуките на ЕУ. Ние увезуваме житарки од Турција, Грција, Србија и од Албанија, но ако има добра цена за нашите трговци, ќе увезуваме и од Украина – рече Бектеши.

Евтината пченица и други земјоделски производи од Украина беа причина неколку земји членки на ЕУ да воведат привремени забрани за увоз за да ги заштитат сопствените производители.

The post ОД УКРАИНСКОТО ЖИТО СЕ ИСПЛАШИЈА И ДОМАШНИТЕ ЗЕМЈОДЕЛЦИ Мелниците не се заинтересирани за увоз бидејќи немаат пари да го платат appeared first on plusinfo.mk.

– Од јануари до сега цената на брашното е намалена за околу 40 отсто и тоа како резултат на конкуренцијата на цените на брашното во регионот и падот на берзанската цена на брашното која последните две недели интензивно се намалува. Какви ќе бидат цените на брашното следната недела и во наредниот период ќе зависи токму од овие параметри – движењето на цената на берзите и од цената кај нашата конкуренција од регионот, а не од некакви ветувања на компаниите дадени на владини претставници на приватни средби – вели Горан Малишиќ, претседател на Групацијата на мелничко-пекарската индустрија во Стопанската комора.

Тој додава дека официјална средба на претставници на мелничката индустрија со министерот за економија немало и според тоа нема никакво ветување од нивна страна дека цената на брашното следната недела ќе се намали како резултат на таква средба.

– Не сме имале официјална средба со министерот Бектеши и не можам да тврдам со кого се сретнал и кој му најавил намалување на цената на брашното следната недела. Како што реков и пред тоа, ние и без средба со него во изминатите неколку месеци во континуитет ја намалуваме цената на брашното бидејќи не можеме да опстанеме на пазарот со конкуренцијата од увозното српско брашно. Дополнително и берзанската цена во континуитет паѓа и ние мораме редовно да реагираме на тоа, ако сакаме да останеме на пазарот – вели тој.

Според него, мелничко-пекарската индустрија поради случувањата во изминатата година – високата цена на струјата и репроматеријалиите, како и поради мерките на владата преземеи во 2022 година, годинава ќе бележат големи загуби.

– Пекарската индустрија веќе има загуби поради скапите резерви и ниската замрзната цена на лебот. Кај помалите пекарници дневните загуби поради ова се од 2.000 евра, а кај големите до 13.000 евра. Загуби се очекуваат и во мелничката индустрија. Според тоа, годинава и двата сектора ќе бележат загуби од прелеаните случувања во текот на ланската година – додава Малишиќ.

Според него, владата ќе треба да ја помогне оваа индустрија бидејќи таа тешко ќе може да ја помине годинава.

– Ние нашите аргументи и предлози за решавање на проблемите ги кажавме уште пред кризата. Сето тоа владата го има на увид, а дали ќе реагира и ќе помогне да не згаснуваат бизнисите од неа зависи – вели претседателот на Групацијата на мелничко-пекарската индустрија во Стопанската комора.

Средба со министерот немале ниту мелничарите од Агро-бизнис комората на Сојузот на стопанската комора и според тоа како што велат немало никакви разговори околу цената на брашното од следната недела.

Министерот за економија, на Фејсбук објави дека следната недела ќе има дополнително намалување на цената на брашното од страна на домашните производители.

Во својата последна мерка, Владата ги замрзна цените на јајцата и оризот, а беше најавено дека истото ќе следи за брашното и шеќерот доколку компаниите сами не ги намалат цените.

The post МИНИСТЕРОТ БЕКТЕШИ СЕ КИТИ СО ТУЃИ ПЕРЈА Брашното поевтинува поради падот на берзанската цена appeared first on plusinfo.mk.

Министерот за економија Крешник Бектеши деновиве се закани дека за две недели ќе се одлучи дали ќе се казнуваат компаниите кои користат евтина струја и кои не ги намалиле цените. Тој најави и анализа на фактичката состојба до крајот на месецов.

