Инвестициите во Армијата, исполнувањето на НАТО-целите на способности и зацврстувањето на колективната одбрана на Алијансата беа темите на кои денеска во касарната „Илинден“ разговараа министерот за одбрана Владо Мисајловски, началникот на Генералштабот на Армијата, генерал-мајор Сашко Лафчиски и амбасадорот на САД во НАТО, Метју Витакер.

Министерот Мисајловски истакна дека македонскиот одбранбен буџет е во нагорна линија и е согласно предвидениот план на раст, како и дека од него 32,5 проценти се наменети за набавка на нова и модерна опрема.

– Нашата држава е кредибилен сојузник со исклучително високо ниво на инвестиции во процесот на модернизација и опремување. Државата сериозно го надминува НАТО стандардот од 20 проценти за оваа намена – рече Мисајловски.

Тој додаде дека државата е на добар пат да го исполни заеднички договореното ниво од 3,5% од БДП наменети за одбранбениот буџет и 1,5% од БДП за активности и проекти поврзани со одбраната до 2035 година.

Генералот Лафчиски информираше дека во тек е вежбата „Блесок 26“ на која ќе се изврши оценување на Лесната пешадиска баталјонска група. Тој ја истакна поддршката на САД и сојузниците за остварување на оваа НАТО цел на способност.

Во текот на посетата, припадници од Баталјонот на специјални сили и Извидувачко-разузнавачкиот баталјон реализираа методско-показна вежба, на која беа презентирани дел од нивните способности, обученост и подготвеност за извршување сложени мисии.

По вежбата Витакер имаше можност да го обиколи тактичко-техничкиот збор, каде беа изложени дел од средствата, вооружувањето, опремата и возилата со кои располагаат единиците на Армијата.

На настанот присуствуваа: вршителот на должност шеф на Мисијата на Амбасадата на САД, Никол Варнс, генерали во Армијата и претставници од Армијата, Министерството за одбрана и од Амбасадата на САД.

Посетата на амбасадорот на САД во НАТО, Метју Витакер, претставува потврда за силното партнерство и сојузништво меѓу Македонија и Соединетите Американски Држави.

The post 📷 МАКЕДОНИЈА ГО НАДМИНУВА НАТО СТАНДАРДОТ ЗА ВЛОЖУВАЊЕ ВО МОДЕРНА ОПРЕМА Амбасадорот на САД во НАТО ја посети касарната „Илинден“ appeared first on plusinfo.mk.

Во соопштение до јавноста Лога вели:

„Парадоксите во оваа наша држава наречена Северна Македонија стануваат нормални, особено кога мнозинската заедница треба да го направи својот „избор“. Сашко Лафчиски од бригаден генерал „се издигна“ во чин генерал-мајор и беше назначен за шеф на Генералштабот на Армијата од страна на претседателката Гордана Силјановска-Давкова, што предизвика многу реакции во јавноста, особено во армијата. Но, ова брзо поминува бидејќи тој го зазема местото на еден Албанец, кој според професионалните заслуги и законските услови требаше да биде генерал Бесник Емини.

Г-дин Лафчиски не ги исполнува потребните услови за оваа позиција, односно е четири нивоа под стандардите кои се бараат за шеф на Генералштабот.

Не реагираше ни СДСМ, ни ВМРО-ДПМНЕ, ни Левица, ни ЗНАМ, се прашувате зошто?

Еден од главните услови што Лафчиски не ги исполнува е возраста и стажот. Се бара шефот на Генералштабот да има најмалку 6 месеци искуство како командант на Оперативната Команда, а законската регулатива обврзува на чело на Генералштабот да се назначува само оној кој барем 6 месеци бил на чело на Оперативната Команда. Над сè, како бригаден генерал, Лафчиски нема 4 години искуство како што бара законот за да може да биде именуван за генерал-мајор, што автоматски значи шеф на Генералштабот. На Лафчиски му е даден овој чин еден ден пред тој да биде декретиран од претседателката за шеф на Генералштабот. Неговото досие како воен службеник, доверливоста и угледот во армијата оставаат да се посака многу, во неофицијални околности се дознава дека досега не бил опремен ниту со потребниот НАТО сертификат)“.

The post „МУ ГО ЗЕДЕ МЕСТОТО НА ГЕНЕРАЛ АЛБАНЕЦ“ Лафчиски не ги исполнува условите за шеф на Генералштабот, реагира Кренар Лога appeared first on plusinfo.mk.

„Овој празник е потсетување дека нас никој не нѐ ослободувал, туку сами се ослободивме. Македонската држава не е ниту подарена, туку е извојувана и стекната со тешка и праведна народно – ослободителна борба“.

Со овие зборови претседателката Гордана Сиљановска Давкова на свеченост во Охрид го честиташе 18 август, денот на македонската Армија.

