Претседателот на САД Доналд Трамп порача дека конфликтот со Иран може да заврши доколку Техеран ги пригфати условите во меморандумот предложен од Вашингтон, а во спротивно најави поинтензивно бомбардирање. Објавата на Трамп на социјалните мрежи доаѓа во време кога двете страни се доближуваат до можен договор за примирје.

Во меѓувреме стигна и првата реакција од Иран. Портпаролот на Советот за национална безбедност на Иран, Ебрахим Резаи, оцени дека предлогот повеќе личи на „американски список на желби отколку на реалност“.

„Американците нема да го добијат со неуспешно воено сценарио она што не успеаја да го добијат во преговорите лице в лице“, објави Резаи на мрежата Икс.

Тој порача дека Иран е подготвен.

„Прстот ни е на чкрапалото. Ако не се предадат и не ги направат потребните отстапки, ќе следи суров одговор за кој ќе се покаат“, напиша иранскиот претставник.

Трамп нуди, Техеран одбива

Трамп претходно порача дека Иран има избор меѓу договор и нови напади.

„Под претпоставка дека Иран ќе се согласи да го исполни договореното, што е можеби голема претпоставка, веќе легендарнaта операција „Епски бес“ би завршила, а блокадата би овозможила Ормускиот Теснец да биде отворен за сите, вклучително и за Иран“, напиша Трамп.

Прифаќање или бомбардирање?

Трамп испрати и директна закана.

„Доколку Иран не се согласи, бомбардирањето ќе започне и тоа ќе биде многу поинтензивно отколку порано“, напиша Трамп.

Изјавата доаѓа во чувствителен момент. Во тек се дипломатски контакти меѓу Вашингтон и Техеран.

„Аксиос“ открива, договорот е блиску?

Според „Аксиос“, САД и Иран се блиску до прелиминарен меморандум за разбирање. Документот би можел да го означи крајот на сегашниот конфликт.

Вашингтон очекува одговор од Техеран во следните 48 часа. Иако договор сè уште нема, американски извори велат дека двете страни никогаш не биле поблиску.

14 точки за примирје

Предлогот содржи 14 точки. Во него е вклучен мораториум за збогатување на ураниум.

За возврат, би следело постепено укинување на санкциите и ослободување на замрзнатите ирански средства.

Документот предвидува и олеснување на пловидбата низ Ормускиот Теснец.

Колку години без збогатување?

Клучниот спор останува времетраењето на мораториумот. САД бараат ограничувања до 20 години. Иран предлага 5. Компромисните варијанти се движат меѓу 12 и 15 години.

По истекот на рокот, на Техеран би му било дозволено ограничено збогатување.

Инспекции и ураниум надвор од Иран

Предлогот предвидува Иран да не развива нуклеарно оружје. Се бара и засилен режим на инспекции.

Во игра е и преместување на високо збогатениот ураниум надвор од земјата. Тоа е едно од клучните барања на Вашингтон.

Поделби во Техеран?

Американската администрација смета дека во иранското раководство има поделби. Според дел од претставниците, тоа може да го отежне договорот.

Некои американски функционери остануваат скептични. Се сомневаат дека Техеран е подготвен за конечен договор.

Ормускиот Теснец останува чувствителен

Одлуката на Трамп да се откаже од планираната операција во Ормуз, според извори, е поврзана со напредокот во преговорите.

Целта е да се зачува кревкото примирје. Но тензијата во регионот останува висока.

Рубио предупредува, процесот е тежок

Државниот секретар на САД Марко Рубио порача дека процесот е сложен.

– Потребна е јасна дипломатска рамка – изјави Рубио.

Тој истовремено изрази сомнежи за подготвеноста на Иран да постигне договор.

The post ПА, ТОА Е СПИСОК НА АМЕРИКАНСКИ ЖЕЛБИ Иран реагира, Трамп се заканува со посилно бомбардирање appeared first on plusinfo.mk.

Иран знае што не смее да прави изјави претседателот на САД за новинарите од Овалната соба во Белата куќа. Доналд Трамп одби да одговори што би значело прекршување на примирјето со Иран откако претходно денеска министерот за одбрана на САД Пит Хегсет изјави дека Иран уште не ја преминал линијата.

– Ќе дознаете, бидејќи ќе ви кажам… тие знаат што да прават, тие знаат што не треба да прават – изјави Трамп.

