Основното јавно обвинителство поднесе Обвинителен акт против вкупно три лица кои се товарат дека на 13 ноември минатата година опожариле кафуле во станбена зграда на улицата Христо Татарчев во Кисела Вода.

Меѓу тројцата обвинети е и Гоце Трајковски, кој беше сведок во предметот за киднапирањето и убиството на 14-годишната Вања Ѓорчевска.

„Со автомобил ‘Фолксваген голф’ со скопски регистарски ознаки, управувано од еден од обвинетите, пристигнале во близина на кафе барот. Додека тој обвинет останал да чека во возилото, останатите двајца отишле до деловниот простор. Едниот од нив со секира го скршил лизгачкото стакло од кафе барот, а другиот со бензин запалил оган. Потоа сите тројца соизвршители заедно со возилото заминале од место на настанот. Притоа на запалениот објект предизвикале и имотна штета од поголема вредност проценета на 362.161 денари“, информираше Јавното обвинителство.

The post ОБВИНЕНИЕ ПРОТИВ ГОЦЕ ТРАЈКОВСКИ ЗА ПАЛЕЊЕТО КАФУЛЕ ВО КИСЕЛА ВОДА Со секира го скршиле стаклото и со бензин го запалиле објектот appeared first on plusinfo.mk.

Сведокот Гоце Трајковски на денешното рочиште даде непристрасен исказ од кој не може да се извлече ништо што би го компромитирало таткото Александар Ѓорчевски во целата постапка, рече адвокатот Владимир Туфегџиќ по денешното рочиште на кое им се суди на обвинетите за убиствата на 14-годишната Вања Ѓорчевска и 74-годишниот Панче Жежовски.

– Сведоци сте денеска дека сè што кажа Гоце Трајковски, ние приговор немаме. Сè е во корист и во полза на одбраната на Александар, бидејќи Гоце Трајковски изнесе буквално сè што знае. Дејствија кои ги преземал во текот на целата постапка, во еден дел и по барање на полицијата и тоа воопшто не е спорно. Човекот даде еден непристрасен исказ од кој не може да се извлече ништо што би го компромитирало Александар во целата оваа работа. Ние во основа сме задоволни затоа што конечно се слушна целосната вистина, се слушна она што Гоце го кажа пред јавниот обвинител во поширока варијанта. Ние како одбрана сме задоволни – рече Туфекџиќ.

Трајковски, додаде тој, не е само сведок на Обвинителството, туку и на одбраната.

– Најбитно е што јас на судот не сум му барал да не му поклони верба. Ова не е само сведок на Обвинителството, туку доставен во листа на докази и како сведок на одбраната, така што ние приговор и забелешка на неговиот исказ немаме. Во глобала и генерално, на сите детали по сеќавање, многу спонтано, отворено и реално ги кажа сите состојби и го објасни она што е најбитно, неговото учество во целата оваа постапка – рече Туфегџиќ.

The post ГОЦЕ ТРАЈКОВСКИ КАЖА БУКВАЛНО СЀ ШТО ЗНАЕ Неговото сведочење е во полза на таткото Александар, вели бранителот Туфегџиќ appeared first on plusinfo.mk.

Еден од поддржувачите на партијата Десна, кои протестираа пред Основниот Кривичен суд пред претходното рочиште што се одржа на 3 февруари 2025година, влегол во просторот од судницата наменет за новинари и дофрлал за време на денешното рочиште.

Тој навредувал и дофрлал до обвинителката „Ова ли е судење?“, „Ова ли е правда?“…

Полицајата два пати го опоменувала да се смири зашто ќе биде отстранет. По некое време, тој престанал да дофрла и не бил исфрлен од судницата.

На денешното рочиште за убиствата на Вања Ѓорчевска и Панче Жежовски сведочеше Гоце Трајковски, син на Кираца Трајковска, кој подолго време не беше достапен на органите на прогонот и чие сведочење беше одложувано неколку пати.

Гоце сведочеше дека инспекторите Дејан Димовски и Музафер Харишиќ побарале од него да оди во домот на сестрата на Александар, Оле, за да провери да не е таму скриена Вања.

– Од МВР ме тераа да одам кај неа во стан да видам дали Вања е скриена во плакар или во тоалет. Ме прашаа дали знам дали Александар чува куче „кангал“ дома. Јас им реков дела не верувам оти тоа е големо куче а Александар живее во стан. Кога прашав зошто ме прашуваат, ми рекоа: „Проверуваме да не чуваат со Палчо заедно такви кучиња“. После ме натераа да одам кај Оле да ја барам Вања во плакар. Појдов и ѝ кажав на Оле зошто сум таму, а таа ми дозволи. Донесете детектор за лага и ставете ме мене и Музафер. Никогаш не сум му се јавил да го прашам до каде е истрагата – рече Гоце одговарајќи на прашања од адвокатот на Александар, Владимир Туфегџиќ.

