Руски научници тврдат дека ја развиле првата генетска терапија што може целосно да го искорени вирусот на хепатитис Б – болест која денес бара доживотна терапија.

Лабораторијата за генетски технологии при Универзитетот „Сеченов“, под раководство на Дмитриј Костјушев, објави дека користи модифицирана ЦРИСПР/Цас9 технологија со биокамуфлажа, создадена без вирусни компоненти.

– Користејќи систем на биоразградливи наночестички, првпат успеавме да спакуваме CRISPR/Cas комплекси со ефикасност од речиси 80 проценти – изјави Костјушев за „РИА Новости“.

Тој објаснил дека секоја наночестичка содржи стотици копии на антивирусни комплекси кои целосно ги елиминираат вирусните фрагменти во клетките. По 24 часа, според него, во црниот дроб не остануваат траги од лекот, а клетките не го препознаваат како туѓо тело.

„Нашите системи за испорака се универзални – можат да се користат за корекција на мутации, уништување тумори или сузбивање инфекции“, додал научникот, навестувајќи дека истата технологија би можела да се примени и против рак.

The post РУСКИТЕ ГЕНЕТИЧАРИ РАЗВИЈА ТРЕТМАН ЗА ХЕПАТИТИС Б И МОЖЕН ЛЕК ЗА РАК Наночестичките навлегуваат во 95 проценти од заразените клетки appeared first on plusinfo.mk.

Ново поглавје во медицината го отвори британски тим кој успеа да го запре најагресивниот облик на леукемија кај пациенти за кои повеќе немало спас. Тимот од Универзитетскиот колеџ во Лондон и детската болница „Грејт Ормонд Стрит“ примени метод на прецизно уредување на ДНК, со кој белите крвни клетки се претвораат во жив лек што го уништува ракот.

Тинејџерка ја победи болеста, сега сонува за лабораторија

Шеснаесетгодишната Алисa Тепли од Лестер мислела дека нема да го доживее своето полнолетство. Болеста ѝ ги исцрпела сите можни терапии. Ниту хемотерапијата, ниту трансплантацијата од коскена срцевина не дале резултат.

– Мислев дека ќе умрам и дека никогаш нема да имам можност да правам што прават другите деца – изјави таа.

По експерименталниот третман ѝ бил уништен стариот имунолошки систем, а во телото ѝ биле вбризгани нови, генетски препишани Т-клетки.

Денес ракот не е видлив, а Алисa се подготвува за возачка дозвола и сака да студира биомедицински науки за еден ден самата да помогне во истражувањето на крвните заболувања.

Како функционира „живиот лек“

Истражувачите користеле технологија наречена base editing, со која може да се измени една единствена „буква“ во генетскиот код. Притоа, здравите Т-клетки од донор се препишуваат така што: го губат својот природен механизам за напад врз организмот на пациентот, го отстрануваат протеинот CD7 за да не се самоуништуваат, добиваат „невидливост“ пред одредени хемотерапевтици, се програмираат да ги ловат сите клетки што го носат CD7 – токму оние што го предизвикуваат ракот.

Лекарите опишуваат дека терапијата практично го „демонтира“ целиот имунолошки систем и го рестартира од нула – ризичен процес, но со резултати што до пред неколку години би биле научна фантастика.

Резултати што носат надеж

При првите испитувања спроведени во Лондон биле вклучени единаесет пациенти, меѓу нив осум деца и двајца возрасни со најтешка форма на Т-клеточна акутна лимфобластна леукемија. Деветмина влегле во длабока ремисија и можеле да подлежат на трансплантација. Седум сè уште се без траги од болеста, некои повеќе од три години по третманот.

– Пред неколку години ова ќе звучеше како фантазија. Сега гледаме дека работи – изјави професорот Васим Касим од Универзитетскиот колеџ во Лондон.

Од болницата „Грејт Ормонд Стрит“ додаваат дека пациентите, иако минуваат низ тешки месеци изолација и ризик од инфекции, добиваат вистинска шанса за живот.

Новата граница на медицината?

Резултатите објавени во списанието „New England Journal of Medicine“ се опишани како најсилен доказ досега дека уредувањето на гените може да се користи за лекување на смртоносни болести. Лекарите предупредуваат дека кај неколку пациенти ракот развил отпор со губење на CD7-маркерот, но дека технологијата може да се надгради за да ги препознае и тие варијанти.

Според експертите, оваа метода би можела да се примени и кај други видови рак и наследни болести, чекор што, според многумина, претставува почеток на нова ера во медицината.

The post ЗА ПРВПАТ ГЕНИЈАЛНО УРЕДЕНА ДНК ГО ПОБЕДИ РАКОТ Научниците спасија тинејџерка и отворија нова ера appeared first on plusinfo.mk.

На глуво девојче од Британија му бил вратен слухот по првата светска и револуционерна генетска терапија, објави британски Гардијан.

Опал Сенди (18 месеци), од Оксфордшир, е родена целосно глува поради аудитивна невропатија предизвикана од прекин на нервните импулси кои патуваат од внатрешното уво до мозокот.

Сега, благодарение на генската терапија која се тестира во Велика Британија и ширум светот, слухот на девојчето е речиси нормален и може уште повеќе да се подобри.

Главниот истражувач и хирург, професор Манохар Бенс, изјавил дека резултатите се „подобри одошто се надевал или очекувал“.

– Нашите резултати со девојчето Опал се спектакуларни и многу блиску до враќање на нормалниот слух. Затоа се надеваме дека тоа е потенцијален лек – рекол Бенс.

Аудитивната невропатија може да биде предизвикана од грешка во генот ОТОФ кој е одговорен за создавање на протеин наречен отоферлин. Ова им овозможува на клетките во увото да комуницираат со аудитивниот нерв. За да се надмине грешката, генетската терапија „нова ера“, која ја развива биотехнолошката компанија „Регенерон“, вметнува активна копија од генот во увото.

Во овој случај, детето примило инфузија која содржи активен ген на десното уво за време на операција во септември лани.

The post ГЛУВО ДЕТЕ ПРОСЛУША СО ГЕНЕТСКА ТЕРАПИЈА Револуционерниот лек обележува нова ера во медицината appeared first on plusinfo.mk.