– Ако нема намалување на цените ќе се доведеме во состојба да ја укинеме поддршката за струјата. Во одлуката можеме да бидеме селективни со тоа што ќе ги исклучиме од субвенции за струја оние компании кои не ги намалиле цените за производите во договорениот процент. Дел од компаниите веќе ги намалија цените на производите како што е договорено од 7 до 12 отсто па тие и натаму ќе добиваат субвенции – рече Бектеши.

Компаниите, пак, го тврдат спротивното, дека ги намалиле цените според процентот на учество на цената на струјата во крајната цена на производот.

Владата најави казни, компаниите велат дека цените се намалени

Од мелничко-пекарската индустрија тврдат дека цените се намалени соодветно на учеството на струјата од околу 5 отсто и дополнително за уште некој процент поради конкуренцијата и поевтините репроматеријали вградени во нивите производи.

– Цените кај пекарската индустрија се намалени од 5 до 16 отсто. На пример, лебот кој чинеше 45 денари сега чини 42 денари, оној од 52 денари сега чини 50 денари… Кај мелничката индустрија цените се намалени од 10 до 15 отсто. Зборуваме за брашното кое се користи во индустријата. За пакуваното брашно секоја мелница ги утврдува цените според своите пресметки. Не треба да се заборави дека дел од мелниците имаат резерви од производи кои се произведени со скапи репроматеријали и за нив не можат да ги намалат цените. Овие резерви веќе се трошат и видливо е намалувањето на цените. Но, да бидеме јасни, цените се намалуваат и поради конкуренцијата и пониските цени на репроматеријалите – вели Горан Малишиќ, претседател на Здружението на мелничко-пекарска индустрија на Стопанската комора.

Според него, институциите имаат механизми да го проверат ова тврдење, пред да се закануваат со казни.

– Има инспекции и тие нека ги посетат компаниите, како што тоа редовно го прават изминативе месеци, и нека утврдат кој се придржува, а кој не на договорот. Тогаш и нека се казнуваат ако има потреба – вели Малишиќ.

Тој додава дека граѓаните во иднина нема да видат цени на прехранбени производи како во 2021 година, односно пред кризата, но ќе има намалувања соодветни на учеството на цените на репроматеријалите, струјата и другите параметри кои влегуваат во крајната цена на производот.

– Треба да се овозможи да помине периодот кога ќе проработи конкуренцијата за да почнат да се намалуваат цените, но да бидам јасен и покрај тоа што цените на суровините почнаа да се намалуваат, тие не се на нивото од претходните години. Тоа значи дека граѓаните веќе не треба да се надеваат на враќање на цените од пред кризата, туку за проценти кои ќе се утврдат по пресметките на сите параметри кои влегуваат во цената – вели Малишиќ.

И млечната индустрија ги намали цените на производите. На рафтовите во продавниците се регистрираат пониски цени на млекото, сирењето и на другите производи.

Струјата е само дел од цената на производот, увозните суровини го диктираат темпото

Бизнисмените велат дека струјата има различно учество кај различни производи, но најзначајно е тоа какви се цените на суровините. Од сето тоа зависи и процентот на намалување на цената.

– Тренд е во светот на намалување на цените на суровините. Овој месец ќе има тренд на намалување на цените не само на маслото и на брашното, туку и на другите производи, особено на месото – вели бизнисмен.

Од месната индустрија која е посочена дека не ги намалила цените велат дека нема причина за намалување поради високите цени на суровините.

– Секторот за месна индустрија е речиси целосно зависен од увозот на суровини. Околу 85% од замрзнатото месо за преработка, било да е пилешко, говедско или свинско, се купува од преку океанот, Канада и Бразил. Високата цена на производите купени во странство според берзата, продолжува да ја диктира високата цена на пазарот – неодамна изјавија од месната индустрија.

Производителите, увозниците и трговците главно се придржуваат на пропишаните маржи. Тоа го констатира Државниот пазарен инспекторат во контролите за јануари и за периодот од октомври лани до 10 јануари.

„Според Одлуката за ограничување на маржата кај основните прехранбени производи, во јануари 2023 година извршени се над 300 инспекциски надзори и не се забележани отстапувања од предвидените ограничувања за маржата“, се наведува во јануарскиот извештај.

