Канадските власти поставија огромен знак со пораката „Езеро Онтарио, сега и засекогаш“, како директен одговор на одлуката на американскиот претседател Доналд Трамп во САД езерото Онтарио да се преименува во Езеро Америка.

Знакот, испишан на англиски и на француски јазик, на 29 август го откри премиерот на канадската провинција Онтарио, Даг Форд.

Големиот син знак е поставен во природниот парк Fifty Point Conservation Area, во близина на Гримсби, на брегот на езерото Онтарио. Неговата порака е недвосмислена: името на езерото, едно од петте Големи Езера на Северна Америка, нема да се промени во Канада. Форд, кој го откри знакот облечен во дрес на канадската фудбалска репрезентација, порача дека Канаѓаните се „силни и отпорни“ и дека никогаш нема да отстапат пред, како што рече, насилник.

И премиерот Марк Карни деновиве порача дека езерото во Канада ќе остане „езеро Онтарио, сега и засекогаш“.

Повод за канадската реакција беше извршната наредба што Трамп ја потпиша минатата недела, со која американските федерални власти треба да го користат името Езеро Америка. Одлуката следуваше по влошувањето на односите меѓу САД и Канада и пропаѓањето на трговските преговори меѓу двете земји.

Називот „Онтарио“ има длабоки историски корени. Тој потекнува од јазиците на домородните народи, а според објаснувањето на канадските власти, името е старо повеќе од 400 години. Преименувањето предизвика остри реакции и меѓу домородните заедници, кои оценија дека станува збор за бришење на историското и културното наследство.

Во САД дел од дигиталните карти веќе почнаа да го прикажуваат називот „Езеро Америка“, а во Канада останува старото име. Google Maps соопшти дека американските корисници ќе го гледаат новиот назив, а канадските називот Онтарио, додека во други земји може да се појавуваат и двата називи.

The post ЕЗЕРО ОНТАРИО, СЕГА И ЗАСЕКОГАШ Канада му одговори на Трамп со огромен знак на езерскиот брег appeared first on plusinfo.mk.