– Како претседателка на Републиката, како врховна командантка на вооружените сили, но и како партизанска ќерка, стојам пред вас, горда на вас, наследниците на партизаните. Вие, војниците и офицерите, питомците и ветераните на армијата сте вистинските чувари на наследството – слободната македонска држава, која пред 80 години, на АСНОМ, ни ја оставија нашите храбри предци.

Претседателката зборуваше дека силата на армијата извиера од единството на различностите во македонското општество. Таа исто така потсети дека дел од припадниците во моментот на Армијата во моментот се борат со огнените стихии ширум државата помагајќи им на пожарникарите и на екипите. Таа им се заблагодари и на граѓаните волонетри кои помагаат во гаснењето. Сиљановска Давкова потсети дека вклучувањето на Армијата во гаснење беше пракса и години наназад:

– Повторувам, години наназад, Армијата редовно се ангажираше во  поддршката на институциите во справувањето со елементарните непогоди и со кризните состојби. Секогаш тоа го правеше професионално и пожртвувано. Затоа Армијата, затоа вие, континуирано уживате највисока доверба кај македонските граѓани – вели таа.

На денешниот настан беше и остварено примопредавање на на должноста началник на Генералштабот на Армијата. Сиљановска давкова му честиташе на новиот началник на Генералштабот, генерал-мајор Сашко Лафчиски, а за неговиот претходник Васко Ѓурчиновски изјави:

– Од срце, и со разум, му благодарам на досегашниот началник, генерал-потполковник Васко Ѓурчиновски за успешното лидерство во изминатите години. Нему му припадна задачата да биде началник на Генералштабот во клучен период, кога македонската држава се соочи со бројни ризици, но и успеси како формалното членство во НАТО. Тој активно учествуваше во трансформацијата и модернизацијата на Армијата и успеа да ја продлабочи соработката со нашите сојузници. Јас и понатаму му нудам соработка. Благодарна сум му за стореното и очекувам понатамошни советнички успеси.

Претседателката истакна дека „мора да продолжиме да се залагаме за родова еднаквост и за кариерен напредок во сите области и во Армијата. Конечно, мора да вложуваме во образованието и во обуката на сегашните и на идните воени лидери на македонската армија, но и во нивниот социјален статус“.

Таа рече дека и понатаму ќе учествуваме во мисиите ЕУФОР – АЛТЕА и УНИФИЛ.

Во моментов, над 180 армиски припадници се ангажирани во мировните мисии и операции, под македонското знаме.

На настанот збор зеде и министерот за одбрана Владо Мисајловски. Тој го честиташе празникот, ги пофали војниците за нивниот професинализам во регионалната безбедност на Балканот.

– Во овие кревки времиња од особена важност е билатералната и регионалната соработка, соработката со ЕУ, но од особена важност е соработката со соседите. Во тој контекст, за зајакнување на одбраната на Алијансата на неодамнешниот самит на НАТО, заедно со министрите за одбрана на Италија, Албанија и Бугарија потпишавме Писмо за намери во насока на олеснување на движењето на воените сили на сојузничките земји на Коридорот 8 со цел заштита на источното крило на Алијансата – изјави Мисајловски и додаде:

– Она што ни претстои во нашата работа за одржување на стабилна и безбедна држава, но и за зачувување на мирот во глобални рамки е изработка на нови стратешки документи, нова Стратегија за одбрана, ажурирање на Долгорочниот план за развој на одбранбени способности и на Планот за опремување и модернизација.

Мисајловски рече и дека заложба на оваа Влада е да имаме Буџетот за одбрана, кој ќе одговори на сите побарувањата, Буџет кој ќе продолжи да расне и да ги надминува минималните 2% од БДП, согласно „Заложбата за инвестирање во одбраната” која беше усвоена на минатогодишниот самит на Алијансата во Вилнус.

Тој им се заблагодари и на војниците кои се вклучени во гаснењето на пожарите ширум земјата, а најави многу работа и реформи велејќи дека претходната влада оставила пустош и „илјадници хеткари изгорена земја“.

– И колку да имаме подготвен персонал независно дали се тоа пожарникари, припадници на армијата, доброволци, на кои сум им искрено благодарен за сета нивна борба, тие се немоќни затоа што немаат соодветна опрема и за жал, немаат воздушна поддршка која и тоа како е потребна. Од еден модерен центар кој беше креиран да создава пилоти не само за Армијата туку и за Полицијата за Дирекцијата за заштита и спасување, но и да нагласам, за сојузничките и партнерските земји, денес имаме само хангар со опрема која во моментов не се употребува.  Но, јас од оваа говорница ветувам дека ќе вложам максимален напор овој Центар повторно да го активираме – дециден беше министерот Мисајловски.

The post ДРЖАВАТА НЕ НИ Е ПОДАРЕНА, ТУКУ ИЗВОЈУВАНА СО НАРОДНА БОРБА Вие сте чуварите на наследството од АСНОМ, им порача претседалката на припадниците на Армијата appeared first on plusinfo.mk.

