Градоначалникот на Општина Центар, Герасимовски, најави воведување на новитет – „центарска картичка“, како дополнителна услуга за жителите и како поддршка на локалниот бизнис-сектор.

– Воведуваме центарска картичка како дополнителна услуга за жителите на Општина Центар, но и како директна поддршка и промоција на локалниот бизнис-сектор. Со оваа картичка граѓаните ќе добиваат попусти и поволности на одредени производи и услуги – истакна Герасимовски во интервју за Дневник на Сител, најавувајќи низа мерки за подобрување на животниот стандард во 2026 година.

Картичката ќе биде електронска и уникатна за секој жител, со сопствен бар-код. Таа ќе може да ја користат исклучиво жители на Центар, а бенефициите ќе важат само кај правни субјекти регистрирани во општината.

– Со картичката ќе можат да се добијат попусти во институции како театри, музеи, галерии, локални бизниси од здравство, фармација, козметика, фитнес, правни услуги, угостителство, мода, велосипеди, храна и други, за граѓаните да добијат конкретни поволности за своите потреби – појасни Герасимовски.

Постапката за воведување на картичката се планира да започне во средината на јануари или почетокот на февруари, додека пуштањето во употреба се очекува во март.

Освен „центарската картичка“, Герасимовски најави и други мерки за поддршка на семејствата и образованието во 2026 година:

Еднократната парична помош за пензионерите со ниски примања се зголемува од 2.500 на 5.000 денари.

Поддршката за новороденчиња се зголемува од 7.000 на 10.000 денари.

Во образованието се воведува бесплатен топол оброк за учениците во основните училишта, ученички екскурзии низ државата, и зголемување на стипендиите: за талентираните ученици за 1.000 денари, а за учениците од социјално загрозени семејства за 1.500 денари.

– Нашата цел е да ја подигнеме квалитетот на животот во општината и да обезбедиме конкретни мерки кои ќе им помогнат на граѓаните, од пензионерите до семејствата со деца – додаде градоначалникот.

The post ЦЕНТАР ВО ЧЕКОР СО ГРАЃАНИТЕ Герасимовски најавува „центарска картичка“ и зголемена поддршка за пензионерите и семејствата appeared first on plusinfo.mk.

Општина Центар утринава спроведе интензивно миење на улиците во сите населби на територијата на локалната самоуправа. Цистерните и метларките на ЈП „ПОЦ” ја миеја прашината на улиците и тротоарите, го освежуваа и расчистуваа просторот околу контејнерите.

Градоначалникот на Општина Центар, Горан Герасимовски, посочи дека редовното миење на улиците придонесува за намалување на загадувањето со ПМ-честички и обезбедува одржување на хигиената во градот.

– Со овие активности не само што го одржуваме централното градско подрачје, туку и го заштитуваме здравјето на граѓаните. Продолжуваме со редовно миење во сите населби, како што тоа го правевме и досега – рече Герасимовски.

The post МИЕЊЕТО УЛИЦИ ЌЕ СТАНЕ РЕДОВНА ПРАКСА ВО ЦЕНТАР Се очекува тоа да го намали загадувањето appeared first on plusinfo.mk.

Градоначалникот на Општина Центар, Горан Герасимовски, денеска одржа средба со противкандидатките од локалните избори, Билјана Ивановска од „Независни заедно” и Марија Среброва од „Левица”. Поради работни обврски, на средбата не присуствуваше кандидатот Мирослав Лабудовиќ од „Знам”.

На состанокот, на кој присуствуваа и раководителите на секторите во општината, се дискутираше на повеќе теми од интерес на граѓаните: урбанизам, зеленило, нови паркинг-зони, планираното затворање на сообраќајот во Дебар Маало и друго.

– Високо ги ценам и почитувам моите противници во изборниот процес. Уште на предизборните дебати јавно потенцирав дека секој нивен предлог и иницијатива ќе бидат добредојдени. Нивните искуства со кои влегоа во трката, Среброва како советник во Советот на Општина Центар и Ивановска како поранешна претседателка на ДКСК, го кренаа нивото и квалитетот на целиот изборен процес. Се надевам дека ќе продолжиме со блиска соработка и во иднина – рече Герасимовски.

На средбата беше договорено ваквите состаноци да продолжат и понатаму, со цел развивање на заеднички иницијативи во интерес на жителите на Центар.

