Бугарија е подготвена да го отвори воздушниот простор за рускиот претседател Владимир Путин, ако тој одлучи да дојде во Будимпешта на средба со американскиот претседател Доналд Трамп, изјави денеска министерот за надворешни работи на Бугарија, Георг Георгиев.

Тој рече дека ваквите логистички прашања можат да се дискутираат само кога најавената средба на претседателите Трамп и Путин ќе биде официјализирана.

– Прво да го дознаеме датумот, а потоа да разговараме за техничките детали. Колку што знам, нема датум кога двајцата треба да се сретнат – рече Георгиев за време на престојот на Самитот на ЕУ во Луксембург.

Министерот за надворешни работи нагласи дека Софија нема да попречува никаква дипломатска иницијатива за постигнување мир во Украина.

– Кога се прават напори за мир, единственото логично решение е сите страни да придонесат за таков состанок – рече Георгиев.

На прашањето дали тоа значи дека Софија ќе му дозволи на претседателот Путин да влезе во воздушниот простор, тој рече:

– А како поинаку би можел да се одржи тој состанок ако еден од учесниците не може да стигне до Будимпешта?

Георгиев потврди дека Бугарија ќе го поддржи 19. пакет санкции на ЕУ против Русија, кој треба да биде усвоен оваа недела, додавајќи дека неговата земја има активна улога во поддршката на Украина и воено и технички.

The post БУГАРИЈА ЌЕ ГО ОТВОРИ НЕБОТО ЗА АВИОНОТ НА ПУТИН Како ќе се одржи мировниот самит ако еден учесник не може да стигне до Будимпешта, вели Георгиев appeared first on plusinfo.mk.

Уставните судови не се под јурисдикција на соседни политичари, а одлуките на овој суд се конечни и не се коментираат, рече денеска претседателката Гордана Сиљановска Давкова во однос на писмото на шефот на бугарската дипломатија Георг Георгиев до неговите колеги од ЕУ, во кое вели дека е непотребна провоција и правна апсурдна постапка иницијативата за оценка на уставноста на Протоколот од Договорот за доброседство со Бугарија, поднесена до Уставниот суд од поранешната пратеничка Лилјана Поповска.

Сиљановска Давкова потенцираше дека е непријатно да се коментираат вакви изјави како и да се даваат комeнтари за работа на Уставен суд, укажувајќи дека Уставниот суд решава дали има основ за проследување на доставените иницијативи.

– Непријатно ми е првин да коментирам вакви изјави како што е непријатно и да давате коментари и за работа на Уставен суд. Уставните судови се дури и надвор од поделбата на власта внатре во државата, сигурно не се под јурисдикција на соседни политичари. Ако некој покренал постапка во Уставниот суд, Уставниот суд ќе реши дали има основ за негово проследување. Одлуките на уставните судови и во Бугарија и во Македонија се конечни и не се коментираат, јас дури ниту тогаш не би ги комнетирала, изјави Сиљановска Давкова,  по доделувањето на признанието „Инженерски прстен“ во Охрид.

Уставниот суд на 13. минатиот месец информираше дека е формиран предмет во кој е оспорен Протоколот од вториот состанок на Заедничката меѓувладина комисија со Бугарија донесен на 17.07.2022 година во Софија, за кој во тек е претходна постапка во која се испитуваат податоците и известувањата потребни за донесување на одлука.

Подносителка на иницијативата, поранешната пратеничка и претседателка на ДОМ Лилјана Поповска,  наведува дека со оспорениот Протокол е прекршен Уставот и тврди дека има несоодветна форма и содржина, дека излегува надвор од рамките на правен акт кој обработува еден член од Договор меѓу две земји и произведува штетни дејствија врз идентитетските прашања за македонскиот народ, јазик и држава.

Поповска бара поништување на Протоколот и наведува дека поништувањето е издржано согласно Виенската конвенција за договорното право(1969) со која е овозможено поништување во случај кога е во спротивност со императивната норма на општото меѓународно право, што таа го толкува и во овој случај.