– Дали од вашиот пријател од „Сејф сити“ дознавте дека „цитроенот“ е на исчезнат велешанец? – праша Туфегџиќ.

– Да, ме известија дека колата се бара веќе три дена – рече Гоце.

– Дали со Дејан Димовски и со Музафер Харишиќ сте имале директен контакт или преку СМС пораки? – праша Туфегџиќ.

– И директно и преку СМС. Ме тераа да го сликам Александар што прави дома. Ме повикаа во канцеларија кај нив, навечер околу 9 часот. Со инспекторите прво се сретнавме пред зграда кај Александар. Ме прашаа што мислам за случајот. Јас реков дека мислам дека Панче е педофил и дека ја намамил Вања да влезе во кола кај него. Тогаш Музафер ми рече дека паметно размислувам и ме покани на разговор во канцеларија во СВР Скопје – рече Гоце по што додаде дека веќе не се видел со Александар после тоа.

Гоце Трајковски дознал за судбината на Вања од извесна Маја, која била братучетка на мајката Зорица.

– Ме фати паничен напад, веднаш избегав од дома. Почнаа да ми вртат другари дека имало полиција во Скопска Црна Гора. Ми се јави и инспекторот Музафер. Ме натера да му се јавам на Александар, ама тој ништо не знаеше – рече Гоце.

– Дали може да потврдите дека вие од вторникот до моментот на пронаоѓањето на Вања сте му споделувале информации на таткото кои претходно сте ги добиле од врски во полиција? – праша Туфегџиќ.

– Сѐ што знаеше таткото, знаеше од мене. Сите информации одеа преку мене – рече Гоце.

– Како стасаа до Вас снимките од камерите во Велес? – праша Туфегџиќ.

– Мајка ми од Белград постојано се интересираше за случајот. Се јавила на луѓе во Велес и ми рече да го побарам братучед ми кој го познавал Панче. Му се јавив и му кажав што мислам, дека може да е педофил и дека тој можеби ја грабнал Вања. Тој ми рече дека Панче во скоро време јадел ќотек од некој излезен од затвор. Така, преку наши луѓе дојдовме до снимките од бензинската во Велес – рече Гоце.

Следното рочиште е закажано за 14 февруари 2025 година.

The post ПОДДРЖУВАЧ НА ДЕСНА ДОФРЛАШЕ ВО СУДНИЦАТА Преку контакти на Кираца, Гоце дошол до снимките од Велес appeared first on plusinfo.mk.

Сведокот Гоце Трајковски на снимките од камерите забележал дека возилата поминуваат со 40-50 на час, а само еден „цитроен“ многу чадел и многу бавно возел.

– Ми падна чудно тоа што првите 5-6 коли поминуваа со 40-50 км на час, а „цитроенот“ многу чадеше и многу бавно возеше. Му реков на Саше дека колата ми е сомнителна, дека работи под саух и дека е тазе запалена, а и прозорците беа замаглени. Скриншотите ги препратив кај другарот во „Сејф сити“. По 3 часа ми се јави другарот од „Сејф сити“ и ми рече дека сум ненормален поради тоа што сум го нашол „цитроенот“. Тогаш ми кажа дека 3 дена го бараат тоа возило и дека е на исчезнат велешанец – рече Гоце.

Пријателот од „Сејф сити“ му рекол на Гоце да го пребара на Гугл името Панче Жежовски, и тој тогаш видел дека станува збор за исчезнато лице. Во исто време наишол и на фотографија од автомобилот, кога бил огласен за продажба, а на неа се гледала таблицата.

– На снимката не се гледаше регистарскиот број. Тоа не е секојдневна кола, туку кола стара 50 години. Лесно е да ја забележат камерите и да ја снимат таблицата. Така пријателот сфатил дека тој „цитроен“ е на Панче. „Цитроенот“ кога се вклучува на Партизанска, вози 30 метри по третета лента кон „Силбо“. Доаѓа до дирекцијата на Лукоил, но се враќа во рикверц и минува на втората лента иако немаше потреба. Тогаш му реков на Александар „Види, како некој да му диктира на возачот да не вози на третата лента за да не може да го фатат камерите од дуќаните и да се измеша меѓу другите коли“ – рече Трајковски.

Тој додаде дека сомнително му било уште едно големо комбе и пикапот „рено кангу“. Кога комбето скршнало на друга страна, во фокусот им останале „цитроенот“ и „реното кангу“, бидејќи возеле во иста насока и блиску едно до друго.