The post ГРЕОТА Е ДА СЕ ФРЛАТ! Герасимовски доби предлози и идеи за Центар од своите противкандидатки appeared first on plusinfo.mk.

Кандидатот за градоначалник на Општина Центар Горан Герасимовски, во интервјуто за порталот „Пари” вели дека по резултатите од првиот круг и поддршката што ја добива од терен во изминатите денови, смета дека во недела, заедно со граѓаните на Центар, ќе ја потврди големата победа.

– Нашите очекувања и анализите кои ги имаме се дека поддршката расте, а во вториот круг ќе ја зголемиме разликата. Сметам дека водевме фер, чесна и многу конструктивна изборна кампања, која беше длабоко втемелена во програмата за следните четири години. Мојата програма не беше изборен памфлет туку сериозен стратешки и политички документ составен врз база на остварливи ветувања и проекти за секој дел од Центар и за секоја категорија граѓани. Ова е суштинската разлика меѓу мене и другата опција – истакнува Герасимовски.

Тој потенцира дека не се служел со ниски напади, лаги и манипулации како што тоа го правеа противкадидатите, туку се фокусирал на реални ветувања и конкретни проекти кои граѓаните на Центар ги препознаа.

– Центар и центарци не потпаѓаат на стари потрошени трикови и негативна кампања, знаат да препознаат искрен пристап и посветена работа, и затоа очекувам во недела да ми ја дадат поддршката – вели Герасимовски.

Toj најави почеток на целосна реконструкција на улица „50 Дивизија”, со која улицата ќе добие современ, функционален и безбеден изглед. Проектот предвидува еднонасочно движење и ново коловозно решение, со што ќе се подобри протокот на сообраќајот и ќе се создадат нови резидентни паркинг-места.

– Со проширување на тротоарите, поставување бариери против диво паркирање, ново ЛЕД осветлување и зеленило, овој потег ќе стане поурбан, побезбеден и поудобен за сите жители. Како трајно решение за паркирањето, предвидена е и катна гаража, со која конечно ќе се реши долгогодишниот проблем на граѓаните од овој дел на Центар – рече Гeрасимовски.

Тој најави и изградба на нова градинка во населбата по скандинавски терк, со што просторот добива целосно нова вредност, урбано, зелено и безбедно маало за сите центарци.

The post ВОДЕВМЕ ФЕР, ЧЕСНА И КОНСТРУКТИВНА КАМПАЊА Герасимовски очекува в недела да ја потврди победата appeared first on plusinfo.mk.

Кандидатот за градоначалник на Центар од Движењето ЗНАМ поддржан од ВМРО-ДПМНЕ, Мирослав Лабудовиќ во гостување во емисијата „За или против“ на Алфа ТВ го обвини актуелниот градоначалник Горан Герасимовски дека избегнува дуел со него за втор пат.

– Секој кандидат различно си ја планира агендата, но ако сте актуелен градоначалник, имате обврска да се појавите на ТВ соочлување и да одговорите на повеќе прашања што ги интересираат граѓаните. Горан Герасимовски втор пат избегнува таков дуел. Јас, како граѓанин, сакам да му поставам повеќе прашања, но тие ќе се постават на празно столче, исто како што беше празен целиот негов мандат – рече Лабудовиќ.

Тој посочи дека сака да го праша Герасимовски за урбанистичките планови, наведувајќи дека Центар е рекордер по бројот на издадени дозволи, повеќе од 300, кои се уште се според плановите од 2012 година.

– Само три ДУП-ови се сменети, а шест се на разгледување. Дали тоа е навремена и точна постапка? Тоа е прашањето кое граѓаните заслужуваат да го слушнат – додаде Лабудовиќ.

Кандидатот за градоначалник го обвини Герасимовски и за потенцијални заеднички бизниси со поранешниот премиер Зоран Заев и министерот Венко Филипче во Дубаи.

– Центар е последното упориште на струмичките бизниси кои инвестираат и во Дубаи. Сакав да прашам дали и Герасимовски инвестира заедно со нив таму и да ја потврди или демантира шпекулацијата – дали бил присутен на јахтата на Заев – рече Лабудовиќ.

Лабудовиќ го оцени обидот на Герасимовски да се претстави како независен кандидат како несериозен и очајнички.