– Според наведеното во иницијативата Протоколот е во спротивност со Уставот, бидејќи не е ратификуван во Собранието, не е објавен во дадениот уставен рок во „Службен весник на Република Северна Македонија”. Дополнително, се тврди дека е во спротивност со членовите 6-16, 19, 20 и 26 од Законот за склучување, ратификација и извршување на меѓународни договори бидејќи не е почитувана процедурата за негово договарање, усвојување од страна на Владата и потпишување – стои во наводите на иницијативата.

Во иницијативата, како што информираа од Уставен, е наведено дека Протоколот не е полноправен акт потврден од Параламентот туку останува само записник од состанок на Меѓувладина комисија. Се тврди дека за разлика на процедурата спроведена во Република Северна Македонија која ја оценува како нетранспарентна и со пропусти, бугарската собраниска Комисија за текстот на Протоколот дискутирала уште на 23.06.2022 година, еден месец пред министрите за надворешни работи на двете земји да го потпишат Протоколот, а потоа на седница на 24.06.2022 година го усвоила целиот пакет од Францускиот предлог за почеток на преговорите со Северна Македонија со имплицитно вградениот Протокол.

БУГАРИЈА СЕ ЖАЛИ ВО БРИСЕЛ ДЕКА МАКЕДОНИЈА НЕ ГИ ИСПОЛНУВА ОБВРСКИТЕ Клучните договори насочено се оспорени пред Уставниот суд, пишува Георгиев

The post УСТАВНИТЕ СУДОВИ НЕ СЕ ПОД ЈУРИСДИКЦИЈА НА СОСЕДНИ ПОЛИТИЧАРИ Сиљановска-Давкова возврати на забелешките на Георг Георгиев appeared first on plusinfo.mk.

Бугарија изразува растечка загриженост за континуираниот неуспех на Република Северна Македонија да ги исполни своите обврски кон Европската Унија, напиша бугарскиот министер за надворешни работи Георг Георгиев во писмо до Брисел.

„Пакет-договорот одобрен во јули 2022 година на европско ниво останува единствениот можен пат напред за оваа земја-кандидат за ЕУ. За жал, наместо конструктивен дијалог и добрососедски односи, забележуваме политика на конфронтација, провокации и повлекување од преземените обврски, вклучително и насочено оспорување на клучните договори пред Уставниот суд во Скопје“, пишува Георгиев, објави БГНЕС.

Не е можно да се промени договорениот европски консензус или која било од неговите компоненти, додава тој.

„Бугарија очекува соседната земја да ги исполни своите обврски со добра намера, на што самиот Европски Совет постојано инсистира. Остануваме на ставот дека најдоброто решение за иднината на Западен Балкан е учеството на сите држави во овој најуспешен проект наречен Европска Унија. Подготвени сме да му помогнеме на Скопје да го следи својот европски пат во процесот на реформи, во случај ако членството во Обединета Европа е вистински избор на неговата влада“, пишува бугарскиот министер за надворешни работи.

The post БУГАРИЈА СЕ ЖАЛИ ВО БРИСЕЛ ДЕКА МАКЕДОНИЈА НЕ ГИ ИСПОЛНУВА ОБВРСКИТЕ Клучните договори насочено се оспорени пред Уставниот суд, пишува Георгиев appeared first on plusinfo.mk.

Летаат искри упатени од Софија кон Скопје откако македонскиот премиер Христијан Мицкоски со аналогијата за глушецот и лавот одговори на провокациите од бугарскиот министер Георг Георгиев кој претходно го нарече „северномакедонски премиер“.

Откако официјална Софија остро реагираше на изјавата на Мицкоски, се јави и бугарскиот премиер Росен Жељазков кој рече дека  „колегата Мицкоски треба да најде начин да се извини“.

– Наративот и изразот на премиерот Христијан Мицкоски ќе им бидат оставени на познавачите на Езоп. РС Македонија мора да се придржува до консензусот постигнат во 2022 година и да ги исполни преземените обврски – рече бугарскиот премиер по денешнот гласање за недоверба на неговиот кабинет – рече бугарскиот премиер откако преживеа гласање за недоверба во бугарскиот парламент.