Додека гледале снимки кај Александар дома, на Гоце му се јавил некој инспектор од МВР и му рекол дека имаат осомничени лица од Велес, но да не му кажува на таткото на Вања за да не се испаничи.

– Но Александар го слушнал муабетот и подоцна му се јавил на инспекторот Музафер и барал веднаш да бидат уапсени осомничените велешани. Инспекторите лажат сите до еден дека таткото знаел сѐ од првиот ден. Ќе ви откријам сѐ што ме тераа да правам – рече Гоце.

Тој додаде дека мајката на Вања, Зорица ја запознал откако исчезнала Вања.

– По смртта на Вања, Зорица живееше со моја братучетка која е мажена за прв братучед на Зорица. Зорица ми пишуваше дека е зачудена дека Александар бил вмешан во сето ова затоа што бил грижлив татко. Особено бил приврзан за Вања. Да кивнела, тој веднаш ја носел на лекар. Зорица дури ми кажа дека Александар има дадено отказ од работа само за да минува повеќе време со децата. Со Александар се немав видено 15-20 години, ама мислам дека никогаш не бил во финансиска криза оти е од имотна фамилија. И да му требале пари, ќе продал некој стан и ќе имал пари – рече Гоце.

„ПАЗИ ШТО ЗБОРИШ ДА НЕ ПРОПАДНЕШ ВО ДУПКА“ Гоце Трајковски тврди дека му се заканувале членови на Десна пред да сведочи

The post „ЦИТРОЕНОТ“ МНОГУ ЧАДЕЛ И БАВНО ВОЗЕЛ Пријателот од „Сејф сити“ му рекол на Гоце дека 3 дена го барале возилото на Жежовски, а тој веднаш го нашол appeared first on plusinfo.mk.

Сведокот Гоце Трајковски рече дека добил закани по живот пред да сведочи на денешното рочиште за убиствата на Вања Ѓорчевска и Панче Жежовски што се случија во ноември 2023 година.

Трајковски рече дека не познава никого од обвинетите, освен Александар Ѓорчевски, таткото на убиената Вања. Тој рече дека првообвинетиот Љупчо Палевски Палчо бил зет за прва братучетка на мајка му Кираца Трајковска.

– Првпат во живот ги гледам. Ниту Палчо го знам, ниту првата братучетка на мајка ми, односно тетка ми. Сакам да напоменам дека имам смртни закани од овие психопативе, од профил на Фејсбук „Недвижности Битола“, кои ми пишаа „Пази што збориш да не пропаднеш во дупка“. Заканувачите после сами се издадоа дека се од партијата Десна, кога се вклучија лајв од партијата. Имам и тужба против нив. Јас не сум 14-годишно девојче или стар човек за така да ми се закануваат – рече Гоце.

Адвокатот на Палчо го праша Гоце:

– Кажавте дека имате закани на Фејсбук и посочивте дека тоа се психопати. Кои се тие психопати?

Судијата Ивица Стефановски не дозволи ова прашање да се постави.

– Ќе се согласите ли дека вашиот пријател од „Сејф сити“ незаконски ги споделувал информациите со Вас? – рече адвокатот.

– Ние си правевме другарски муабет и човекот сакаше да помогне. Тој сам ми рече дека штом се работи за девојче, спремен е да добие отказ ако треба – рече Гоце

Гоце упати навреди кон адвокатот, па тој побара јавно да му се извини.

Адвокатот на Палевски побара изземање на судијата зашто, како што рече, дозволил да бидат нарекувани „психопати“.

– Не дозволувате да поставуваме прашања, а не сакате да го казните сведокот поради навредите. Поради пристрасност барам ваше изземање – рече адвокатот на Палевски.

– Вие може да барате што сакате, ама јас го водам рочиштето – му одговори судијата.

Сведокот Трајковски одговараше на прашањата на обвинителките кои го навратија на денот кога исчезна Вања. Гоце рече дека дента спиел до 10 часот и дека кога отворил Фејсбук прочитал дека е исчезнато девојче од „Песталоци“.