Тој додаде дека Иран се обидува да се спротивстави со помали бродови. Според него, тоа е обид да се натпреварува со американската морнарица.

Во меѓувреме, тензиите растат во Ормускиот Теснец, а Вашингтон и Техеран разменуваат напади и остри пораки. Ситуацијата се вжешти откако Вашингтон најави помош за бродови во клучниот нафтен коридор.

– Иран нема шанси. Никогаш немал – изјави Трамп.

Тој тврди дека Техеран сака договор. Вели дека тоа го слуша во разговорите.

– Ми го кажуваат тоа кога разговарам со нив, а потоа излегуваат на телевизија и велат дека им оди одлично.

Трамп даде прогноза за нафтата.

– Очекувам цената да достигне 300 долари за барел – изјави тој.

Највисоката цена на нафтата во поновата историја од 2008 година кога беа регистрирани 147 долари за барел.

„Кренете бело знаме“

Трамп испрати порака до Техеран.

– Иран треба да го крене белото знаме на предавање – изјави Трамп.

Тој ја пофали блокадата на САД во Теснецот.

– Практично е како челик. Никој нема да се обиде да ја пробие – рече тој.

„Подготвен сум да им ја уништам економијата“

Трамп зборуваше и за економијата на Иран.

– Подготвен сум да ја уништам нивната економија затоа што сакам да победам – изјави Трамп.

Тој тврди дека инфлацијата во Иран сега е 150% и дека валутата ријал е безвредна.

Според други податоци, инфлацијата во Иран е под 54%.

The post СКРШЕН МИР? ЗНААТ ШТО НЕ СМЕАТ Трамп го повика Иран да крене бело знаме appeared first on plusinfo.mk.

Централната команда на американските Вооружени сили (ЦЕНТКОМ) денеска објави дека два трговски брода под американско знаме успешно поминаа низ Ормускиот Теснец.

„Бродови разурнувачи на американската морнарица со наведувани ракети во моментов дејствуваат во Арапскиот Залив откако поминаа низ Ормускиот Теснец во поддршка на „Проектот слобода“, соопшти командата во објава на социјалната мрежа Икс.

Иранската Исламска револуционерна гарда (ИРГЦ) ги опиша тврдењата на САД како „целосни лаги“.

„Човек од акција, сака притисок“

Претседателот на САД, Доналд Трамп, одлучи да започне нова воено-поморска операција „Проект Слобода“ во Ормускиот Теснец со цел да изврши притисок врз Иран по застојот во преговорите, објави Аксиос, повикувајќи се на американски претставници.

– Американскиот претседател сака акција. Тој не сака да стои во место. Тој сака притисок. Тој сака договор – изјавил висок американски функционер.

Погоден е брод на Јужна Кореја?

Во меѓувреме, можно е напад да предизвикал експлозија во јужнокорејски товарен брод закотвен во Ормускиот Теснец, објави Министерството за океани и рибарство на Јужна Кореја.

Околу 13:40 часот ппо македонско време, според министерството, евидентиран е напад врз товарниот брод „HMM Namu“. Во времето на инцидентот, бродот бил закотвен во водите во близина на Обединетите Арапски Емирати. Превезува вкупно 24 членови на екипажот, вклучувајќи 6 јужнокорејски државјани и 18 странски државјани. Според достапните информации, никој не е повреден.

Краток аларм, па порака во Емиратите

Министерството додава дека се верува дека за време на наводниот напад се случила експлозија на левата страна од машинската просторија. Инцидентот следел по претходните извештаи од Обединетите Арапски Емирати дека танкер на Емиратите поврзан со државната нафтена компанија Аднок бил погоден во Ормуз претходно во текот на денот.

Жителите на Емиратите добија предупредување за можна ракетна закана од тамошното Министерство за внатрешни работи. Набргу потоа беше испратена порака за прекин на огнот, во која се наведува дека „ситуацијата во моментов е безбедна“ и дека граѓаните можат да се вратат на нормалните активности.

Сè уште не е познато што точно го предизвикало предупредувањето.

Министерството за одбрана на ОАЕ соопшти дека пресретнало три ракети од Иран. Засега нема информации за евентуални жртви.