Инспекторатот ја утврди истата состојба и во вкупниот извештај кој го опфаќа периодот октомври лани до 10 јануари во кои се опфатени податоци за 707 инспекциски надзори.

Нема пречекорувања кај маржите, тврди пазарниот инспекторат

„Во овој период констатирано е дека производителите, увозниците и трговците на мало и големо се придржуваат на највисоката утврдена маржа од 5% и 10% на производите наведени во Одлуката, односно маржа до 5% во трговијата на големо и трговијата на мало за леб бел (сечен на парчиња или цел), шеќер бел и сончогледово масло за јадење (без ладно цедено масло) и маржа до 10% во трговијата на големо и трговијата на мало за брашно од пченица – тип 400 и тип 500, макарони и шпагети од тврда пченица, македонски бел ориз, трајно кравјо млеко со масленост од 2,8%, 3,2% и 3,5%, јајца од кокошка, урда, кравјо бело сирење и мешано бело сирење, кашкавал, кисело млеко, павлака и јогурт“, се наведува во извештајот.

Инспекторите забележале и тренд на намалување на цените на основните прехранбени производи.

Граѓаните, пак, се незадоволни од малиот процент на намалените цени на дел од производите чија цена ланската година драстично скокна поради високата цена на струјата, а за одделни производи не гледаат намалување туку раст на цените.

– Не гледам дека нешто се мрднало кај цените иако владата вели дека има намалување, освен кај маслото за јадење и лебот. Има мало намалување и на цената на млекото и млечните производи. Не гледам намалување на другите производи. Но и овие намалени цени се високи, ако се споредат со цените од пред една година, бидејќи нашиот стандард остана ист – вели граѓанин.

Од околу 1.000 компании за производство на храна, само 230 компании добиваат субвенционирана струја, но надлежните велат дека сите производители треба да ги намалат цените за 7-12%. Оваа владина мерка која е за период од 5 месеци го чини буџетот околу 3,5 милиони евра.

Меѓународната агенција за храна и земјоделство ФАО веќе објави дека цените на храната на светските берзи се намалуваат девет месеци по ред. Но, во Македонија една година трошоците за живот се зголемени за 20 отсто, а најголема тежина во оваа инфлација има токму поскапувањето на храната.

The post ЦЕНИТЕ НА ХРАНАТА ВЕЌЕ НИКОГАШ НЕМА ДА БИДАТ КАКО ПОРАНО Владата ветува поевтина храна без да ги пресмета сите трошоци appeared first on plusinfo.mk.

Иако земјава не увезува пченица од Русија, зголемувањето на берзанските цени на оваа житарка, како последица на целосното запирање на рускиот извоз од годинашната реколта, ќе значи повисоки цени за количините кои земјава годишно ги увезува, но и можно зголемување на цените на брашното и лебот, велат мелничарите.

Поради високите трошоци и состојбите на пазарот на земјоделски производи земјоделците очекуваат зголемување на откупната цена на пченицата од годинашната реколта. Земјава годишно увезува околу 100.000 тони пченица, по берзанска цена и околу 50.000 тони брашно.

Зголемена понуда и од други производители 

– Секако, една таква одлука на Русија ќе значи зголемување на берзанските цени на пченицата. Но мислам дека нема да има драстична осцилација на цените, бидејќи последните месеци лани беше достигнат врв на цената на пченицата. И да се запре целиот руски извоз на оваа култура, сепак оваа цена нема да ја надмине декемвриската, бидејќи има големо производство од другите региони. На зголемување на цената на пченицата од новата реколта може да влијаат и некои неочекувани случувања. Тоа може да бидат климатски промени до жетвата, но и политички промени, па затоа со сигурност не можеме да кажеме што ќе се случува до јули – вели Горан Малишиќ, претседател на Здружението на мелничко-пекарската индустрија на Стопанската комора.

Какви ќе бидат цените на производите од пченица, додава тој, ќе зависи од цената на суровината по завршување на жетвата, но и од низа други фактори кои тешко можат да се предвидат.