– И се јавував на ќерка ми која учи во истото школо ама не ми крена. Ме фати паника и ѝ се јавив на мајка ми. Таа ми рече дека девојчето е на час и дека ја следи на апликација. После тоа накај 13 часот мајка ми ми пиша порака дали знам чие е девојчето што го нема и ми кажа дека станува збор за Вања на кумот Саше. Имаме старо кумство со Саше, ми беше кум на првата свадба. Никогаш не сме се дружеле. Се немавме слушнато 15-20 години. Мајка ми ми рече да му се јавам на Александар и да му помогнам затоа што имам луѓе секаде. Ѝ одговорив дека ми е незгодно оти долго време се немаме слушнато, да не испадне дека сакам да фаќам сеир. Во 20 часот вечерта пак ми рече да му се јавам и да му понудам помош, ми го прати бројот, па јас му напишав СМС порака „Здраво Саше, овде е синот на Кираца, ако треба помош барај ме“. Ми врати дека е во полициска станица и дека дава изјава но дека ќе ме побара кога ќе излезе – рече Гоце.

Двајцата зборувале на телефон, меѓу другото, и за тоа дали да се вклучи куче трагач да ја бара Вања, дали Вања има дечко, дали е вљубена… Таткото на Вања рекол дека никогаш дотогаш не се случило да ја нема цел ден.

Се сретнале првиот пат пред зградата на Александар. Гоце прашал по која патека одела Вања на училиште, а Александар му покажал апликација која точно покажала каде се движела Вања.

– Излегов на улица, барав камери. Прво ги барав снимките од продавница за душеци ама ми рекоа дека камерите подолго време не работат. После тоа отидовме во фризерница чија камера фаќа точно пред скалите од зградата. Газдарицата беше културна и ни даде да ги гледаме снимките од нејзиниот телефон – рече Гоце.

Тој рече дека гледале на снимките од 7.10 часот до 7.30 часот, бидејќи Вања излегла од дома во 7.20.

– Ја немаше Вања на снимките. Се чудевме како е тоа можно затоа што ГПС-от покажува дека тука поминала. Александар ѝ се јави на Зорица и ја праша кое време таа излегла од дома за да провериме дали времето на снимките е точно. Зорица му рече дека излегла во 7.35 часот. Се покажа дека Зорица ја има на снимките како испаничено трча со црна јакна среде улица и телефонот го става во задниот џеб. Заклучивме дека снимките се точни – рече Гоце.

Тој додаде дека Александар и Зорица ја барале Вања насекаде, се јавувале по болници оти мислеле да не ја удрила кола. Биле и на Водно и на Кеј, викале по неа. Биле и во една напуштена куќа, ама Вања ја немало.

– Потоа се јавив кај другар во „Сејф сити“ да провери на камерите, случајно да не заминала кон парк. Ми рече дека ја нема на камерите кон паркот. Ми рече дека цела полиција е вклучена и дека сите се чудат дека нема трага, како со хеликоптер да е земена – рече Трајковски, кој барал и добил снимки и од една менувачница.

Гоце вели дека имало оперативен штаб од 70 полицајци кои работеле заедно на случајот.

– Пријателот не сподели службени тајни со мене, туку само сакаше да помогне да се најде девојчето. Тој е херој во овој случај – додаде Гоце.

Потоа Александар отишол во кафулето „Синдикат“ и го замолил газдата да му ги даде снимките од камерите.

– Само што почнавме да ги гледаме, влегоа двајца инспектори од МВР. Ги гледавме заедно снимките 2-3 минути и им реков дека нешто ми е чудно. Им реков на полицајците: „Толку ли не сфаќате дека Вања е исчезната наутро во 7.20 часот, а снимките што ги гледате се во темница?“ Тогаш на газдата му текна дека снимките отстапуваат два часа од реалното време. На тие снимки видовме девојче кое беше облечено исто како Вања, со јакна и со ранец. Единствено ранецот се разликуваше од тој на Вања. Тогаш го извадив телефонот да сликам за да му пратам на Александар ама инспекторите ме опоменаа и ме избркаа надвор од менувачницата. Во тоа време Александар седеше со други инспектори кај него пред зграда. Јас продолжив кон Дебар Маало. На крај ги собравме сите снимки и ги гледавме заедно, а откако утврдивме дека ја нема Вања наоколу, остана само улицата кај фризерницата. Ја пуштив пак снимката од фризерницата и враќав од 6 до 9 часот, но немаше ништо. Гледавме автомобили, за секоја кола правевме посебен скриншот. Ми падна чудно тоа што првите 5-6 коли поминуваа со 40-50 км на час, а „цитроенот“ многу чадеше и многу бавно возеше. Му реков на Саше дека колата ми е сомнителна, дека работи под саух и дека е тазе запалена, а и прозорците беа замаглени. Го познав возилото дека е „цитроен“ затоа што како дете ја викавме ајкула. Александар тогаш ми рече дека Вања нема шанси да се качи во ваква кола. Скриншотите ги препратив кај другарот во „Сејф сити“ и продолжив кон кафулето „Правда“ за да барам други снимки. По 3 часа ми се јави другарот од „Сејф сити“ и ми рече дека сум ненормален поради тоа што сум го нашол „цитроенот“. Тогаш ми кажа дека 3 дена го бараат тоа возило и дека е на исчезнат велешанец – рече Гоце.