– Герасимовски е претседател на општинската организација на СДСМ во Центар и беше акламативно избран нивен кандидат. Сега го гледаме резултатот од првиот круг, катастрофален, и сака да се откаже од партијата, а утре би се откажал и од граѓаните ако не му одговара – нагласи Лабудовиќ.

Тој исто така потенцираше дека има одлична соработка со идниот градоначалник на Скопје, Орце Ѓорѓиевски, и дека заедно ќе работат на нови проекти и визија за Центар и Скопје.

– Со Орце Ѓорѓиевски се надополнувавме за многу идеи и идни проекти. Сигурен сум дека со него ќе направиме целосно свртување на текот на работите со нов пристап и нова визија, која ќе даде нов лик на Центар и Скопје – заклучи Лабудовиќ.

The post ДАЛИ ГЕРАСИМОВСКИ ЈА ИЗЛАЖАЛ ЈАВНОСТА? Лабудовиќ прашува за неговата бизнис врска со Заев и Филипче во Центар appeared first on plusinfo.mk.

Кандидатот за градоначалник на Општина Центар од редовите на СДСМ, Горан Герасимовски, синоќа беше на терен, на средби со граѓаните „од врата до врата“.

„Поддршката од центарци во пресрет на вториот круг од локалните избори за Герасимовски значително се зголемува. Тој, на вчерашните средби доби поддршка да продолжи да ја води општината како во изминатите четири години“, се вели во соопштението на кандидатот за градоначалник.

Герасимовски, на центарци им ги најави клучните проекти за вториот мандат, дом за стари лица, нова градинка, набавка на две цистерни и пет метларки, ограничување на движењето на возилата во Дебар Маало за намалување на сообраќајниот метеж, изградба на две монтажни катни гаражи, нов административно-граѓански објект, два покриени базени, како и воведување на „Центарска картичка“.

– Работевме домаќински, не потрошивме ниту еден денар на непродуктивни трошоци. Во еден мандат ја изградивме најмодерната градинка во државата. Реконструкцијата на нашата култна сала „Работнички“ е во завршна фаза, поставивме ново смарт осветлување, ги подобривме условите во сите градинки и основни училишта. Покажавме како се води општина, во интерес на сите граѓани, а не на политички интереси. Со истата грижа за секој еден центарец продолжуваме и во новиот мандат – рече Герасимовски.

Граѓаните упатија благодарност до Герасимовски за акциите за чистење на сметот што ги спроведува целата измината година, се наведува во соопштението од Штабот на кандидатот.

The post ГЕРАСИМОВСКИ НА СРЕДБИ СО ГРАЃАНИТЕ ОД ВРАТА НА ВРАТА Кандидатот ги претстави своите проекти за вториот мандат appeared first on plusinfo.mk.

Кандидатот за градоначалник на Општина Центар Горан Герасимовски, денеска најави дека Општина Центар воведува „Центарска картичка” со попусти за културни и спортски настани, локали и продавници.

– Секој центарец добива еднаш годишно бесплатна карта за театарска претстава, а за секоја следна купена карта добива 20% попуст. Со картичката, овоможуваме и 20% попуст за натпреварите на нашиот најтрофеен клуб „Работнички”, како и попусти за влез на базен. На нашите центарци, на децата и возрасните им овозможуваме подобри услови и поволности – рече Герасимовски.

The post ЗА ЦЕНТАРЦИ ПОПУСТИ ЗА КУЛТУРНИ И СПОРТСКИ НАСТАНИ Општината воведува „Центарска картичка“ appeared first on plusinfo.mk.

Кандидатот за градоначалник на Општина Центар за втор мандат Горан Герасимовски најави дека Општината ќе воведе ваучери за користење на вештачка интелигенција, што ќе биде современа поддршка за младите во Центар.

– Воведуваме месечни ваучери за користење на вештачка интелигенција, со цел младите да добијат пристап до современи дигитални алатки и да ги унапредат своите знаења и вештини. Во новиот мандат вложуваме во младите преку конкретни мерки кои ќе им овозможат да го развијат својот потенцијал и да бидат подготвени за иднината – изјави Герасимовски.

Тој посочи дека особено внимание ќе биде насочено кон младите кои не се вклучени во образование, вработување или обуки.