На присутните ќе им се обратат претседателката Гордана Сиљановска Давкова и министерот за одбрана Владо Мисајловски.

„На свеченоста ќе се изврши и церемонија на примопредавање на должност началник на генералштабот на Армијата како и обраќања на досегашниот началник на генералштабот, генерал-потполковник Васко Ѓурчиновски и новопоставениот началник на генералштабот,  генерал-мајор Сашко Лафчиски“, соопштија од Министерството за одбрана.

На свеченоста се поканети премиерот Христијан Мицкоски, министри во Владата, пратеници во Собранието, поранешни министри за одбрана и началници на генералштабот, пензионирани генерали, високи гости од повеќе институции во Републиката, командантот на националната гарда на Вермонт, генерал-мајор Грегори Најт, дипломатскиот кор во Република Северна Македонија…

Одбележување на 18 август – Денот на македонската Армија почна во петокот (16 август) со традиционален свечен собир на вработените во Генералштабот и Министерството на платото пред Министерството за одбрана и Генералштабот, а со воени церемонии празникот се одбележа и во командите и единиците на Армијата во сите касарни во Републиката.

По повод Денот на Армијата синоќа во скопската касарна „Илинден“ беше извршена почесна артилериска стрелба со истрелување на 10 плотуни од артилериски орудија од состав на артилерискиот баталјон на Армијата.

За роденден на Армијата е избран 18 август, денот кога во 1943 година на Славеј Планина бил формиран баталјонот „Мирче Ацев”, кој се смета за првата организирана воена формација на НОВ на Македонија. Процесот за формирање на современата македонска Армија, пак, започна во 1992 година, кога тогашниот претседател Киро Глигоров, со раководството на ЈНА го потпиша договорот за дислокација на федералната армија од територијата на Република Македонија.

Македонската Армија денес е составен дел од најголемиот колективен безбедносен систем откако Република Северна Македонија во март 2020 година стана 30 полноправна членка на НАТО.

Северна Македонија на 11 место во НАТО според процентот од БДП наменет за одбраната

Северна Македонија во државниот Буџет за 2024 година за потребите на одбраната има предвидено 263 милиони долари, што претставува 2,22 отсто од БДП на земјата, се посочува во најновиот извештај на НАТО за одбранбените трошоци на земјите членки.

Согласно дефинициите на НАТО, како трошоци за одбраната се сметаат исплатите направени од страна на националните влади за потребите на своите вооружени сили, на сојузниците или на Алијансата. Во расходите за одбрана, меѓу останатите, се вклучени и трошоците за други сили финансирани преку буџетите на други министерства, покрај оние од Министерството за одбрана, како и средствата директно исплатени од државата за пензии на воените лица и цивилите што биле вработени во воените структури, за мировни и хуманитарни операции, за уништување на оружје, опрема и муниција и за истражување и развој.

Од вкупните трошоци на Северна Македонија за одбраната најголем процент или 43,9 отсто се наменети за плати на воениот персонал, по што следуваат 29,3 проценти за набавка на опрема, истражување и развој, 23 отсто за операции и одржување и други расходи и 3,8 проценти за инфраструктура. Сличен сооднос на распределбата на средствата има кај повеќето членки на НАТО, со исклучок на Португалија, Бугарија, Хрватска и Белгија, каде над 50 проценти од трошоците се наменети за воениот персонал, Полска, Унгарија, Финска и Луксембург каде над 40 отсто се за опрема, истражување и развој и Шведска, САД и Данска кои над 40 отсто од средствата ги предвиделе за операции и одржување.

Во периодот 2014-2024 година, земјава бележи раст на трошоците за одбрана за 148,87 отсто од 106 милиони долари во 2014 на 263 милиони долари годинава. Во 2014 година трошоците за одбрана изнесувале 1,09 отсто од БДП, за сега да достигнат до 2,22 проценти.

Претставничка на САД во Алијансата, Џулијан Смит во интервју за МИА изрази благодарност на Северна Македонија за одвојувањето на два проценти од БДП за одбраната

– Навистина да ѝ се заблагодарам на Северна Македонија. Ова е земја што донесе навистина тешки одлуки за да го достигне прагот од два проценти од БДП за одбраната. Северна Македонија е сега над прагот, над два процента и ги поздравуваме тие напори и сите земји што го направија тоа – нагласи Смит.

Таа најави дека веројатно следната седмица НАТО ќе објави нов извештај за споделување на товарот, кој ќе покаже дека околу две третини од членките на Алијансата сега трошат над два проценти од БДП за одбрана, што според неа, е важно бидејќи значи дека сојузниците можат да ги исполнат своите обврски.

The post АРМИЈАТА ОДБЕЛЕЖУВА 32 ГОДИНИ ПОСТОЕЊЕ Централната свеченост ќе се одржи денеска во Охрид appeared first on plusinfo.mk.