The post „ПАЗИ ШТО ЗБОРИШ ДА НЕ ПРОПАДНЕШ ВО ДУПКА“ Гоце Трајковски тврди дека му се заканувале членови на Десна пред да сведочи appeared first on plusinfo.mk.

Сведокот Гоце Трајковски денеска ќе биде спроведен од притвор во Кривичниот суд, за да сведочи во процесот за грабнувањата и убиствата на 14-годишната Вања Ѓорчевска од Скопје и на 74-годишниот Панче Жежовски од Велес. За злосторствата се обвинети Љупчо Палевски, Велибор Манев, Боре Видевски и Влатко Кешишев, а Александар Ѓорчевски е обвинет за помагање во грабнувањето на неговата ќерка Вања.

Сведокот Гоце Трајковски му е кумашин на таткото Александар Ѓорчевски, кој му помагал во приватната потрага по неговата ќерка во деновите по грабнувањето. Му набавувал снимки од камери за видео-надзор и заедно ги анализирале. Трајковски и неговата мајка Кираца Трајковска, според нејзиното сведочење, први го поврзаа исчезнувањето на Вања и цитроенот на Панче.

Тој е последен сведок на предлог на Обвинителството, од групата сведоци блиски до семејството на Вања. Не сведочеше во времето кога се испитуваа и другите сведоци, затоа што првиот пат, на 15 ноември 2024 година, наводно имаше паничен напад, а потоа беше во бегство затоа што на 13 ноември запалил угостителски објект во Кисела Вода. На 23 јануари 2025 година сам ѝ се предаде на полицијата и оттогаш е во притвор.

• СВЕДОКОТ ЗА УБИСТВАТА НА ВАЊА И НА ПАНЧЕ Е ВО БЕГСТВО Гоце Трајковски запалил кафуле со бензин

Што ново може да открие сведочењето на Трајковски?

Тој е сведок на Обвинителството, кое се труди да докаже дека мотивот за грабнувањето на Вања е користољубие, за да се изнудат пари од нејзин близок член на семејството, а таткото Александар помагал во грабнувањето со тоа што на грабнувачите им дал информации кога неговата ќерка излегува од дома, за да оди на училиште. Од друга страна, и одбраната на Александар Ѓорчевски очекува дека со сведочењето на Трајковски ќе се докаже нивното тврдење дека Александар е невин и во деновите по грабнувањето интензивно ја барал неговата ќерка, на сите можни начини.

• СВЕДОЦИТЕ ПОТВРДИЈА ДЕКА СЕМЕЈСТВОТО НА ВАЊА БИЛО ВО КОНФУЗИЈА Адвокатот Туфегџиќ прашува зошто Обвинителството не ги зема предвид исказите од блиските на Александар

Гоце Трајковски, иако стар кум на Александар, не комуницирал со него со години. По грабнувањето на Вања, Гоце кај Александар го испратила мајка му Кираца Трајковска, со цел да им помогне на Александар и на мајката на Вања, Зорица Ѓорчевска.

Трајковска, во своето сведочење рече дека Александар и Гоце од вториот ден тргнале по улиците да бараат камери. Гоце влегувал во кафулиња, во распаднати куќи во Дебар Маало.

– Два дена се бараше девојчето на снимки, за да се види пешки дали ја има, а третиот ден решија да бараат коли. На една снимка видоа издувни гасови од кола која тргнува во тој момент, и бело возило пикап пред тоа возило. Кога ја најдоа сомнителната кола, најдоа информација дека е исчезнат Панче Жежовски. Гоце провери преку пријатели, дозна каква кола има Жежовски, дека е истата боја како на снимките што ги гледавме. Ние се посомневавме во Жежовски. Помисливме дека тој ја зел, му ги проверив сите профили на Фејсбук… сешто помисливме, да се извинам на семејството на Жежовски.  Јас го поврзав со еден мој роднина од Велес, јас сум по мајка велешанка, најдовме и други снимки – сведочеше мајката на Гоце, Кираца Трајковска.

• КИРАЦА ТРАЈКОВСКА ПРВА ГО ПОВРЗАЛА ГРАБНУВАЊЕТО НА ВАЊА СО УБИСТВОТО НА ПАНЧЕ Таа го испратила синот Гоце да му помага на Александар

Откако сведокот Гоце Трајковски стана недостапен за органите на прогонот, бранителот на Александар, адвокатот Владимир Туфегџиќ побара да се прочита неговиот исказ даден во Обвинителството за време на истрагата. Но, судијата Ивица Стефановски одби, во надеж дека сведокот Трајковски ќе биде обезбеден до крајот на доказната постапка.

