Нашиот пат кон Европската Унија е повеќе од хармонизација на закони – тоа е создавање институции кои работат по европски стандарди, порача премиерот Христијан Мицкоски на настанот по повод генеричките обуки за административни службеници, во организација на Министерството за јавна администрација.

– Денеска сме собрани со исклучително важна цел – да потврдиме дека реформите не се само зборови во програма, туку дела што се гледаат и чувствуваат. Нема модерна држава без модерна администрација. Нема напредна економија без функционален јавен сектор. Нема доверба во институциите без професионални, одговорни и мотивирани службеници. Кога велиме дека инвестицијата во административните службеници е инвестиција во иднината на јавниот сектор, тоа не е само слоган, тоа е нашата визија и обврска пред граѓаните – рече Мицкоски пред присутните.

Јавната администрација, нагласи премиерот, е темелот на државата.

– Таа сте вие – луѓето кои секојдневно го носат товарот на институциите. Вашата работа е лицето на државата, вашиот став е впечатокот кој граѓаните го добиваат за институциите – рече Мицкоски.

Овој прв циклус на генерички обуки, додаде, со 600 учесници од локално и од централно ниво, е јасен сигнал дека оваа Влада не се плаши од промените, туку ги носи.

– Обезбедивме врвни меѓународни обучувачи, современи програми и методологии кои не само што го пренесуваат знаењето, туку ја менуваат и културата на работењето – рече Мицкоски.

До неодам,а нагласи премиерот, јавната администрација беше сведена на политички плен.

– Наместо развој – партизација. Наместо мотивација – страв и реваншизам. Наместо обука – клиентелизам. Претходната влада ја остави администрацијата демотивирана, со нарушена доверба, со луѓе кои се чувствуваа оставени на цедило. Чекавме со години за нормални системи за обука, а резултатите беа стагнација и загубени генерации на службеници, кои немаа пристап до современи знаења – рече Мицкоски.

Тоа време заврши, потенцира тој.

– Денес јавно кажуваме: јавната администрација нема повеќе да биде партиски плен. Ќе биде професионална, ефикасна и ќе работи за граѓаните – додаде премиерот.

Нагласи дека Естонија покажала дека малите земји можат да бидат големи по иновациите, а  Словенија покажала дека администрацијата може да биде мотор на реформите.

– Тоа се приказни кои почнале како што ние почнуваме денес – со луѓе кои решиле да се обучуваат, да се менуваат и да ја менуваат својата земја. Нашиот пат кон Европската Унија е повеќе од хармонизација на закони, тоа е создавање институции кои работат по европски стандарди. Овие обуки се доказ дека не чекаме да ни биде кажано што да правиме. Ние сме генерацијата што ја презема иницијативата и сака да ја донесе Европа дома преку современ јавен сектор – рече премиерот.

Мицкоски упати апел до министрите и градоначалниците.

– Ве повикувам сите министри, директори и градоначалници: продолжете да ги поддржувате ваквите програми. Осигурете се дека секој вработен во вашите институции ќе има пристап до обука, менторство и до можност за професионален развој. Ова не е трошок, ова е најпрофитабилната инвестиција за државата – потенцираше премиерот.

Тој нагласи дека ова е само почеток.

– Верувам дека секој од вас ќе биде амбасадор на промената во својата институција. Ќе ја понесете оваа енергија и ќе ја претворите во резултати што граѓаните ќе ги почувствуваат – истакна Мицкоски.

Рече дека времето на нашата држава е сега.

– Ние сме генерацијата која мора да ја извлече државата од мракот на партизацијата и да ја однесе во светлината на европската иднина. Ве повикувам – учете, прашувајте, дискутирајте. Бидете храбри да воведувате нови практики. Бидете тие кои ќе ја остават администрацијата поефикасна, почесна и посилна од кога било. Заедно ќе создадеме јавен сектор кој нема да биде само апарат на државата, туку двигател на развојот, партнер на граѓаните и гарант на европската иднина на татковината – подвлече премиерот Мицкоски.

The post ЈАВНАТА АДМИНИСТРАЦИЈА ПОВЕЌЕ НЕМА ДА БИДЕ ПАРТИСКИ ПЛЕН Ќе ја извлечеме државата од мракот на партизацијата, порача Мицкоски appeared first on plusinfo.mk.