– До март не очекуваме драстичен скок на цените на суровините, па цените на производите ќе се задржат на ниво на сегашните кои постепено почнаа да се намалуваат откако владата обезбеди поевтина струја за компаниите, а цената на пченицата почна да се намалува. Рано е да се каже што ќе се случува по жетвата, бидејќи тоа зависи од повеќе фактори. Сепак, ако има голем пораст на цената на суровините, тоа би предизвикало и за раст на цените на готовиот производ – вели Малишиќ

Мора да се зголемува домашното производство

Очекувањата на земјоделците се дека со новата реколта ќе добијат и повисока откупна цена на пченицата бидејќи и трошоците за одгледувањето на оваа култура лани се зголемија. Само ѓубривата лани поскапеа за 58 отсто, а поскапеа и горивата и семенскиот материјал. Тие забележуваат дека нашата пченица ни од далеку не ги следи берзанските цени кои се актуелни во текот на откупот и потоа.

– Секоја држава, ако има правилен пристап, поучена од ваквите непредвидливи состојби и климатските промени, треба самата да се погрижи да произведе земјоделски производи кои ќе ги задоволат потребите на населението. Тоа треба да го направи и нашата држава, со подготовка и спроведување на стратегија која ќе има друг пристап кон земјоделството. Тоа се покажа како потребно во актуелната криза. Ако растат берзанските цени како резултат на запирање на рускиот извоз, но и како резултат на високите трошоци во земјоделието, ќе треба да се зголемат и откупните цени на пченицата. Но, кај нас тоа многу тешко оди. На пример, лани поради високите трошоци производната цена на пченицата беше 30 денари по килограм, но откупната цена беше 18 до 20 денари, зависно од квалитетот. Годинава во одделни региони има појава на инсекти-штетници и ако не се дејствува навреме ќе биде намален и очекуваниот принос на пченицата, што ќе створи потреба за поголем увоз. Сето тоа говори дека навременото реагирање и на владата може да ја подобри состојбата, или обратно, трајно да се намали производството на одредени култури – вели Ристо Велков од синдикатот на земјоделци од Струмица.

Лани беа произведени повеќе од 255.000 тони пченица со кои се задоволуваат дел од потребите на земјава. Владата се фокусираше на тоа да го зголеми производството за да го намали увозот на оваа култура. Лани покрај Националниот формира и интервентен фонд за поддршка на земјоделците од кој дополнително се финансираше таканаречената зелена нафта, набавката на вештачки ѓубрива и семенски материјал. Овие мерки беа продолжени и за време на есенската сеидба.

The post РУСКАТА ЗАБРАНА ЗА ИЗВОЗ НА ПЧЕНИЦА ЌЕ ГО ПОСКАПЕ ЛЕБОТ И КАЈ НАС? Мелничарите не очекуваат да се надмине декемврискиот пик appeared first on plusinfo.mk.

Економистот Маријанчо Николов вели дека високи цени ќе имаме до крајот на зимата, до кога ќе се задржат високите цени на енергенсите, а потоа може да се очекува нивна стабилизација, но на повисоко ниво од она што беше пред кризата.

– Цените на енергенсите до март ќе останат високи, а после тоа ќе се види колку тие ќе влијаат на трошоците на домашниот пазар. Со оглед на тоа што на одреден број компании им е обезбедена пониска цена на струјата до април, и обезбеден е гас за истиот период, не би требало да се очекува зголемување на цените на нивните производите до април, туку одредено намалување, барем за прехранбените производи за кое беше дадено ветување од страна на бизнис асоцијациите кога беше побарана владината мерка. Оправдувањето дека се промениле условите и дека нема да има намалување на цените од 10 отсто не држи, бидејќи самите тие правеа пресметки и го кажаа процентот на намалување – вели Николов.

Бараа поевтина струја, ама за своите цени калкулираат

На ова, додава тој, му одат во прилог и веќе намалените цени на храната на берзите, што значи дека до средина на годината нема да има раст на цените на суровините. Потоа, сè ќе зависи од годинашната жетва и цените на суровините кои ќе се формираат на берзите, како и цените на енергенсите од наредната есен, кога земјава веќе ќе може да ги вклучи во пресметките и новите енергетски капацитети од обновливи извори.