Обвинителката Ана Стојковиќ Димитровска по последното рочиште изјави дека имаат да изнесат уште докази.

– Останаа уште докази во врска со првиот обвинителен акт против тројца обвинети. Не се изведени доказите против Љупчо Палевски – рече таа.

Четворицата извршители, првообвинетиот Палевски и Манев, Видевски и Кешиев, се обвинети дека на 22 ноември 2023 година го грабнале и го убиле со пиштол велешанецот Жежовски и му го зеле цитроенот. На 27 ноември 2023 година со цитроенот ја грабнале Ѓорчевска, со цел да изнудат пари, но ја однеле во околината на Бразда и ја убиле со истрел во главата.

The post ЌЕ СЕ РАСВЕТЛИ ЛИ УЛОГАТА НА ТАТКОТО НА ВАЊА? Ќе сведочи контроверзниот Гоце Трајковски appeared first on plusinfo.mk.

Судијата Ивица Стефановски го отстрани од судницата првообвинетиот за убиствата на Вања Ѓорчевска и Панче Жежовски, Љупчо Палевски, откако тој се побуни дека ги немал некои од доказите.

Обвинителката на денешното рочиште презентираше фотографии, меѓу кои од куќата и од дворот на Жежовски. Покажа фотографии од местото каде бил пронајден мобилниот телефон на Панче, фотографии од домот на Велибор Манев, од одземените предмети, од камерите со кои се снимани видеата.

Беа покажани и фотографии од претресот на домот Боре Видевски, како и фотодокументација од увидот на местото каде што е најдено телото на Панче, која содржи фотографии од телото, дупката, чаурата…

Судијата Стефановски побара фотодокументацијата да биде изработена во хартиена форма за да биде доставена до одбраната и го повика Палевски да се врати во судницата.

Судењето продолжува во петок, за кога е најавено сведочење на Гоце Трајковски.

The post КУМОТ ГОЦЕ ТРАЈКОВСКИ ЌЕ СВЕДОЧИ ВО ПЕТОК Палевски отстранет од судницата appeared first on plusinfo.mk.

Од Јавното обвинителство брифираат дека на 13 ноември оваа година, Трајковски со уште две лица, намерно опожарил угостителски објект – кафуле на улицата Христо Татарчев во Кисела Вода.

Двајцата негови соучесници се фатени и против нив е поведена истрага, но Трајковски е во бегство.

„На 13 ноември, околу 3 часот наутро, тројцата со пожар предизвикале имотна штета од поголема вредност во износ од околу 450.000 денари. Со оглед на тоа што кафулето е лоцирано во поголема станбена зграда, постоела опасност тие со пожарот да предизвикаат и значителна опасност за животот и телото на станарите. На местото пристигнале со автомобил ‘Фолксваген голф’, се паркирале во близина на кафе барот, а едниот осомничен останал во возилото да чека. Вториот осомничен зел секира од багажникот и го скршил лизгачкото стакло, додека третото лице кое е идентификувано и се преземаат мерки за негово пронаоѓање, запалило оган со бензин. Потоа сите заедно избегале од местото. Истрагата е отворена, бидејќи со дејствијата како соизвршители предизвикале тешки дела против општата сигурност по член 292 став 1 во врска со член 288 став 1 од Кривичниот законик. За двајцата осомничени кои се веќе обезбедени, по предлог на јавниот обвинител, определена им е мерка притвор“, се вели во соопштението на Јавното обвинителство.

Интересно е тоа што само два дена подоцна, кога Гоце Трајковски требаше да сведочи на рочиштето за убиствата на Ѓорчевска и на Жежовски, тој не се појави во судницата. Неговата мајка Кираца Трајковска, која исто така сведочеше, тогаш истакна дека нејзиниот син доживеал паничен напад и затоа не можел да дојде на рочиштето.

Ако не го обезбедат за сведок, во суд в понеделник ќе биде презентиран неговиот исказ од истрагата, даден пред јавен обвинител.

Инаку, Гоце Трајковски беше еден од првите кои се вклучија во потрагата за 14-годишната Вања. Тој му помагал на нејзиниот татко Александар Ѓорчевски во обидите да ја пронајдат Вања, која беше исчезната пред да биде откриено дека е убиена.

За грабнувањата и убиствата на Вања и Панче се обвинети четворица извршители – Љупчо Палевски Палчо како првообвинет, и Велибор Манев, Влатко Кешишов и Боре Видевски, а таткото на Вања, Александар Ѓорчевски е обвинет за помагање во грабнувањето на неговата ќерка.