Според Жељазков, многу луѓе во Бугарија не се задоволни од постигнатиот компромис во 2022 година, но политичката зрелост бара да се спроведе она што е договорено.

– Довербата во овие времиња е многу кревка – порачува тој велејќи дека Бугарија ќе продолжи да го поддржува европскиот пат на Македонија, но целосно врз основа на спроведувањето на обврските од Договорот од 2022 година и на Договорот за добрососедство.

Уште една реакција и барање за извинување пристигна и од поранешниот бугарски амбасадор во Македонија Велизар Енчв.

Енчев реагираше на постапката на македонското Министерство за надворешни работи, кое вчера, 10 јули, го повика актуелниот бугарски амбасадор  Жељазко Радуков на разговор и побара извинување од Софија за зборовите на Георгиев кој го нарече Мицкоски „северномакедонски премиер“.

– Бруталните навреди (од Мицкоски)  кон нашиот министер за надворешни работи не се ‘инцидент’, туку дел од конзистентна антибугарска стратегија. Бугарија мора веднаш да го повлече својот амбасадор од Скопје „на консултации“. Нашиот амбасадор нема работа во главен град каде што е повикан на објаснувања и јавно навредуван. Бугарија не е должна да финансира, спасува од пожари и да отвора европски врати за земја што ја клевети преку сите можни канали – советува Енчев во својата објава дадена во телевизиско гостување.

Според дипломатот, по вчерашната изјава Мицкоски за „глушецот и лавот“, Бугарија не може да се преправа дека дипломатските канали функционираат нормално.

Мицкоски во четврокот, 10 јули, изјави дека македонските медиуми не треба да му посветуваат внимание на Георгиев, кој „одработува“ и зашто тој што го раководи во позадина му дал задача „да се закача“, како кога „глушецот го задева лавот“.

The post БАЈ ГАЊО ЌЕ НИ ПРОСТИ ШТО НÈ ТЕПАЛ Само Мицкоски треба да се извини?! appeared first on plusinfo.mk.

Европскиот парламент утре треба да гласа за извештајот за напредокот на Македонија, но Бугарија испраќа јасна порака: документот нема правна сила и нема да влијае на ставот на официјална Софија.

Бугарскиот министер за надворешни работи Георг Георгиев, од Брисел, изјави дека извештаите на ЕП не се обврзувачки и не можат да ја заобиколат волјата на земјите-членки.

– Секоја земја-кандидат мора да ги исполни условите што сме ги поставиле. Бугарија е доследна, проширување ќе има само ако се почитуваат договорите. Никој не може да ја заобиколи преговарачката рамка од 2022 година – рече Георгиев.

Прашан дали има очекувања од утрешното гласање во Комитетот за надворешна политика на ЕП, Георгиев остро возврати.

– Ние не се мешаме како некои наши југозападни соседи. Не е коректно политичари однапред да знаат каков ќе биде исходот – рече тој.

Министерот дури и ги прозва европратениците кои, според него, ја „инструментализираат“ дебатата во Брисел и се обидуваат да ја преформулираат вистината за идентитетот и јазикот.

– Европските институции не се алатка за промовирање на туѓи агенди. Ниту една земја-членка не се откажува од консензусот, Бугарија сигурно нема – заклучи Георгиев, алудирајќи дека секој обид да се форсира процесот ќе заврши со вето.

The post БУГАРИЈА ПОВТОРНО ГО СПОРИ ПАТОТ НА СКОПЈЕ КОН ЕУ Министерот Георгиев порача дека Извештајот за Македонија нема тежина appeared first on plusinfo.mk.

ВМРО-ДПМНЕ бара од претседателот на СДСМ Венко Филипче да им се извини на граѓаните за лагите дека внесувањето на Бугарите во Уставот е единствениот услов за почеток на преговорите за членство во ЕУ.