Совети за мини, закочен сообраќај

Почнувајќи од денеска американската морнарица ќе им помага на комерцијалните бродови безбедно да минуваат низ Тесенцот, давајќи им совети за избегнување мини и подготвеност за интервенција во случај на ирански напад.

Според извори, Трамп кон крајот на минатата недела разгледал план за испраќање воени бродови низ мореузот за да го отвори со сила, но во последен момент одлучил да преземе повнимателен пристап.

Функционира ли новата акција на САД? Хрватски Индекс пренесува дека по објавувањето на „Проектот слобода“ предводен од САД, бродскиот сообраќај низ клучниот поморски пат останува многу низок.

„Повеќето бродови транзитираат низ областа користејќи го иранскиот систем за одвојување на бродови, наместо коридорот „Проект слобода“ поблиску до брегот на Оман“.

„Пукавме во воздух, ги исклучија радарите“

Претходно денеска Командата ги негираше тврдењата на иранските сили дека брод на американската морнарица бил погоден од ракети додека се приближувал кон Теснецот.

Иранските државни медиуми претходно објавија дека војската со 2 ракети погодила американски брод разорувач кој се обидувал да влезе во Ормус, што САД оттогаш го негираат. Во ново соопштение на иранската војска се вели дека иранската морнарица „издала предупредување и испукала предупредувачки истрели по рутата на непријателските разорувачи“.

Според тврдењата на иранската страна, американските разорувачи ги исклучиле радарите пред да се приближат кон Теснецот и биле „веднаш откриени“ откако повторно ги вклучиле. Потоа, како што е наведено, иранската морнарица испратила предупредување до разорувачите „за опасностите од кршење на примирјето“ преку радио врска.

Војската, исто така, тврди дека е испратен уште еден „експлицитен предупредувачки сигнал“, со порака дека „секој обид за влегување во Ормускиот Теснец ќе се смета за кршење на прекинот на огнот и ќе биде пресретнат со поморски одговор“.

The post 2 БРОДА ПОМИНАА НИЗ ОРМУЗ, ПРОЕКТОТ „СЛОБОДА“ Е УСПЕХ? Погоден е јужнокорејски брод, Иран пак тврди дека гаѓа appeared first on plusinfo.mk.

„Не знаат како да потпишат ненуклеарен договор. Подобро би било наскоро да се вразумат“.

Вака напиша шефот на САД на својата социјална мрежа и објави монтирана слика на која држи руже со натпис „Го нема веќе доброто момче“.

Објавата доаѓа во време кога цената на нафтата порасна од 112 на 114 долари за барел што ги подгрева стравовите од економска криза.

Иран ги обвини САД за „пиратство“ и заплена на бродови, со најава за можен воен одговор од страна на Исламската револуционерна гарда (ИРГЦ).

Западните медиуми пишуваат дека стратегијата на Доналд Трамп е долгорочна економска блокада на Иран.

Во меѓувреме, Израел пак гаѓaше цели во Јужен Либан.

The post ГО НЕМА ДОБРОТО МОМЧЕ, ВЕЛИ ТРАМП „Иран да се опамети, не знае да потпише договор“ appeared first on plusinfo.mk.

Примирјето во војната меѓу САД и Иран е продолжено, но без јасен рок, додека американскиот претседател Доналд Трамп наводно му дал на Техеран само неколку дена за договор, објавија американски медиуми.

Аналитичарите се обидуваат да ја дешифрираат стратегијата на Вашингтон. Постои очигледен расчекор меѓу официјалните изјави и медиумските извештаи.

Краток или неодреден рок?

„Аксиос“ и „Фокс њуз“, повикувајќи се на извори од Белата куќа, известуваат дека Трамп бил подготвен да го продолжи прекинот на огнот за уште 3 до 5 дена. Веста ја пренесе „Дојче Веле“.

Во тој краток период од неколку денови, Иран наводно треба да се согласи за заеднички предлог за деескалација и завршување на конфликтот.

Овие извештаи сугерираат дека продолжувањето на примирјето било од почеток замислено како привремена мерка.

Сепак, самиот Трамп го негира тоа.

– Нема временска рамка и нема брзање – изјави Трамп во интервју за „Фокс њуз“.

Тој додаде дека примирјето го продолжил „на неодредено време“.

Техеран молчи поради внатрешен конфликт?

Портпаролката на Белата куќа, Каролин Ливит, нагласи дека временската рамка ја одредува исклучиво Трамп.