Сите обвинети за овие сурови злосторства се изјаснија дека се невини.

Јавното обвинителство тврди дека има докази дека мотивот за убиството на Вања првично бил користољубие.

ДОЖИВЕАЛ ПАНИЧЕН НАПАД ПРЕД СУДЕЊЕТО Сведокот Гоце Трајковски не се појави во судницата

The post СВЕДОКОТ ЗА УБИСТВАТА НА ВАЊА И НА ПАНЧЕ Е ВО БЕГСТВО Гоце Трајковски запалил кафуле со бензин appeared first on plusinfo.mk.

Ви ја пренесуваме комуникацијата на јавниот обвинител со сведокот:

– Во какви релации сте со семејството Ѓорчевски?

– Старо кумство, од времето на женидбата со мојот свекор. Тие нам ни се кумови. Плус, Сашо одамна работеше во Фершпед. Во Фершпед бев заменик-генерален директор.

– Комунициравте ли често со семејството?

– Порано да, но после јас живеев во Белград, па поретко контактиравме со семејството Ѓорчевски. Со Сашко почето, оти и деловно работевме.

– Гоце, вашиот син, контактираше ли?

– Тој ни со најблиските не контактира многу, не се имаа видено одамна.

• МУ ПИШАЛЕ НА ИЛОН МАСК, АМА ОДГОВОР НЕ ДОБИЛЕ Братучедот на Вања се изначитал грозни работи на Фејсбук поврзани со исчезнувањето на девојчето

– Како дознавте за Вања?

– Ја видов објавата на Зорица на Фејсбук. Гоце ме праша кое е девојчето, му реков дека е на Сашко ќерката. На почетокот, јас, ќерка ми, зетот, зборувавме што ли е работата и на почетокот сметавме дека е во години кога можеби излегла да се прошета со момче, па зборувавме дали имала комуникации со други деца, па помисливме да не се работи за некоја врска со момче од некоја друга националност, на сѐ помислувавме.

– Кога се слушнавте со Зорица?

– Вечерта во 19:30 по исчезнувањето на Вања. Им напишав порака и на Зорица и на Саше, не сакав да им се јавувам за да им додевам, ми рекоа дека се во полиција во Беко. На Сашо му пишав дека Гоце ќе дојде да му помогне. Зорица ми напиша дека Сашко ќе излезе од полиција и дека ќе ме побара. Беше доцна, после полноќ, па јас на Гоце му го напишав бројот на Сашко, а на Сашко му ги пишав бројот на Гоце. Тие се слушнаа и се договорија да се видат утредента.

– Зошто мислевте дека Гоце ќе помогне?

– Па во тој момент сите бевме истражители. Знаеме дека во такви моменти родителите се збунети, се губат, не резонираат добро, па сакавме сите да помогнеме. Саше е мирен и повлечен, а Гоце има многу пријатели, па може ќе помогне. Вториот ден тргнаа по улиците да бараат камери. Гоце влегувал во кафулиња, во распаднати куќи во Дебар Маало, ја барале пешки. Се вклучија и други луѓе, ќерка ми го преобјави статусот од Зорица, и дента добивме сознание дека Вања влегла во бело возило. Јас тие денови бев во Белград, кај ќерка ми. Комунициравме преку телефон.

– Гоце ве известуваше ли?

– Да, за сѐ, за сета нивна работа ме известуваше Гоце по телефон.

– Што ви рече Гоце, како помагал?

– Одеше по улица и бараше по кои куќи и згради има камери. Тој забележал дека на самиот агол кај зградата, на паркингот кон хотелот, едно 10 метри од влезот, нема покриеност со камери. Гоце ми рече, девојчето се губи во самата зграда. Непријатно му било, но ја прашал Зорица дали Вања воопшто спиела ноќта дома. Зорица рекла да. Па ми рече дека е можно да ја грабнал некој педофил во зградата. Па ги викале другите станари од зградата, проверувале и во просторија во подрумот, дошол некој човек да им отвори, виделе дека и таму е празно. За да добие снимки од еден дуќан дури лажно се претставил дека е инспектор. На едни снимки ја виделе Зорица како трча по улицата.

– Што точно му станало сомнително на Гоце?