„Бугарскиот министер за надворешни работи, Георг Георгиев изјави: уставните измени не се единствениот услов, тогаш допрва почнува процесот. Оваа негова изјава значи врела шлаканица за СДСМ, за Венко Филипче и за целата надворешна политика на оваа партија, која се заосноваше на тезата дека уставните измени се единствениот услов што треба да се исполни“, соопшти ВМРО-ДПМНЕ.

Партијата потсетува на изјавите на поранешниот министер за евроинтеграции Бојан Маричиќ

„Уставните измени се единствен услов за продолжување на нашиот пат кон ЕУ. Продолжувањето на преговорите со ЕУ не зависи од Извештајот на ЕК, туку од уставните измени. Единствен услов за отворање на првиот кластер се уставните измени – ова се зборовите со кои Бојан Маричиќ лажеше и ја убедуваше македонската јавност дека Бугари во Устав се последната кнедла која треба да се проголта. Додека ВМРО-ДПМНЕ бараше гаранции и уставни измени со одложено дејство, СДСМ повторно нè убедуваше дека нема опасност од ново вето од Бугарија. И претседателот Христијан Мицкоски јасно посочуваше дека смената на Уставот е само почеток на барањата, СДСМ пак лажеше дека тоа не е точно“, соопшти ВМРО-ДПМНЕ.

СДСМ ја заплеткаа државата во чвор, го лажеше народот и ги распродаваше државните и национални интереси без око да му трепне, се додава во соопштението на владејачката партија.

„Каде е сега Венко Филипче да ја убедува јавноста дека уставните измени се единствениот услов за напредок? Ќе се извини ли што ја лажеше јавноста? Едно е сигурно, СДСМ е синоним за неспособност, криминал и за предавства“, се вели во соопштението од ВМРО-ДПМНЕ.

The post ВРЕЛА ШЛАКАНИЦА ЗА СДСМ ОД БУГАРИЈА Филипче да се извини што лажеше дека „Бугари во Устав“ се единствениот услов за преговорите со ЕУ appeared first on plusinfo.mk.

Двајцата министри  денеска ја остварија првата средба на маргините на Минхенската безбедносна конференција.

„На средбата се разговараше за поголем број теми, вклучувајќи ги билатералните разлики, блокадата на европскиот пат на државата од страна на Бугарија, како и за положбата на македонското малцинство во Бугарија. Министерот Муцунски изрази жалење што, наместо развој на добрососедската политика, односите меѓу двете земји остануваат оптоварени со билатерални спорови, кои станаа непринципиелна пречка на македонскиот евроинтегративен процес“, соопштија од кабинетот на министерот.

Притоа, се додава во соопштението, Муцунски истакна дека сите отворени прашања треба да се решаваат одговорно, преку дијалог и со взаемна почит и разбирање, бидејќи добрососедските односи, покрај другото, подразбираат и поддршка за европските интеграции на Македонија, како стратешка определба на државата.

„Министерот Муцунски на средбата го отвори и прашањето за почитување на правата и слободите на припадниците на македонското малцинство во Бугарија и ја нагласи потребата од спроведување на одлуките на Европскиот суд за човекови права“, се вели во соопштението од кабинетот на Муцунски.

Бугарскиот министер Георг Георгиев истакнал дека добрососедските односи се хоризонтален критериум во процесот на евроинтеграциите и без нив не е возможно да се постигне членство во ЕУ. Градењето добрососедство бара доверба, отворен дијалог, предвидливост и спроведување на обврските, рекол тој, соопшти бугарското МНР.

„Ставот на Бугарија во однос на европската интеграција на Македонија е јасен и конзистентен. Европскиот компромис од 2022 година вклучува комплекс на мерки и нивното целосно спроведување е единствениот пат напред. Вклучувањето на Бугарите, на рамноправна основа со другите народи, во Уставот на Република Северна Македонија е само првиот чекор, чие спроведување ќе му овозможи на Скопје да ги започне преговорите за членство. Георгиев беше категоричен дека не е можно повторно преговарање или заобиколување на постигнатите договори зад кои стои цела ЕУ“, соопшти МНР на Бугарија.