– Тој го одржува (примирјето) и великодушно нуди одредена флексибилност на режим кој е целосно извалкан – рече Ливит.

Според неа, причината за молкот на Техеран е внатрешен конфликт. Таа посочи на поделби меѓу прагматични и тврдокорни струи во иранското раководство.

– Претседателот Трамп сака еден единствен одговор – додаде таа.

Санкции за Иран, ураниумот останува проблем

Ливит истакна дека „Операција Економски бес“ продолжува.

Според неа, блокадата на иранските пристаништа и бродови е ефикасна.

– Ја задушуваме иранската економија – рече таа.

Таа додаде дека Трамп ќе ја заврши војната кога тоа ќе биде најдобро за САД. Белата куќа останува на ставот дека Иран мора да го предаде збогатениот ураниум.

Ова е клучен услов за крај на конфликтот.

Запленувањето бродови не е кршење на примирјето?

Во меѓувреме, Иран заплени два товарни брода во Ормускиот теснец. САД тврдат дека тоа не претставува кршење на примирјето.

– Ова не беа американски ниту израелски бродови, туку меѓународни – рече Ливит.

Таа додаде дека Иран се однесува „како група пирати“. Според неа, американските напади ја ослабиле иранската морнарица.

„Блокадата е поефикасна од бомбардирањето“

Трамп изјави дека блокадата во Теснецот е поефикасна од бомбардирањето на Иран.

– Тие се плашат од блокади повеќе отколку од бомби – рече шефот на САД.

Тој додаде дека блокадите имаат долгорочни последици. Според него, кога енергетската инфраструктура ќе пропадне, може трајно да остане нефункционална.

– Луѓето велат дека сакам да завршам поради изборите, тоа не е вистина – рече тој.

„Арагчи е паметен човек“

Трамп најави дека ќе продолжи внимателно да ја следи ситуацијата. Тој не даде конкретен рок за крај на војната и нагласи дека нема брзање.

Истовремено, посочи дека преговорите ќе продолжат.

– Абас Аргчи е паметен човек – рече Трамп, осврнувајќи се на иранскиот министер за надворешни работи.

Тој додаде дека Арагчи ќе биде дел од иранската делегација во идните разговори.

The post ТРАМП БИЛ СПРЕМЕН ДА МУ ДАДЕ „3 ДО 5 ДЕНА“ НА ИРАН Белата куќа вели нема рок, дали Вашингтон ги влече конците? appeared first on plusinfo.mk.

САД и Иран се блиску до договор и може да потпишаат меморандум за разбирање со рок до конечен договор од 60 дена, пишува Ројтерс. Веста доаѓа во време кога Израел и Либан постигнаа десетдневно примирје.

Бриселски Политико пишува дека претседателот на САД брза за договор со Техеран поради економски притисок. Доналд Трамп, пак, изјави дека Иран се согласил да го одложи збогатувањето ураниум на 20 години, клучен услов во преговорите.

Либанците утринава славеа со истрели на улиците по стапувањето во сила на прекинот на огнот со Израел, додека раселените жители почнаа да се враќаат во своите домови, пишуваат западните медиуми.

Кревкото примирје, иако беше прекршено во раните часови, донесе позитивни реакции од светските лидери. Информацијата доаѓа во време кога, според дипломатски извори, се подготвува нова рунда разговори меѓу САД и Иран.

Но, реакциите во Израел за примирјето се значително поразлични. Многу жители од северот го осудија десетдневниот прекин на огнот.

Локалните власти тврдат дека одлуката ги изненадила. Израелскиот премиер посочи дека војската останува во Јужен Либан сè до целосно разоружување на паравојската Хезболах поддржана од Иран.

Иако договорот стапи на сила на полноќ, тензиите не исчезнаа. Борците на Хезболах испукуваа ракети до самиот почеток на примирјето. Израелското гранатирање продолжило уште кратко време потоа.

Ова укажува дека договорот е чувствителен и лесно нарушлив.

Celebrations in Lebanon as the Ceasefire goes into effect

I pray it holds. That is celebratory gunfire https://t.co/d9r5CxcPP3 pic.twitter.com/AQi5zbO0MB

— Ryan Rozbiani (@RyanRozbiani) April 16, 2026

Макрон со поддршка и предупредување

Францускиот претседател Емануел Макрон даде поддршка за договорот. Во исто време, предупреди дека ситуацијата останува кревка.