Бизнисмените со став дека поскапувањето на производите зависи од нивните трошоци во кои покрај другото влегуваат цените на енергенсите и суровините, но и платите на вработените.

– Дали и колкаво намалување на цените на производите ќе има во текот на годината ќе зависи од нашите трошоци. Секоја компанија посебно ги пресметува тие трошоци и ги утврдува цените. Колкаво ќе биде намалувањето на цените на прехранбените производи веќе овој месец, како резултат од поевтината струја, ќе утврди секоја компанија зависно од тоа колкаво е учеството на оваа цена во нејзините трошоци на производство. Дали тоа ќе биде 2,5 или 10 отсто одлучува секоја компанија – вели претседателот на Асоцијацијата на мелничко-пекарската индустрија Горан Малишиќ.

Според него, какви ќе бидат цените на брашното и лебот во месеците по април зависи од цената на суровината која ќе се утврди со жетвата, конкуренцијата од соседството, која влијае на цената на брашното во земјава, како и цените на енергенсите до крајот на годината.

Инфлацијата може да се држи под контрола 

Николов смета дека од усогласеноста на политиките на владата и Народната банка ќе зависи колкава ќе биде инфлацијата годинава, иако главен фактор сепак се глобалните цени на енергенсите и храната.

– Сметам дека е можно да се оствари стапка на инфлација од 7,1 отсто како што е планирана, под услов да нема непредвидливи настани во глобални рамки кои би влијаеле на цената на енергенсите и храната. Притоа Народната банка ќе треба поагресивно да управува со инфлацијата, но ќе треба да биде претпазлива да не му наштети на стопанството. Владата, која има највисок буџет годинава од кој дури 1,2 милијарди евра за отплата на долгови, ќе мора да намали од другите непродуктивните трошења со цел да влијае на инфлацијата – вели Марјанчо Николов.

Според него, важно е годинава да се зачува куповната моќ на граѓаните која лани почна да се намалува и затоа зголемувањето на платите во јавниот сектор, на минималната плата и на пензиите би требало да го следи и приватниот сектор.

– Ова ќе биде потребно не само како потреба од подобрување на стандардот на граѓаните кои осиромашија лани за дури 30 отсто кај храната, туку и од потребата во земјава да се задржи кадарот кој бара подобри услови за живот надвор од земјава. Ова треба да го следат и компаниите. Сето тоа ќе влијае на задржување на куповната моќ на населението и да се спречи пад на побарувачката на домашниот пазар, но не треба да се дозволи тоа да го искористат компаниите за зголемување на цените на производите со што ќе се забрза инфлацијата – вели тој.

Оптимистичка прогноза на НБМ за инфлација од околу 9 отсто 

Владата со Буџетот веќе најави зголемување на платите во јавниот сектор како и на редовното зголемување на минималната плата и пензиите. Предвидени се и повеќе мерки за намалување на цените на прехранбените производи.

Народна банка лани неколку пати ја зголеми основната каматна стапка, но стапката на инфлацијата почна да се намалува дури во декември кога и цените на енергенсите на берзите почнаа драстично да се намалуваат. Банката донесе и други мерки за запирање на инфлацијата што требаше да ја намалат потрошувачката. Според Народната банка, инфлацијата во последните месеци забрза, за што најмногу придонесува растот на цените на храната. Нејзините очекувања за годинава се дека инфлацијата ќе забави и ќе изнесува 9 отсто.

– Годинава очекуваме постепено забавување на инфлацијата, која на среден рок би се вратила на историските стапки од околу два процента – изјави гувернерката на Народната банка, Анита Ангеловска-Бежовска, во новогодишната порака.

Таа додаде дека се неопходни структурни реформи што ќе ја зајакнат отпорноста на економијата, како и одговорно, стратегиско и одржливо дејствување на носителите на политиките.

The post ЌЕ ИМА ЛИ ПОСКАПУВАЊА ГОДИНАВА? Сè ќе зависи од цената на енергенсите и суровините appeared first on plusinfo.mk.