The post БИЛАТЕРАЛНИОТ СПОР СО БУГАРИЈА Е НЕПРИНЦИПИЕЛНА ПРЕЧКА НА МАКЕДОНИЈА КОН ЕУ Прва средба на Муцунски со бугарскиот колега Георгиев appeared first on plusinfo.mk.

– Ако прашањето е зошто нема да има заедничко чествување, тоа е затоа што не сме добиле покана за такво нешто. Последното такво чествување беше откако се потпиша Договорот за добрососедство во 2017 година. Но, во овој момент немаме покана од Република Северна Македонија заедно да го чествуваме тој ден – рече Георгиев.

Прашан дали со заедничкото одбележување би можеле да повторат тензиите од 2023 година, тој посочи дека „историјата треба да обединува, а не да разделува“.

Георгиев ги оцени како специфични односите меѓу Софија и Скопје.

Одговорајќи на прашањето дали Софија ќе ја промени позицијата, со оглед на ставот на македонскиот премиер Христијан Мицкоски дека Бугарите нема да бидат внесени во Уставот без јасни гаранции од ЕУ, Георгиев рече дека Скопје нема како да го продолжи пристапниот процес доколку не ги исполни преземените обврски.

Според него, нема држава која повеќе од Бугарија има интерес од интеграцијата на земјите од Западен Балкан и додаде дека тоа не го кажува само од позиција на бугарските европски приоритети од 2018 година со претседателството, туку во многу поширок контекст.

– Ние, искрено, се радуваме дека Република Северна Македонија и Албанија се наши сојузници во НАТО. Тоа е инвестиција во безбедноста на регионот. Природно е да се радуваме и на евроинтеграциите, но со запазување на условите – рече Георгиев.

The post ГОДИНАВА НЕМА ЗАЕДНИЧКО ЧЕСТВУВАЊЕ НА ГОЦЕ ДЕЛЧЕВ Бугарија вели дека не добила покана од Македонија appeared first on plusinfo.mk.

Георг Георгиев од партијата ГЕРБ на Бојко Борисов ќе ја извршува функцијата министер за надворешни работи во новата Влада на Бугарија, што ќе ја предводи премиерот Росен Жељазков.

Георгиев беше заменик министер за надворешни работи од ноември 2014 година до јануари 2017 година, во време кога бугарската дипломатија ја водеше Екатерина Захариева.

На последните парламентарни избори беше избран за пратеник во 51. Народно собрание, од редовите на ГЕРБ.

Беше пратеник и во 43, 45, 48, 49 и 50 состав на парламентот.

Георг Георгиев, како што е наведено во неговата биографија објавена на веб страницата на бугарскиот парламент, е роден на 20 октомври 1991 година во Софија.

Дипломирал политички науки на софискиот универзитет „Св. Климент Охридски“, а потоа магистрирал политички консалтинг.

Георгиев има завршено „Програма за специјални странски претставници во областа на законодавството“ на Корејската фондација „Програма за странски лидери“ на Стејт департментот на САД и програмата „Идни европски лидери“.

Георг Георгиев има завршено и курс на Кинеската дипломатска академија.

Народното собрание на Бугарија денеска ја избра новата Влада, предводена од Жељазков. Со тоа, по многу обиди во изминатите четири години, седум изборни циклуси, и два и пол месеци по последните парламентарни избори, Бугарија доби редовна политичка влада.

„За“ гласаа 125 пратеници, „против“ беа 114, а немаше воздржани.

Владата на Жељазков беше поддржана од пратениците на ГЕРБ-СДС, БСП-Обединета левичарска партија и Има таков народ, како и од партијата ДПС – ДПС.

The post КОЈ Е НОВИОТ ШЕФ НА БУГАРСКАТА ДИПЛОМАТИЈА? Георгиев ѝ беше десна рака на Захариева од 2014 до 2017 година appeared first on plusinfo.mk.