– Два дена се бараше девојчето на снимки за да се види пешки дали ја има, а третиот ден решија да бараат коли. На една снимка видоа издувни гасови од кола која тргнува во тој момент, и бело возило пикап пред тоа возило. Кога ја најдоа сомнителната кола, најдоа информација дека е исчезнат Панче Жежовски. Гоце провери преку пријатели, дозна каква кола има Жежовски, дека е истата боја како на снимките што ги гледавме. Ние се посомневавме во Жежовски. Помисливме дека тој ја зел, му ги проверив сите профили на Фејсбук… сешто помисливме, да се извинам на семејството на Жежовски. Јас го поврзав со еден мој роднина од Велес, јас сум по мајка велешанка, најдовме и други снимки.

– Се познавате ли со Палевски?

– Да, тој ми е зет, деловен партнер, одевме на кафе, дискутиравме.

– Со што се занимаваше тогаш Палевски?

– Со трговија, со весници.

– Имаше ли финансиски проблеми?

– Порано не, потоа да, но така е во бизнискот, а финансиските проблеми се решаваат со позајмици, со банки…

– Колку работеше, а колку не работеше Александар?

– Десетина години работеше кај нас, па во Кометал, па пак во Фершпед.

– Се познавате ли со земејството на Зорица?

– Да.

– Дали ви е познато дали семејството на Александар имало контакти со Палевски?

– Немале, не можам да тврдам 100%, ама тие не се познаваа.

– Дали ви е познато нешто за станот на Н.Н.Борче?

– Единствено дека Ванчо го купи на времето, додека се правеше зградата. Го купил на кредит.

– Во моментот на настанот, познато ли ви е чиј е станот на Н.Н. Борче?

– Да, на Сашко.

– Дали Гоце ви ја испрати снимката од цитроенот?

– Не, сѐ ми испраќаше како скриншот. На скриншотот беше возилото, времето, се гледаше бојата, дека е старо. Таблиците не се гледаа. Марката на возилото не се гледаше.

– Кој заклучи дека е тоа возилото на Панче?

– Јас видов објави дека Панче го нема. Интуиција. Се распрашувавме кој е човекот што го нема. Го поврзав син ми Гоце со роднина од Велес, за заедно да соработуваат и да продолжат да истражуваат. Најдоа снимка од Велес, од бензинска пумпа, каде се гледа Панче како го вози цитроенот и уште еден човек со него. Регистрацијата се гледаше.

Прашања поставуваше и Владимир Туфегџиќ, адвокат на Александар Ѓорчевски:

– Само од Гоце ли добивавте информации што се случува?

– Да.

– А од Александар?

– Не.

Прашања поставуваше и првообвинетиот Љупчо Палевски:

– Дали Гоце ви спомнал дека јас сум бил очув на Вања?

– Не.

Дали ви е познато дека за време на претресот во станот на Иванка, мајката на Александар, вашиот син Гоце на полицајците им рекол дека Александар е основач на партијата Десна?

– Не.

– Дали според вас, јас би можел да ја убијам Вања?

– Не. Дури и ако биле причина парите, не.

ДОЖИВЕАЛ ПАНИЧЕН НАПАД ПРЕД СУДЕЊЕТО Сведокот Гоце Трајковски не се појави во судницата

The post КИРАЦА ТРАЈКОВСКА ПРВА ГО ПОВРЗАЛА ГРАБНУВАЊЕТО НА ВАЊА СО УБИСТВОТО НА ПАНЧЕ Таа го испратила синот Гоце да му помага на Александар appeared first on plusinfo.mk.

На денешното рочиште за убиствата на Вања Ѓорчевска и на Панче Жежовски, сведокот Гоце Трајковски, кој требаше да даде исказ за настаните поврзани со случајот, не се појави во судницата.

Според зборовите на неговата мајка, Кираца Трајковска, која исто така е сведок, Гоце утрово доживеал паничен напад, што го спречило да присуствува на судењето.

Гоце Трајковски беше еден од првите кои се вклучија во потрагата за 14-годишната Вања. Тој му помагал на нејзиниот татко Александар Ѓорчевски во обидите да ја пронајдат Вања, која беше исчезната пред да биде откриено дека е убиена.

Во моментов сведочи Зоран Ѓорчевски, таткото на Александар Ѓорчевски, односно дедото на Вања.

За грабнувањата и убиствата на Вања и Панче се обвинети четворица извршители – Љупчо Палевски Палчо како првообвинет, и Велибор Манев, Влатко Кешишов и Боре Видевски, а таткото на Вања, Александар Ѓорчевски е обвинет за помагање во грабнувањето на неговата ќерка.

Сите обвинети за овие сурови злосторства се изјаснија дека се невини.

The post ДОЖИВЕАЛ ПАНИЧЕН НАПАД ПРЕД СУДЕЊЕТО Сведокот Гоце Трајковски не се појави во судницата appeared first on plusinfo.mk.