Американскиот претседател Доналд Трамп соопшти дека меморандумот за разбирање за мировен договор со Иран е „во голема мера договорен“ и дека документот предвидува и отворање на Ормускиот Теснец, еден од најважните светски морски коридори.

Сепак, иранската новинска агенција Фарс подоцна ги демантираше дел од неговите тврдења, особено во делот кој се однесува на контролата врз водниот пат, наведувајќи дека информациите не соодветствуваат со реалната состојба.

Трамп на социјалните мрежи порача дека очекуваниот договор би можел да го деблокира регионот и да го стабилизира протокот на енергенси, кој беше нарушен по ескалацијата на конфликтот во февруари, кога САД и Израел извршија напади врз Иран. Тој додаде дека финалните детали сè уште се усогласуваат.

Иранските извори, пак, наведуваат дека рамката за договор би му овозможила на Техеран значително учество во управувањето со Ормускиот Теснец, што е во спротивност со американските толкувања.

Во меѓувреме, Техеран потврди дека се водат разговори за можен меморандум за прекин на војната, по дипломатски активности во кои биле вклучени регионални актери. Пакистанските извори го оценија напредокот како „охрабрувачки“, додека премиерот на Пакистан Шехбаз Шариф ги поздрави напорите за постигнување мир.

Според западни медиуми, предлог-рамката вклучува три фази: формален крај на војната, решавање на прашањето за Ормускиот Теснец и 30-дневен рок за пошироки преговори. Доколку Вашингтон го прифати документот, разговорите би продолжиле по празникот Курбан бајрам.

Поради кризата и притисокот врз енергетските пазари, Трамп викендов остана во Вашингтон и откажа приватни обврски. Во тој период остварил серија телефонски разговори со лидери од Саудиска Арабија, Катар, Египет, Обединетите Арапски Емирати, Јордан, Турција и Пакистан. Разговор бил воден и со израелскиот премиер Бенјамин Нетанјаху, кој, според извори, бил оценет како конструктивен.

Портпаролот на иранското Министерство за надворешни работи, Есмаил Багаи, изјави дека разликите меѓу страните се намалуваат, но нагласи дека Техеран инсистира на контрола врз Ормускиот Теснец, укинување на санкциите и прекин на воените закани.

Дополнително, ирански претставници предупредуваат дека секое обновување на конфликтот ќе наиде на „силен и одговорен одговор“.

The post ТРАМП ТВРДИ ДЕКА ИМА МИР СО ИРАН Техеран веднаш возврати со демант appeared first on plusinfo.mk.

Германскиот канцелар Фридрих Мерц се обиде да ги намали тензиите со американскиот претседател Доналд Трамп откако рече дека Иран ги понижил Американците во војната.

Мерц нагласи дека неговиот личен однос со Трамп не е нарушен.

– Мојот личен однос со американскиот претседател останува добар како и секогаш. Сè уште сме, да употребиме американски израз, во добри односи – рече Мерц.

Сепак, зад дипломатскиот тон стојат сериозни разлики околу војната во Иран.

Канцеларот предупреди дека Европа плаќа висока цена.

– Во Германија и Европа значително страдаме од последиците од затворањето на Ормускиот Tеснец – рече Мерц.

Растот на цените на енергијата дополнително ја влошува ситуацијата.

Во понеделник, за време на посетата на училиште во западна Германија, тој рече дека Иран ги „понижува“ САД и дека Америка влегла во војната без одржлива стратегија за излез, споредувајќи ја ситуацијата со претходните проблеми во Авганистан и Ирак. Мерц, исто така, се пожали дека конфликтот ѝ штети на германската економија, велејќи дека „ги чини многу пари“.

Американскиот претседател директно го нападна Мерц.

„Тој не знае за што зборувa“, напиша Трамп.

Тој ја критикуваше и германската економија, оценувајќи дека ѝ оди лошо.

Германија одби директно воено вклучување во војната во Иран. Берлин инсистира дека конфликтот не е војна на НАТО и дека е подготвен само на ограничен ангажман кога ќе завршат борбите.

The post МЕРЦ ЈА СМИРУВА ТОПКАТА СО ТРАМП „И покрај тоа сме во добри односи“ appeared first on plusinfo.mk.

Западните земји ги губат своите лидерски позиции и отстапуваат место на нови центри на раст. Вака изјавил рускиот претседател Владимир Путин во видеообраќање до форумот „Отворен дијалог“.

Според рускот лидер глобалниот поредок се менува.

Се рушат старите правила?

– Претходните пристапи и воспоставените норми постепено ја губат силата, вклучително и поради постапките на западните земји – изјави Путин.

Тој додаде дека промените се видливи во сите области.

– Сите елементи на глобалниот раст, од економијата до технологијата, се менуваат неповратно – рече Путин.