– Постои ризик прекинот на огнот да биде прекршен – изјави Макрон посред кого Хезболах мора да се разоружа, а Израел да го почитува суверенитетот на Либан.

Во Париз се подготвува и мултилатерална иницијатива за безбедноста во Ормускиот Теснец.

Иран го гледа примирјето како успех

Иран го поздрави примирјето и го оцени како дипломатски успех. Техеран смета дека тоа е резултат на отпорот на Хезболах.

– Ова е дел од пошироко разбирање со САД – изјави портпаролот Есмаил Бакаеи.

Иран се залага за поширок регионален прекин на огнот.

Пакистан, кој посредува меѓу САД и Иран ја поздрави веста за прекинот на огнот во Либан. Премиерот Шехбаз Шариф ги пофали дипломатските напори на САД. Тој ја истакна поддршката за суверенитетот на Либан.

Разговорите меѓу Израел и Либан се одржаа во Вашингтон. Овој процес се смета за значаен чекор кон нормализација на односите.

„Клучен чекор“

Генералниот секретар на Обединетите нации Антонио Гутереш го поздрави договорот. Претседателката на Европската комисија Урсула фон дер Лајен оцени дека примирјето е „олеснување“ по големите загуби.

Претседателот на Европскиот совет Антонио Кошта потврди дека поддршката за Либан ќе продолжи.

Италијанскиот министер за надворешни работи Антонио Тајани го оцени договорот како „клучен чекор“.

Слични пораки испратија и Обединетите Арапски Емирати, со акцент на спречување на нова ескалација.

The post МЕМОРАНДУМ МЕЃУ САД И ИРАН ПО ПРИМИРЈЕТО ВО ЛИБАН? Додека Бејрут слави, Тел Авив се двоуми appeared first on plusinfo.mk.

Министерот за надворешни работи на Иран Абас Арагчи во телефонски разговор со својот кинески колега Ванг Ји остро ги критикуваше американските потези во регионот.

– Провокативните дејствија на САД дополнително ќе ја комплицираат ситуацијата – порача Арагчи.

Иранскиот министер алудираше на обидите на САД да воспостават, како што ја нарекува, „морска блокада“.

Тој предупреди дека ваквите чекори директно влијаат врз бродскиот сообраќај во Ормускиот Теснец. Ставот на Техеран останува дека ваквите потези носат ризик од ескалација.

„Отпорни сте, ама смирете ја топката“

Кинескиот министер за надворешни работи ја пофали „отпорноста“ на иранскиот народ. Тој нагласи дека Пекинг е подготвен да помогне во дипломатските напори.

Сепак , Ванг Ји го повика својот ирански колега да вложи напори за враќање на нормалната пловидба низ Теснецот.

Ванг Ји смета дека суверенитетот и безбедноста на Иран во Ормуз треба да се почитуваат и заштитат, но додаде дека слободата и безбедноста на пловидбата низ водниот пат исто така мора да бидат гарантирани.

10 точки на САД и условот на Техеран

Лидерот на САД Доналд Трамп оцени дека иранскиот предлог од 10 точки може да биде основа за разговори. Но, по средбата во Исламабад, Техеран обвини дека „прекумерни барања“ од Вашингтон го попречиле договорот.

Иран инсистира дека целосен прекин на нападите е клучен предуслов.

Ветото во ООН помогна против ескалација?

Кина и Русија на 7 април ставија вето на резолуција поврзана со теснецот. Техеран тврди дека Ормускиот Теснец е затворен за „непријателски земји“.

Арагчи оцени дека ваквиот потег помогнал да се спречи дополнителна ескалација.

The post ЌЕ ИМА ОПАСНИ ПОСЛЕДИЦИ ВО ТЕСНЕЦОТ Иран се закани кон САД, Кина бара мирна пловидба appeared first on plusinfo.mk.

Кинескиот претседател Си Џинпинг предложи мировен план во четири точки за Блискиот Исток. Нацртот вклучува почитување на суверенитетот, меѓународното право и принципите на мирен соживот.

Предлогот бил презентиран на средба во Пекинг со крунскиот принц на Абу Даби, шеикот Халед бин Мохамед бин Зајед Ал Нахјан.