– За оваа група креиравме програми за активно вклучување преку обуки, интерактивни работилници и волонтерски ангажмани, со цел да ги поттикнеме нивната мотивација и личен развој. Дополнително, Општина Центар ќе ги зголеми за 50% стипендиите за талентирани ученици, а ќе продолжи и со субвенциите за полагање возачки испит и за купување велосипеди – нагласи Герасимовски.

The post ОПШТИНА ЦЕНТАР ЌЕ ДЕЛИ ВАУЧЕРИ ЗА ВЕШТАЧКА ИНТЕЛИГЕНЦИЈА Герасимовски сака да ги поттикне младите да стекнат нови вештини appeared first on plusinfo.mk.

Јавното претпријатие Комунална хигиена соопшти дека подигнало 350 тони комунален отпад во еден ден во Скопје.

Во текот на вчерашниот ден и минатата ноќ, ЈП Комунална хигиена-Скопје соопшти дека спровела активности за собирање и транспорт на комуналниот отпад од контејнерите поставени на булеварот Гоце Делчев до хотел ВИП, булеварот Партизански одреди, булеварот Митрополит Теодосиј Гологанов, улиците Даме Груев и Џон Кенеди, како и на повеќе локации во скопската општина Аеродром. Во рамките на вчерашните активности биле подигнати вкупно 350 тони комунален отпад.

„Би сакале да ја информираме јавноста дека досега немаме добиено одговор од страна на градоначалниците на скопските општини каде го одлагаат отпадот од наводните активности за собирање на комуналниот отпад што тврдат дека ги спроведуваат во рамките на своите општини. ЈП Комунална хигиена-Скопје во текот на денешниот ден не забележа дека е подигнат отпад од страна на општинските комунални претпријатија во ниту една скопска општина. Се прашуваме дали навистина и на кои локации се одвиваат овие активности?“, велат од ЈП КХС.

The post КОМУНАЛНА ХИГИЕНА ПОЧНА ДА СЕ МЕША ВО СВОЈАТА РАБОТА Собрала 350 тони ѓубре, а не мери колку оставила на улиците appeared first on plusinfo.mk.

Градоначалникот Горан Герасимовски, во лајв видео се обрати во јавноста тврдејќи дека 5 дена ЈП „Комунална хигиена” воопшто не се појавува на улиците во Центар за да го подигне сметот каде што има надлежност.

Герасимовски истакна дека утрово испратил допис до ЗЕЛС за итна седница кадешто ќе се побара решение за овој проблем.

– Ова ги надминува сите граници. Изминатите пет дена комуналното претпријатие воопшто не се појавува на улиците во Општина Центар и се соочуваме со огромни проблеми, а набрзо не дај боже и зарази. Нашите хигиеничари се во две смени, имаме дополнителна механизација којашто и во утринските и во вечерните часови е на терен и правиме сѐ да го расчистиме сметот и она што не го прави комуналното претпријатие веќе подолг период. Но, овие 5 дена како што кажав е навистина алармантно. Утрово пуштив допис до Управниот одбор на ЗЕЛС, се слушнав и со директорката на ЗЕЛС, побарав итна седница на ЗЕЛС кадешто ќе се побара решение на овој проблем – рече Герасимовски.

Герасимовски, изјави дека разговарал и со неколку негови колеги од кои побарал дополнителна механизација за да го отстрануваат самите сметот, и ја повика Владата да размисли за вонредна ситуација.

– Разговарав со неколку мои колеги каде што побарав дополнителна механизација за да го отстрануваме самите сметот но, еве и јавно ја повикувам и Владата да размисли за вонредна ситуација, поради тоа што јавното комунално претпријатие и Град Скопје изминатите пет дена воопшто не се појавува на територија на Општина Центар за да го отстрани сметот од контејнерите. Нема да дозволиме ова да се случува на центарци, ќе направам сѐ, и јас и мојот тим на луѓе сето ова што се прави да престане. И затоа, уште еднаш пружам апел и до Владата, и до ЗЕЛС да ни помогне во овој дел, да се справиме заедно со сметот со којшто се соочуваме во Општина Центар – посочи Герасимовски.

The post 📽️ ГЕРАСИМОВСКИ БАРА ВОНРЕДНА СИТУАЦИЈА ВО ОПШТИНА ЦЕНТАР „Пет дена сами чистиме, ја нема Комунална хигиена“ appeared first on plusinfo.mk.