Мултиполарен свет, нова рамнотежа

Путин истакнал дека се формира нова, мултиполарна архитектура на глобалниот развој.

– Ниедна земја не може да се развива сама, на сметка на другите. Моделот ќе биде одржлив само ако се базира на еднаквост и меѓусебно почитување.

Форумот „Иднината на светот: Нова платформа за глобален раст“ се одржува од 27 до 29 април.

На него учествуваат претставници од повеќе од 120 земји.

The post ПОРЕДОКОТ СЕ УРИВА, СЛЕДУВА МУЛТИПОЛАРЕН СВЕТ Путин објави крај на доминацијата на Западот appeared first on plusinfo.mk.

Повеќе од кога било на светот му се потребни одговорни лидери, рано предупредување на ризиците, како и превентивна наместо реактивна дипломатија, истакна претседателката Гордана Сиљановска-Давкова во обраќањето на „Панелот на лидери“ на тема „Мапирање на иднината, управување со неизвесностите“, што се одржа во рамките на 5. Дипломатски форум во Анталија.

Говорејќи за глобалните неизвесности, таа предупреди на растечката опасност од авторитарни тенденции и ремилитаризација, како и на сериозната криза на политичкото лидерство, соопшти кабинетот на претседателката.

Според неа, меѓународното право не може да се применува и почитува, без силни и стабилни меѓународни институции. Таа укажа на неодложната потреба од длабока реформа на Обединетите Нации, но и на Европската Унија, со оглед на фактот што обете беа формирани како неопходни мировни проекти, а се соочуваат со војна.

Во врска со Западен Балкан, Сиљановска-Давкова го реафирмира ставот дека евроинтеграциите не се само политичко, туку и безбедносно прашање, а отпорноста на трети страни е возможна само ако сме внатре во ЕУ.

Таа уште еднаш укажа дека спротивно на основните европски начела и принципи, вградени во конститутивните документи на ЕУ, е членството да се условува со преговори за идентитетски прашања, култура, историја и јазик.

На панелот учествуваа претседателот на Казахстан, Касим-Жомарт Токаев, и премиерот на Грузија, Иракли Кобахиѕе. Дискусијата ја модерира Мевлут Чавушоглу, поранешен министер за надворешни работи, пратеник во Големото национално собрание и шеф на турската делегација во ПС на НАТО.

Панелистите ги искажаа своите ставови за клучните глобални предизвици и неизвесности со кои се соочува меѓународната заедница во 2026 година, со фокус на прашањата за геополитичките тензии, економска нестабилност, климатските ризици, технолошките трансформации и безбедносните закани.

Се согласија дека зајакнувањето на мултилатералните институции е неопходно во градењето поефикасен меѓународен систем. Беше истакната важноста на антиципативната дипломатија, активното препознавање и управувањето со новите ризици, како и потребата од современи стратешки рамки што ќе ја поттикнат соработката меѓу државите во справување со заедничките глобални предизвици.

The post 📽️ НА СВЕТОТ МУ ТРЕБААТ ЛИДЕРИ КОИ ЌЕ ПРЕДУПРЕДАТ ЗА РИЗИЦИТЕ Сиљановска Давкова во Анталија повика на реформи во ОН и во ЕУ appeared first on plusinfo.mk.

Претседателот на САД го исмеа Иран велејќи дека никој не сака да биде врховен лидер на таа земја и дека наводно тоа му било понудено нему.

– Никогаш немало лидер кој не си ја сакал работата помалку од оној во Иран.

Потоа следеше иронична порака, која брзо се прошири.

– Велат: Не го сакам ова. Би сакале вие да бидете следниот врховен лидер. Не, ви благодарам, не сакам – изјави Трамп.

Претходно тој изјави лидерите стравуваат од реакција дома и од американски притисок.

– Тие преговараат и многу сакаат договор, но се плашат да го кажат тоа. Мислат дека нивниот народ ќе ги убие. Мислат дека и ние ќе ги убиеме – додаде тој.

Иран јавно ги негира преговорите. Во исто време, Трамп тврди дека има напредок и дека е можен договор. Во меѓувреме изарелскиот премиер Бенјамин Нетанјаху нареди интензивни дводневни напади врз воената инфраструктура на Иран. Според „Њујорк Тајмс“ Нетанјаху се плаши дека Трамп може да склучи примирје и да ја стопира војната со Иран.

Трамп и порано користел сличен стил. Минатата година се пошегува дека би сакал да биде папа. Изјавата дојде по смртта на папата Франциск.

Дополнително, беше објавена и слика со вештачка интелигенција. На неа, Трамп беше прикажан како папа, што предизвика критики.

The post РЕКОА НЕ САКАМЕ, ТИ БИДИ АЈАТОЛАХ Трамп се измајтапи со иранското раководство appeared first on plusinfo.mk.