„Потребно е почитување на принципите на мирен соживот и стабилност“, пренесуваат кинеските медиуми во врска со предлогот.

Планот опфаќа четири клучни точки: почитување на суверенитетот, меѓународното право, мирен соживот и усогласување на развојот со безбедноста.

Извозот полека заглавува 

Конфликтот на Блискиот Исток веќе има влијание врз кинеската економија. Извозот е забавен во споредба со претходните месеци.

Причината е растечката неизвесност и влијанието врз цените на енергијата. Сепак, дел од економистите оценуваат дека Кина успева да ги ублажи последиците.

Големите резерви на нафта и диверзифицираните извори на енергија му даваат стабилност на Пекинг.

Средба Си – Трамп на повидок

Следниот месец се очекува средба меѓу претседателот на САД Доналд Трамп и кинескиот претседател Си Џинпинг во Пекинг.

Средбата претходно била одложена поради конфликтот со Иран.

The post СИ ЏИНПИНГ ПРЕДЛАГА 4 ТОЧКИ ЗА МИР НА БЛИСКИОТ ИСТОК Војната полека го заглавува извозот на Кина appeared first on plusinfo.mk.

Заменик-претседателот на иранскиот Парламент, Хаџи Бабаеј, изјави дека Ормускиот Тесенц е „целосно“ под контрола на Иран и дека преминот низ овој стратешки воден пат треба да се наплатува во иранската валута – ријали.

Бабаеј нагласи дека планот за Ормускиот Теснец добил едногласна поддршка од 250 пратеници, јави „Гардијан“.

– Според одлуката на раководството, овој стратешки поморски пат под никакви услови не е предмет на преговори – изјави тој, додавајќи дека, и покрај санкциите, извозот на нафта на Иран надминал 1,6 милиони барели дневно.

– Денес нафтата на нашата земја практично е невозможно да се санкционира, а иранскиот народ нема да отстапи ниту чекор од своите барања – рече Бабаеј.

Отворањето на Ормускиот Теснец, преку која минува околу една петтина од светското снабдување со нафта, е главно барање на САД за ставање крај на конфликтот и клучен дел од условеното двонеделно примирје постигнато минатата недела со Иран. Речиси целосното затворање на теснината предизвика нагло зголемување на цените на горивата, што може да влијае врз изборните шанси на републиканците на парламентарните избори во ноември.

Американски воени претставници вчера соопштија дека нивните сили „почнале да создаваат услови за расчистување на мините во теснината“, при што два разорувачи со наведувани ракети на американската морнарица изведуваат операции во регионот.

Иран, кој ја затвори Ормускиот Теснец како одговор на американско-израелскиот напад на 28 февруари, ги демантираше тврдењата дека овие пловни објекти влегле во областа.

The post ЌЕ СЕ НАПЛАЌА ВО РИЈАЛ, ТЕСНЕЦОТ Е ВО РАЦЕТЕ НА ИРАН Техеран изгласа закон, нема преговори за поморскиот пат? appeared first on plusinfo.mk.

Израел ќе отвори нов дипломатски канал со Либан во услови на растечки тензии. Израелскиот премиер Бенјамин Нетанјаху најави директни разговори со јасно дефинирана агенда. Инфромацијата доаѓа откако во денешните израелски напади врз Либан загинаа повеќе од 200 луѓе, а повередени се над 1.000.

Премиерот на Израел потврди дека веќе дал насоки разговорите да започнат што е можно побрзо.

– Во светлината на повторените барања на Либан за отворање директни разговори со Израел, вчера ѝ наложив на владата што е можно поскоро да започне директни разговори со Либан – изјави Нетанјаху.

Тој додаде:

– Разговорите ќе се фокусираат на разоружување на Хезболах и воспоставување мирни односи меѓу Израел и Либан.

Иран претходно предупреди дека ќе реагира доколку продолжат нападите врз Либан.

– Нашите прсти остануваат на чкрапалото – порача претседателот на Иран Масуд Пезешкијан,

Техеран ги оцени нападите како кршење на прекинот на огнот меѓу САД и Иран. Во нападите загинаа над 200 лица, додека повеќе од 1.000 се повредени.

The post НЕТАНЈАХУ СО НОВ ПОТЕГ ПО НАПАДИТЕ Израел започнува преговори со Либан, Хезболах е жешка тема appeared first on plusinfo.mk.